Ítara kei Féduru, wabaruaguóun wamá

1. Ida liña lasandiragun Féduru lungua dan le larihinbalin milaguru le ladügübei Hesusu lau hañugun saragu úduraü?

LAWADIGIMARIDUÑA meha Féduru sun áriebu ani mañugungili meha ni kata. Ábati lariñagun Hesusu lun: “Héibameme anagü, ábame hágurunu hisenin ñein” (Luk. 5:4). Íbini mafiñen lan Féduru lañuguba lan, adüga lumuti le lariñagubei Hesusu. Aba hañugun saragu úduraü darí lun tagumeserun hasenin aheiridagua. Dan le líchugunbei fe aban lan milaguru le asuseredubei, aba “taweiridun lanigi” Féduru, hau sun ha úarabaña luma. Ábati lariñagun Féduru: “Disebá nuéi, Nabureme, ladüga aban wügüri gafigounti au” (Luk. 5:​6-9). Ábati lasandirun Féduru madüna lan nírügü lun lerederun lurugabu Hesusu.

2. Ida liña líderaguniwa wakutihani lani Féduru hénpulu?

² Linarün meha Féduru: ladüga aban lan meha “wügüri gafigounti” ligía. Ariñagatu Bíbülia anihein lan dan ariñaga lan ani adüga ligía katei le adügübei lun lasakürihan lárigiñe. Sandiguatün san hungua ítara kei lasandiragun Féduru lungua? Lǘhadün san áfaagua lun hígirun aban luriban igaburi o échuni? Lidan kesi le mábürüha lan harüna. Gayaraati líderagunün lani Féduru hénpulu. Samina humá luagu le: Gayaraati hamuga ladügün Bungiu lun mabürüdün lan tidan Bíbülia sun charati burí le ladügübei apostolu le. Gama lumoun, aba ladügün Bungiu lun labürüdǘniwa lun gayara lan wafurendeirun saragu katei buíduburiti lídangiñe (2 Tim. 3:​16, 17). Dan le wakutihani abahüdaguni luáguti Féduru aban wügüri le charati saragu ani aban wügüri kei wagía, arihatiwa magurabun lan Heowá lun macharabadiwa lan. Le labusenrunbei lun wawandun, ani sigí wagíame áfaagua íbini débili wamá.

3. Ka uagu megei wabéi lun wawandun?

³ Ka uagu mégeiwa lubéi lun wawandun? Kei lariñaguni aban ariñawagúni, “Líluagu gürigia adüga aban wadagimanu ábatima buídutima lan ladügüni”. Ru wama aban hénpulu. Dan le busén lan aban gürigia lafurendeirun áfara gidara buidu, másiñati lanügün saragu irumu lun gayara lan lafurendeirun. Lidan burí sun dan le laubei afurendeira gayaraabei máfaradibei lan tun buidu. Gama lumoun, lau lasayahan gayaraati abuidureina lanme láfarun. Íbini lafurendeirun áfaroun buidu aniheinbei dan láchararuba. Madügünbei katei lira lun lábürühan larüna. Lasigiruba asayaha. Ligiaméme asuseredubei lidan wakesin. Íbini wasaminarun ígira wamá lan aban luriban échuni, ábanya burí wábürühan. Ligía lubeiti, áfaaguatiwa lun lun gayara lan wiñuragun lídangiñe. Súngubei wagía ariñagatiwa ani adügatiwa katei ani lárigiñe aba wasakürihan. Gama lumoun, anhein mábürühan warüna líderagubadiwa Heowá lun wasigirun wabaruaguóun (1 Fe. 5:10). Akutiha waméi lawandun Féduru. Gudemehabu le larufudubei Hesusu lun Féduru íbini chará lan Féduru gayaraati línchahaniwa lun wasigirun eseriwida lun Heowá.

