ARUFUDAHANI 60
Sigí humá abuiduragüdei humadagua luma Heowá
Furendeihadün saragu katei luagu Heowá lidan aturiahani le resibi humaalibei. Adügaali le lun weiri lan línsiñe Bungiu hun darí lun másiña lan deregeguaadün lan hungua lun ani badisei huguya. Anhein madügün humagili lubéi, másiñati málühadün lan adügei. Lau sun lira, agurabúati lun hasigirun awansera lidan humadagua luma Heowá lárigiñe habadiseirun. Le linarün katei, gayaraati hasigirun abuiduragüdei humadagua luma Heowá lun súnwandan. Ida?
1. Ka uagu lunti lubéi hasigirun abuiduragüdei humadagua luma Heowá?
Mosu wadügüni sun wayaraati lun wasigirun abuiduragüdei wamadagua luma Heowá. Ka uagu? “Madireirun wamaamuga luéi üma” (Ebüréu 2:1). Kaba íderaguawa lun wasigirun eseriwida lun Heowá lau úaraguni? Lau beresegu wamá lidan apurichihani luma lau wáluahan wadügün amu burí katei lidan weseriwidun lun Heowá (aliiha huméi Filipuna 3:16). Weseriwidun lun Heowá, ligía katei buídutimati le gayaraabei wadügüni lidan wabagari! (Sálumu 84:10).
2. Ka amu katei gayaraabei hadügüni?
Íbini lagumuchuña lan aturiahani tídangiñeti Bíbülia le hibihubei, lagumeseruña hibagari keisi kristiánu. Ariñagatu Bíbülia lun kada aban wádangiñe: “Daügua humá lau iseri igaburi” (Éfesuna 4:23, 24). Anhaün asigira aturiahoun Lererun Bungiu, abasiiha huguyame lidoun adamuridaguni, hasigiruba afurendeira amu burí katei luagu Heowá luma luagu ligaburi. Áluaha humá ida luba lan háyeihani lubuidun burí ligaburi. Ani sigí humá adügei asansiruni le mégeiwabei lun hagundaaragüdüni Heowá.
3. Ida luba líderagunün Heowá awansera lidan heseriwidun lun?
Ariñagatu Bíbülia: “Ladügüba Bungiu lun ua lan mégeiti luagu lubuidun higaburi, deregüdagu lidan hafiñen, héreñu ani chóuruñu” (1 Féduru 5:10). Sun wagía gagibuguatiwa luma óuchawaguni, lau sun lira, ru lumuti Heowá le wemegeirubei woun lun wawandun (Sálumu 139:23, 24). Füramaseti Bungiu líchugubei lan “lubuidun aritaguni hun”, ítara kei erei le hemegeirubei lun heseriwidun lun lau úaraguni (aliiha huméi Filipuna 2:13).
SIGÍ HUMÁ AFURENDEIRA
Ariha waméi ka lan gayaraabei hadügüni lun hasigirun awansera lidan heseriwidun lun Heowá ani kaba lan abiniruni líchiga hun.
4. Sigí humá ayanuha luma aganbei Humada le buídutimabei
Íderagua laadün furíei luma taturiahóun Bíbülia lun gamadagua humá luma Heowá. Gayaraati san ladügün katei le lun yarafatima lan hasandiragun hungua lun? Ida?
Aliiha huméi Sálumu 62:8, ábameti hayanuhan luagu álügüdahani le:
Líderagubadün habuiduragüdüni ligaburi hafurieidun lun buídutima lan humadagua luma Heowá. Ida luba hibihini?
Aliiha huméi Sálumu 1:2, ábameti hayanuhan luagu álügüdahani le:
Líderagubadün buídutima lan haliihanu Bíbülia lun habuiduragüdüni humadagua luma Heowá. Ida luba hibihini?
Ida luba hasagarun saragu buiti lídangiñe haturiahanu Bíbülia hábuguarügü? Lun hadarirun fiu adundehani, ariha huméi BIDÉU, ábameti hayanuhan luagu álügüdahani burí le:
Ka lídangiñe adundehani le lídanbei bidéu gayaraabei hafalaruni?
Ka hamuga katei uágubei habusenra haturiahan?
5. Gánwoungüda huméi heseriwidun lun Heowá
Anhein haganwoundagüda heseriwidun lun Heowá, hawanseruba lidan humadagua luma. Ariha huméi BIDÉU, ábameti hayanuhan luagu álügüdahani le:
Ka buiti tasagarubei Cameron lídangiñe taganwoundagüdüni teseriwidun lun Heowá?
Lau sun siñá lan wáguyun súngubei lidoun amu ageiraü lun wapurichihan, gayaraati waganwoundagüdüni weseriwidun. Aliiha huméi Ariñawagúni 21:5 ani ayanuha humá luagu le habusenrubei hadügüni lúntima heseriwidun lidan...
... damuriguaü.
... apurichihani.
Ida luba líderagunün adundehani tídangiñeti Bíbülia le lun haganwoundagüdüni heseriwidun lun Bungiu?
Le gayaraabei háfaagun luagu
Habuiduragüdüni ligaburi hafurieidun.
Haliihanu Bíbülia dayarügubei.
Hasubudiruniña sun íbirigu ha lídanbaña damuriguaü le ñein hubéi.
Hagumeserun íchiga aban aturiahani tídangiñeti Bíbülia.
Heseriwidun kei prekursoru ídehati o le apurichihabei ǘrüwa-wein-diisi oura luagu hati.
Anhein wügüri hubéi, háfaagun lun heseriwidun kei ídehati lidan damuriguaü.
6. Winwan humá lau ugundani lun súnwandan!
Aliiha huméi Sálumu 22:26, ábameti hayanuhan luagu álügüdahani le:
Ka lunbei hadügüni lun gunda lan hibagari dandu guentó kei lun súnwandan?
LE HAFURENDEIRUBEI
Sigí humá abuiduragüdei humadagua luma Heowá luma áfaagua lun haganwoundagüdüni heseriwidun lun. Ítara luba hawinwandun lau ugundani lun súnwandan.
Águyuguagüdüni
Ka uagu gayara lubéi hachoururuni líderagubadün lan Heowá lun heseriwidun lun lau úaraguni?
Ka gayaraabei hadügüni lun derebugu lan humadagua luma Heowá?
Ka uagu lunti lubéi wáfaagun lun waganwoundagüdüni weseriwidun lun Heowá lun wawanserun lidan wamadagua luma?
FURENDEI HUMÁ LANWOUN
Kátima labusenrubei Heowá: wadügün aban óunwenbu katei le arufuduti deregegua wamá woungua lun o weseriwidun lun lau úaraguni sagü weyu lidan wabagari?
Íbini aban lubúein Heowá le úaraguati gayaraati leferidiruni ubebeni le lasandirubei. Ariha huméi ka lan gayaraabei hadügüni lunya hasandiruni.
Ka lunbei nadügüni lunya nagundaarun lidan neseriwidun lun Heowá? (5:25)
Ka lunbei nadügüni lun naganwoundagüdüni neseriwidun lun Heowá?
Ariha huméi ka lan uagu lunti lubéi aban humá kristiánu le derebuguti lafiñen luma ida luba lan hibihini.