Líderagubadün Heowá danme le hiru humá o maguraasun humá

1, 2. Ida liña meha lasandiragun apostolu Pábulu lungua, ani ida liña líderaguniwa lani hénpulu? (Rómana 7:​21-24).

KA ÑǗBUINBEI lidoun hisaminan dan le hasaminarun luagu apostolu Pábulu? Háfuga aba lan harihini kei aban misionéru le ganigiti, aban máisturu le garufudahaditi, o kei aban wügüri le abürühabei saragu gárada to tídanboun Bíbülia. Ani ítara liña, adüga lumuti Pábulu sun burí katei le. Lau sun lira, anihein meha giñe dan sandigua lan lungua lau íruni, maguraasuni luma lau idiheri. Ítara kei wagía, anihein meha dan lageindagun luma luriban saminaü.

² (Aliiha huméi Rómana 7:​21-24). Tidan gárada to labürühaboun Pábulu houn rómana, ayanuhati luagu ligaburi lasandiragun lungua. Ani másiñati giñe sandiguañahaadiwa lan woungua ítara. Lau sun meha aban lan kristiánu le úaraguati Pábulu áfaagua ligía lun gaganbadi lan lun Bungiu, anihein meha dan hénrengu lan lun lun ladügüni lugundan Bungiu. Anihein meha giñe dan wuriba lan lasandiragun lungua dan le lasaminarun luagu le adüga láalibei. Ani híruti meha giñe lasandiragun lungua ladüga lagagibudaguña meha luma aban turobuli ani siñati meha lasansiruni le gádanbalin.

3. Kaba wariha lidan aturiahani le? (Ariha huméi giñe “Ariñahani súdiniti”).

³ Lau sun meha anihein lan dan gagibugua lan Pábulu luma sügǘ burí le, áfaaguati lun masaminarun lan saragu luagu. Lidan aturiahani le wafurendeiruba ka lan uagu lariñaga Pábulu “fugiabu au” lúmati ka lan ladügübei lun mígiraguagüdün lan lungua lun luriban saminaü.a Wafurendeiruba giñe ka lan gayaraabei wadügüni lun wáyeihani.

KATEI BURÍ LE ADÜGÜBEI LUN WURIBA LAN MEHA LASANDIRAGUN PÁBULU LUNGUA

4. Ka burí katei adügübei lun wuriba lan lasandiragun Pábulu lungua?

⁴ Katei wuribati le meha ladügübei luagu aban dan. Lubaragiñe meha ladügagun lungua kristiánume, adügati meha Pábulu, le subudiwabei kei Saulu, katei wuribati le uágubei lasaküriha dan lárigiñe. Kei hénpulu, dan le lafarúnbei Esütéban hilagubei, saminati meha Saulu buidu lan le hadügübei (Adü. 7:58; 8:1). Ani éibaaha lumutiña giñe saragu kristiánugu lau furundei (Adü. 8:3; 26:​9-11).

5. Ida liña meha lasandiragun Pábulu lungua dan le laritagun luagu katei wuribati le meha ladügübei luagu aban dan?

⁵ Lárigiñebei ladügagun Pábulu lungua kristiánume, anihein meha dan sandigua lan lungua lau duru dan le laritagun luagu le meha ladügübei. Ani lau lásügürün dan, másiñati wuribatima lan lasandiragun lungua. Kei hénpulu, tidan furumiñetu ligaradan houn kristiánugu korintuna, kei burí lidan irumu 55, abürühati: “Madünatina ni lun nanügǘn keisi apostolu, lugundun éibaaha numutiña meha tílana liligilisin Bungiu” (1 Ko. 15:9). Kei burí seingü irumu lárigiñe, ariñagati tidan ligaradan houn éfesuna: “Ǘnabutimatina sügǘ lau le ǘnabutimabei hadan lánigu Bungiu” (Efe. 3:8). Ani tidan aban tídangiñe gárada to labürühaboun lun Timotéu, ariñagati ñein lubaragiñe lan meha ladügagun lungua kristiánume, anabagua lániña, éibaaha laaña giñe kristiánugu (1 Tim. 1:13). Samina wamá ida liña lan meha lasandiragua apostolu Pábulu lungua dan meha le lidin bisidaña lílana damuriguaü luma dan le ladunragun hama kristiánugu ha meha léibaahabaña o hama haduheñu ha léibaahabaña.

