Ka lunbei ladügǘniwa lun libihín ibagari magumuchaditi?

1. Ka hasaminarubei fiu gürigia luagu lawinwandúniwa lun súnwandan?

GÓUNIGI hamuti saragu gürigia heigin ani áfaaguatiña lun hadügün ehersísiu lun buidu lan hátuadi. Íbini adüga hamani sun le, magurabuntiña lun hawinwandun lun súnwandan. Másiñati samina hamá siñabei lan lawinwandúniwa lun súnwandan, hóunigirunbalin hátuadi lugundun mabuseerun hamá hasufurirun saragu danme le haweiyadun. Gama lumoun, ayanuhati Hesusu luagu ñeinbei lan “ibagari le magumuchaditi”, kei le aubei warihei lidan Huan 3:16 luma 5:24.

2. Ka lariñagubei kapítulu 6 le tídanbei liliburun Huan luagu ibagari magumuchaditi? (Huan 6:​39, 40).

² Aban weyu, aba ladügün Hesusu milaguru tau fein luma hau úduraü lun léigagüdün saragu milu gürigia.a Le ladügübei wéirigüda lumutu hanigi gürigia ani dimurei le lariñagubei larugan ligía adügübei lúntima taweiridun hanigi. Sigí hamaali meha saragu milu gürigia hagía Hesusu dagá Kafarünaumu, ani ñein lariñaga houn laru beya Galiléa gayara lan háguyugun gürigia lun gabagari hamá aban ibagari magumuchaditi (aliiha huméi Huan 6:​39, 40). Samina humá hawagu hiduheñu humadagu ha féridi humaañabaña lidan óunweni. Arufudati le lariñagubei Hesusu, saragu lan gürigia ha óunwegubaña háguyuguba lan, ani huguya hama hiduheñu gayaraabei hawinwandun lun súnwandan. Lidan kapítulu 6 tidan liliburun Huan, ariñagati Hesusu ábaya dimurei le hénrengubei houn saragu gürigia lun gunfuranda hamani. Akutiha waméi katei le buidu buidu.

3. Ítara kei lariñaguni Huan 6:​51, ka lariñagubei Hesusu luougua?

³ Lárigiñebei líchugun Hesusu éigini houn gürigia lau milaguru le ladügübei, aba hasaminarun tuagu maná to ichugúboun houn hagüchagu. Watu Bíbülia tun maná “fein to siélugiñetu” (Sal. 105:40; Huan 6:31). Yusu lumuti Hesusu tema tani maná lun larufudahan ámuya katei houn. Íbini aban lan idewesei lúmagiñetu Bungiu maná, ha meha éigibarun chülüti dan lun meha hóunwegun (Huan 6:49). Ariñagati Hesusu luagu ligía lan “fein siélugiñetu to tímatimaatu”, “fein to líchuguboun Bungiu”, “fein to íchuguboun ibagari” (Huan 6:​32, 33, 35). Dan lárigiñe, arufuda lumuti Hesusu ka lan idan mítaran tan maná lumoun, dan le lariñagunbei: “Aumeme fein wínwantu tuguya to arariruboun siélugiñe; le éigiti tídangiñe fein tuguya, labagariduba lun súnwandan” (aliiha huméi Huan 6:51). Yuriguagüdarügü lumutiña dimurei le huríu ha. Ida liña lachoururuni Hesusu rarirügü lan siélugiñe ani ligía lan “fein” to tímatimaatu sügǘ tau maná to meha líchuguboun Bungiu lau aban milaguru houn hagüchagu? Aba lariñagun Hesusu fiu dimurei súdiniti houn: “Fein to lunboun níchugunu, núgubu guánarügü”. Ka san labusenrubei Hesusu lariñagun lau burí dimurei le? Busentiwa wasubudiruni óunabagülei, lugundun ítara luba wasubudiruni ka lan adügǘbei lun gayaraabei lan wawinwandun lun súnwandan dandu wagía kei waduheñu. Ariha waméi ka lan uagu layanuha Hesusu.

“FEIN SIÉLUGIÑETU TO TÍMATIMAATU” LUMA LǗGÜRÜGÜ GUÁNARÜGÜ

4. Ka uagu añahein habéi meha ásurutiña ariñaga dan le haganbunbalin le lariñagubei Hesusu?

⁴ Hádangiñe ha aganbubalin Hesusu aba hásurun ariñaga dan le lariñagubei lederegeraali lan lúgubu lun gabagari hamá gürigia. Háfuga saminatiña mosu lan héigini lǘgürügü (Huan 6:52). Ariñagati Hesusu murusun dimurei le wéirigüdati anigi lanwoun le ariñaga láalibei lau lariñagun: “Ninarün hau luagu anhaün lan meigin lídangiñe núgubu, au le Liráü Wügüri, matun humeime nita, mabagaribadün” (Huan 6:53).

