Jehová nuyaʼ jun rsamaj Jeremías

Jehová xchaʼ Jeremías rchë ntok profeta chpan ri tinamït Judá. Ryä xtäq Jeremías rchë nbʼeruʼij chkë ri winäq chë tkiyaʼ qa rbʼanik ri ma ütz ta. Pero Jeremías xuʼij reʼ che rä Jehová: «Rïn kʼa yïn kʼajol na, ma yikowin ta yitzjon chkiwäch ri winäq». Jehová xuʼij: «Ma taxiʼij ta awiʼ, rïn xkatintoʼ y xtinbʼij chawä achkë nkʼatzin naʼij».

Jehová xuʼij che rä Jeremías chë kermoloʼ ri yekʼwayon bʼey chpan ri tinamït, tpaxij jun xar chkiwäch chqä tuʼij reʼ chkë: «Ya reʼ xtbʼanatäj rkʼë Jerusalén». Taq ryä xuʼän riʼ, ri achiʼaʼ riʼ xpë kiyowal. Pasjur, jun sacerdote, xchʼäy Jeremías chqä xyaʼ rqʼaʼ raqän pa cepo o chukojöl tzʼalän. Jeremías ma xkowin ta xslon jun aqʼaʼ. Pasjur xresaj äl chkaʼn qʼij. Chrij riʼ Jeremías xuʼij: «Ma nköchʼ ta chik. Ma xtintzjoj ta chik ri rbʼin pä Jehová». ¿Kan xuʼän komä ya riʼ? Manä. Taq Jeremías xquʼ rij riʼ, xuʼij: «Ri rbʼin pä Jehová achiʼel ta jun qʼaqʼ ri kʼo pa wan. Ma yikowin ta nyaʼ qa rtzjoxik». Rma riʼ Jeremías ma xyaʼ ta qa rbʼanik riʼ.

Kʼïy jnaʼ chrij riʼ, xjeʼ jun kʼakʼakʼ rey pa rwiʼ Judá. Ri sacerdotes chqä ri ma ye rprofetas ta Jehová ma nqä ta wä chkiwäch ri nutzjoj Jeremías. Rma riʼ xkiʼij chkë ri yetoʼö ri rey: «Re achï reʼ kʼo chë nkäm». Jeremías xuʼij: «Si yinikamsaj, xtikamsaj jun achï ri majun ta rmak. Rïn xa xuʼ nbʼij ri nuʼij pä Jehová chwä y ma yë ta ri nquʼ rïn». Taq ri yetoʼö ri rey xkikʼoxaj riʼ, xkiʼij: «Re achï reʼ majun rma nkäm».

Jeremías ma xyaʼ ta qa rtzjoxik ri xuʼij pä Jehová che rä, pero ri yetoʼö ri rey kan xkatäj kiyowal chrij. Rma riʼ xkiʼij che rä ri rey chë tkamsaj. Ri rey xyaʼ qʼij chkë rchë nkiʼän riʼ. Rma riʼ xkichäp Jeremías y xkikʼäq chpan jun jül ri nujnäq chë chʼabʼäq rchë nkäm chriʼ. Chpan ri jül, Jeremías eqal xbʼä äl chpan ri chʼabʼäq.

Chrij riʼ, Ébed-Mélec, jun ri nsamäj rkʼë ri rey, xuʼij reʼ che rä ri rey: «Ri yetoʼö awchë xkikʼäq Jeremías chpan jun jül. Si xtqayaʼ qa chriʼ, xtkäm». Ri rey xuʼij che rä Ébed-Mélec chë kerkʼwaj äl 30 achiʼaʼ y tkesaj pä Jeremías. Jeremías majun bʼëy xyaʼ qa rtzjoxik ri xuʼij pä Dios che rä. ¿Tapeʼ chë nawajoʼ yatok achiʼel ryä?