Ri ángeles nkiyaʼ rtzjol chë xaläx Jesús

César Augusto, ri nqʼatö tzij pa rwiʼ Roma, xuʼij chë jontir ri judíos nkʼatzin yebʼä chpan ri tinamït ri akuchï xeʼaläx wä rchë nkibʼetzʼibʼaj kibʼiʼ. Rma riʼ, José y María xebʼä Belén, rma rfamilia José aj Belén. Chpan ri tiempo riʼ, María ya njeʼ wä ral.

Taq xeʼapon Belén, ma xkïl ta chik akuchï yekanaj wä. Rma riʼ xekanaj chpan jun jay ri akuchï yeyaʼöx wä ri chköp. Y chriʼ xaläx wä Jesús. María xpïs chkipan bʼyuʼl taq tzyäq chqä eqal xyaʼ qa chpan jun ri akuchï yewaʼ wä ri chköp.

Chunaqaj Belén, ye kʼo wä jojun ajyuqʼ pa jyuʼ ri najin wä yekichajij kikarneʼl chaqʼaʼ. Chaq kʼateʼ, jun ángel xkʼüt pä riʼ chkiwäch y jun saqïl ri petenäq rkʼë Jehová xsaqirsaj akuchï ye kʼo wä. Ri ajyuqʼ kowan xkixiʼij kiʼ, pero ri ángel xuʼij: «Ma tixiʼij ta iwiʼ, rma nkʼamon pä ütz taq rtzjol. Re qʼij reʼ xaläx ri Mesías chriʼ Belén». Chaq kʼateʼ, xeqʼalajin pä kʼïy ángeles chlaʼ chkaj ri xkiʼij: «Tyaʼöx rqʼij Dios ri kʼo chkaj, y chwäch le Rwachʼlew, jnan tbʼanaʼ kiwäch ri winäq rkʼë Dios». Chrij riʼ, ri ángeles xebʼä äl. ¿Achkë xkiʼän ri ajyuqʼ?

Ryeʼ xkiʼij: «Joʼ Belén komä yän riʼ». Rma riʼ xebʼä Belén y xkïl José y María chqä ri neʼy chpan ri jay ri akuchï yeyaʼöx wä ri chköp.

Ri xekʼoxan ri xuʼij ri ángel chkë ri ajyuqʼ xel kikʼuʼx. María xquʼ rij ri xuʼij ri ángel riʼ y majun bʼëy xmestaj ta. Ri ajyuqʼ xetzolin kikʼë kikarneʼl y xetyoxin che rä Jehová rma jontir ri xkikʼoxaj chqä xkitzʼët.