ARUFUDAHANI 02
Rutu Lererun Bungiu emenigini woun
Lidan sun ubóu, gagibuguatiña gürigia luma turobuli le íchugubei íruni, idiheri o igarigu houn. Susereeli san somu katei hun le adügübei lun hasandiragun hungua ítara? Másiñati hasufuriruña lan ladüga somu sandi o ladüga lounwen somu gürigia le hínsiñeti hun. Háfuga álügüdagua humá hungua: “Lachülürüba funa san dan lun ua lan turobuli”. Rutu Lererun Bungiu óunabagülei le ruti gurasu.
1. Ka emenigini tíchugubei Lererun Bungiu woun?
Mama ariñagarügü tumuti Lererun Bungiu ka lan uagu buin liña lubéi ubóu le lau turobuli, rutu giñe uganu buiti luagu madurabei lan turobuli lun súnwandan ani málühali lan agumucha. Gayaraati líchugun füramasei le tídanbei Lererun Bungiu “emenigini hun” lubá “dan le lunbei liabin” (aliiha huméi Heremíasi 29:11, 12). Gayaraati líderaguniwa emenigini le lun wawandun turobuli luma lun gunda wamá íbini uguñe weyu. Íderagua lumutiwa giñe lun wachoururuni gúndaabadiwa lan lun súnwandan.
2. Ka tariñagubei Lererun Bungiu luagu ámuñegü?
Ariñagatu Lererun Bungiu úabei lan “óunweni ni ayahuni ni íruni ni igarigu” ámuñegü (aliiha huméi Arufudúni 21:4). Yarafa madise, lagumuchuba turobuli burí le adügübei lun hasufurirun gürigia uguñe weyu, kéiburi gudemei, marichaü, sandi luma óunweni. Füramasetu Lererun Bungiu hawinwanduba lan gürigia lidan aban paraísu ubouagu lun súnwandan.
3. Ka katei gayaraabei líderagunün lun hafiñerun luagu emenigini le tíchugubei Lererun Bungiu?
Hemenigitiña saragu gürigia laranseraguba lan sun katei ubouagu, lau sun lira machourun hamuti anhein lasusereduba lubéi. Ánheinti füramasei le tídanbei Lererun Bungiu, chóuruti lagunfuliruba lan. Anhein haliiha “Lererun Bungiu lun harihini anhein inarüni lubéi le ariñawagúbei” hun, gayaraabei hafiñerun luagu füramasei burí le (Adügaü 17:11). Danme le haturiahanu Lererun Bungiu, harihibei hungua gayara lan hafiñeruni le tariñagubei luagu ámuñegü.
SIGÍ HUMÁ AFURENDEIRA
Ayanuha wamá luagu fiu lídangiñe füramasei le tídanbei Lererun Bungiu lubá ámuñegü, ariha wameime ida liña lan líderaguniña emenigini le amu gürigia.
4. Füramasetu Lererun Bungiu gayaraabei lan wawinwandun lun súnwandan masufurirunga
Ariha huméi ámuñegueinarügü füramasei tídangiñeti Bíbülia le uágubei layanuhóua ya. Ka lídangiñe hínsiñetimabei hun? Ka uagu?
Aliiha huméi bérusu tídangiñeti Bíbülia le áfuachubei úara luma füramasei le ani ábame hayanuhan luagu álügüdahani burí le:
Ruti san bérusu burí le emenigini hun? Afiñetün san gayara lan lahuudun le lariñagubei bérusu burí le lun somu hiduhe o humada?
Aríagua humá hungua ubouagu danme le
ÚAALI NI ABAN... |
SUN LAN GÜRIGIA... |
|---|---|
|
|
|
|
|
|
|
|
|
|
5. Gayaraati ladügün emenigini le tídanbei Lererun Bungiu lun labuidurun wabagari
Hírutiña saragu gürigia o gáñitiña ladüga sun turobuli le harihibei ubouagu. Añahein hádangiñe, adüga hamuti sun hayaraati lun haransehani katei. Ariha huméi ida liña lan líderaguniña füramasei le tídanbei Bíbülia gürigia uguñe weyu lun hasubudiruni labuiduruba lan katei ubouagu. Ariha huméi BIDÉU, ábameti hayanuhan luagu álügüdahani burí le:
Según le arihíbei lidan bidéu, ka meha uagu tadiherida Rafika?
Lau sun magumuchagun lan turobuli ligía, ida liña tíderagunu Lererun Bungiu?
Gayaraati líderaguniwa emenigini le tíchugubei Lererun Bungiu lun wagagibudagun luma íruni luma lun wiñuragun lídangiñe turobuli lau aban lubuidun igaburi. Aliiha huméi Ariñawagúni 17:22 luma Rómana 12:12, ábameti hayanuhan luagu álügüdahani burí le:
Afiñetün san gayaraabei lan líderagunün emenigini le tíchugubei Lererun Bungiu lun habuiduragüdüni hibagari guentó? Ka uagu?
LE HARIÑAGUBEI FIU GÜRIGIA: “Wéiriyati lubuidun füramasei le tídanbei Bíbülia lun inarüni lan”.
Afiñetün san súdini lan harihini hungua anhein lagunfuliruba lubéi füramasei burí le tídanbei Lererun Bungiu?
LE HAFURENDEIRUBEI
Füramasetu Lererun Bungiu aban ibagari buin lau ugundani woun, ruti le emenigini woun ani íderagua lumutiwa lun wabaruaguóun wamá meberesenga turobuli le úmabei wagagibudagua.
Águyuguagüdüni
Ka uagu megei habéi gürigia hasubudiruni le füramase lubéi Bungiu?
Ka tariñagubei Lererun Bungiu luagu ámuñegü?
Ida luba líderagunün hemenigi humá lubá ámuñegü?
FURENDEI HUMÁ LANWOUN
Sigí humá afurendeira luagu lubafu emenigini.
“Esperanza: ¿dónde hallarla?” (¡Despertad!, to lánina 22 lidan gádürü-hati, irumu 2004)
Ariha huméi ida liña lan líderaguniña emenigini gürigia ha láubaña sandi máraninati.
“Gayaraati san tíderaguniwa Bíbülia agagibudagua luma wasandi?” (Ariñahani lídangiñeti jw.org)
Sunme harihiñein lan bidéu lauti uremu le, aríagua humá hungua awinwanda hama hiduheñu lidan Paraísu le füramase tubéi Lererun Bungiu.
Aliiha huméi ida liña lan lasansirun libagari aban gürigia lárigiñebei lasubudiruni emenigini le tídanbei Lererun Bungiu.