6. Ka amu katei adügübei lun lasufurirun Pábulu? (Ariha huméi giñe abürüdǘni).

⁶ Anihein meha aban turobuli luagu Pábulu le adügübei lun lasufurirun. Abürühati Pábulu adüga lan meha turobuli le lun ladiheridun saragu ani ariñagati ítara liña lan “kamá hamuga aban hiiyu charuñu [l]uagu” (2 Ko. 12:7). Mariñagun lumuti ka lan katei adügübei lun lasufurirun, másiñati aban lan sandi o amu lan katei adügübei lun lasufurirun saragu.b

7. Ka meha uagu hénrengu lubéi lun Pábulu ladügüni le buídubei? (Rómana 7:​18, 19).

⁷ Lichara. Ageindaguati meha Pábulu luma figóu le luágubei (aliiha huméi Rómana 7:​18, 19). Lau sun busén lan Pábulu ladügüni le buídubei, siñá lumuti meha adüga. Áfaaguati lun labuiduragüdüni ligaburi, lau sun lira, subudi lumuti meha mosu lan ladügüni áfaaguni le súnwandan (1 Ko. 9:27). Lau sun lira, charati meha. Samina wamá luriban lasandiragun lungua dan le lariñagun o ladügün somu katei le uágubei áfaaguaali lan lun labuiduragüdüni.

KA ÍDERAGUBALIN PÁBULU AGAGIBUDAGUA LUMA LURIBAN SAMINAÜ

8. Ka katei ladügübei Pábulu le íderagubalin lun labuiduragüdüni ligaburi?

⁸ Kei warihin tidan ligaradan Pábulu, ráramaguati asaminara ida luba lan líderaguniña lani Bungiu sífiri, dandu ligía kei amu kristiánugu, lun hageindagun luma luriban ayumahani lúmati lun habuiduragüdüni hagaburi (Rom. 8:13; Gal. 5:​16, 17). Ayanuhati saragu wéiyaasu luagu luriban ayumahani luma luriban échuni le lunbei hadisedun kristiánugu luéi lun hagundaaragüdüni Heowá (Gal. 5:​19-21, 26). Chóuruti ráramagua lan asaminara luagu lichara, áluahati giñe adundehani tidan Lererun Bungiu, samina ligía luagu katei le lunbei ladügüni lun ladügüni asansiruni le lemegeirubei. Chouru wamuti luagu falá lani lidan libagari adundehani leha líchugubei houn amu.

9, 10. Ka íderagubalin Pábulu lun mígiraguagüdün lan lungua lun luriban saminaü? (Éfesuna 1:7; ariha huméi giñe dibuhu).

⁹ Íbini anihein lan meha dan féridi lani Pábulu liguraasun, anihein meha saragu katei le íderagubalin lun meferidirun lani lugundan. Kei hénpulu, wéiriti meha lugundan luagu katei buiti le hayanuhabei lupaanágu lun hawagu íbirigu ha lílana damuriguaü (2 Ko. 7:​6, 7). Wéiriti meha giñe lugundan lau gamadagua lan hama gürigia buítiña (2 Tim. 1:4). Gúndaati meha giñe lasubudiruni gunda lan Heowá lau ani gayara lan leseriwidun lun ‘lau taruman lanigi’ (2 Tim. 1:3). Íbini meha dan le ladaürǘña lubéi Roma, ariñagati houn kristiánugu: “Gunda humá súnwandan, ladüga lídanñadün aban luma Wabureme” (Fili. 4:4). Ma mariñagun lubéi hamuga aban gürigia le laubei luriban saminaü dimurei le? Dan meha le liabin saminaü wuribati lichügüwagun, lau lóufudagun, aba lasansiruni saminaü wuribati ligía luagu saminaü buiti.

