Áluaha waméi uburugu le lunbei ladurarun lun súnwandan

1. Ka lariñagubei Hesusu luagu le lunbei lasuseredun lun uburugu Herusalén lidan furumiñeti sígulu?

FIU weyu lubaragiñe lounwen Hesusu, ruti aban profesía houn lani disipulugu. Gúnfuliti profesía le luagu furumiñeti wéiyaasu lidan furumiñeti sígulu dan le lagünrinchawagunbei Herusalén úara tuma litenpulun. Aba lariñagun houn: “Danme harihin geyegua hamá lan súdaragu uburugu Herusalén”, “lunti hanurahan” lau lóufudagun (Luk. 21:20). Ani gúnfuliti dimurei le lariñagubei Hesusu: dan le hegeyedaguni súdaragu rómana uburugu Herusalén (Luk. 21:​21, 22).

2. Ka lariñagubei apostolu Pábulu houn kristiánugu ha Hudeabaña luma houn ha Herusalénbaña?

² Fiu irumu lubaragiñe hegeyedaguni súdaragu rómana uburugu Herusalén, abürühati apostolu Pábulu aban gárada houn kristiánugu ha Herusalénbaña luma houn ha Hudeabaña lau aban ariñahani súdiniti. Subudi wamutu gárada to uguñe weyu kei gárada to abürühóuboun houn ha adimurehabalin ebüréu. Tidan gárada to, ruti Pábulu adundehani houn le lunbei líderaguniña lun haranserun lubá le lunbei liabin: lagünrinchawagun Herusalén. Anhein busén habéi kristiánugu hagía hesefuruni habagari, mosu meha aranseñu hamá lun hígirunu haban luma hani bísinisi hárigiñegua lun hanurahan. Dan le layanuhanbei apostolu Pábulu luagu uburugu Herusalén, ariñagati: “Lidan ubóu le, úati ni aban uburugu wama le aduraruti lun sun dan; wáluahañein uburugu le lunbei ñéinhinbadiwa lan” (Ebü. 13:14).

3. Katei san “lubuidun uburugu le derebugubei ebu”, ani ka uagu lunti lubéi wáluahani?

³ Másiñati adüga hamá gürigia bula hau kristiánugu ha anurahabaña Herusaléngiñe luma Hudeagiñe gama lumoun, lau hadügüni lira, sefu hamuti habagari. Uguñe weyu, adügǘwati giñe bula wau ladüga michu wamani wafiñen luagu seinsu ani mafiñen wagía luagu haranserubei lan gürigia turobuli le yaabei ubouagu. Ka uagu mafiñen wabéi? Ladüga subudi wamuti madurabei lan ubóu le lun súnwandan ani wáluahañein “lubuidun uburugu le derebugubei ebu”, luma “uburugu le lunbei ñéinhinbadiwa lan”. Mini lan uburugu ligía, Larúeihan Bungiu (Ebü. 11:10; Mat. 6:33).a Lidan aturiahani le, wakutihaba fiu lídangiñe adundehani le labürühabei apostolu Pábulu houn kristiánugu ebüréu. Lábugiñe kada tema, warihuba: 1) ida liña lan meha líderaguniña adundehani le kristiánugu ha lun hasigirun áluahei “uburugu le lunbei ñéinhinbadiwa lan”, 2) ida liña lan meha líderaguniña Pábulu lun haranserun lubá lagünrinchawagun Herusalén lúmati 3) ka lan wafurendeirubei lídangiñe adundehani le, le gayaraabei líderaguniwa lubá le lunbei lasuseredun lidan wadaani.

