Sigí humá éibuga lídangiñe “émeri sagüráuti”

1, 2. Ka katei súdiniti lunbei meha hanúadiruni huríu ha meha awinwandubaña Babilónia? (Ésüdürasi 1:2-4).

RÚHALI meha urúei aban ñunsu! Gayaraahali meha hagiribudun huríu meha ha barühaña 70 irumu adaürǘwa Babilónia hageiroun (aliiha huméi Ésüdürasi 1:2-4). Heowarügüñein meha gayara ladügün aban katei ítarati. Ka uagu? Lugundun méchuntiña meha babilóniana ígiragüdaña gürigia ha hanügübaña adaürǘwa (Isa. 14:4, 17). Gama lumoun, aba lábürühan Babilónia, ani aba líchugun iseri urúei gumadi lun hígirawagüdüniwa huríu lun gayara lan hagiribudun hageiroun. Ligíati sun huríu, hátima hachügüdinabaña iduheñu, mosu meha harihin kaba lan hadüga: háfuridun Babilóniagiñe o herederun ñein. Másiñati meha hénrengu lan houn hanúadiruni kaba lan hadüga. Ariha waméi ka lan uagu hénrengu lubéi.

² Añahein meha hádangiñe derebuguhaña meha lun hadügün aban wéiyaasu migifeti ani le hénrenguti. Kei hiibe-agei lan meha huríu Babilónia hágurahoua, ligíarügüñein meha fulasu hasubudirun. Ánheinti Ísüraeli, hageira meha hagüchagu. Luagu le aban oubaü, genegeti meha añahein lan hádangiñe huríu rísihaña meha Babilónia. Ligíati, másiñati hénrengu lan meha houn hígirunu tubuidun haban o hani bísinisi lun houdin awinwanda lidan aban fulasu le ibidiñeti houn.

3. Ka meha abiniruni hagurabubei huríu ha agiribudubaña Ísüraelin?

³ Gíbetimabei meha buiti hasagarun huríu ha úaraguabaña lau hagiribudun Ísüraeli sügǘ lau furumiñeguarügü sákürifisiu le lunbei meha hadügüni. Liibe-agei meha abiniruni le lunbei heresibiruni, gániti meha luma háhuduragun. Anuhein meha tóugiñe 50 ténpulu houn búngiugu mama inarünitiña Babilónia, gama lumoun úatu meha ni aban lun Heowá ñein. Kei meha ua lubéi latarü ñein ni aransehani hani fádirigu, siñati meha hadagaragüdün ísüraelina lun Heowá kei meha lariñaguni lilurudun Moisesi. Lanwoun lira, ha meha inebehabubaña lun Heowá luma lun lilurudun murusunrügüñanu meha hóubawagu sun ha áhuduragubaña houn búngiugu mama inarünitiña. Ligíati, saragu meha milu huríu ha áhuduragubaña lun Bungiu, hayumahaña meha hagiribudun hageiroun luma lun haransehan lunya ñein lan áhuduraguni inarüniti.

4. Ka meha füramase lubéi Heowá houn huríu?

⁴ Kéiburiñein meha gádürü hati lidura haweiyasun ísüraelina Babilóniagiñe lun Ísüraelin, ani mama meha aban wéiyaasu ménrenguti. Gama lumoun, füramaseti meha Heowá houn ligíaba lan agidarei sun katei le eberesehabei hémerirugugiñe. Abürühati Isaíasi: “Adüga humá aban émeri lubá Wabungiute lidan fulasu mabuidunti. Achagaha huméi sun fulasu wayati, [...] úaraguagüda huméi fulasu le múaranbei, surugüda humeime fulasu le segebei” (Isa. 40:3, 4). Samina humá san! Ma ménrengubei meha houn huríu héibugun lidan aban üma le suruti ani le wayati sügǘ luéi herederun amudeira luma arariraha wübü? Ani ítara, magüreweinbei meha haweiyasun ani chülügiñebaña meha.

5. Ka meha san liri üma le ayusurúbei kei hénpulu, le anügübei lúmagiñe Babilónia darí Ísüraelin?

⁵ Anihein saragu üma gíriti, ani le líbiri, númeru afidirúbei luagu. Ágiati üma le ayusurúbei kei hénpulu, le uágubei layanuha Isaíasi? Gíriti giñe. Ariñagatu Bíbülia: “Ñeinbei aban üma gíriti ‘émeri sagüráuti’. Siñabei hásügürün ha wíyebaña luéigiñe” (Isa. 35:8). Ka mini lubéi dimurei burí le houn Ísüraelina? Agia woun, ka mini lubéi?

