2 Timoteo

3 Ye kʼa tatamaj chë pa rkʼisbʼäl taq qʼij, janina kʼayewal xkejeʼ y kan kʼayewal xtuʼän kikʼwaxik. 2 Rma ri winäq xa xuʼ ryeʼ xtkajoʼ qa kiʼ; xa xuʼ päq xtkajoʼ, xtkinaʼ kiʼ, xtkinmirsaj kiʼ, xtkiyöqʼ Dios, ma xtkinmaj ta rtzij ri kiteʼ kitataʼ, ma xketyoxin ta chqä kaʼiʼ kipaläj, 3 ma xtkikʼüt ta ajowabʼäl, xa xuʼ ryeʼ xtkajoʼ xtnmäx kitzij, xketzʼukü tzij, ma xtkiqʼïl ta kiʼ, ma xtjeʼ ta joyowanïk kikʼë, ma xtkajoʼ ta ri ütz, 4 xa xkeqʼolon chqä ye tïx, kan xtjeʼ nimirsanem pa kan, más xtkajoʼ ri kʼastanen chwäch ri Dios, 5 xtkiʼän chë achiʼel ta nkiyaʼ rqʼij Dios, ye kʼa rkʼë kibʼanobʼal xtkikʼüt chë ma ke riʼ ta; y kikʼë winäq achiʼel riʼ, ma kajeʼ ta. 10 Ye kʼa rït kan abʼanon pä ri nbʼanon pä rïn, achiʼel ri naʼoj xinkʼüt chawäch, ri rbʼanik kʼaslemal nkʼwan, ri xinchaʼ xinbʼän pa nkʼaslemal, ri nkʼuqbʼäl kʼuʼx, ri ma chanin ta npë nyowal, ri rbʼanik yijowan y ri nkochʼon pä, 11 chqä ataman achkë kʼayewal chqä tijöj poqonal nqʼaxan pä, achiʼel ri xinqʼaxaj Antioquía, Iconio chqä Listra. Rïn xinköchʼ jontir ri kʼayewal riʼ, y ri Ajaw xirköl chwäch jontir riʼ. 12 Kantzij na wä, jontir ri nkajoʼ nkikʼwaj jun chöj kʼaslemal chwäch Dios, rkʼë Cristo Jesús, xtyaʼöx chqä kʼayewal pa kiwiʼ. 13 Ye kʼa, ri itzel taq winäq chqä ri yeqʼolon xa más xkebʼä pa nüm, [...] 14 Ye kʼa rït, ma tayaʼ ta qa rbʼanik ri xkʼut chawäch chqä ri naʼoj ri xebʼanö chawä rchë xanmaj, rma ataman achoq chkij xeʼatamaj wä riʼ 15 y chë kan xa xuʼ xataläx ataman pä ri loqʼoläj taq wuj, ri yekowin nkiyaʼ anaʼoj rchë xkakolotäj rma ri akʼuqbʼäl kʼuʼx chrij Cristo Jesús. 16 Ronojel ri kʼo chpan ri Loqʼoläj taq Wuj kan rkʼë Dios petenäq wä y nkʼatzin rchë nqrtjoj, rchë nqrqʼïl, rchë nuchojmij ri ma ütz ta chqä rchë nqrpixabʼaj kikʼë ri ütz taq naʼoj. 17 Rchë ke riʼ, ri rsamajel Dios kan xttamaj chqä xtkowin xtuʼän xa bʼa achkë ütz taq bʼanobʼäl.