2 Timoteo

2 tatzjoj rchʼaʼäl Dios; kan tabʼanaʼ yän riʼ taq ütz rbʼanon ronojel chqä taq kʼo kʼayewal; keʼaqʼilaʼ ri ma ütz ta yeʼajin che rä, kachapon chkë chqä keʼapixabʼaj, ye kʼa ma tikʼo ta akʼuʼx chubʼanik riʼ chqä kan pa rbʼeyal keʼatjoj ri nkʼaj chik. 3 Rma xtbʼeqä ri qʼij taq ryeʼ ma xtkajoʼ ta xtkikʼoxaj ri ütz taq naʼoj; pa rkʼexel riʼ, xa xtkiʼän ri nkirayij chqä xkekikanuj achkë xketjon kichë. Ri achkë xketjon kichë xa xuʼ xtkiʼij chkë ri nkajoʼ nkikʼoxaj. 4 Ryeʼ ma xtkiyaʼ ta chik kixkïn chkë ri kantzij taq naʼoj chqä xa chkij tzʼukün taq naʼoj xtbʼä wä kan. 5 Ye kʼa rït kan taquʼ na jontir ri yeʼaʼän, keʼakochʼoʼ ri kʼayewal, ma tayaʼ ta qa rtzjoxik ri utziläj taq rtzjol chqä kan tabʼanaʼ jontir ri nkʼatzin chpan ri samaj ri yaʼon qa pan aqʼaʼ. 6 Rma rïn yïn achiʼel ri vino ri ya najin chik ntix pa rwiʼ ri altar, y ri qʼij rchë nkolotajik kan naqäj chik kʼo pä. 7 Rïn ntjon pä nqʼij chpan ri utziläj chʼaʼoj, xinkʼïs ri kʼaqöj anin, nkʼutun pä chë kʼo nkʼuqbʼäl kʼuʼx. 8 Komä xa xuʼ chik nyoʼen rchë nyaʼöx ri corona rchë ri chojmilal chwä. Ri corona ri xtyaʼöx chwä rma ri Ajaw, ri utziläj qʼatöy tzij, chpan ri qʼij riʼ rma nnman pä rtzij. Ye kʼa ma xa xuʼ ta chwä rïn, ryä xa kan xtyaʼ chqä chkë jontir ri kan rkʼë ronojel kan kiyoʼen wä ri qʼij ri xtkʼüt pä riʼ. 9 Tabʼanaʼ jontir ri kʼo pan aqʼaʼ rchë yapë yän chi ntzʼetik. 11 Xa xuʼ Lucas kʼo wkʼë. Takʼamaʼ pä Marcos taq xkapë, rma kan nkʼatzin rtoʼik chwä. 16 Ri naʼäy mul xikʼwäx pacheʼ majun ta jun xjeʼ wkʼë, jontir xinkiyaʼ qa. Kʼo ta nwajoʼ rïn chë ma xtqʼat ta tzij pa kiwiʼ rma ya riʼ. 17 Ye kʼa, ri Ajaw ma xiryaʼ ta qa chqä xyaʼ wchqʼaʼ, rchë ke riʼ, wmä rïn, xttzjöx ri ütz taq rtzjol chkë jontir winäq, rchë ke riʼ kan chpan jontir tinamït xtkʼaxatäj wä, y kan xikol pa rchiʼ ri köj.