Dirá huméi hichügüwagun abahüdaguni le tídanbei Bíbülia

Anihein saragu abahüdaguni tidan Bíbülia luagu le sügühalibei le arufudahabei katei súdiniti woun. Líderagubadiwa wadiraaruni lidan wachügü le waliihabei lúntima gunfuranda wamani buidu luma lun wasagarun saragu buiti lídangiñe le waliihabei. Ariha wamá fiu adundehani le adügübei kamá hamuga warihiñein abahüdaguni le tídanbei Bíbülia.

• Waliihan lau umalali héreti. Anhein wadüga ítara, ménrenguntimabei woun wadiraaruni lidan wachügü le asuseredubei. Anhein waliihaña lubéi somu abahüdaguni tídangiñeti Bíbülia úara hama waduheñu, wasagaratimaba saragu buiti anhein aliiha kada aban hádangiñe le hariñagubei kada aban hádangiñe gürigia le áfuachubei lidan abahüdaguni ligía.

• Wararamagun asaminara luagu le hásügürübei gürigia ha uágubaña tabahüdaha Bíbülia dan le hásügürün lídangiñe ítaga sügǘ. Houcha humá híchaagun hungua lidan halugaarun ha uágubaña labahüdawagúa lun gunfuranda humani le hasaminarubei luma le hasandirubei. Gayaraati wálügüdagun woungua: “Ka uagu lariñagei gürigia katei le, o lóusera lidan ítaga igaburi? Kaba hamuga nariñaga lun hamuga nun lan lasusereda le asuseredubei lun? Ida liña hamuga nasandiragun nungua?”.

• Wadibuhan. Íbini madibuhadi wamá, ánhawa áfaagua lun wadibuhan, líderagubadiwa lun wadiraaruni abahüdaguni lidan wachügü luma lun waritaguni buidu.