5. Ida liña wasubudiruni mama lan meha lamuriahaña Hesusu hama gürigia lun hátuni lita?

⁵ Lidan tidaani Bíbülia ariñagaali meha Bungiu houn gürigia lun meigin hamá hitaü (Agu. 9:​3, 4). Dan lárigiñe, aba láguyuguagüdüni Heowá gumadi le houn ísüraelina lidan Lúrudu le líchugubei houn. Sun ha éigibaña hitaü, hagidarúba “hádangiñe lumutuniña Bungiu” (Fad. 7:27). Arufudahati meha Hesusu houn huríu lun gaganbadi hamá lun Lilurudun Moisesi (Mat. 5:​17-19). Ligía mafiñerun wabéi amuriaha lan hama huríu lun héigini lǘgürügü ni lun hátuni lita. Le linarün katei, lau dimurei aweiridagüdütu anigi le, larufudahaña meha Hesusu houn gürigia ida luba lan hibihin ibagari, “le magumuchaditi” (Huan 6:54).

6. Ka amu katei gayaraabei líderaguniwa gunfurandei layanuhaña lan Hesusu luagu aban hénpulu dan le lariñagunbei lunti lan leiginiwa lǘgürügü ani gurawa ligíame lita?

⁶ Furanguti aban lan meha hénpulu layusurubei Hesusu dan ligía. Mama meha furumiñe wéiyaasu layusurun Hesusu hénpulu, haritagua waméi le lariñagubei tun würi samariana, dan le lariñagunbei tun: “Anhein le átuti lídangiñe duna le níchugubei, masandirundigiaalime mágürabu, ladüga duna le lunbei níchuguni lun, gésesenbei lidan lun líchugun ibagari magumuchaditi lun” (Huan 4:​7, 14).b Mama meha lariñaguña Hesusu tibihiba lan würi to ibagari magumuchaditi láurügü tatun lídangiñe duna le lídangiñeti somu fusu. Ítarameme, mama lariñaguña houn gürigia ha únbaña layanuhan Kafarünaumu hawinwanduba lan lun súnwandan ánhaña eiga lídangiñe lǘgürügü ani gurá hagíame lídangiñe lita.

ÁMUYA DAN, DAN LE LAYUSURUN HESUSU DIMUREI GENEGEGUATI

7. Ka hariñagubei fiu gürigia luagu le lariñagubei Hesusu lidan Huan 6:53?

⁷ Añahein gürigia ariñagutiña le lan lariñagubei Hesusu lidan Huan 6:53 lariñaguñein lan le lunbei ladügǘniwa lidan Ladinerun Aburemei. Hariñagunbalin lira ladüga genegegua lan luáriuagua dimurei le lariñagubei lumoun le ariñaga láalibei (Mat. 26:​26-28). Ariñagatiña sun lan ha achülürübaña lidoun Ladinerun Aburemei mosu lan heigin tídangiñe fein ani gurá hagíame tídangiñe diwéin to ásügürawagüdüwaboun. Inarüni funa san le hariñagubei? Súdiniti lun wasubudiruni óunabagülei lugundun sagü irumu óundaraguatiña saragu míñunu gürigia lidan sun ubóu úara wama lidan Aritaguagülei. Warihibei ámuñegueinarügü dimurei le lariñagubei Hesusu lidan Huan 6:53 lumoun le lariñagubei dan le ladügünbalin Ladinerun Aburemei.