ÁFAAGUNI LE LADÜGÜBEI FÉDURU LUMA ABINIRUNI LE LERESIBIRUBEI

4. Ka lariñagubei Féduru luougua, ani ida liña líchugun Hesusu darangilaü lun? (Lúkasi 5:​5-10).

⁴ Mariñaguntu Lererun Bungiu ka lan uagu lariñawagúa luagu Féduru aban lan “wügüri gafigounti” ni ka lan figóu úagubei lasaminara (aliiha huméi Lúkasi 5:​5-10). Másiñati adüga lan fiu charati wéiriti. Ariha lumuti Hesusu hanufude lan meha Féduru, háfuga ladüga machourun lan luougua. Gama lumoun, subudi lumuti giñe gayara lan úaragua lan. Ligía lubeiti lariñagubei lun: “Manufudedabá”. Chülüti dimurei le tidoun lanigi Féduru lau larihini afiñen lan Hesusu luagu. Dan lárigiñe, ligía luma Andürési le lamulen aba hígiruni bísinisi lánina óuchahani lun hederegeragun houngua sunsuinagubei lun hafalaruni Mesíasi. Seremei le hanúadirunbei resibitiña lubuidun burí abiniruni (Mar. 1:​16-18).

5. Ka abiniruni libihinbei Féduru lau mígiraguagüdün lan lungua lun lanufude luma lun lánharun lun agunbirahani le ladügübei Hesusu lun?

⁵ Kei lani Kristu disipulu, wínwanti meha Féduru lubuidun burí sügǘ. Ariha lumuti meha Féduru Hesusu areidaguagüda sanditiña, asagaha máfianu hawéi gürigia luma águyuguagüda hilaaña (Mat. 8:​14-17; Mar. 5:​37, 41, 42).b Ariha lumuti giñe arufudúni le ñein lubéi larihei uéiriguni le lunbei leresibiruni Hesusu lidan Larúeihan Bungiu. Ligía aban katei le mabulieidun lubéi lidan libagari (Mar. 9:​1-8; 2 Fe. 1:​16-18). Ítara liña, arihati Féduru katei le masaminarun lumuti yebe larihibei lan. Ma funa lugundan lau mígiraguagüdün lan lungua lun luriban saminaü le lasandirubei luouguoun! Lun hamuga ígiraguagüda lan lungua leferidiruñein hamuga sun abiniruni le.

6. Ibihati san Féduru liñuragun lídangiñe lidebilin lau lóufudagun? Afuranguagüda huméi.

⁶ Íbini meha sun le larihibei Féduru luma le laganbubei mosu meha lasigirun ageindagua luma lidebilin. Ariha wamá fiu hénpulu. Dan meha le lafuranguagüdübalin Hesusu mosu lan lasufurirun ani hilá ligía lun lagunfulirun profesía le tídanbei Bíbülia, aban ladeinhan Féduru lun (Mar. 8:​31-33). Asigenehati Féduru saragu wéiyaasu hama ha híbiri apostolugu ka lan hádangiñe wéirigutimabei (Mar. 9:​33, 34). Guñoun lubaragiñe lounwen Hesusu aba lábürühan Féduru luagu aban wügüri ani aba láchuguni larigei (Huan 18:10). Gúñounmeme ligía aba lanufudedun ani ǘrüwañein wéiyaasu leyeedagun ibidiñe lan Hesusu le lumada lun (Mar. 14:​66-72). Lagumuhóun aba layahuahan lau igarigu (Mat. 26:75).

7. Lárigiñe láguyugun Hesusu, ka chansi líchugubei lun Féduru?

⁷ Manügün lumuti Hesusu Féduru kei aban gürigia féridihali, lau sun buin liña lan meha Féduru lau íruni. Lárigiñe láguyugun Hesusu, ruti chansi lun apostolu le lun larufuduni lun hínsiñe lan lun. Aba lagunbirahani lun lóunigiruniña lánigu (Huan 21:​15-17). Ani aba lagundaarun Féduru lau dasi le. Ligía ñeinñein lubéi Herusalén weyu Pentekosutesi ani ligía aban hádangiñe furumiñetiña ha anuadirúabaña lau sífiri sandu.