AFIÑE WAMÁ MAWEIYASUNBEI LAN HEOWÁ ÍGIRAWA

4. Ka meha san uagu súdini lubéi uburugu Herusalén houn kristiánugu?

⁴ Súdiniti meha uburugu Herusalén houn kristiánugu. Ka uagu? Ladüga ñeinñein lan meha furumiñe damuriguaü le agumeserubei lidan irumu 33. Lanwoun lira, lidan uburugu ligía, ñéinñanu meha giñe lílana sétanu le arihibei lau apurichihani lidan dan ligía. Luéigiñe amu oubaü, ñein meha hawinwanda saragu kristiánugu ani gíbeeli meha hamegegun. Lau sun lira, ariñagati meha Hesusu houn lánigu mosu lan meha hanurahan Herusaléngiñe luma Hudeagiñe (Mat. 24:16).

5. Ka ladügübei Pábulu lun líderaguniña kristiánugu hagüra lun aranseñu hamá?

⁵ Busenti meha Pábulu lun aranseñu hamá kristiánugu hagía lun hanurahan Herusaléngiñe. Ligía meha busén lubéi lun harihini kristiánugu hagía uburugu Herusalén kei meha larihini Heowá. Aba laritaguagüdüniña Pábulu magundanhali lan buga Heowá ni tau ténpulu, ni hau fádirigu ni lau adagaragüdüni le meha adügǘbei ñein (Ebü. 8:13). Ani hiibe-agei gürigia ha erederubaña Herusalén máhatiña meha luagu Hesusu lan Mesíasi le füramasewabei. Mámaali buga Herusalén fulasu le ñeinba lubéi láhudurawagua lun Heowá lugundun lagünrinchawagúa buga dandu Herusalén kei litenpulun (Luk. 13:​34, 35).

6. Ka uagu lidan lubéi dan lachülüra adundehani le líchugubei Pábulu houn kristiánugu hagía le wadarirubei lidan Ebüréu 13:​5, 6?

⁶ Dan meha le labürühanbarun Pábulu gárada houn ebüréu, aban meha uburugu awanseti Herusalén lidan dan ligía. Ariñagati aban rómana le abürühabei luagu Herusalén, “ligía lan meha uburugu le wéiribei laganbahóuniwa luagu lidan dan ligía”. (Historia Natural, libro V, traducción de Gerónimo de Huerta). Sagü meha irumu aweiyasuhatiña meha huríu ha erederubaña lidan ámuñegueinarügü fulasu lun houdin Herusalén efeduha lun Bungiu, ani adügatiha katei le lun lebelurun saragu seinsu lidoun uburugu ligía. Chóuruti adüga lan katei le lun hagañeirun kristiánugu ha awinwandubaña ñein saragu seinsu. Másiñati ligía lan lariñagubei apostolu Pábulu houn: “Míchiga huméi hínsiñehabu luagun seinsu; gunda humá lau le húmati”. Ani lárigiñe aba layusurunu Lererun Bungiu lun laritaguagüdüniña luagu aban füramasei le ñein lubéi lariñaga Heowá: “Nóunigirubadibu; mígirun nubadibu” (aliiha huméi Ebüréu 13:​5, 6; 2 Lur. 31:6; Sal. 118:6). Ani lidan dan lachülüra aritaguagülei le houn kristiánugu ha Herusalénbaña hama houn ha Hudeabaña. Ka uagu? Lugundun lárigiñe heresibirunu gárada to, mosu meha hígirunu haban, hani bísinisi luma sun hámati. Mosu meha hagumeseruni habagari lidan amu fulasu ani hénrengubei meha katei le houn.

