LEKSIÓUN 11

Ayanuha humá lau ubebeni

Rómana 12:11

LE LUNBEI HADÜGÜNI: Ayanuha humá lidan aban igaburi le adügüti lun busén hamá gürigia hawinwanduni le hafurendeirubei.

Aranse humóun hanigi. Danme le haranseruni le lunbei hariñaguni, ráramagua humá asaminara luagu lisudinin le lunbei harufudahani. Aturiaha huméi ariñahani ligía buidu gayara láamuga hariñaguni lau ichouruni.
Samina humá hawagun gürigia ha aganbubalün. Ráramagua humá asaminara luagu buiti le lunbei hasagaruni ha híbiri lídangiñe le lunbei hariñaguni o haliihani houn. Samina huméi ida luba lan hafuranguagüdüni ariñahani lidan aban igaburi le ídehati lun buídutima lan gunfuranda hamani luma lun gebegitima lan houn.
Ru humá ibagari lun le hariñagubei. Ayanuha humá lau ubebeni. Arufuda huméi lau higibu luma lau ligaburi hánhingichuni húgubu o húhabu tídangiñe lan sun hanigi hayanuha.

Áfaagua humá lun madireirun humani hasaminan gürigia luéi le habusenrubei harufudahan houn lau hadügüni ligiaméme katei lau higibu o húhabu. Chouru huméi gébuna lan hadügüni. Arufuda humá ubebeni dántima le hakutihaña lan somu puntu súdiniti o lun hínchahaniña gürigia lun hawinwanduni le lafurendeirubei. Anhaün ayanuha lau saragu ubebeni súnwandan, gayaraabei habuchadagüdün hawagu gürigia ha aganbubalün.