8. Ka idan amu lan bián katei le luáriuagua? (Ariha huméi giñe dibuhu).

⁸ Akutiha wamá bián katei le ámuñegueinarügüti luáriuagua lidan bián sügǘ le. Furumiñeti, ídabuga ani halía lariñagei Hesusu dimurei le lídanbei Huan 6:​53-56? Ariñaga lumuti Hesusu dimurei le hagibugiñe saragu huríu Galiléa lidan irumu 32 lidaaniwagu Kristu. Susereti katei le aban irumu lubaragiñe ladügüni Ladinerun Aburemei Herusalén. Libiaman, ka un layanuha? Houn gürigia ha Galiléabaña. Hiibe-agei gürigia ha únbaña layanuha Hesusu Galiléa, le meha súdinitimabei houn heigin sügǘ lau hamadagua luma Bungiu (Huan 6:26). Ligíati, dan le lariñagunbalin Hesusu dimurei le hénrengubei houn lun gunfuranda hamani, lau lóufudagun aba heferidiruni hafiñen luagu. Íbini fiu hádangiñe lani disipulugu aba mafalarun hamaali lan (Huan 6:​14, 36, 42, 60, 64, 66). Mítaranti le asuseredubei dan ligía lumoun le asuseredubei dan lárigiñe lidan irumu 33, dan le ladügünbalin Ladinerun Aburemei. Lugundun lidan dan ligía añaha meha 11 lani apostolugu luma ha úaraguabaña, íbini ua lan gunfuranda hamani le larufudahabei sunsuinagubei. Gama lumoun, mítarantiña meha kei hiibe-agei gürigia ha Galiléabaña. Chouru hamuti meha apostolugu úaraguatiña ha Hesusu lan Liraübei Bungiu le ñǘbuinbei siélugiñe (Mat. 16:16). Aba lariñagun houn buidu lan hadüga lau lariñaguni dimurei le houn: “Huguya meha úarabaña numa lidan nóuchawagun” (Luk. 22:28). Buídurügüti dimurei le, lun gunfuranda wamani mama lan ligiaméme le lariñagubei lidan Huan 6:53 lumoun dimurei le lariñagubei dan le ladügünbalin Ladinerun Aburemei. Lanwoun le, aniheingua amu katei le lunbei gunfuranda wamani.

GADAN LUMUTIBU DIMUREI LE LARIÑAGUBEI HESUSU

9. Ka un lariñawagúa dimurei le lariñagubei Hesusu dan le ladügünbalin Ladinerun Aburemei?

⁹ Lidan Ladinerun Aburemei ruti Hesusu fein maganatu lébini houn lani apostolugu ani aba lariñagun houn lúgubu lan mini tubéi fein tuguya. Lárigiñe aba lásügüragüdünu diwéin haganagua ani aba lariñagun houn lita lan mini tubéi “le lánina iseri daradu” (Mar. 14:​22-25; Luk. 22:20; 1 Ko. 11:24). Wéiriti lisudinin lagumuhóun katei le ladügübei Hesusu. Mama hama sun gürigia ladügǘwa iseri daradu le, hámarügüñein “linasiñun Ísüraeli”, mini lan le Ísüraeli le lani Bungiu ha lúnbaña harúeihan luma Kristu “lidan Larúeihan Bungiu” (Ebü. 8:​6, 10; 9:15). Lidan dan ligía uati meha gunfuranda hamani apostolugu le mini lubéi daradu le. Hanuadirúa meha lau sífiri sandu lun gayara lan gafanran hamá lidan iseri daradu lun hañuurun úara luma Hesusu sielu lun harúeihan (Huan 14:​2, 3).

10. Ka idan amu lan dimurei le lariñagubei Hesusu Galiléa lumoun le lariñagubei dan le ladügünbalin Ladinerun Aburemei? (Ariha humóun giñe iyawaü).

¹⁰ Dimurei le lariñagubei Hesusu lidan Ladinerun Aburemei lariñaguñein houn fiu gürigia. Fiu gürigia hagía, hagía apostolugu úaraguatiña ha lúmabaña lidan adineruni ligía (Luk. 12:32). Dandu hagía kei amu gürigia ha lúnbaña hóundarun hamoun, mosu heigin tídangiñe fein ani gurá hagíame tídangiñe diwéin. Sun hagía gabarabaña sielu luma Hesusu. Mítaranti le lariñagubei houn lani apostolugu dan ligía lumoun le lariñagubei houn saragu gürigia Galiléa. Lau le lariñagubei Galiléa layanuhaña meha houn saragu gürigia.

11. Ida liña wasubudiruni mama lan houn fiu gürigia abiniruni le uágubei layanuha Hesusu Galiléa?

¹¹ Dan meha le Galiléañein lubéi Hesusu lidan irumu 32, layanuhaña meha hama huríu ha amuriahabaña éigini luma. Lidan kesi le, layanuhaña meha houn luagu éigini le buídutimabei le meha lunbei líderaguniña ibihei ibagari magumuchaditi. Lanwoun lira, afuranguagüdati houn gayaraabei lan háguyugun gürigia lidan lagumuhóun weyu lun habagaridun lun súnwandan. Mama meha layanuhaña luagu abiniruni le lunbei meha habihini fiúrügü gürigia kei meha lariñaguni dan le ladügünbalin Ladinerun Aburemei. Layanuhaña meha Hesusu ñein Galiléa luagu aban luwuyeri abiniruni le lunbei hibihini sun gürigia. Ligía lariñagunbei: “Le éigiti tídangiñe fein tuguya, labagariduba lun súnwandan. Fein to lunboun níchugunu, núgubu guánarügü, níchugubei lun gayaraabei lan habagaridun gürigia” (Huan 6:51).c

