Jehová nuchajij Jesús

Ri winäq ri ye kʼo pa este che rä Israel nkinmaj wä chë ri estrellas nkikʼüt abʼey. Kʼo jun aqʼaʼ, jojun chkë ri winäq riʼ xkitzʼët chë chkaj najin nslon jun ri achiʼel ta jun estrella ri kowan ntzʼitzʼan. Rma riʼ xkitzeqelbʼej. Ri estrella riʼ xerkʼwaj kʼa Jerusalén. Ri achiʼaʼ riʼ xkichäp rkʼutxik reʼ: «¿Akuchï kʼo wä ri akʼal ri xtbʼeʼok kirey ri judíos? Röj nqajoʼ nqxkeʼ chwäch».

Herodes, rey pa rwiʼ Jerusalén, xkʼoxaj chë xaläx jun akʼal ri xtbʼeʼok rey. Rma riʼ xchäp quʼuj y xkʼutuj reʼ chkë ri sacerdotes ri kʼo más kiqʼij: «¿Akuchï kʼo chë naläx wä ri rey riʼ?». Ryeʼ xkiʼij: «Ri profetas xkiʼij chë Belén xtaläx wä». Rma riʼ Herodes xerskʼij ri achiʼaʼ ri xkitzʼët ri estrella y xuʼij reʼ chkë: «Jäx Belén y tikanuj ri akʼal. Chrij riʼ, tibʼeʼij chwä akuchï kʼo wä, rma rïn chqä nwajoʼ yixkeʼ chwäch». Pero xa najin wä nutzʼük tzij.

Ri estrella xslon chik jmul y xbʼä kʼa Belén. Chriʼ, xpaʼeʼ pa rwiʼ jun jay. Ri achiʼaʼ xeʼok apü y xkïl Jesús rkʼë María, ri rteʼ. Ryeʼ xexkeʼ chwäch ri akʼal chqä xkispaj reʼ che rä: oro, pon chqä rqʼolil cheʼ ri jubʼül rxlaʼ. ¿Kan yë komä Jehová xtaqö kichë ri achiʼaʼ riʼ akuchï kʼo wä Jesús? Manä.

Ri aqʼaʼ riʼ, Jehová xuʼij reʼ che rä José chpan jun achïkʼ: «Herodes nrajoʼ nukamsaj Jesús. Takʼwaj äl ryä chqä awixjayil y jäx äl Egipto. Kixkanaj qa chriʼ y ma kixtzolin ta pä kʼa taq xtinbʼij chiwä chë ma nxiʼin ta chik rij ri akʼal». Rma riʼ José chqä rfamilia xebʼä äl Egipto.

Jehová chqä xuʼij chkë ri achiʼaʼ ri xetzʼetö ri estrella chë ma ketzolin ta rkʼë Herodes. Taq Herodes xnaʼej chë ri achiʼaʼ riʼ ma xketzolin ta chik rkʼë, kan xkatäj ryowal. Y rma ma xkowin ta xrïl Jesús, xtäq kikamsaxik jontir ri akʼalaʼ aj Belén ri jnan kijnaʼ rkʼë Jesús. Pero Jesús majun ta xbʼanatäj rkʼë rma Egipto kʼo wä.

Taq Herodes xkäm, Jehová xuʼij reʼ che rä José: «Ma nxiʼin ta chik rij ri akʼal. Ütz yixtzolin». José, María y Jesús xetzolin Israel y xekanaj qa Nazaret.