Anton Petrus/Moment via Getty Images
AGAGUDÚAÑU HUMÁ!
Le san lúgubu ñeinbei lan aban wuribu wéiriti lidan sun ubóu? | Ka tariñagubei Bíbülia?
Lidan 30 irumu le sügühalibei, arihatiña saragu gürigia luagu buidu lan léibugun katei ani abuidureina liña lan hanaagun néchanigu hámagua ubouagu. Lau sun lira, arufudati le asuseredubei ubouagu uguñe weyu lun hasaminarun mítaran lan, kei larufuduni ñunsu burí le:
“Nidiheritiña saragu gürigia luagu le gayaraabei lanügüni awuribuhani le Gasabei lun burí ageiraü le geyegubei lau, lau gumeseeli lan Ísüraeli ageindagua luma Hezbolá lidan fadaguaü le Líwanubei” (Reuters, 6 lidan eneru, irumu 2024).
“Gumeseeli sétanu le lábugiñebei laríaahan Irán aduuragua lidan ámuñegueinarügü fulasu ani gumeseyaaña giñe lílana Irán adaagua bonba nuclear. Lanwoun lira, reiti guentó óundaragua giñe Rusia, China lumoun Irán. Adügati le lun hasandiragun lílana ageiraü ha luéigiñebaña oubaü le ñéingiñe lubéi lálüda weyu houngua lau machouruni” (The New York Times, 7 lidan eneru, irumu 2024).
“Anihamémegua Rusia adüga saragu damichi lun Ukrania” (UN News, 11 lidan eneru, irumu 2024).
“Lau aganwoundeina lan lirisin luma lubafu China lun lawuribuhan, luma pantaü le luágubei Taiwán, lúmati manaagun lan China lungua buidu luma Meriga, adügati katei le lun ménrengubei lan lun laduurun wuribu haganagua” (The Japan Times, 9 lidan eneru, irumu 2024).
Ariñagatu san Bíbülia somu katei luagu le gádanbalin ubóu uguñe weyu? Ñeinbei san aban wuribu wéiriti lidan sun ubóu?
Ariñaga tumuti Bíbülia le asuseredubei uguñe weyu
Mariñaguntu Bíbülia ni kata luagu ídatima luba lan awuribuhani uguñe weyu. Lau sun lira, ayanuhatu Bíbülia luagu awuribuhani hanarimeburiti le amakürübalin dan le ídanbei wawinwanda, le agidarubalin “darangilaü ubouagugiñe”(Arufudúni 6:4).
Ariñagatu meha liliburun Danieli lidan aban profesía “danme [lan] lachülürün leben dan”, hageindaguba lan ageiraü burí ha gabafutimabaña hámagua luagu ubafu. Ani ladügüba lan awuribuhani le lun harufudagun houngua lau gabafu hamá ani ladügüba giñe lun hagastarun saragu seinsu, “golu luma pülata”, luma burí amu irisini (Danieli 11:40, 42, 43).
Chülümémeeli aban wuribu
Ariñagatu Bíbülia lubaragiñe lan labuidurun katei, laribadatimaba lan. Ariñagati meha Hesusu: “Ladüga ñeinbei saragu asufuriruni le úagili libe lúmagiñe lagumeserun ubóu, úabei giñe lárigiñe” (Matéu 24:21). Lagumuchuba “saragu asufuriruni” le lidan aban wuribu le gíribei Arümahedón, “wuribu le lánina óunwenbu luéyuri Bungiu le Suntigabafu” (Arufudúni 16:14, 16).
Lau sun lira, magumuchunbei Arümahedón hau gürigia, séfurügü lubaña. Layusurubei Bungiu wuribu le lun lagumuchun lau harúeihan gürigia, ha adügaañabaña saragu damichi ubouagu. Lun hasubudiruni ida luba lan lanügün Arümahedón darangilaü lun súnwandan, aliiha huméi ariñahani burí le: