Ka uagu mítaran lubéi hadügüni gefentiña luagu Heowá Ladinerun Aburemei kei ladügǘn tidan amu burí relihión?

Falá wamuti sun adundehani le tídanbei Bíbülia luáguti ida luba lan wadügüni Laritaguagüle lounwen Kristu, le giñe subudiwabei kei “Ladinerun Aburemei” o Lagumuhóun Adineruni (1 Korintuna 11:20; Traducción del Nuevo Mundo). Ánheinti afiñeni luma burí échuni le afalarúbei tidan burí amu relihión luáguti ida luba lan ladügǘniwa Ladinerun Aburemei, múaranti luma le tariñagubei Bíbülia.

Ka uagu ladügǘwa Ladinerun Aburemei?

Adüga wamuti Ladinerun Aburemei lun waritaguni sákürifisiu le ladügübei Hesusu wawagu, luma lun warufuduni weteingiradi (Matéu 20:28; 1 Korintuna 11:24). Madügün wamuti Ladinerun Aburemei ladüga wafalaruña lan somu échuni tánina relihión le adügüti lun wabihin somu katei espechaliti, kéiburi lun ferudunawa lan wafigoun. Arufudahatu Bíbülia dánrügüñein lan warufuduni wafiñen luagu Hesusu feruduna lani Bungiu wafigoun, mama ladüga wadügün somu échuni tánina relihión (Rómana 3:​25; 1 Huan 2:​1, 2).

Kádaba átiri dan ladügǘwa?

Ariñagati Hesusu houn lani disipulugu lun hadügüni Ladinerun Aburemei, lau sun lira, mariñagun lumuti houn kádaba lan átiri dan hadügei (Lúkasi 22:19). Añahein gürigia saminatiña lunti lan ladügǘniwa sagü hati, añahein amu, saminatiña sagü lan dimaasu, sagü weyu, saragu wéiyaasu luagu weyu o kei auti labusenra gürigia. Lau sun lira, anihein fiu katei le lunti gabaroun wamani.

Gumese lumuti Hesusu Ladinerun Aburemei lidan weyu le ídanbei meha hefeduhei huríu Luéyuri Esefuruni ani fiu oura lárigiñe, aba lounwen (Matéu 26:​1, 2). Mama ítaraguarügüti katei le. Góubaguagüda tumuti Lererun Bungiu lani Hesusu sákürifisiu lumoun lani mudún le lánina Esefuruni (1 Korintuna 5:​7, 8). Ábanrügüñein meha wéiyaasu luagu irumu lefeduhóun Luéyuri Esefuruni ani ábanrügüñein meha wéiyaasu luagu irumu hadügüni furumiñetiña kristiánugua Laritaguagüle lounwen Hesusu (Áfuriduni 12:​1-6; Fádirigu 23:5). Ani wagía le gefentiña luagu Heowá, adüga wamuti ligiaméme lugundun falá wamuti adundehani le tídanbei Bíbülia.

Weyu luma oura

Íderagua lumutiwa ligaburi ladügüni Hesusu adamuridaguni le lun wasubudiruni, mámarügü kádaba lan átiri dan wadügei, íderagua lumutiwa giñe asubudirei kaba lan weyu luma oura wadügei. Weyu 14 lidan hati nisán irumu 33, lárigiñe lálüdün Weyu, lagumeserei Hesusu adamuridaguni le. Úarati le tuma kalendáriu to meha afalarubalin Hati lidan tidaani Bíbülia (Matéu 26:​18-20, 26). Wagía gefentiña luagu Heowá, adüga wamuti giñe Laritaguagüle lounwen Kristu weyuméme ligía ladüga falá wamuti hani furumiñetiña kristiánugu hénpulu.b

Wándaradi meha léiguada weyu 14 lidan hati nisán irumu 33, íbini ítara, gayaraati lábürühan weyu le furumiñeguarügü weyu lidan dimaasu kada irumu. Lun wasubudiruni, wagía gefentiña luagu Heowá, ka lan weyu lábürüha 14 lidan hati nisán, falá wamuti le meha hadügübei huríu lidan lidaani Hesusu, mama le hadügübei huríu ha uguñebaña weyu.c

Fein tuma diwéin

Lidan iseri adamuridaguni le, yusu lumutu meha Hesusu fein maganatu lébini tuma diwéin to ígiraguboun lídangiñe lefeduhóun Luéyuri Esefuruni (Matéu 26:​26-28). Ligía wayusurunbei fein to maganatu lébini, ni amu aganagu, tuma diwéin funatu, mama tira beibei le machouhangili, mayusutiwa giñe diwéin to gaganatu súgara, binu, híduru o amu aganagu.

