Kajiʼ kʼojolaʼ ri nkinmaj rtzij Jehová

Nabucodonosor xerkʼwaj äl chlaʼ Babilonia ri winäq aj Judá ri kan kʼo kiqʼij. Ryä xyaʼ Aspenaz pa kiwiʼ, jun achï ri nsamäj rkʼë ri rey. Ri rey xuʼij che rä re achï reʼ chë kerkanuj kʼojolaʼ ri majun ta kiyabʼil chqä kan kʼo kinaʼoj chkikojöl ri winäq riʼ. Re kʼojolaʼ reʼ oxiʼ jnaʼ xketjöx rchë nyaʼöx nmaʼq taq samaj pa kiqʼaʼ. Ryeʼ xtkʼatzin wä xtkitamaj nkiskʼij, nkitzʼibʼaj chqä yetzjon ri kichʼaʼäl ri babilonios. Y xtkʼatzin wä xtkitäj rkïl wäy ri nutäj ri rey. Kajiʼ chkë re kʼojolaʼ reʼ ya riʼ Daniel, Hananías, Misael y Azarías. Pero Aspenaz xyaʼ bʼiʼaj babilonios chkë: Beltsasar, Sadrac, Mesac y Abednego. ¿Naquʼ rït chë ri rbʼanik xketjöx re kʼojolaʼ reʼ xtuʼän chë xtkiyaʼ qa Jehová?

Ryeʼ nkajoʼ wä nkinmaj rtzij Dios chqä kitaman wä chë rLey Jehová nuʼij chë ma ütz ta nkitäj jojun chkë ri rkïl wäy ri nutäj ri rey. Rma riʼ xkiʼij reʼ che rä Aspenaz: «Tabʼanaʼ utzil, ma tayaʼ ta chqë ri rkïl wäy ri nutäj ri rey». Pero Aspenaz xuʼij: «Si rïx ma nitäj ta ri najin nyaʼ chiwä y ri rey nutzʼët chë achiʼel ta xa yïx yawaʼ, xkirkamsaj».

Pero Daniel kʼo jun xpë pa rjolon ri ütz nkiʼän. Rma riʼ xuʼij reʼ che rä ri najin nbʼanö kwent kichë: «Tabʼanaʼ utzil, xa xuʼ verduras, ichaj chqä yaʼ tayaʼ chqë chkipan 10 qʼij. Chrij riʼ kojajnamaj kikʼë ri kʼojolaʼ ri najin nkitäj rkïl wäy ri nutäj ri rey». Ri najin nbʼanö kwent kichë ütz xkʼoxaj ya riʼ.

Taq xeqʼax ri 10 qʼij, Daniel y ri oxiʼ ramigos más wä ütz yetzuʼun chkiwäch ri nkʼaj chik kʼojolaʼ. Jehová kan kiʼ rkʼuʼx xuʼän kikʼë rma xkinmaj rtzij. Ryä chqä xtoʼ Daniel rchë nqʼax chwäch achkë yeʼel chë tzij ri achïkʼ chqä ri visiones.

Taq xetjöx yän oxiʼ jnaʼ, Aspenaz xerkʼwaj ri kʼojolaʼ chwäch Nabucodonosor. Ri rey xtzjon kikʼë y xtzʼët chë Daniel, Hananías, Misael y Azarías más wä kinaʼoj chkiwäch ri nkʼaj chik kʼojolaʼ. Rma riʼ xerchaʼ rchë yesamäj chriʼ rkʼë. Ri rey kʼïy mul nukʼutuj wä rnaʼoj chkë chkij jojun ri kan kʼo kiqʼij. Jehová xuʼän chë xjeʼ más kinaʼoj chkiwäch ajnaʼoj taq winäq chqä chkiwäch ri ajqʼijaʼ ri yesamäj rkʼë ri rey.

Tapeʼ Daniel, Hananías, Misael y Azarías ma ye kʼo ta wä pa kitinamit, majun bʼëy xkimestaj ta chë yë wä Jehová kiDios. ¿Y rït? Taq ateʼ atataʼ ma ye kʼo ta awkʼë, ¿xtnatäj chqä Jehová chawä?