Ítarameme wamá áluahei “ladundehan Bungiu”

1. Kátima san katei hemegeirubei gürigia? (Matéu 5:​3, TNM).

ADÜGA lumutiña Heowá gürigia lun megei hamá katei kei burí: éigini, daüguaü tuma muna lun hawinwandun. Súdini buriti katei le, lugundun anhein ua lubéi katei burí le wama íbini lau murusun dan, lañoundaguba wawaguti. Lanwoun lira, adüga lumutiwa giñe Heowá lun megei wamani lídehan (aliiha huméi Matéu 5:​3, TNM). Anhein busén wabéi lun gunda wamá, lunti wasubudiruni megei wamani Bungiu lúmati lun merederun lan wáluahani.

2. Ka hénpulu íderagubaliwa lun gunfuranda wamani buidu ka lan mini lubéi megei wamani lídehan Bungiu?

² Ka labusenrunbei Hesusu lariñagun dan le layanuhanbei hawagu ha “subudibalin luagu megei hamani ladundehan Bungiu”? Le mini lubéi dimurei le lidan güriegu, mini lan aban gürigia le amuriahabei ídemuei. Lun gayara lan gunfuranda wamani katei le buidu, samina wamá luagu aban wügüri le gudemeti, le huchecheeru ladaüragun ani ñun liña luagu legeyedun üma awandei lárouga wéyuagu luma lidiliga áriebu. Ma lugudemen laríawagun ladüga meigin lan ani mere ligía. Keiti le wuriba lubéi lariawagúniwa aba hadisedun gürigia luéi. Subudi lumuti wügüri le megei lan ídemuei lun labuidurun libagari. Ligiaméme asuseredubei houn ha asubudirubalin megei hamani lídehan Bungiu. Subudi hamuti luagu hiru lan le gádanbaliña ani megei hamá ídemuei lun labuidurun gádantiña. Ligíati busén habéi hasagarun saragu buiti lídangiñe adundehani le líchugubei Heowá houn ha hínsiñehabubaña lun.

3. Kaba wariha lidan aturiahani le?

³ Lidan aturiahani le wayanuhaba furumiñe tuagu würi fenisiana to ayumuraguboun lun Hesusu lun líderagunu. Warihiba arufuda tan würi to ǘrüwa lubuidun igaburi le súdinibei lun harufuduni ha subudibalin megei hamani lídehan Bungiu. Lárigiñe, wakutihabei ǘrüwa hénpulu le híchugubei ǘrüwa wügüriña ha buídubei hamadagua luma Bungiu: apostolu Féduru, apostolu Pábulu luma urúei Dawidi.

ABAN HÉNPULU LÁNINA ǗNABUGUNI, AYUMURAGUNI LUMA AFIÑENI

4. Ka tabusenrunbei würi fenisiana lun ladügüni Hesusu tuagu?

⁴ Luagu aban dan, aba tidin aban würi fenisiana áluahei Hesusu lun tariñaguni lun ‘ragüla lan aban mafia tisaani ani ma lan luriban lóuserunu’ (Mat. 15:​21-28, TNM). Aba tayarafadun lun ani aba táhuduragun ligibugiñe ayumuragueina lun lun líderagunu. Arufudatu würi to igaburi buiti. Ariha wamá fiu lídangiñe.