8. Ka óunwenbu charati ladügübei Féduru Antiokía?

⁸ Íbini lárigiñe lanúadirun Féduru, mosu meha lasigirun ageindagua luma lidebilin. Lidan irumu 36, ariha lumuti Féduru ida liña lan libihin Korunéliu aban wügüri mama huríu sífiri sandu. Arihúati furangu úati lan “himei lan Bungiu aban gürigia luéi aban” ani gayaraati lílana hamá damuriguaü kristiánu gürigia ha lídangiñetiña amu néchani (Adü. 10:​34, 44, 45). Lúmagiñe dan ligía lun lubaruaguóun, maturobulin hali meha Féduru lun leigin hama gürigia ha mama huríu katei meha le maweiyasunti meha adügei (Gal. 2:12). Gama lumoun, añahein meha kristiánugu ha huríu asaminarutiña siñá lan heigin huríu úara hama ha mámabaña huríu. Dan le hachülürünbei fiu ha asaminarubaña ítara Antiokía, aba meigin hali lan Féduru hama líbirigu ha mama huríu, másiñati ladüga lan lanufude luéi hagañidun kristiánugu ha huríu. Dan le larihinbalin apostolu Pábulu le ladügübei Féduru aba ladeinhan lun hagibugiñe súngubei (Gal. 2:​13, 14). Íbini chará lan Féduru, mábürühanti larüna, sigiti lubaruaguóun. Ka íderagubalin?

KA ÍDERAGUBALIN FÉDURU LUN LASIGIRUN LUBARUAGUÓUN?

9. Según Huan 6:​68, 69, ida liña larufuduni Féduru úaragua lan?

⁹ Aba meha wügüri úaraguati Féduru. Mígirunti meha lun ladügün ni kata lun lábürühan larüna sunsuinagubei. Kei hénpulu, arufuda lumuti úaragua lan dan le lariñagubei Hesusu somu dimurei houn lani disipulugu le úabei gunfuranda hamani (aliiha huméi Huan 6:​68, 69). Saragu hádangiñe lubaragiñe hamuga hamuriahan luma Hesusu lun lafuranguagüdüni le labusenrunbei lariñagun o hagurabaha lan lun lafuranguagüdüni, ábarüga hígiruni hafalaruni Hesusu. Ánheinti Féduru madügün lumuti. Aba lariñagun hagibugiñe súngubei Hesusurügüñein lan ariñaga dimurei “lánina ibagari magumuchaditi”.

10. Ida liña larufuduni Hesusu afiñe lan luagu Féduru? (Ariha huméi giñe dibuhu).

¹⁰ Mágurun lumuti Hesusu Féduru. Lagumuhóun guñoun le laubei Hesusu Ubouagu, subudi laali meha Hesusu lígirubei lan Féduru hama amu apostolugu lábugua. Lau sun lira, ariñagati luagu Féduru lau ichouruni lárügüdaguba lan lungua ani úaraguabei lan (Luk. 22:​31, 32). Gunfuranda lumuti meha Hesusu “aranseñu liña lan sífiri, anhein úgubu, débiliti” lan (Mar. 14:38). Ligíati, íbini yeegua lan Féduru ibidiñe lan Hesusu lun, míchugun lumuti Hesusu apostolu le keisi aban féridihali. Lárigiñe láguyugun aba larufudagun lungua lun Féduru, genegeti lábuguarügüñein lan Féduru oura ligía (Mar. 16:7; Luk. 24:34; 1 Ko. 15:5). Chóuruti íderagua lani katei le apostolu le lun liñuragun lídangiñe lanarime íruni le luágubei ladüga le ladügübei.