“ÉMERI SAGÜRÁUTI” LIDAN DAN LE SÜGÜHALIBEI LUMA LIDAN WADAANI

6. Ka uagu lariñawagúa sagüráu lan émeri le?

⁶ “Émeri sagüráuti”. Ma buiti iri le lun aban üma? Ka uagu lariñawagúa sagüráu lan émeri le? Lugundun migirúnti meha lun ñein lan iwiyei Ísüraeli, mini lan le, siñá lan hawinwandun huríu aban ibagari lánina magíaguni, ni lun háhuduragun houn guáriua ni lun hadügün amu figóu le wéiriti. Huríu meha ha lúnbaña hagiribudun mosu meha lánigubaña lan Bungiu (2 Lur. 7:6). Mini lan san le sun lan ha áfuridubaña Babilóniagiñe hadügüñein lan meha sun katei buidu? Uá. Mosu meha hadügün asansiruni lidan habagari lun gayaraabei lan hagundaaragüdüni Heowá.

7. Ka meha asansiruni lunbei hadügüni hádangiñe huríu? Ru humá aban hénpulu.

⁷ Kei buga wariñaguni lidan párafu burí le lubaragiñebei le, Babilónia meha hágurahoua hiibe-agei huríu ani genegeti aba lan meha háyeihani saragu hádangiñe ligaburi hasaminan luma hechun babilóniana. Irumu burí lárigiñe, aba líchugun Ésüdürasi fe ha lan meha furumiñeti sétanu huríu ha agiribudubaña Ísüraelin, añahein lan hádangiñe maríeihaña meha hama würiña ha lílana amu burí néchani (Afu. 34:15, 16; Ésüd. 9:1, 2). Dan lárigiñe, aba taweiridun lanigi gumadimati Neemíasi saragu lau larihin mariñagadi hamá harahüñü huríu burí ha lun hererun ebüréu (2 Lur. 6:6, 7; Neem. 13:23, 24). Ida luba meha san hafurendeirun lun línsiñedun Heowá houn luma lun háhuduragun lun anhein ua lubéi gunfuranda hamani iñeñein létima ídanbei tabürüdǘwa Lererun Bungiu? (Ésüd. 10:3, 44). Ligíati, mosu meha hadügün huríu ha óunwenbu burí asansiruni, ani ménrenguntimabei meha houn lun hadügüni lau hawinwandun Ísüraeli ladüga ladügǘña meha aransehani murusun murusun ñein lunya láhudurawagun lun Heowá (Neem. 8:8, 9).

8. Ka lánibei “émeri sagüráuti” wama? (Ariha humóun iyawaü to luáguboun tidáü garüdia).

⁸ Másiñati añahein lan gürigia asaminarutiña: “Ma lubuidun le asuseredubei houn huríu. Gama lumoun, gániti san le asuseredubei houn wama uguñe weyu?”. Ítara liña. Ladüga wéibuguña giñe lídangiñe “émeri sagüráuti”. Guentó, adügati émeri le lun wáhuduragun lun Heowá lidan üma le lau darangilaü luma úarani, ani ámuñegü, wibihiba abiniruni lidan Larúeihan Bungiu. Ligíati, dandu kristiánugu anuadirúaaña kei “amu mudún”, lunti wakipuragun woungua lidan üma le (Huan 10:16).b Lúmagiñe irumu 1919, furihaña saragu míñunu wügüriña, würiña hama irahüñü tídangiñe Babilónia to Wéiriboun, mini lan le sun relihión mama inarünitu to ubouaguboun, ani gumeseeña éibuga luéigiñe émeri le. Chóuruti huguya lan aban hádangiñe. Íbini sügühali lan kei burí san irumu lúmagiñe ladararún üma le, gumesewati meha aransehóua kéiburi 100 irumu lubaragiñe ladararun.

LARANSEHÓUN ÉMERI

9. Según Isaíasi 57:14, ida liña laransehóun “émeri sagüráuti”?

⁹ Lidan hakesin huríu ha agiribudubaña Babilóniagiñe, adügati meha Heowá lun lagidarúniwa katei le eberesehabei lídangiñe émeri (aliiha huméi Isaíasi 57:14). Adüga lumuti san ligiaméme lidan “émeri sagüráuti” le lídanbei wadaani? Anha. Saragu san irumu lubaragiñe irumu 1919, gumeseti Heowá ayusura wügüriña ha hínsiñehabubaña lun lun harumadahani üma le (ariha huméi giñe Isaíasi 40:3). Ligíati, “wadagimanu” le hadügübei, adüga hamuti lun gayaraabei lan hagidaruni katei le eberesehabei lídangiñe émeri le lun gayaraabei lan meha hásügürün gürigia ha harumabaña anigi luma lun háfuridun tídangiñe Babilónia to Wéiriboun lun gayaraabei lan hebelurun lidoun áhuduraguni lun Bungiu, le ñein lubéi úarani luma darangilaü. Ariha wamá fiu wadagimanu le adügǘbei lun laransehóun üma le.

