¿Kantzij komä chë Jesús xkäm xa wumä rïn?

YE KʼÏY rusamajelaʼ Jehová ri xejeʼ ojer xkiʼij ri kʼo wä pa kan, rma ryeʼ xkinaʼ «achiʼel wä nqanaʼ röj» komä (Sant. 5:17). Jontir ri tzij riʼ yeqïl chpan le Biblia. Jun tzʼetbʼäl. Ri apóstol Pablo xuʼij ri kʼo pa ran rkʼë re tzij reʼ: «Taq nwajoʼ nbʼän ri ütz, xa yë ri ma ütz ta kʼo pä chi nwäch. [...] ¡Kantzij na wä chë majun nqʼij ta!» (Rom. 7:21-24). Rkʼë jbʼaʼ ke riʼ chqä nqanaʼ röj. Taq nqbʼison rma ri mak kʼo qa pa qawiʼ, ri tzij ri xeruʼij qa Pablo kantzij na wä chë nkikʼuqbʼaʼ qakʼuʼx.

Pablo chqä xuʼij ri achkë wä xnaʼ chrij ri rukʼaslemal xyaʼ Jesús pa kamïk. Chpan Gálatas 2:20 ryä xuʼij: «Ri Rukʼajol Dios [...] janina xirajoʼ chqä xyaʼ rukʼaslemal pa kamïk xa wumä rïn». Pablo kan rukʼuqbʼan wä rukʼuʼx chrij riʼ. Ye kʼa röj, ¿nqanmaj riʼ chqä o xa kʼayewal nuʼän chqawäch nqanmaj?

We rma jun mak ri xqaʼän ojer nqanaʼ chë majun qaqʼij ta, rkʼë jbʼaʼ, kʼo mul kʼayewal nuʼän chqawäch nqanmaj chë Jehová janina nqrajoʼ chqä chë xküy yän qamak. Y rkʼë jbʼaʼ, más na kʼayewal nqʼax chqawäch chë ri rukʼaslemal xyaʼ Jesús pa kamïk, kan jun spanïk ri xyaʼöx pa qawiʼ röj. Jesús nrajoʼ chë kan ke riʼ nqatzʼët ri kolotajïk. ¿Achkë rma nqaʼij riʼ chqä achkë xtqtoʼö rchë kan ke riʼ rubʼanik xtqatzʼët? Xtqaqʼalajsaj re kʼutunïk reʼ.

¿ACHKË RUBʼANIK NUTZʼËT JESÚS RI RUKʼASLEMAL XYAʼ PA QAMIK?

Jesús nrajoʼ chë röj nqatzʼët ri rukʼaslemal xyaʼ pa kamïk achiʼel ta jun spanïk ri kan chqë röj xyaʼöx wä. ¿Achkë rma nqaʼij riʼ? Qchʼobʼon na peʼ chrij ri nuʼij Lucas 23:39 kʼa 43. Jun achï ri tzeqebʼan wä chwäch jun cheʼ chuxkïn Jesús xqʼax chwäch chë xmakun. Rma ri tijöj poqonal najin wä nyaʼöx pa ruwiʼ, kʼo wä chë xuʼän jun nimaläj mak, rma xa xuʼ wä chkë ri itzel taq winäq nyaʼöx wä ri tijöj poqonal riʼ. Ri achï riʼ kan sachnäq wä rukʼuʼx, rma riʼ xuʼij che rä Jesús: «Kinatäj chawä taq xkatok chpan ri aqʼatbʼäl tzij».

Jesús, tzeqäl chwäch jun cheʼ chkikojöl ye kaʼiʼ alqʼomaʼ

¿Achkë xuʼij Jesús che rä? Tqachʼobʼoʼ na peʼ reʼ: Tapeʼ janina ntiʼon ruchʼakul, Jesús xsloj rujolon rchë xutzuʼ apü ri aleqʼon. Ryä kʼo chë xtzäq ruchqʼaʼ rchë xtzeʼen apü rkʼë y kan rkʼë ajowabʼäl xuʼij che rä: «Kantzij nbʼij chawä komä, xkajeʼ wkʼë chwäch ri kotzʼijaläj ulew». Jesús ütz ta xuʼij che rä ri aleqʼon chë ryä xpë «rchë xbʼeruyaʼ rukʼaslemal pa kamïk pa kikʼexel ye kʼïy winäq» (Mat. 20:28). Ye kʼa ma ke riʼ ta xuʼän. Ryä xtoʼ ri aleqʼon rchë xqʼax chwäch chë ri rukʼaslemal, xtyaʼ pa kamïk xa rma ryä. Kan rkʼë ajowabʼäl, Jesús xuʼij che rä: «Xkajeʼ wkʼë». Chqä xuʼij che rä chë xtbʼerilaʼ na jun nimaläj utzil: xtbʼekʼaseʼ na chwäch jun kotzʼijaläj ulew.