12. Ka emegeirúbei lun gayara lan libihín ibagari magumuchaditi le uágubei layanuha Hesusu Galiléa?

¹² Mariñagunti Hesusu houn huríu hagía heresibirubei lan sun gürigia abiniruni le ítaraguarügü, ni ha wínwanhañabaña lidan binadu dan ni ha agüriahóubaña lárigiñe. Le lariñagubei houn hárügübaña lan éigitiña tídangiñe fein, mini lan lira, ha afiñebaña luagu. Saminatiña saragu gürigia ha ariñagubaña hawougua kristiánugu hamá lun lan hasalbarun buídurügü lan hafiñerun luagu Hesusu luma lun harihini keisi Hasalbaragüle (Huan 6:29). Le linarün katei, añahein hádangiñe ha únbaña layanuha Hesusu Galiléa afiñetiña meha luagu, ani lárigiñe aba hígiruni. Kati uagu hígirei?

13. Ka meha hemegeirubei gürigia lun aban hamá lani Hesusu disipulugu ha inarünitiña?

¹³ Hiibe-agei gürigia ha léigagüdübaña Hesusu aranseñu haña lun hafalaruni ánheingubeirügü líchiga sun le hemegeirubei houn. Le meha hínsiñetimabei houn lareidaguagüdüniña, hibihin éigini máfaagunga hagía luagu, lúmati lun larufudahani le habusenrunbei haganbun houn. Lau sun lira, arufudahati Hesusu mégeiwati lan ladügǘn amu katei lun aban hamá lani disipulugu ha inarünitiña. Mama meha liábiña Hesusu ubouagun lun líchuguni le hemegeirubei gürigia houn lun hawinwandun. Mosu meha hánharun gürigia ha lun agunbirahani le ladügübei Hesusu houn, lidan amu dimurei, hánharun lun le larufudahabei houn luma lun gaganbadi hamá lun (Huan 5:40; 6:44).

14. Ka lunbei wadügüni lun wasagarun buiti lídangiñe lúgubu luma lita Hesusu?

¹⁴ Ariñagati Hesusu mosu lan hafiñerun gürigia luagu. Ka mini lubéi le? Mini lan, hafiñerun úgubu lan le lunbei ladagaragüdüni luma hitaü le lunbei láwiyuruni ligíaba lan adüga lun hibihin ibagari magumuchaditi. Ítara kei megei hamani huríu afiñeni ligía, ítara liña giñe megei wamani uguñe weyu (Huan 6:40). Lun gayara lan wasagarun buiti lídangiñe lúgubu Hesusu luma lita le úagubei layanuhóua lidan Huan 6:53 mosu wafiñerun luagu asalbaruni. Gayaraabei hibihini sun gürigia lubuidun chansi le (Efe. 1:7).

15, 16. Ka katei súdiniti wafurendeirubei lídangiñe kapítulu 6 le tídanbei liliburun Huan?

¹⁵ Wéiriti lisudinin kapítulu 6 le tídanbei liliburun Huan dandu woun kei houn waduheñu. Arufudati weiri lan hínsiñe gürigia lun Hesusu. Ñein Galiléa areidaguagüdati sanditiña, ayanuha ligía houn gürigia luagu Larúeihan Bungiu ani hóugüda laaña (Luk. 9:11; Huan 6:​2, 11, 12). Mámarügüñein giñe lira ladüga, arufudahati giñe houn ligía lan “fein to íchuguboun ibagari” (Huan 6:​35, 48).

¹⁶ Gürigia ha únbaña lagúara Hesusu “amu mudún” méigintiña tídangiñe fein matun hagía tídangiñe diwéin to ásügürawagüdüwaboun dan le ladügǘn Ladinerun Aburemei sagü irumu (Huan 10:16). Gama lumoun, sagatiña buiti lídangiñe úgubu le lederegerubei Hesusu luma lídangiñe hitaü le láwiyurubei luagu hafulesein. Ida liña hasagarun buiti lídangiñe katei le? Lau hafiñerun luagu sákürifisiu le ladügübei (Huan 6:53). Ánhañati ha éigibaña tídangiñe fein ani gurá hagía tídangiñe diwéin harufuduñein hádangiñetiña lan lílana iseri daradu ani gafanranbaña lan lidan Arúeihani sielu. Ligíati, wéiriti lebegi kapítulu 6 le tídanbei liliburun Huan woun súngubei, meberesenga anhein kristiánugu lubéi ha anuadirúaaña wagía o hádangiñetiwa lan amu mudún. Arufudati súdini lan lun wafiñerun luagu Hesusu lun wibihin ibagari magumuchaditi.