7. Ka uagu lunti lubéi wederebudagüdüni wafiñen luagu Heowá lúmagiñe guentó?

⁷ Ida luba lahuudun ariñahani le woun uguñe weyu? Ítara kei kristiánugu ha lánina furumiñeti sígulu, lunti agagudúañu wamá ani aranseñu wagíame (Luk. 21:​34-36). Kaba ubá waransera? Lubá “saragu asufuriruni”, le lunbei lagumuchun danme le lagünrinchawagun lagübüri ubóu le lábugiñebei lubafu Mafia (Mat. 24:21). Lídanme dan ligía, másiñati mosu lanme wígiruni sun wamegegun wárigiñegua lau wíchuguni wafiñen sunsuinagubei luagu maweiyasunbei lan Heowá ígirawa. Íbini magumeserungili lan saragu asufuriruni, gayaraati warufuduni lúmagiñe guentó afiñe wamá luagu Heowá sunsuinagubei. Álügüdagua wamá woungua: “Arufudati san le nabusenrubei nibihin luma le nanúadirubei mama lan luagu seinsu nafiñera, afiñe nan luagu füramasei le ladügübei Heowá lóunigirubadina lan?” (1 Tim. 6:17). Líderagubadiwa hénpulu le hígirubei kristiánugu lánina furumiñeti sígulu lun úaragua wamá lídanme lidaani saragu asufuriruni. Lau sun lira, wéiritimabei lénrengunga le lunbei wagagibudagun luma lidan saragu asufuriruni luéi le hásügürübei kristiánugu lánina furumiñeti sígulu. Ligíati, danme le lagumeserun saragu asufuriruni, ida luba san wasubudiruni kaba lan wadüga?

GAGANBADI WAMÁ HOUN HA ADUNDEHABALIWA

8. Ka méhati adundehani líchugubei Hesusu houn lani disipulugu?

⁸ Fiu irumu lárigiñe lóunahanu Pábulu gárada houn ebüréu, aba hegeyedaguni súdaragu rómana uburugu Herusalén. Dan le harihini kristiánugu katei le, subudi hamaali meha lidaanihali lan hanurahan ladüga lagünrinchawagúa lan Herusalén (Mat. 24:3; Luk. 21:​20, 24). Gama lumoun, halíñounbametiha hanurahan? Ariñagarügüti Hesusu: “Hámeti gürigia ha Hudeabaña, lunti hanurahan luagun burí wübü” (Luk. 21:21). Keiti le gibe lubéi wübü geyegu lau Herusalén, ida lubati hasubudiruni kaba lan wübü ñéinhinba lubéi hanurahan?

9. Ka meha uagu gayara lubéi hálügüdagun fiu kristiánugu houngua halíñounba lan hanurahan? (Ariha humóun giñe mapa).

⁹ Gíbeti meha fulasu le buiti lun hanurahan kristiánugu ñeinhin: kéiburi , wübü burí le Samariabei, wübü burí le Galiléabei, wübü Erümón, wübü burí le Líwanubei, lúmati wübü burí le loubafurugubei duna Hordán (ariha humóun mapa). Genegeti meha weiri lan lichourun fiu lídangiñe uburugu burí le lídanbei wübü ligía lun lanurahóun ñeinhin. Gamala aban meha lídangiñe uburugu ligía, lugundun lábuluguñein meha wübü ani hénrenguti meha lachülürǘniwa ñeinhin. Saminatiña meha fiu huríu buidu lan uburugu ligía lun lanurahóun ñeinhin. Gama lumoun, aba hábürühan rómana luagu Gamala, ani günringua haméi ani hilaguatiña saragu lílana Gamala.b

10, 11. a) Ida liña funa san ladundehaniña Heowá lumutuniña? (Ebüréu 13:​7, 17). b) Ida liña lidin houn ha gaganbadibaña? (Ariha huméi giñe dibuhu).

¹⁰ Ligíati, ida liña hasubudiruni kristiánugu halíñounba lan hanurahan? Genegeti Heowá lan adundehabaliña ha alidihabalin damuriguaü lun hadundehaniña kristiánugu ha. Dan lárigiñe, ariñagati aban wügüri le gíribei Eusebio le abürühabei luagu binadu sügǘ “ariñaga lan Bungiu houn kristiánugu ha Herusalénbaña lun háfuridun Herusaléngiñe lubaragiñe wuribu lun houdin Pella, aban uburugu le Pereabei” (Historia eclesiástica, tomo I, traducción George Grayling). Buiti meha uburugu Pela lun houdin kristiánugu ñeinhin lugundun madiseti meha lerederun luéi Herusalén ani ménrengunbei meha aweiyasuhani le lunbei hadügüni lun hachülürün ñeinhin. Luéigiñe le aban oubaü, mama meha huríu hiibe-agei gürigia ha erederubaña Pela, ligíati mádaragun habéi houngua lidoun hawuribuhan huríu hama rómana (ariha humóun mapa).