10, 11. Ka ibihúbei lau imprimírua tan Bíbülia luma tásügüragüdüniwa? (Ariha humóun giñe iyawaü).

¹⁰ Imprimírua tan Bíbülia. Darí meha lamidangua sígulu keinsi, abürühóuarügütu meha sun kopia to asagarúboun tídangiñe Bíbülia. Barüti meha wadagimanu le saragu dan, ani lóuguatu meha kopia adügǘtu tídangiñe Bíbülia ani sérutu meha. Dan meha le ladügǘnbei máhina lun imprimírü tan líburu, ménrenguntimahali meha lasagarún kopia tídangiñe Bíbülia luma lun tafanreinhóun.

¹¹ Tásügüragüdüniwa Bíbülia. Lidan saragu sígulu, lídanñoun meha latín Bíbülia, iñeñein le meha gunfuranda habéi gürigia ha íñubei hafurendei. Gama lumoun, seremei meha lun máhina burí le, wügüriña meha ha inebebei Bungiu houn áfaagutiña saragu lun hásügüragüdünu Bíbülia lidoun amu iñeñein le meha hayanuhabei furumiñeguarügü gürigia. Ítarati, ha meha aliihabarun Lererun Bungiu, gayaraati meha harihini anhein úara lubéi le haganbubei tidan ligilisi luma le tarufudahabei Bíbülia.

12, 13. Ru humá aban hénpulu le arufudubalin ida liña lan meha larufudúniwa lidan sígulu disinéfu iyeeni lan fiu lídangiñe katei burí le tarufudahabei relihión mama inarünitu.

¹² Ídemuei lun taturiahóun Bíbülia. Añahein meha gürigia aturiaha hamutu Bíbülia buidu buidu ani furendeitiña saragu lídangiñe haliihanu. Meredetiña meha lau le hafurendeirubei, ani adügati meha katei le lun hagañidun alidihatiña relihión. Kei hénpulu, lidan sígulu disinéfu, aba meha hagumeserun saragu wügüriña ha haruma tanigi adüga tratadu tuma burí garüdia to ayanuhaboun burí luagu arufudahani mama inarüniti le tarufudahabei burí ligilisi.

¹³ Lidan irumu 1835, anihein meha aban wügüri le inebebei Bungiu lun gíriti Henry Grew, afanreinhati meha aban garüdia to ayanuhaboun luagu ka lan asuseredubei dan le hounwen gürigia. Amu meha katei le larufudahabei luéi le tarufudahabei tiibe-agei ligilisi, afuranguagüda lumuti meha tau Bíbülia aban lan idewesei lúmagiñeti Bungiu móunwedadi ani mama lan tau aban uani móunwedaditu wágurahoua. Lidan irumu 1837, aba meha ladarirun aban minisi gíriti George Storrs aban garüdia dan le laweiyasuhaña lubéi tidan íngiini. Dan le laliihanbarun, aba líchugun fe furendeihali lan aban inarüni súdiniti, ábati labahüdahani houn amu. Lidan irumu 1842, aba meha líchugun aban yanu gabügürüguati gíriti “Móunwedaditiña san salufuritiña?”. Chülüti meha le labürüdübei George Storrs tidoun lanigi aban nibureinti gíriti Charles Taze Russell.

14. Ida liña meha lasagarun íbiri Russell hama lánigu paaná buiti lídangiñe wadagimanu le meha hadügübei amu? (Ariha humóun giñe iyawaü).

¹⁴ Ida liña meha lasagarun íbiri Russell hama lánigu paaná buiti lídangiñe wadagimanu le meha hadügübei amu luagu “émeri sagüráuti” le? Lidan meha dan ligía, anuheinharu meha líburu-agei, tuma amu burí Bíbülia lidan ámuñegueinarügü iñeñein. Ligíati, gayaraati meha hayusurunu tulu burí to dan le haturiahan. Sagatiña giñe buiti lídangiñe akutihani le ladügübei Henry Grew, George Storrs hama burí amu. Adügati giñe Russell hama lánigu paaná óunwenbu burí wadagimanu luagu “émeri sagüráuti” lugundun afanreinhatiña saragu líburu tuma burí tratadu to ayanuhatu luagu burí ariñahani tídangiñeti Bíbülia.

