Aranseedün san lun habadiseirun?

Adügaali haturiahanu Bíbülia lun hafurendeirun saragu katei luagu Heowá. Másiñati giñe adügaadün lan asansiruni lidan hibagari lun hawinwanduni le furendei humaalibei. Lau sun lira, gayaraati anihein lan somu katei le eredehabalün luéi hederegeragun hungua lun Heowá ani badisei huguyame. Layanuhaña arufudahani le luagu fiu katei le eberesehabaliña saragu gürigia luéi habadiseirun luma ka lan gayaraabei hadügüni lun hiñuragun lídangiñe.

1. Ka lunbei hasubudiruni tídangiñe Bíbülia lubaragiñe habadiseirun?

Lun habadiseirun, mosu “hasubudiruni inarüni” (1 Timotéu 2:4). Úati mini lan le mosu lan hasubudiruni lóunabagüle sun álügüdahani le gayaraabei hadügüni gürigia hun tuagu Bíbülia. Íbini kristiánugu ha lǘhaña lidan inarüni, mégeitiña hasigirun afurendeira luagu Bungiu (Kolosana 1:9, 10). Lau sun lira, mosu hafurendeiruni arufudahani tídangiñeti Bíbülia létima mégeiwabei lun habadiseirun. Ani híderagubadün wéiyaaña lidan afiñeni arihei anhein subudi humaali lubéi.

2. Ka lunbei hadügüni lubaragiñe habadiseirun?

Ariñagatu Bíbülia: “Asaküriha humá; giribu huguyame lun Bungiu” (aliiha huméi Adügaü 3:19). Mosu hadügüni lira lubaragiñe habadiseirun. Kati mini lubéi le? Hasandiragun hungua wuriba luagu figóu le meha hadügübei ani aba hamuriahan ferudun luma Heowá. Ábame giñe hebé lan hadügüni wuribati le meha hadügübei ani ábame hagumeserun awinwanda kei aubei labusenra Bungiu, gumese huguyame awinwanda keisi aban lílana damuriguaü lau habasiihan lidoun adamuridaguni luma hiridún kei aban apurichihati le mabadiseirúngili.

3. Ka uagu moun lumuti lubéi ladarasahanün anufudei luéi habadiseirun?

Añahein gürigia hanufudetiña luéi hachararun luma luéi magunfulirun hamá lau le füramase habéi lun Heowá. Le linarün katei, lachülürüba dan lun hachararun, kei meha lasuseredun houn wügüriña hama würiña úaraguatiña ha iridúbaña tidan Bíbülia. Haritagua huméi magurabun lan Heowá macharabaña lan lubúeingu (aliiha huméi Sálumu 103:13, 14). Anhein hadüga sun hiyaraati, gúndaabei Heowá. Ani líderagubadün. Chóurugüda lumuti Heowá woun úabei “lan ni kata lun lafanreinraguniwa luéi línsiñehabu” (aliiha huméi Rómana 8:38, 39).

SIGÍ HUMÁ AFURENDEIRA

4. Subudi huméi Heowá buidu

Ka lunbei hasubudiruni luagu Heowá lubaragiñe habadiseirun? Mosu hasubudiruni darí lun línsiñedun hun, busén huguyame gaganbadi humá lun. Ariha huméi BIDÉU, lun hasubudiruni ida liña lan hadügüni aturiahatiña Bíbülia ha lídangiñetiña sun ubóu katei le. Ábameti hayanuhan luagu álügüdahani le:

BIDÉU: Le lunbei ladügǘniwa lubaragiñe badisei (3:56)

• Según bidéu le, ka íderagubaliña aturiahatiña ha lun haranserun lubá badisei?

Aliiha huméi Rómana 12:2, ábameti hayanuhan luagu álügüdahani burí le:

• Anihein san somu arufudahani tídangiñeti Bíbülia le uágubei machourun humá? Afiñetün san arufudaha hamani gefentiña luagu Heowá inarüni?

• Anhein machourun hubalin, ka gayaraabei hadügüni?