¹¹ Abürühati meha Pábulu houn kristiánugu, aba lariñagun houn: “Gaganbadi humá houn ha arufudahabaña hun” (aliiha huméi Ebüréu 13:​7, 17). Ha afalarubalin adundehani ligía, aba hanurahan luagu burí wübü ligía. Keiti gaganbadi hamá, sefu hamuti habagari. Adügati le asuseredubei lun hachoururuni mígirun lubaña lan Bungiu ha agurabahabalin “uburugu le derebugubei ebu”, mini lan, Larúeihan Bungiu (Ebü. 11:10).

12, 13. Ida liña ladundehaniña Heowá lumutuniña lídantima lidaani lénrengunga?

¹² Ida luba lahuudun ariñahani le woun uguñe weyu? Yusu lumutiña Heowá ha adundehabaliwa uguñe weyu lun líchugun adundehani furanguti woun. Ayanuhatu Bíbülia luagu saragu abahüdaguni le arufudubalin yusu lan Heowá saragu wügüriña úaraguatiña lun líchugun adundehani houn lumutuniña lídantima lidaani lénrengunga (2 Lur. 31:23; Sal. 77:20). Furanguti giñe warihini uguñe weyu anihagua lan Heowá ayusuraña ha alidihabaliwa lun líchugun .adundehani woun.

¹³ Kei hénpulu, dan le lagumeserunbei sandi COVID-19, ru hamuti ha alidihabaliwa adundehani le wemegeirubei woun. Resibitiña wéiyaaña lidan afiñeni adundehani luagu ida luba lan hadügüni adamuridaguni lun gayara lan hasigirun íbirigu áhuduragua lun Heowá. Fiu hati lárigiñe, aba ladügǘn aban adamurini wéiriti le ásügürawagüdübei luéigiñe Internet, bigibigitu luma tuéigiñe radiu lidan lóugiñe 500 iñeñein, aban katei le meha madügünñahawagili. Lidan sun lidaani sandi ligía, resibi wamuti le wemegeirubei lun wasigirun áhuduragua lun Heowá. Adügati katei le lun lidan wamá aban. Meberesenga le lunbei lasuseredun, gayaraati wachoururuni lasigiruba lan Heowá íderaguaña ha alidihabaliwa lun buidu lan le lunbei hanúadiruni. Amu luéi wafiñerun luagu Heowá luma lun gaganbadi wamá lun lilurudun, ka amu katei lunbei wadügüni lun aranseñu wamá lun wasubudiruni kaba lan wadüga lidan lidaani saragu asufuriruni?

ARUFUDA WAMÁ ÍNSIÑENI WÁMAGUA KEI IDUHEÑU ANI RESIBI WAMAÑA BUIDU

14. Según Ebüréu 13:​1-3, ka igaburi lunbei harufuduni kristiánugu eibu meha layarafadun lagünrinchawagun uburugu Herusalén?

¹⁴ Danme lagumeserun saragu asufuriruni, mósume warufudun ínsiñeni wámagua lidan dan ligía sügǘ lau amu dan. Mósume wasigiruni hani kristiánugu ha awinwandubaña Hudéa luma Herusalén hénpulu, ha meha arufudubaña ínsiñeni hámagua súnwandan (Ebü. 10:​32-34). Gama lumoun, eibu hayarafadun lun lidaani lagünrinchawagun Herusalén, mosu meha harufudun ínsiñeni hámagua keisi iduheñu lidan dan ligía sügǘ lau amu dan (aliiha huméi Ebüréu 13:​1-3).c Ani ligiaméme lunbei wadügüni lídanme lidaani saragu asufuriruni.

15. Ka uagu mosu lubéi meha harufudun kristiánugu ebüréu ínsiñeni kei iduheñu hámagua ani resibigua hagíame hámagua buidu?