5. Ka igaburi tarufudubei würi fenisiana ani ka ladügübei Hesusu? (Ariha huméi giñe dibuhu).

⁵ Arufudatu würi fenisiana ǘnabuguni le inarüniti. Ida liña wasubudiruni? Magañiduntu dan le lagoubaguagüdünu Hesusu hama harahüñü ounli, ibiñanigu ha kamanibaña hábiñe gürigia ha mámabaña huríu. Lun hamuga woun lan lariñawagúa ítara, ida luba hamuga wóunabun? Wuribabei hamuga san wasandiragun woungua ani aba hamuga woudin ñéingiñe mamuriahanga ídemuei? Madügün tumuti würi fenisiana katei le. Arufudatu ǘnabuguni. Lanwoun lira, ayumuraguatu saragu wéiyaasu lun Hesusu lun líderagunu. Ka san uagu tayumuragun lun saragu? Ladüga afiñe tan luagu. Kei larihini Hesusu weiri lan tafiñen würi to, aba ladügün aban katei hanarimeti. Íbini ‘hóunrügüñein lan lílana Ísraeli, ha ítarabaña kei mudún ha féridihaña lounahóua’, aba labuguni mafia ligía tuéi tisaani würi tuguya.

6. Ka wafurendeirubei túmagiñe würi fenisiana?

⁶ Lun wibihini lídehan Bungiu lunti ítara wamá kei würi fenisiana. Mosu wasigirun ayumuragua arufuda wagíame ǘnabuguni luma aban afiñeni le derebuguti. Ánheingubeirügü ǘnabugu wabéi, ligíarügüba wayumuragun lun Heowá saragu amuriaha ídemuei. Súdiniti giñe derebugu lan wafiñen luagu Hesusu luma lun wafiñerun hawagu ha layusurubaña lun ladundehaniña lani disipulugu (Mat. 24:​45-47). Dandu Heowá kei Liráü, gúndaatiña lau híchuguni le hemegeirubei ha arufudubalin lubuidun burí igaburi le (ariha huméi giñe Santiagu 1:​5-7). Ariha waméi ida liña lan ladundehaniwa Heowá rulei sun le wemegeirubei woun lun gunda wamá. Lun wasubudiruni katei le, ariha waméi lani Féduru, Pábulu luma Dawidi hénpulu.

ÍTARA WAMÁ KEI FÉDURU: SIGÍ WAMÁ ATURIAHOUN LERERUN BUNGIU

7. Ka lariñagubei Hesusu lun Féduru, ani ka amu katei ladügübei Féduru? (Ebüréu 5:14–6:1).

⁷ Samina wamá luagu le ladügübei apostolu Féduru. Ligía aban hádangiñe furumiñetiña huríu le asubudiruti Hesusu lan Mesíasibei. Subudi lumuti meha Féduru layusuruñein lan Heowá Hesusu lun larufudahan luagu “ibagari magumuchaditi” houn lumutuniña Heowá (Huan 6:​66-68). Lubaragiñe lamudeirun Hesusu sielun, aba lariñagun lun Féduru: “Góunigibañati nánigu” (Huan 21:17). Gúnfuliti apostolu Féduru lau dasi le lau úaraguni darí lun layusuruni Heowá lun labürühan bián gárada to tídanboun Bíbülia. Lau sun lira, mégeiti meha Féduru lun laturiahanu Lererun Bungiu. Kei hénpulu, aturiaha lumutu gárada to labürühaboun apostolu Pábulu lau lídehan Bungiu. Subudi lumuti meha Féduru anihein lan meha burí katei “hénrenguti gunfurandawa lan” tidan gárada burí tuguya (2 Fe. 3:​15, 16). Íbini ítara, mábürühanti meha larüna Féduru ani afiñeti meha líderagubei lan Heowá lun gunfuranda lani katei hénrenguti luma lun lafalaruni le labürüdübei Pábulu tidan ligaradan (aliiha huméi Ebüréu 5:14–6:1).

