Jerusalén nchup rwäch

Ri tinamït Judá kʼïy mul xyaʼ qa Jehová y xa tyox xyaʼ kiqʼij. Rma riʼ, Jehová xertäq äl kʼïy profetas kikʼë rma nrajoʼ wä yertoʼ. Pero ri winäq ma xkinmaj ta tzij chqä xa yetzeʼen wä chkij. Jehová nrajoʼ wä chë xa xuʼ ryä nkiyaʼ rqʼij. Rma riʼ, ¿achkë xuʼän?

Nabucodonosor, ri rey rchë Babilonia, kʼïy wä tinamït najin yerchʼäk. Ri naʼäy mul xchʼakon chrij Jerusalén xerkʼwaj äl Babilonia ri rey Joaquín, ri achiʼaʼ ri yetoʼö rchë, ri soldados chqä ri nkiʼän achkë jun rkʼë kiqʼaʼ. Ryä chqä xkʼwaj äl ri bʼeyomäl ri kʼo chpan rtemplo Jehová. Chrij riʼ Nabucodonosor xuʼän chë Sedequías xok rey pa rwiʼ Judá.

Pa naʼäy, Sedequías xnmaj rtzij Nabucodonosor. Pero ri ma ye rprofetas ta Jehová chqä ri winäq ri ye kʼo chunaqaj Jerusalén xkiʼij che rä Sedequías chë ma tnmaj ta chik rtzij ri rey rchë Babilonia. Jeremías xuʼij reʼ che rä: «Si ma xtanmaj ta chik rtzij, ri winäq aj Judá xkekamsäx, xtkïl wayjal chqä yabʼil».

Ocho jnaʼ chrij riʼ, ri rey Sedequías ma xnmaj ta chik rtzij ri rey rchë Babilonia chqä xkʼutuj rtoʼik che rä Egipto. Rma riʼ Nabucodonosor xertäq rsoldados chrij Jerusalén. Ri soldados babilonios kʼïy tiempo xejeʼ chrij Jerusalén. Jeremías xuʼij reʼ che rä Sedequías: «Jehová nuʼij chë si nayaʼ qa awiʼ chkiwäch ri babilonios, rït chqä ri winäq ma xkixkäm ta. Pero si ma xtaʼän ta riʼ, ryeʼ xtkiporoj Jerusalén y xkatkikʼwaj äl Babilonia». Sedequías xuʼij: «Ma xtinyaʼ ta qa wiʼ chkiwäch».

Jun jnaʼ rkʼë nkʼaj chrij riʼ, ri babilonios xkiwulaj jun peraj rmuro Jerusalén. Ryeʼ xeʼok apü chpan ri tinamït chqä xkiporoj. Ryeʼ chqä xkiporoj ri templo, ye kʼïy winäq xekikamsaj y kan pa mil xekikʼwaj äl Babilonia.

Sedequías xkowin xanmäj äl, pero ri babilonios xebʼä chrij, xkichäp chunaqaj Jericó y xkikʼwaj äl chwäch ri rey Nabucodonosor. Ri rey xuʼän chë Sedequías xtzʼët taq xekamsäx rkʼajol chwäch. Chrij riʼ xuʼän chë xok moy, xyaʼ pa cárcel y chriʼ xkäm wä. Pero Jehová xuʼij reʼ chkë ri winäq aj Judá: «Taq xkeqʼax 70 jnaʼ, xkixintzolij Jerusalén, ri itinamit».

¿Achkë xbʼanatäj kikʼë ri qʼopojiʼ kʼojolaʼ ri xekʼwäx äl Babilonia? ¿Kʼa xkiyaʼ na komä rqʼij Jehová?