Meredeti ni aban profesía magunfulirunga

KA UAGU AMU TUBÉI BÍBÜLIA TUÉI TÍBIRI LÍBURU? Subudiwati luagu gayarati lan gunfurandawa lan le hariñagubei binadu garíaahatiña lidan bián manera ani siñati lafiñerúniwa luagu, ani susereti giñe ligiaméme lau laturiahóun tesetirun waruguma lidan dan le ídanbei nasirua lan aban gürigia (horoscopo). Gürigia ha ariñagubalin le lunbei lasuseredun ámuñegü según le harihibei lasusereduña lan uguñe weyu, manigitiña lun hariñaguni le lunbei lasuseredun saragu sígulu lubaragiñe liabin. Ánheinti profesía le tídanbei Bíbülia gúnfuliti súnwandan, íbini dan le tariñaguni “lúmagiñe furumiñeti dan” le lunbei lasuseredun (Isaíasi 46:10).

ABAN HÉNPULU: Lidan meha sígulu sisi lubaragiñe lidaani Hesusu, arihati meha profeta Danieli aban arufudúni le ñein lubéi larufudúa saragu dan lubaragiñe lasuseredun, lábürügüdüni arúeihani Güresiana arúeihani lani Media luma Pérüsia lau lóufudagun. Ariñaga lumuti giñe danme lan gabafutimahali lurúeite Güresia ábame lan ‘láhalachawagun’. Kaba méhati arúeiha leweñegua? Ariñagati Danieli: ‘Láfuridayaba gádürü arúeihani lídangiñe néchani le, gama lumoun mítaranbei lubafu kei le furumiñeti.” (Danieli 8:5-8, 20-22.)

KA LARUFUDUBEI LE BÜRÜWAÑUBEI LUAGU DAN LE SÜGÜHALIBEI? Lóugiñe bián sígulu lárigiñe labürüdüni Danieli profesía le, ligía lagumeserun Alehánduru Magno arúeiha Güresia. Lidan diisi irumu lagañeirei Media luma Pérüsia ani aba lachawaraguni larúeihan dagá lumoun duna Indu (Pakistán líribei guentó). Gama lumoun 32 irumu lau ligía lounwen lidan magurabahóuniwa lan. Murusunbei dan lárigiñe aba lafanreinragun larúeihan hadan gádürü lisudaranigu ha agañeirubalin wuribu le ageindawagúbei Ipso (Liraüraü Asia). Úati ni aban hádangiñe arúeihati lau ubafu libe le meha aubei larúeiha Alehánduru Magno.

IDA LIÑA HARIHIN LUN? Anuhein funa san amu líburu to meredeti ni aban lídangiñe tani profesía magunfulirunga? Odi Bíbüliarügüñoun?