8. Ka meha ladügübei Féduru dan le libihinbei iseri adundehani lúmagiñe Heowá?

⁸ Arufuda lumuti meha Féduru afiñe lan luagu Heowá lau gaganbadi lan lun adundehani le líchugubei lun. Samina wamá luagu arufudúni le larihibei uburugu Hope. Aba lariñagun lani Bungiu ánheli lun Féduru lun láfarun luma lun leigin fiu animaalu ha wíyetiña según Lilurudun Moisesi. Aban meha katei le maweiyasunbaña huríu adügei! Ligía meha lariñagunbei Féduru lun ánheli ligía: “Uá, Nabureme; méiginñahagidina ni kata le wanügübei kei wíyeti”. Ábayati ladimurehan ánheli ligía lun, aba lariñagun lun: “Le katei le larumadagüdübei Bungiu, mariñagabá luagu wiye lan” (Adü. 10:​9-15). Lárigiñebei larihini Féduru arufudúni ligía, aba hachülürün ǘrüwa lóunagülegu Korunéliu ariñaga lun lun lidin lun Korunéliu. Lubaragiñebei libihini Féduru arufudúni ligía, maweiyasunbei hamuga ebelura lúbiñe aban gürigia le mama huríu, ladüga saminatiña meha huríu mabuidun lan lun lóundaragun aban gürigia hama gürigia ha mámabaña huríu (Adü. 10:​28, 29). Sansi lumuti meha san apostolu Féduru ligaburi larihini katei? Anha, lárigiñebei gunfuranda lani Féduru busén lan Heowá lun haganbuni sun gürigia uganu buiti, aba lasansiruni ligaburi lisaminan (Ari. 4:18). Ligía aba lubéi lapurichihan lun Korunéliu luma houn tílana luban, ariha lumutiña ánhara lun inarüni ani resibi haméi sífiri sandu, badisei hagía (Adü. 10:​44-48).

9. Ka bián katei wibihibei dan le waturiahani arufudahani hénrenguti le tídanbei Bíbülia?

⁹ Ítara kei Féduru, mosu giñe gabügürügua lan waturiahanu Lererun Bungiu. Liibe-agei dan, waliihaba katei le ménrengunti gunfurandawa lan. Súdiniti giñe lun busén wamá waturiahan arufudahani dǘgüdati, lidan amu dimurei, katei le hénrenguti lun gunfurandawa lan. Lun wibihini katei le, mégeiwati dan luma áfaaguni lun gunfuranda wamanu Lererun Bungiu. Lau sun lira, buídubei lun wadügüni lugundun wibihiba saragu buiti. Samina wamá luagu bián katei le wibihibei. Furumiñe, furendeitiwa saragu katei luagu Heowá le adügübei lun línsiñedun woun luma lun inebe lan woun. Libiaman, ínchaha lumutiwa lun wayanuhan luagu Wáguchi Bungiu le siélubei (Rom. 11:33; Aruf. 4:11). Gayaraati giñe wafurendeirun ámuya katei lídangiñe le ladügübei Féduru: kéiburi dan le tadügün lóundarun Heowá somu asansiruni lidan ligaburi gunfuranda wamani somu arufudahani le tídanbei Bíbülia, mosu wánharun lun asansiruni ligía lau lóufudagun. Ítararügüba gayara lan wígirun lun tadundehaniwa lóundarun Heowá luma lun lasigirun Heowá ayusurawa.

ÍTARA WAMÁ KEI PÁBULU: ARUFUDA WAMÉI IGABURI LE AUBEI LAGUNDAARA BUNGIU

10. Según Kolosana 3:​8-10, ka lunbei wadügüni lun wagundaaragüdüni Heowá?

¹⁰ Adundeha lumutiwa giñe Heowá lau larufuduni woun ida luba lan gagaburi wamani burí igaburi le aubei lagundaara (aliiha huméi Kolosana 3:​8-10). Barüti dan luma áfaaguni lun wafurendeirun áyeihei ligaburi Heowá. Samina wamá luagu apostolu Pábulu. Lúmagiñe nibureingili, áfaaguati tídangiñe sun lanigi lun lagundaaragüdüni Bungiu (Gal. 1:14; Fili. 3:​4, 5). Lau sun lira, úati meha gunfuranda lani ida luba lan láhuduragun lun Bungiu kei le aubei lagundaara. Kei hénpulu, ibidiñeti meha lun luáguti larufudahan Kristu. Lanwoun lira, pántati meha Pábulu ani móuserunti kei le aubei lagundaara Heowá, ligía guánarügü meha ariñagubei anabagua lániña kristiánugu (1 Tim. 1:13).