¹⁵ Dan le hegeyedagunbalin súdaragu rómana uburugu Herusalén ani sódini aba houdin, meferidirun hamuti kristiánugu hagía chansi lun hanurahan. Gama lumoun, fiúrügüñein ílagu gayara hanügün hámagua (Mat. 24:​17, 18). Dan le haweiyasuhanbei lidoun fulasu le ñeihinbaña lubéi, mosu meha dipeni hamá hawagu amu íbirigu lun híderaguniña. Chóuruti meha megei hamá íbirigu ha anurahabaña aban fulasu lun hawinwandun, daüguaü luma éigini. Lau híchuguni kristiánugu ha le hemegeirubei hábirigu houn, harufuduña meha aban ínsiñeni kei iduheñu hámagua (Titu 3:14).

16. Ida luba warufudun ínsiñeni houn wábirigu? (Ariha humóun giñe iyawaü).

¹⁶ Ida luba lahuudun ariñahani le woun uguñe weyu? Ínchaha lumutiwa ínsiñeni lun wíderaguniña wábirigu dan le hemegeiruni. Aranseñu haña saragu lubúeingu Heowá lun híderaguniña hábirigu lun hasigirun áhuduragua lun Heowá luma lun híchuguni sun le hemegeirubei houn ladüga mosu hanurahan hábiñegiñe ladüga wuribu o ladüga chagaguaü le lígirubei liñawan dan. Ariñagatu aban íbiri to anurahaboun Ukraniagiñe ladüga wuribu: “Ariha wamaali ida liña lan ladundehaniwa Heowá ani íderagua lawa lau layusuruniña íbirigu. Buiti heresibiruniwa íbirigu ani íderagua hamutiwa saragu, íbirigu ha ukraniabaña, ha ungüríabaña, hama ha yámanibaña!”. Ídehatiwa luma Heowá lun lóunigiruniña íbirigu dan le geresibiradi wamá houn buidu (Ari. 19:17; 2 Ko. 1:​3, 4).

17. Ka uagu súdini lubéi lun wafurendeirun arufuda ínsiñeni kei iduheñu lúmagiñe guentó houn wábirigu luma lun weresibiruniña buidu?

¹⁷ Uguñe weyu súdiniti lun wíderagun wámagua, gama lumoun, súdinitimabei wadügüni ámuñegü (Abak. 3:​16-18). Ligía anihán lubéi Heowá arufudaha woun lúmagiñe guentó lun hínsiñe hamá wábirigu woun kei waduheñu lun buidu lan weresibiruniña lugundun megei wabéi igaburi burí le lidan lidaani saragu asufuriruni.

KABA ASUSEREDA ÁMUÑEGÜ?

18. Ida luba wáyeihaniña kristiánugu ebüréuna?

¹⁸ Kristiánugu ha anurahabaña Herusaléngiñe sefu hamuti habagari dan le lagünrinchawagunbei uburugu ligía. Ígira hamuti hageira, lau sun lira, mígirun lumutiña Heowá. Ida luba wáyeihani hani hénpulu? Lau gaganbadi wamá lun adundehani lunbei líchugun woun, íbini ibidiñe lan woun kábatima lan asusereda ámuñegü. Gama lumoun, ítara kei hagía anihein giñe adundehani le líchugubei Hesusu wama lun aranseñu wamá, lun gaganbadi wamá lun adundehani burí le (Luk. 12:40). Anuhoungua giñe gárada to labürühaboun Pábulu houn kristiánugu hagía ani húugiru woun uguñe weyu. Lanwoun lira, füramaseti giñe Heowá woun maweiyasunbei lan ígirawa (Ebü. 13:​5, 6). Ligíati, sigí wamá áluahei uburugu le lunbei ladurarun lun súnwandan, mini lan, Larúeihan Bungiu. Anhein wadüga ítara, wibihubei lubuidun burí abiniruni le lunbei líchuguni Heowá woun lun súnwandan (Mat. 25:34).