ARUFUDAHANI 53
Anúadira wamá isebáhari le auti lagundaara Heowá
Aban “Bungiu gúndaati” Heowá (1 Timotéu 1:11, TNM). Busenti lun gunda wamá lidan wabagari. Hínsiñeti lun lun wadireirun dan lun wemeraagun lídangiñe wawadigimari luma wafisiute. Lidan arufudahani le, warihibei ida luba lan wayusuruni dan le wadireirubei lun wemeraagun lidan aban igaburi le ruti ugundani woun, hínsiñe ligía lun Heowá.
1. Ka lunbei gabaroun wamani dan le wanúadirun isebáhari?
Ka hínsiñebei hun hadügün lidan dan le hadireirubei lun hemeraagun? Añahein himei hamuti herederun darangilu hábiñe aliiha aban líburu, aganbaha uremu, aríagua somu katei lidan Internet o aríagua somu pikchá o pelikula. Añahein amu, hínsiñeti houn hásügürün dan hama hamadagu éibuga laru beya, áfuliha o áhurera somu huraraü. Meberesenga ka lan isebáhari hínsiñebei woun, mosu wachoururuni anúadira wamani le “hínsiñebei lun Wabureme” (Éfesuna 5:10). Lunti gunfuranda wamani katei le buidu lugundun liibe-agei isebáhari le hínsiñebei houn gürigia uguñe weyu gaganati katei le iyereeguti lun Heowá, kéiburi anarimeni, magíaguni o katei hámagiñeti máfianu (aliiha huméi Sálumu 11:5). Kaba íderaguawa anúadira isebáhari lau lichú aau?
Ánhawa anúadira umadagu ha hínsiñehabutiña lun Heowá, hínchahabadiwa lun wadügün katei buiti ani híderagubadiwa lun wanúadahani wisebáhari buidu. Kei wafurendeiruni lidan arufudahani 48, “ha óundaragutiña hama chu tau, lachuuduba hau”. Ánhañati ha héchubaña ásügüra dan hama gürigia ha minebenbei lilurudun Heowá houn, “heferidiruba” (Ariñawagúni 13:20).
2. Ka uagu lunti lubéi wóunigiruni dan le wásügürübei lidan isebáhari?
Íbini buidu lan isebáhari le wanúadirubei, mosu wóunigirun lun mibe lan dan wásügürün lidan. Ladüga, ánhawa móunigi, ladügüba isebáhari lun madaani wamá lun burí katei létima lunbei wetenirun lun. Ariñagatu Bíbülia: “Yusu huméi hidaani lidan katei buiti” (aliiha huméi Éfesuna 5:15, 16).
SIGÍ HUMÁ AFURENDEIRA
Ariha waméi ka lan gayaraabei hadügüni lun gayara lan hanúadirun buidu lidan luáguti isebáhari.
3. Dise humá luéi luriban isebáhari
Ka uagu lunti lubéi wanúadiruni wisebáhari lau duari? Ariha huméi BIDÉU, ábameti hayanuhan luagu álügüdahani burí le:
Ka idan genegegua lan huraraü lánina hageindagun rómana lidan binadu dan luma fiu lídangiñe huraraü le uguñebei weyu?
Según bidéu, ka lafurendeirubei Danny luagu isebáhari?
Aliiha huméi Rómana 12:9, ábameti hayanuhan luagu álügüdahani le:
Ida luba líderaguniwa bérusu le lun wanúadirun isebáhari buiti?
Ka burí katei iyereegubei lun Heowá? Aliiha huméi Ariñawagúni 6:16, 17 luma Galasiana 5:19-21. Lárigiñe haliihani kada bérusu, ayanuha humá luagu álügüdahani le:
Lídangiñe sun katei le iridúbei lidan bérusu le, ka lídangiñe kamanitimabei lidan isebáhari uguñe weyu?
Ida luba wanúadirun isebáhari lau lichú aau?
Álügüdagua humá hungua:
Ka laganabei? Gaganati san katei le iyereeguti lun Heowá?
Átiriñein dan? Gidati san lídangiñe dan le lunbei nayusuruni lun katei burí létima lunbei netenirun lun?
Ka uma? Adügati san lun nóundarun hama gürigia ha mínsiñehabutiña lun Heowá?
Lun wesefurun, mosu wadisedun luéi denchaü o peliguru sunsuinagubei. Ligíati lunti lubéi wadisedun luéi isebáhari le uágubei wasaminara gayara lan ladügün wuribani woun.
4. Yusu huméi hidaani buidu
Ariha huméi BIDÉU, ábameti hayanuhan luagu álügüdahani le:
Lau sun mama lan ladügüña íbiri le lídanbei bidéu ni kata wuribati, ka liturobulinbei?
Aliiha huméi Filipuna 1:10, ábameti hayanuhan luagu álügüdahani le:
Ida luba líderaguniwa bérusu le lun wanúadiruni átiribei lan dan wásügürün lidan isebáhari le hínsiñebei woun?
5. Anúadira humá isebáhari le buiti
Lau sun anihein lan saragu isebáhari le mínsiñeti lun Heowá, anihein saragu amu le hínsiñeti lun, le gayaraabei wadügüni lun wásügürün lubuidun dan. Aliiha huméi Apurichihati 8:15 luma Filipuna 4:8, ábameti hayanuhan luagu álügüdahani le:
Ka isebáhari buiti hínsiñebei hun?
Gayaraati wásügürün lubuidun dan lidan isebáhari buiti.
LE HARIÑAGUBEI FIU GÜRIGIA: “Úati ni kata wuribati luagu isebáhari le gaganati anarimeni, agamariduni luma katei le gániti hama máfianu, madügünrügü wamaali ligía le warihubei”.
Kaba hamuga hariñaga?
LE HAFURENDEIRUBEI
Busenti Heowá lun wásügürüni buidu lidan isebáhari buiti.
Águyuguagüdüni
Ka luwuyeri isebáhari unbei hamahada kristiánugu?
Ka uagu lunti lubéi wóunigiruni dan le wásügürübei lidan isebáhari?
Busentün san hanúadirun isebáhari le auti lagundaara Heowá? Ka uagu?
FURENDEI HUMÁ LANWOUN
Ariha huméi ka lan lunbei lanúadiruni hisebáhari.
Aliiha huméi ida luba lan hanúadiruni hisebáhari buidu.
“¿Son sanas nuestras diversiones?” (La Atalaya, to lánina 15 lidan diisi-hati, irumu 2011)
Lidan abahüdaguni luáguti ibagari le gíribei “Me liberé de mis prejuicios”, ariha huméi ida liña lan lígirun aban wügüri fiu isebáhari.
“La Biblia les cambió la vida” (La Atalaya, to lánina 1 lidan bián-hati, irumu 2010)
Ariha waméi ka lan tanúadirubei aban úguchuru luagu isebáhari le gánibei hama máfianu.