11. Ka asansiruni lunbei meha ladügüni Pábulu?

¹¹ Lubaragiñe meha ladügagun Pábulu lungua kristiánume, gañi gáñiti meha. Ariñagatu Lererun Bungiu weiri lan meha ligañi Pábulu hama lánigu Hesusu, ani “meredeti lasiadiruniña” darí lun busén lan meha láfaraguniña hilagubei (Adü. 9:1). Lárigiñebei ladügagun lungua kristiánume, áfaaguati lun meha lagidaruni igaburi mabuidunti le luágubei (Efe. 4:​22, 31). Íbini laganagua áfaaguni ligía, dan le múaradun lubéi luma Berünawé, aba ñein lan aban lanarime “sigenei haganagua” darí lun lagañidun Pábulu saragu (Adü. 15:​37-39). Lidan kesi le, móuserunti Pábulu kei le aubei lagundaara Heowá. Lau sun lira, mábürühanti larüna ábati lasigirun áfaagua lun gagaburi lani igaburi le aubei lagundaara Heowá (1 Ko. 9:27).

12. Ida liña meha libihin Pábulu lun labuiduragüdüni ligaburi?

¹² Ida liña meha libihin Pábulu lun labuiduragüdüni ligaburi? Míchugun lumuti lafiñen luouguoun (Fili. 4:13). Ítara kei Féduru, afiñeti meha luagu “sun erei le líchugubei Bungiu lun” (1 Fe. 4:11). Íbini ítara, anihein meha burí dan aba lachararun ani adügati le lun lasandirun maguraasuni. Dan meha le lasandiragun lungua ítara, aba burí lasaminarun luagu sun katei buiti le adüga láalibei Heowá luagu ani ábaya libihini erei le lemegeirubei lun lasigirun lubaruaguóun (Rom. 7:​21-25).

13. Ida luba wáyeihani Pábulu?

¹³ Meberesenga anhein barühadiwa lubéi saragu dan eseriwida lun Heowá o málügidiwa lan, sun wagía gayaraati wáyeihani Pábulu. Ida? Lau wáfaagun sagü weyu lun wáyeihani ligaburi Heowá. Le linarün katei, wachararuba. Kei hénpulu, másiñati wagañidun o wadügün o wariñagun somu katei le moun lumuti. Dan le lasuseredun katei le, mama mosu wasaminarun siñabei lan wagundaaragüdüni Heowá. Lubaragiñe lira, sigiméme wamá áfaagua lun wasansiruni ligaburi wasaminan luma ligaburi wóuserun (Rom. 12:​1, 2; Efe. 4:24). Lau sun lira, anihein aban katei le súdiniti lun mabulieidun wamani: anhein busén wabéi lun wabuiduragüdüni wagaburi, mosu wáfaagun lun gunfuranda wamani buidu ka lan lagurabubei Heowá wámagiñe.

ÍTARA WAMÁ KEI DAWIDI: ÍGIRA WAMÁ LUN LÓUNIGIRUNIWA HEOWÁ

14, 15. Ida liña lóunigiruniña Heowá lumutuniña uguñe weyu? (Sálumu 27:5; ariha humóun giñe iyawaü).

¹⁴ Lun gunda wamá le tímatimaati, mégeitiwa lun lóunigiruniwa Heowá. Ida liña lóunigiruniwa Heowá ani ka lunbei wadügüni lun wígirun lun lóunigiruniwa?