11. Ida liña lachoururagüdüni Hesusu lun Féduru lóunigirubei lan Heowá?

¹¹ Chóurugüda lumuti meha Hesusu lun Féduru lóunigirubei lan Heowá. Lárigiñe láguyugun Hesusu, aba ladügün aban milaguru lau láñugun Féduru hama ha híbiri apostolugu saragu úduraü lunya hasagarun buiti lídangiñe (Huan 21:​4-6). Chóuruti adüga lan milaguru le lun larihini Féduru gabafu lan Heowá lun líchuguni le lemegeirubei lun lau lumenrengun lun labagaridun. Másiñati haritagua lani apostolu le oura ligía füramasei le ladügübei Hesusu luagu lóunigirubaña lan Heowá ha ʻáluahabalin larúeihan Bungiu furumiñe’ (Mat. 6:33). Lau lasubudiruni Féduru katei le aba líchuguni lani ministeriu lidan furumiñeti lúgaaru, mama lun óuchahani. Ligíati, lidan irumu 33 lidan Pentekosutesi aba líchugun aban yanu lau ganigi le íderagubaliña saragu milu gürigia lun hánharun lun uganu buiti (Adü. 2:​14, 37-41). Ani dan lárigiñe íderaguati saragu samariana hama gürigia ha mámabaña huríu lun hadügagun houngua lánime Kristu disipulugu (Adü. 8:​14-17; 10:​44-48). Furanguti aban lan gürigia huuti apostolu Féduru lun Heowá lun lachawahan sun hawuyeri gürigia lidoun damuriguaü.

LE GAYARAABEI WAFURENDEIRUNI

12. Ida liña líderaguniwa lani Féduru hénpulu anhein barühadiwa lubéi saragu dan ageindagua luma ligiaméme débili?

¹² Gayaraati giñe líderaguniwa Heowá lun mábürühan lan warüna. Anihein dan hénrenguti katei le dántima le barühadiwa lan saragu dan ageindagua luma ligiaméme débili. Másiñati genege lan woun hanarimetima lan wadebilin sügǘ lau lidebilin Féduru. Ligía lubeiti, gayaraati líchuguni Heowá erei woun lun wabaruaguóun wamá (Sal. 94:​17-19). Ariha waméi likesin aban íbiri lubaragiñe meha lasubudiruni inarüni, magüsi meha ligía luagu saragu irumu. Íbini aban lan meha lígiruni luriban ibagari le sunsuinagubei, anihein dan ñǘnbiguati luriban ayumahani lun. Ka íderagubalin lun mábürühan lan larüna lidan áfaaguni le ladügübei? “Ruti Heowá erei”, liña lariñagun. Ani ariñagayati: “Lau lídehan lani Heowá sífiri […], furendeihadina gayara lan nasigirun […] lidan lémeri inarüni”. Ani lagumuhóun aba lariñagun: “Rúhali Heowá chansi nun lun neseriwidun lun […], íbini aban lan gürigia charati au aniheingua íchiga iderebugu nun”.

13. Ida luba wáyeihani lani Féduru hénpulu? (Adügaü 4:​13, 29, 31; ariha huméi giñe dibuhu).

¹³ Kei le aubei warihei ábaya burí léiguadun Féduru lidoun anufudei hawéi gürigia. Ítara liña lubeiti, aba lamuriahan ídemuei luma Heowá aba lárügüdün ganigi (aliiha huméi Adügaü 4:​13, 29, 31). Wagía giñe sun gayaraati wagañeiruni anufudei. Ariha waméi le asuseredubei lun Horst, aban nibureinti Gefenti le awinwandubei Yámani lidan hadaani nasi. Saragu wéiyaasu ladügüdarun luagu leskuelarugu ani ariñaga lumuti abusuruni le: “Heil, Hitler!”. Madeinhatiña lagübürigu lun, furieirügütiña luma aba burí hamuriahan luma Heowá lun líchugun ganigi lun. Seremei hídehan lagübürigu luma larabachun luagu Heowá, lau lásügürün dan aba leresibiruni Horst erei le lemegeirubei lun lakipuragun lungua úaraguñu lun Heowá. Ani dan lárigiñe ariñagati: “Mígirungubei lumutina Heowá”.c