¹⁰ Ábaya katei le íderagubalin Pábulu lun mígiraguagüdün lan lungua lun luriban saminaü, lau lararamagun asaminara luagu lebegi esefuruni luma lau larihini kei aban idewesei le líchugubei Heowá lun (Gal. 2:20; aliiha huméi Éfesuna 1:7).Ítara liña lachoururuni seremei lan lounwen Hesusu, feruduna laali lan Heowá lifigoun ani lasigiramémeba lan Heowá íchiga ferudun lun (Rom. 7:​24, 25). Lau sun meha adüga lan katei wuribati luagu aban dan ani chará ligía, gayaraati meha leseriwidun Pábulu lun Bungiu lau ugundani (Ebü. 9:​12-14).

11. Ka uagu ru lubéi lani Pábulu hénpulu gurasu woun?

¹¹ Ítara kei Pábulu, háfuga giñe sandí wamá mosu lan wáfaagun saragu lun masaminarun wamá, lun madügün wamá luma lun mariñagun wamá somu katei le aubei magundan lan Heowá. Ani másiñati aba lan wariñagun: “Fugiabu au!”. Ariñagatu aban íbiri kei burí lóugiñe wein irumu tau gíritu Eliza:c “Sanditina gurasu dan le nasaminarun luagu lani Pábulu hénpulu. Aba narihini nungua mámarügüñadina lan nuguya asandiragua nungua ítara. Ligía ábaya katei le adügübei lun mabulieidun nani subudi lani Heowá lénrengunga le hásügürübei lubúeingu”. Guentó, ariha waméi ka lan gayaraabei wadügüni lun weseriwidun lun Heowá lau aban saminaü le harumati luma lun meferidirun wamani wagundan ítara kei Pábulu, lau sun wageindaguña lan luma saminaü wuribati.

KA GAYARAABEI WADÜGÜNI LUN WASIGIRUN AGEINDAGUA LUMA LURIBAN SAMINAÜ

12. Ida liña líderaguniwa bereseguñu wamá lidan weseriwidun lun Heowá lun mígiraguagüdün wamá woungua lun luriban saminaü?

¹² Lau bereseguñu wamá lidan weseriwidun lun Heowá. Líderagubadiwa wadügüni katei le lun wetenirun lun dasi le wadügübei lidan weseriwidun lun Heowá. Kei hénpulu, dan le weigin buidu gabügürügua ligía wadügün ehersísiu, emeraagua wagía buidu, liibe-agei dan buiti wasandiragun woungua. Ligiaméme asuseredubei dan le wetenirun lun wamadagua luma Heowá. Dan le waliihanu Bíbülia sagü weyu, furí wagía apurichiha, aranse wagía lubá adamuridaguni, ñüdün wagía lidoun, ru wagía óunabagülei lidan, buiti giñe wasandiragun woungua. Ánhawa akipuragua woungua bereseguñu lidan weseriwidun lun Bungiu, ménrenguntimabei woun lun mígiraguagüdün wamá woungua lun luriban saminaü (Rom. 12:​11, 12).

13, 14. Ida liña hasandiragun saragu íbirigu houngua lau bereseguñu hamá lidan heseriwidun lun Heowá?