¹⁵ Subudi lumuti meha urúei Dawidi ladouraguba lan Heowá lau lidan dan hénrenguti (aliiha huméi Sálumu 27:5). Ida liñati lóunigiruniña Heowá lumutuniña uguñe weyu? Góunigi lumutiña luéi furumiñeguarügü katei le gayaraabei ladügün lun heferidiruni hafiñen luagu. Füramaseti úaboun lan ni aban árüma lun tagünrinchaguniña (Sal. 34:7; Isa. 54:17). Lau sun gabafu lan dandu Satanási kei máfianu hama gürigia ha éibaahabaliwa, gabafutimati Heowá hawéi. Íbini hadügün lun weferidiruni wabagari láguyuguagüdübadiwa Heowá (1 Ko. 15:​55-57; Aruf. 21:​3, 4). Lanwoun lira, góunigi lumutiwa giñe Heowá dan le nidiheri wamá lun gayaraabei lan wasigirun eseriwida lun (Ari. 12:25; Mat. 6:​27-29). Kei le hínsiñe wabéi lun saragu, yusu lumutiña wábirigu lun híderaguniwa, ani yusu lumutiña giñe wéiyaaña lidan afiñeni lun hóunigiruniwa (Isa. 32:​1, 2). Ani lidan adamuridaguni, furendeitiwa amu igaburi le ídanbei wígira lun lóunigiruniwa luma líderaguniwa Heowá (Ebü. 10:​24, 25).

16. Ida liña lóunigiruni Heowá urúei Dawidi?

¹⁶ Dan meha le gaganbadi lubéi Dawidi lun Heowá, íderagua lumuti meha Heowá lun buidu lan le lunbei ladügüni, adügati katei le lun buidu lan lasandiragun Dawidi lungua, ítara liñati lóunigiruni Heowá (ariha huméi giñe Ariñawagúni 5:​1, 2). Dan meha le maganbadi lan Dawidi lun Heowá, súfuriti meha ladüga luriban lanúadirun, ani mesefurun lumuti Heowá Dawidi lídangiñe le lanügübei luriban lanúadirun (2 Sam. 12:​9, 10). Kati ladügübei Dawidi dan le wuriba lubéi hóuseruni amu? Aba ladaarunu lanigi lun Heowá lidan furíei ani góunigi lumuti Heowá lau líchugun gurasu lun luma lau lachoururagüdüni lun weiri lan línsiñe lun ani lóunigirubei lan (Sal. 23:​1-6).

17. Ida luba wáyeihani Dawidi?

¹⁷ Áyeiha wamuti Dawidi dan le wáluahani lídehan Heowá dan le lunti lan wanúadirun kaba lan wadüga. Gabaroun wamuti giñe ánhawa lan anúadira wuriba mesefu lubadiwa lan Heowá lídangiñe wuribani le lanügübei le wanúadirubei (Gal. 6:​7, 8). Ani dan le wasufurirun hadüga amu, dará wamutu wanigi lun Heowá lidan furíei afiñeñu lóunigiruboun lan wanigi luma wasaminan (Fili. 4:​6, 7).

SIGIMÉME WAMÁ ARABACHA LUAGUN HEOWÁ LUN LADUNDEHANIWA

18. Ka hasaminarubei saragu gürigia luagu láluahoun ladundehan Bungiu ani ka lunbei wadügüni anhein busén wabéi lun lasigirun Heowá adundehawa? (Ariha humóun giñe iyawaü).

¹⁸ Ariñagati bérusu lánina irumu 2026: “Gúndaatiña ha subudibalin luagu megei hamani ladundehan Bungiu”. Ani súdiniti lun wafalaruni adundehani le uguñe weyu. Wawinwanduña geyegua hau gürigia magundantiña ladüga hamahadun lun háluahani ladundehan Bungiu, ani geyegu waña giñe hau gürigia ha áfaagubaña lun gunda hamá lau háhuduragun lun Bungiu kei le aubei habusenra o lau háluahani hadundehan amu lubaragiñe hamuga háluahani ladundehan Bungiu. Maweiyasun wamá ígira lun labadülerun luriban igaburi le wawagu. Ligíati, sigiméme wamá áluahei ladundehan Heowá, lau waturiahanu Lererun, lau gagaburi wamani igaburi le aubei lagundaara luma lau wígirun lun lóunigiruniwa.