15. Ka katei súdiniti asuseredubei lidan irumu 1919?

¹⁵ Lidan irumu 1919, aba mabafuharu lan meha Babilónia to Wéiriboun, o sun relihión mama inarünitu to ubouaguboun, hawagu lumutuniña Bungiu. Lidan irumu ligía lachülaagua “musu úaraguati”, ani lidan dan lachülaagua lun gayaraabei lan hagumeserun gürigia ha haruma tanigi éibuga lidan “émeri sagüráuti” (Mat. 24:45-47). Seremei lun wadagimanu le hadügübei amu lun haransehani üma ligía, gayaraahali meha hafurendeirun ha agumeserubaña éibuga lidan üma le saragu katei luagu Heowá luma luagu le labusenrubei ladügün (Ari. 4:18). Gayaraati meha giñe hadügüni asansiruni le mégeiwabei lun gayaraabei lan hagundaaragüdüni Bungiu. Furanguti magurabun lan lun hadügüni sun asansiruni lidan aban. Le ladügübei Bungiu, larumadahañanu lumutuniña lau léibugun dan (ariha huméi rekuáduru “Arumadaha lumutiña Heowá lumutuniña murusun murusun”). Ma inarüni samina wamá luagun ugundani le lunbei wasandiruni danme le lachülürün weyu lun wagundaaragüdüni Heowá sunsuinagubei? (Kol. 1:10).

ANIHAMÉMEGUA “ÉMERI SAGÜRÁUTI” DARAGU

16. Ka wadagimanu lánina aransehani adügǘbei lidan “émeri sagüráuti” lúmagiñe irumu 1919? (Isaíasi 48:17; 60:17).

¹⁶ Lun lakipurúniwa aban üma buidu, mégeiwati lun laransehóuniwa. Lúmagiñe irumu 1919, ladügǘña wadagimanu luagu “émeri sagüráuti” lun gayaraabei lan háfuridun saragu gürigia tídangiñe Babilónia to Wéiriboun. Aba lagumeserun musu úaraguati le meha sun liñabei liridúniwa lidan dan ligía awadigimarida. Lidan irumu 1921, aba táfuridun líburu to gíriboun El Arpa de Dios, aban líburu to meha lunboun tahuudun lun híderawagun gürigia asubudirei inarüni le tídanbei Bíbülia. Afanreinhóuatu kei burí 6 míñunu tídangiñe líburu to lidan 36 iñeñein, ani furendei hamuti saragu gürigia inarüni seremei líburu to. Ani guentó, málügili lúmagiñe táfuridun líburu to gíriboun Winwan humá lau ugundani, lun lichugún aturiahani tídangiñeti Bíbülia tau, ani tahuuduña líburu to saragu. Lidan burí lagumuhóun dan le, yusu lumutu Heowá lóundarun lun lasigirun íchiga ariñahani tídangiñeti Bíbülia houn lumutuniña, ani íderagua lumutiwa lun wasigirun éibuga luéigiñe “émeri sagüráuti” (aliiha huméi Isaíasi 48:17; 60:17).

17, 18. Halíñoun san lanügaña “émeri sagüráuti” gürigia?

¹⁷ Gayaraati wariñagun dan le lan hánharun gürigia lun haturiahanu Bíbülia, habihiña lan chansi lun héibugun luéigiñe “émeri sagüráuti”. Añahein hádangiñe, éibugatiña lídangiñe üma le luagu murusun dan, lárigiñe aba hígiruni. Añahein hádangiñe aranseñu haña lun héibugun luéigiñe üma le darí hachülürün le ñéinhinba lubéi lanügaña. Haliñounbati lanügaña?

¹⁸ Houn ha agurabubaña hawinwandun sielu, barǘ lumutiña “émeri sagüráuti” le lidoun ‘lufulasun Bungiu’ (Aruf. 2:7). Hounti ha agurabubaña hawinwandun ya ubouagu, lanügübaña üma le lidoun lébeha lagumuchagüle Milu Irumu le lánina Larúeihan Kristu, danme le mafigounhaña sun gürigia. Anhein héibuguña lubéi lídangiñe üma le, madigiragua humá hárigoun, hubaruaguounméme humá darí hachülürün lidoun iseri ubóu. Ariñagatiwa houn súngubei: “Buidu láamuga haweiyasun!”.