¹³ Ariha waméi le asuseredubei lun Huan, le uágubei ladarirúa aban luwuyeri kánserü le úati kamani lan dan meha le darandi-nefu lubéi irumu lau. Furumiñe, aba meha liábingua luriban saminaü lichügüwagun. Ariñagati: “Wéiritu nanigi lau ladagarun sandi le nuagu lau nibureingidina lan”. Ani lidan meha dan ligía, ǘrüwarügügili meha irumu lau lisaani. Ka íderagubalin lun mígiraguagüdün lan lungua lun luriban saminaü? Ariñagati: “Lau sun meha weiri lan lubucha nuagu, áfaaguatinaha lun bereseguñu wamá lidan weseriwidun lun Bungiu. Lau sun meha anihein lan dan hénrengu lan woun, súnwandan meha woudin adamuridagua, apurichiha, adüga waméi áhuduraguni lun Bungiu kei iduheñu”. Ariñagati giñe: “Lárigiñe wánharun lun ñunsu le, adügati erei luma ínsiñeni le larufudubei Heowá woun lun lagidarun luriban saminaü. Ninarün hau, gayaraati líchugun Heowá erei woun”.

¹⁴ Ariñagatu Eliza, to uáguboun layanuhóua lidan párafu 11: “Sagü nidin adamuridagua adüganéi naturiahan nábuguarügü, ábatima nachoururuni aganba lánina Heowá hínsiñe nuguya lun, ani adügati lira lun nagundaarun saragu”. Ariñaga lumuti Nolan, aban óunigiruti sirkuitu le eseriwidubei Áfürika, ka lan íderagubalin ligía tuma lani weiriou to gíriboun Diane: “Áfaaguatiwa lun bereseguñu wamá lidan weseriwidun lun Heowá, íbini dan le maguraasun wamá. Súnwandan larufuduni Heowá woun líderaguñadiwa lan lun warihini katei lau aban lubuidun igaburi. Ani áfaaguatiwa lun mabulieidun wamani líderagubadiwa lan Heowá biní láwame. Ibidiñeti woun ida luba lan ladügüni, lau sun lira, chouru wamuti líderagubadiwa lan”.

15. Ru humá aban hénpulu lun hafuranguagüdüni ka lan amu katei gayaraabei wadügüni lun mígiraguagüdün wamá woungua lun luriban saminaü.

¹⁵ Anhein awanhagua lubéi asandira íruni o maguraasuni, háfuga úabei buídurügü lan lun wafalaruni sun le ariha wamaalibei darí guentó. Másiñati mosu lan giñe wadügün ámuya katei. Ru wamá aban hénpulu. Samina wamá gáriga lan wanagan. Másiñati líderagubadiwa lan wéibugun murusunraü sagü weyu lun lararirun gáriti, lau sun lira, lun gayaraabei lan lagidarun gáriti, háfuga mosu lan wadügün ámuya katei, kei burí wáluahan ariñahani luagu le gádanbaliwa, o woudin áluaha surusia. Ítarameme, lun mígiraguagüdün wamá woungua lun luriban saminaü, másiñati mosu lan wáluahan ariñahani tidan Bíbülia, tidan wani agumeiraguagüdüni o wáluahan ídemuei luma aban íbiri le derebuguti lafiñen. Ariha wamá ka lan amu katei gayaraabei wadügüni.

16. Ka katei gayaraabei líderagunün asubudirei kátima lan adügübei lun hadiheridun? (Sálumu 139:​1-4, 23, 24).

¹⁶ Wamuriahan luma Heowá lun líderaguniwa asubudirei le wemegeirubei. Subuditi meha lun urúei Dawidi subudi lani Heowá buidu, ligía lamuriahanbei luma Heowá lun líderaguni asubudirei ka lan burí katei adügübei lun ladiheridun (aliiha huméi Sálumu 139:​1-4, 23, 24). Gayaraati giñe wamuriahan luma Heowá lun líderaguniwa asubudirei ka lan uagu liábingua íruni o idiheri wachügüwagun lúmati ida luba lan wagidaruni wawariua. Buiti giñe lun wadügün álügüdahani kei burí le: “Kátima san áhüchüragüdübalina? Anihein san somu katei le adügübei lun nadiheridun súnwandan? Rédeitina san abouchaguei nichügü lau burí saminaü le lubaragiñe hamuga nadisedagüdüni nuáriua?”.

17. Ka burí ariñahani gayaraabei waturiahan le gayaraabei líderaguniwa asaminara luagu katei le ruti gurasu? (Ariha humóun giñe iyawaü).