5. Mígiraguagüda humá hungua lun furumiñeguarügü katei le eberesehabalün luéi habadiseirun

Sun wagía gagibuguatiwa luma lénrengunga dan le wanúadirun wederegeragun woungua lun Heowá ani badisei wagía. Lun harihin aban sügǘ, ariha huméi BIDÉU, ábameti hayanuhan luagu álügüdahani burí le:

BIDÉU: Úati araramutiwa dan le hínsiñe lan Heowá woun (5:22)

• Ka lénrengunga ídangiñebei tiñuragua Narangerel lun teseriwidun lun Heowá?

• Ida liña líderagunu ínsiñeni le tasandirubei luagu Heowá lun tiñuragun lídangiñe lénrengunga burí le?

Aliiha huméi Ariñawagúni 29:25 luma 2 Timotéu 1:7, ábameti hayanuhan luagu álügüdahani le:

• Halíagiñe wibihei ganigi le wemegeirubei lun wiñuragun lídangiñe lénrengunga?

6. Afiñe humá luagu líderagubadün lan Heowá

Líderagubadün Heowá adügei le lagurabubei húmagiñe. Ariha huméi BIDÉU, ábameti hayanuhan luagu álügüdahani burí le:

BIDÉU: Líderagubadibu Heowá (2:50)

• Lidan bidéu le, ka meha uagu lanufudebei aturiahati le lun labadiseirun?

• Ka íderagubalin lúntima lafiñerun luagu Heowá?

Aliiha huméi Isaíasi 41:10, 13, ábameti hayanuhan luagu álügüdahani le:

• Ka uagu gayara lubéi hachoururuni gayaraabei lan hagunfuliruni le füramase hubéi lun Heowá dan le hederegeragun hungua lun?

7. Gánwoungüda huméi heteingiradi luagu línsiñehabu Heowá

Éibutima hasaminarun luagu lueirin hínsiñe lun Heowá, wéiritimabei eteingiruni le hasandirubei ani busentimabadün heseriwidun lun lun súnwandan. Aliiha huméi Sálumu 40:5, ábameti hayanuhan luagu álügüdahani le:

• Ka lídangiñe idewesei le ru laalibei Heowá hun gebegitimabei hun?

Hínsiñeti meha Heowá tau sun Lererun lun profeta Heremíasi ani ariha lumuti meha lanügüni liri Bungiu kei aban lubuidun chansi. Ariñagati: “Aganba numuti bererun; ligía meha tugundan nanigi, lugundun bani au, Nabureme Suntigabafu” (Heremíasi 15:16). Guentó, óunaba huméi álügüdahani burí le:

• Ka uagu aban lubéi lubuidun chansi aban wamá gefenti luagu Heowá?

• Busentün san habadiseirun lun aban humá gefenti luagu Heowá?

• Anihein san somu katei le eberesehabalün luéi habadiseirun?

• Ka gayaraabei hadügüni lun habadiseirun?

LE HAFURENDEIRUBEI

Lau lídehan Heowá, gayaraati hiñuragun lídangiñe furumiñeguarügü lénrengunga le eberesehabalün luéi habadiseirun.

Águyuguagüdüni

• Ka lunbei hasubudiruni tídangiñe Bíbülia lubaragiñe habadiseirun?

• Ka asansiruni lunbei hadügüni lubaragiñe habadiseirun?

• Ka uagu moun lumuti lubéi hígiraguagüdün hungua lun lararamunün anufudei luéi habadiseirun?

FURENDEI HUMÁ LANWOUN

Samina humá luagu kátima lan lunbei línchahanün lun habadiseirun.

“Aranseedün san lun habadiseirun?” (Garüdia Awisahatu, ǘrüwa-hati, irumu 2020)

Ariha huméi ida luba lan hiñuragun lídangiñe somu lénrengunga le eredehabalün luéi habadiseirun.

“Ka san eredehabalina luéi nabadiseirun?” (Garüdia Awisahatu, ǘrüwa-hati, irumu 2019)

Ariha huméi ida liña lan liñuragun aban wügüri lídangiñe óunwenbu burí lénrengunga le úmabei lagagibudagua lun gayara lan labadiseirun.

Ka adarasahabalün luéi habadiseirun? (1:10)

Machourun lumuti meha aban wügüri gíriti Ataa anhein lunti lubéi labadiseirun. Ariha waméi ka lan agidarubalin machouruni ligía luéi lun gayara lan labadiseirun.

Le san lúgubu gadüna nani abinirúni le? (7:21)