Anuhein burí relihión to ayusurutu fein résiharu. Ánhounti Bíbülia góubaguagüda tumuti lébini, liibe-agei dan, luma figóu luma luriban usa (Lúkasi 12:1; 1 Korintuna 5:​6-8; Galasiana 5:​7-9). Ligíati aban lubéi hénpulu buiti fein to maganatu lébini, ni amu aganagu, lun lúgubu Hesusu le úabei mégeiti luagu (1 Féduru 2:​22). Anuhein burí relihión to ayusurutu tira beibei lubaragiñe hamuga tayusurun diwéin, múaranti lira luma le tarufudahabei Lererun Bungiu. Adüga hamuti ladüga maha hamá lun tatuniwa diwéin, lau sun múaran lan lira luma le tariñagubei Bíbülia (1 Timotéu 5:​23).

Luagu aban hénpulu layanuhóuña, mama luagu lita luma lúgubu Hesusu

Aban hénpulu lánina lúgubu Kristu fein maganatu lébini, ánhounti diwéin funatu to ayusurúboun lidan Aritaguagülei, aban hénpulu lánina lita. Masuseredunti aban milaguru lun lasaliragun lúgubu Kristu feinme to maganatu lébini o lita diweinme kei hasaminaruni fiu. Mamigisiragunti giñe ni luma lúgubu ni luma lita. Ariha waméi ida liña lan tarufuduni Bíbülia ítara liña lan katei le.

• Lun hamuga meha amuriaha lan Hesusu hama lani disipulugu lun hátuni lita, múaranbei hamuga meha lira luma lugumadin Bungiu luáguti moun lumuti lan weigin hitaü (Agumesehani 9:4; Adügaü 15:​28, 29). Ani siñati meha lasuseredun lira lugundun maweiyasunbei meha Hesusu amuriaha hama lani disipulugu lun hadügün aban katei le adüraaguti lilurudun Bungiu luáguti sagüráu lan hitaü (Huan 8:​28, 29).

• Matun hamuti apostolugu lita Hesusu áriebu ligía lugundun ligía guánarügü ariñagubei lawiyurúba lan lita arufudei ítara luagu masuseredungili lan meha lani sákürifisiu (Matéu 26:28).

• Ábanrügüñein wéiyaasu líchaagun Hesusu lungua keisi sákürifisiu (Ebüréu 9:​25, 26). Lun hamuga saliguarügü lan lúgubu Hesusu feinme luma lita diweinme sagü ladügǘn Ladinerun Aburemei, ladügǘña hamuga lani Hesusu sákürifisiu saragu wéiyaasu.

• Ariñagati Hesusu: “Adügameme huméi katei le, haritaguagüleme nuagun”, mariñagunti: “Adügameme huméi katei le lun háguyuguagüdüni sákürifisiu le nadügübei” (1 Korintuna 11:24).

Ligaburi lásügürawagüdün fiu bérusu tidan Bíbülia, adügübei lun hasaminarun fiu gürigia layanuhóuña lan luagu saliguarügü lan lúgubu Hesusu feinme ani lita diweinme. Kei hénpulu, según lásügürawagüdün tidan saragu Bíbülia, ariñagati Hesusu tuagu diwéin: “Nita le” (Matéu 26:28). Ani gayaraati lásügürawagüdüniwa le lariñagubei Hesusu ítara: “Nita mini lubéi le”.d Kei meha ladüga Hesusu liibe-agei dan, dan meha le larufudahan, layusurarügüña meha aban hénpulu (Matéu 13:​34, 35).

Kátaña éigibaña tídangiñe fein gurá hagía tídangiñe diwéin?

Dan le hadügüni gefentiña luagu Heowá Ladinerun Aburemei, fiúrügüñanu eiga tídangiñe fein, gurá hagía tídangiñe diwéin. Ka uagu?

Lau hitaü le láwiyurubei Hesusu, gumeseti “aban iseri daradu” le árügüdübalin lubara daradu le meha ladügübei Heowá hama lílana binadu Ísüraeli (Ebüréu 8:​10-13). Ha lídanbaña iseri daradu le, hagía éigibaña tídangiñe fein, gurá hagía tídangiñe diwéin lidan Aritaguagülei. Siñati heigin ni hatun sun kristiánugu, hárügübaña “únbaña wáhali lan Bungiu” lidan aban igaburi espechaliti adügei lira (Ebüréu 9:​15; Lúkasi 22:20). Harúeihaba kristiánugu ha luma Kristu sielu. Ariñagatu Bíbülia furangu san-bián-wein-gádürürügübaña lan milu gürigia ibihei lubuidun chansi le (Lúkasi 22:​28-30; Arufudúni 5:​9, 10; 14:​1, 3).

Bóugudin hawéi mudún míbetiña ha lúnbaña harúeihan luma Kristu, hiibe-agei wádangiñe, hádangiñetiwa “saragu gürigia” ha hemenigibaña hawinwandun lun súnwandan ya ubouagu (Lúkasi 12:32; Arufudúni 7:​9, 10). Lau sun meigin wamá tídangiñe fein, matun wagía tídangiñe diwéin, wagía le hemenigibei wawinwandun lun súnwandan ya ubouagu, ñǘdüntiwa lidan Laritaguagüle lounwen Kristu lun warufuduni weteingiradi luagu sákürifisiu le ladügübei wawagu (1 Huan 2:2).