Génesis

4 ‹Rïn xtinbʼän chë ri awijatzul xkekʼiyär achiʼel wä ri chʼumilaʼ ri ye kʼo chkaj y xtinyaʼ chkë awijatzul jontir re ilew reʼ; y jontir ri tinamït ri ye kʼo chwäch le Rwachʼlew xtinyaʼ utzil pa kiwiʼ xa rma awijatzul rït›. 8 Taq xqʼax ri tiempo, Abimélec, ri qʼatöy tzij pa kiwiʼ ri filisteos, najin wä ntzuʼun äl pa ventana y xtzʼët chë Isaac najin wä nuqʼetej Rebeca, ri rxjayil. 12 Chrij riʼ, Isaac xuʼän rtkoʼn chpan ri tinamït riʼ, y chpan ri jnaʼ riʼ kan kʼïy rwäch rtkoʼn xrïl, 100 mul más chwäch ri xtïk qa, rma Jehová najin wä nuyaʼ utzil pa rwiʼ. 13 Ri achï xbʼeyomär y, rma kan ütz wä ntel jontir chwäch, kan kʼïy rbʼeyomal xjeʼ. 14 Ryä xejeʼ kʼïy rkarneʼl, rwakx chqä xejeʼ ye kʼïy rsamajelaʼ. Ye kʼa ri filisteos kan itzel wä nkinaʼ che rä rma ri kʼo rkʼë. 15 Rma riʼ, ri filisteos xkimüq qa ri pozos ri xkikʼöt qa rsamajelaʼ Abrahán, ri rtataʼ Isaac, taq kʼa kʼäs na wä. 16 Chrij riʼ, Abimélec xuʼij che rä Isaac: «Jät äl näj chqë röj, rma kan kʼïy chik ri achkë kʼo awkʼë rït chwäch ri kʼo qkʼë röj». 17 Rma riʼ, Isaac xel äl chpan ri tinamït riʼ, xapon chwäch ri jyuʼ ri kʼo Guerar y xkanaj qa chriʼ. 18 Isaac xkʼöt chik jmul ri pozos ri xekʼot taq kʼa kʼäs na wä Abrahán, ri rtataʼ, ye kʼa xa xemuq qa kimä ri filisteos taq kamnäq chik Abrahán. Chqä xyaʼ chik jmul kibʼiʼ kan achiʼel ryaʼon qa rtataʼ. 19 Taq ri rsamajelaʼ Isaac najin wä yekikʼöt jül chwäch ri jyuʼ akuchï ye kʼo wä, xkïl jun pozo ri kʼo yaʼ chpan ri ütz ntej. 20 Ye kʼa ri ajyuqʼ ri ye kʼo Guerar xkichäp chʼaʼoj kikʼë rsamajelaʼ Isaac chqä nkiʼij wä chkë: «¡Le yaʼ laʼ qchë röj!». Rma riʼ, Isaac, Ésec rbʼiʼ xyaʼ ri pozo riʼ, rma xkiʼän chʼaʼoj chrij. 21 Y xkichäp rkʼotik jun chik pozo y xkiʼän chqä chʼaʼoj chrij ri pozo riʼ. Rma riʼ, Isaac, Sitná rbʼiʼ xyaʼ qa. 22 Jbʼaʼ chrij riʼ, ryä xel äl chriʼ y xkʼöt chik jun pozo, ye kʼa chrij ri pozo riʼ ma xkiʼän ta chik chʼaʼoj. Rma riʼ, ri rbʼiʼ xyaʼ qa ya riʼ Rehobot chqä xuʼij: «Rma Jehová, röj kʼo jontir reʼ qkʼë. Ryä ryaʼon kʼïy qilew chqä rbʼanon chë nqkʼiyär». 23 Chrij riʼ xjoteʼ äl Beer-Seba. 24 Ri aqʼaʼ riʼ Jehová xkʼüt riʼ chwäch chqä xuʼij che rä: «Rïn yïn ri rDios Abrahán, ri atataʼ. Ma taxiʼij ta awiʼ, rma rïn yïn kʼo awkʼë. Rïn xtinyaʼ utzil pan awiʼ chqä xtinbʼän chë xtkʼiyär ajatzul rma Abrahán, ri nsamajel».