¹⁷ Lau waturiahan ariñahani según le wemegeirubei. Buídubei wadüga ánhawa akutiha ariñahani le ayanuhati luagu ligaburi Heowá. Kei hénpulu, aban katei le íderagubalin apostolu Pábulu, lararamagun asaminara luagu lebegi esefuruni luma luagu gíchigadi lan Heowá ferudun. Gayaraati funa san wadügüni ligiaméme? Lidan garifuna, daritiwa burí agumeiraguagüdüni kei burí Adundehani lun haturiahan gefentiña luagu Heowá o amu burí agumeiraguagüdüni to gayaraaboun tíderaguniwa akutiha luagu lugudemehabu Bungiu, líchigadi ferudun luma luagu ínsiñeni magumuchaditi le larufudubei. Adüga wamá aban lísüta lau burí ariñahani le gayaraabei lahuudun woun kipu wameime ariñahani ligía yarafa ani aturiaha wameime danme burí le liábingua íruni o idiheri woun. Áfaagua wamá lun wafalaruni le waturiahabei lidan wabagari (Fili. 4:8).

18. Ka burí ariñahani aturiaha hamaalibei fiu íbirigu?

¹⁸ Adügatu Eliza to buga uáguboun wayanuha, aransehani lun taturiahan luagu libagari Hobu. Ariñagatu: “Genegeguati násügürün luma le lásügürübei Hobu. Gagibuguati luma saragu lénrengunga. Ani lau sun meha ibidiñe lan lun ka lan uagu lasufurira, súnwandan meha lárügüdün luagu Heowá, íbini lidan dan létima hénrengutimabei lun” (Hob. 42:​1-6). Ariñagatu Diane, to uáguboun wayanuha lidan párafu 14: “Dandu nuguya kei nani weiriei waturiahañoun líburu Acerquémonos a Jehová. Wéiriti weteingiruni Heowá lau líderaguniwa abuiduragüdei wagaburi. Ítara waña lúhaburugu kei múa lúhaburugu nadagimeinti múa. Dan le wasandirun lábürühan lan warüna ladüga wachara, áfaaguatiwa lun wadiraaruni Heowá arufudaha woun luma íderaguawa abuiduragüdei wagaburi ani adügati katei le lúntima wayarafadun lun” (Isa. 64:8).

CHOURU WAMÉI LÍDERAGUBADIWA LAN HEOWÁ BINÍ LÁWAME

19. Ida luba gayara lan wasandiragun woungua lidan somu dan ani ka katei gayaraabei wachoururuni?

¹⁹ Íbini ánhawa akipuragua woungua bereseguñu lidan weseriwidun lun Heowá, aturiaha wagía wábuguarügü, ñeinbei dan le ídanbei wasandiragua woungua lau maguraasuni o lau íruni ítara kei Pábulu. Lau sun lira, lau lídehan Heowá mígiraguagüdünbadiwa woungua lun saminaü mabuidunti burí le. Gayaraati wachoururuni liibe-agei dan buídubei lan wasandiragun woungua ladüga gamadagua wamá luma Heowá ani gayaraati weseriwidun lun lau aban laruman saminaü.

20. Ka aranseñu wabéi lun wasigirun adüga?

²⁰ Sigí wamá adügei sun wayaraati lun magañeirun lániwa luriban saminaü luagu burí katei wuribati le wadügübei luagu aban dan, waturobulin o wachara guánarügü. Líderagubadiwa Heowá lau líchugun ñuruguaü tun wanigi (Sal. 143:10). Ani wayumahaña lun lachülürün weyu lun labulieidúniwa sun le úmabei wageindagua uguñe weyu. Lídanme iseri ubóu, ságüme wásaarun binaafin masandibadiwa ni murusun idiheri o íruni, lubaragiñe lira, gúndaabadiwa eseriwida lun Wabungiute Heowá, le hínsiñehabubei!