14. Ida liña híderaguniña wéiyaaña lidan afiñeni lau ínsiñeni íbirigu ha héiguamemeeli harüna?

¹⁴ Maweiyasunti Heowá luma Hesusu anügawa keisi féridihaña. Dan le leyeedagubei Féduru luagu ibidiñe lan Kristu lun gagibuguati luma aban katei hénrenguti lidan libagari. Lígiraguagüdüba meha san lungua lun lábürühan larüna? O lasigiruba meha lun lani lan Kristu disipulu? Furíei hali meha Hesusu lun Heowá luagu Féduru lun meha meferidirun lani Féduru lafiñen. Lárigiñe aba lariñagun Hesusu lun Féduru luagu furíei hali lan luagu ani chouru lani ganigibei lan lun lederebudagüdüni hafiñen líbirigu (Luk. 22:​31, 32). Ma funa lugundan Féduru laritaguni dimurei burí le lariñagubei Hesusu lun! Wagía giñe sun mosu wanúadiruni le lunbei wadügüni lidan wabagari. Lídanme dan ligía másiñati layusuruba lan Heowá wéiyaaña lidan afiñeni ha lúnbaña híchuguni dǘgüdaguaü le wemegeirubei woun lun gayara lan wakipuragun woungua lau úaraguni (Efe. 4:​8, 11). Paul, aban íbiri le barühalibei saragu irumu eseriwida kei wéiyaali lidan afiñeni, áfaaguati lun líchugun dǘgüdaguaü houn íbirigu. Dan le larihiniña íbirigu ha héiguamemeeli harüna, aba línchahaniña lun haritaguni ida liña lan lachawahaniña Heowá lidoun inarüni. Chóurugüda lumuti giñe houn maweiyasunbei lan Heowá íchigaña keisi féridihaña ladüga ínsiñeni le lasandirubei hawagu luma ladüga magumuchaguadi lan línsiñehabu. Arihaali wéiyaali lidan afiñeni le ida liña lan hiñuragun saragu íbirigu ha héiguamemeeli yebe meha harüna lun habaruaguóun hamá lau lídehan Heowá.

15. Ida liña larufuduni sügǘ lani Féduru luma lani íbiri Horst súnwandan lan lagunfulirun Matéu 6:33?

¹⁵ Ariha wamaali ida liña lan líchuguni Heowá le lemegeirubei Féduru lun luma le hemegeirubei ha híbiri apostolugu houn. Ladügübei giñe lidan wakesin ánhawa íchigei ministeriu lidan furumiñeti lúgaaru lidan wabagari (Mat. 6:33). Lárigiñe Libiaman Wuribu Wéiriti, aba laransehan Horst, le buga uágubei wayanuhan lun prekursoru lan. Gama lumoun, gudemeti meha, ani machourun lumuti anhein gayaraabei lubéi lanuriagun lungua luma anhein leseriwiduba lubéi lun Heowá lidan dan dayarüti. Ka ladügübei? Aba lóuchaguni Horst Heowá aba letenirun apurichiha sun dimaasu dan le labisidahabalin óunigiruti sirkuitu damuriguaü le ñein lubéi. Dan le lagumuchubei dimaasu, aba taweiridun lanigi Horst ladüga lederegerun óunigiruti sirkuitu aban gárada lun lau seinsu ani ibidiñewati ka lan óunaha. Lau seinsu ligía seriwiti meha kei prekursoru luagu saragu hati. Ariha lumuti Horst idewesei le kei aban katei le achoururagüdübalin lun lóunigirubei lan Heowá. Lúmagiñe dan ligía aban líchuguni Larúeihan Bungiu lidan furumiñeti lúgaaru (Mal. 3:10).

16. Ka uagu buídubei lubéi lun wakutihani hénpulu lani Féduru luma le labürühabei tidan ligaradan?

¹⁶ Ma funa meha lugundan Féduru lau larihini mígirun lani Hesusu keisi lamuriahani luma “Disebá nuéi, Nabureme”! Sigiti Kristu arufudaha lun Féduru lun aban lan apostolu úaraguati luma lun aban lan hénpulu buiti houn kristiánugu. Gayaraati wafurendeirun saragu katei huuti lídangiñe le arufudahóubei lun. Íridati Féduru tidan gárada to labürühaboun lun damuriguaü le lídanbei furumiñeti sígulu fiu lídangiñe katei le lafurendeirubei luma amu burí katei. Lidan leweñegua aturiahani wakutihaba fiu puntu létima súdinibei tidan gárada tuguya lúmati ida luba lan gayara lan wadügüni le tariñagubei uguñe weyu lidan wabagari.