Ka uagu lunti lubéi wederegeragun woungua lun Bungiu ani badisei wagíame?

Deregeguati aban gürigia lungua lun Heowá dan le ladügün aban furíei lun, le ídanbei füramase lan lúnrügüba lan láhuduragua ani lugundantimaba lan Bungiu gebegi lun lidan libagari (Sálumu 40:8). Dan le habadiseirun, arufuda humuti houn ha híbiri deregeguaadün lan hungua lun Bungiu. Wederegeragun woungua lun Heowá, ligíatima lunbei wanúadiruni. Ka gayaraabei línchahanün lun hanúadiruni katei le, le gayaraabei lasansiruni hibagari?

1. Ka ínchahabaliwa lun wederegeragun woungua lun Bungiu?

Ínsiñeni le wasandirubei luagu Heowá ínchahabaliwa lun wederegeragun woungua lun (1 Huan 4:10, 19). Ariñagatu Bíbülia: “Hínsiñela lubeiti Babureme le Bubungiute bun tau sun banigi, tau sun buani, lau sun bisaminan, lau sun bere” (Márükosu 12:30). Arufuda wamuti hínsiñe lan Heowá woun dandu lau le wariñagubei kei lau le wadügübei. Ítara kei anúadira hamá aban feru adarigu ha hínsiñeguatiña hámagua lun hamarieidun, dan le hínsiñe lan Heowá woun lau sun wanarün, anúadiratiwa wederegeruni wabagari lun luma wabadiseirun.

2. Ida liña labiniruniña Heowá lubúeingu ha abadiseirúbaña?

Danme le habadiseirun, hádangiñehadünme liduheñu Heowá ha gúndaabaña. Ábameti hasandiruni línsiñehabu Bungiu lidan ámuñegueinarügü igaburi ani yarafatimabei hasandiragun hungua lun (aliiha huméi Malakíasi 3:16-18). Húguchibei Heowá ani gábirigubadün lidan sun Ubóu, gürigia ha asandirubaña ínsiñeni luagu Heowá luma huagu (aliiha huméi Márükosu 10:29, 30). Lubaragiñe habadiseirun, mosu hagunfulirun lau fiu katei. Mosu hasubudiruni Heowá, línsiñedun hun ani arufuda humeime afiñe humá luagu Liráü. Lárigiñe, mosu füramase humá lun Heowá hederegerubei lan hibagari lun. Lárigiñe hadügüni sun le, ani badisei huguya, gachansinbadün lun hawinwandun lau ugundani lun súnwandan. Ariñagatu Lererun Bungiu barǘ lániwa “badisei [...] lun wasalbarun” (1 Féduru 3:21).

SIGÍ HUMÁ AFURENDEIRA

3. Sun wagía, mosu wanúadiruni kaba lan un weseriwida

Lidan meha binadu Ísüraeli, añahein meha gürigia asaminarutiña gayara lan háhuduragun lun Heowá sun añaha lan áhuduragua lun bungiu mama inarüniti le gíribei Baali. Ñeinti hachararei! Ligía lóunahanbalin Heowá Elíasi, le lani profeta, lun lererehan houn. Aliiha huméi 1 Urúeigu 18:21, ábameti hayanuhan luagu álügüdahani le:

• Ka meha lunbei hanúadiruni ísüraelina?

Ítara kei meha ísüraelina, mosu giñe wanúadiruni kaba lan un weseriwida. Aliiha huméi Lúkasi 16:13, ábameti hayanuhan luagu álügüdahani burí le:

• Ka uagu moun lumuti lubéi wáhuduragun lun amu bungiu o lun amu katei sun awanha lan áhuduragua lun Heowá?

• Ida luba warufuduni lun Heowá anúadiraadiwa lan wáhuduragun lun?

4. Rárama humá asaminara luagu línsiñehabu Heowá hun

Rúhali Heowá saragu idewesei gebegiti woun. Ka gayaraabei wíchuguni lun? Ariha huméi BIDÉU.

BIDÉU: Idewesei le gayaraabei wíchuguni lun Bungiu (3:04)

Ida liña larufuduni Heowá línsiñehabu hun? Aliiha huméi Sálumu 104:14, 15 luma 1 Huan 4:9, 10, ábameti hayanuhan luagu álügüdahani burí le:

• Ka lídangiñe sun idewesei le ru laalibei Heowá hun uágutimabei hasandira eteingiruni?

• Dan le hasaminarun luagun sun idewesei le, ka hasandirubei luagu Bungiu?

Dan le weresibirun aban idewesei le hínsiñeti woun, busentiwa weteingiruni le íchugubalin woun. Aliiha huméi 2 Lúrudu 16:17, ábameti hayanuhan luagu álügüdahani burí le:

• Dan le hararamagun asaminara luagun sun le ru laalibei Heowá hun, adügati san lira lun busén humá híchugun somu katei lun? Kaba hamuga híchiga lun?

5. Labinirubadiwa Heowá ánhawa ederegeragua woungua lun

BIDÉU: Lúnrügüñein meha tahurerún bali nawinwanda (5:45)

• Lau sun weiri lan meha línsiñe tahurerún bali lun Andrey, ka uagu lígirei?

• Ígira lumuti Andrey tahurerún bali lun lederegeruni libagari lun Heowá. Afiñetün san buidu lan le lanúadirubei? Ka uagu?

Wéiriguti meha lubara apostolu Pábulu ubouagu lubaragiñebei ladügagun lungua kristiánume. Aturiaha lumuti meha halurudun huríu luma aban máisturu subudiwati. Aba lígiruni sun lira lun ladügagun lungua kristiánume. Asakürihati san lárigiñe? Aliiha huméi Filipuna 3:8, ábameti hayanuhan luagu álügüdahani burí le:

• Ka uagu lariñaga Pábulu “ifei” lan sun le lígirubei lun ladügagun lungua kristiánume?

• Ka lagañeirubei lau lígiruni sun lira?

• Afiñetün san buídutimabei lan hibagari anhaün anúadira heseriwidun lun Heowá? Ka uagu hasaminara ítara?

LE HAFURENDEIRUBEI

Ínchaha lumutiwa ínsiñeni le wasandirubei luagu Heowá lun wederegeragun woungua lun, badisei wagíame.

Águyuguagüdüni

• Ka uagu yu lubéi lun hínsiñe lan Heowá woun tídangiñe sun wanigi luma lun wáhuduragun lun?

• Ka idewesei líchugubei Heowá houn lubúeingu ha badiseihañabaña?

• Hínsiñeti hamuga hun lun hederegeruni hibagari lun Heowá?

FURENDEI HUMÁ LANWOUN

Ariha huméi ka lan uagu tederegerei aban eremuhatu luma aban áhureruti bali habagari lun Heowá.

Hálügüdahan nibureintiña... Kaba san nadüga lau nibagari? Dan narihin nárigoun... (6:54)

Ariha humá amu resun lun hederegeragun hungua lun Heowá.

“¿Por qué hay que dedicarse a Jehová?” (La Atalaya, to lánina 15 lidan eneru, irumu 2010)

Lidan bidéu lauti uremu le, ariha huméi ugundani le hasandirubei ha ederegeragubaña houngua lun Heowá.

Derege naali nibagari bun (4:30)

Lidan abahüdaguni luáguti ibagari le gíribei “Durante años me pregunté para qué estamos aquí”, aliiha huméi ka lan uagu tasaminara aban würi luagun létima gebegibei lidan tibagari.

“La Biblia les cambió la vida” (La Atalaya, to lánina 1 lidan unsu-hati, irumu 2012)