Tapeʼ ri aleqʼon ma xyaʼ ta wä ruqʼij Dios, Jesús xrajoʼ wä chë xqʼax chwäch chë ri rukamik kan jun spanïk ri xuʼän wä che rä ryä. We Jesús xrajoʼ chë ri aleqʼon xqʼax riʼ chwäch, ryä chqä nrajoʼ chë jun qachʼalal ri qasan chik pa yaʼ chqä nuyaʼ ruqʼij Dios ya riʼ chqä tqʼax chwäch. Ye kʼa, ¿achkë xtqtoʼö rchë xtqanmaj chë ri rukamik Jesús chqajujnal nuyaʼ utzil pa qawiʼ tapeʼ xqmakun ojer?

RI XTOʼÖ PABLO

Pablo xqʼax wä chwäch chë Jesús xkäm pa ruwiʼ ryä, rma riʼ xchlaʼëx qa ri rutzjoxik ri ruchʼaʼäl Dios che rä. Ryä xuʼij: «Rïn ntyoxij che rä ri Cristo Jesús ri Qajaw, ri xyaʼö wuchqʼaʼ, rma xukʼuqbʼaʼ rukʼuʼx chwij chqä xyaʼ qa re samaj reʼ pa nqʼaʼ. Xuʼän riʼ tapeʼ xenyöqʼ ri rutzeqelbʼëy, xenkanuj rchë xinyaʼ kʼayewal pa kiwiʼ chqä itzel nnaʼoj xinbʼän kikʼë» (1 Tim. 1:12-14). Rma xyaʼöx qa ri samaj riʼ pa ruqʼaʼ, Pablo xqʼax chwäch chë Jesús xjyowaj ruwäch, xukʼuqbʼaʼ rukʼuʼx chrij chqä janina xrajoʼ. Jesús chqä ruyaʼon qa pa qaqʼaʼ röj ri rutzjoxik ri Ruqʼatbʼäl Tzij Dios (Mat. 28:19, 20) ¿Nqanaʼ röj ri xnaʼ Pablo taq nqaʼän ri samaj riʼ?

Tqatzʼetaʼ ri xbʼanatäj rkʼë Albert. Ryä xel qa pa rutinamit Jehová jbʼaʼ ma 34 junaʼ. Ryä nuʼij: «Ronojel qʼij yenatäj ri nmak chwä. Ye kʼa taq yinel chutzjoxik le Biblia, nnaʼ chë Jesús ruchlaʼen qa jun samaj pa nuqʼaʼ, achiʼel wä xuʼän rkʼë Pablo. Reʼ nuʼän chë más kiʼ nkʼuʼx, y yirutoʼ rchë nkʼuqbʼaʼ nkʼuʼx chë ütz xttel apü jontir chi nwäch» (Sal. 51:3).

Kaʼiʼ qachʼalal achiʼaʼ najin nkitjoj jun achï chrij le Biblia. Ri achï riʼ ruyon tatuajes rij chqä ruksan pulseras y cadenas — Xa bʼa achkë na winäq ri najin nqakʼüt ri kantzij chwäch, tqatoʼ rchë nqʼax chwäch chë najowäx chqä nujyowäx ruwäch rma Jesús.

Taq Allan majanä wä ttamaj ri kantzij, kan itzel wä runaʼoj chqä kan kʼïy wä itzelal xeruʼän. Ryä nuʼij: «Kʼa nnatäj na chwä ri itzelal xenbʼanalaʼ. Kʼo mul, yiqä pa jun nimaläj bʼis. Ye kʼa ntyoxij che rä Jehová chë nuyaʼ qʼij che rä jun ajmak achiʼel rïn rchë nkʼwaj ri utziläj taq rutzjol chkë ri nkʼaj chik. Taq ri winäq nkijäl kinaʼoj rma le Biblia, nnataj chwä chë Jehová janina ütz runaʼoj chqä janina nqrajoʼ. Rïn nchʼöbʼ chë ryä yiruksaj rchë yentoʼ winäq ri xkiqʼaxaj kʼayewal achiʼel xinqʼaxaj rïn».

Ri nq-el chutzjoxik le Biblia nqrtoʼ rchë nqaksaj qachqʼaʼ rchë yeqaʼän ri ütz y nqchʼobʼon chkij ri ütz taq naʼoj. Chqä nukʼuqbʼaʼ qakʼuʼx chë Jesús nujyowaj qawäch, nqrajoʼ chqä nukʼuqbʼaʼ rukʼuʼx chqij.

JEHOVÁ MÁS NÜM CHWÄCH RI QAN

Rkʼë jbʼaʼ ri qan kʼa nuʼän na chqë chë itzel nqanaʼ kimä ri mak xeqaʼän ojer, y rkʼë jbʼaʼ kʼa chwäch ri kʼakʼakʼ Ruwachʼulew xkeqamestaj wä. ¿Achkë xtqtoʼö rchë ri bʼis ma xtchʼakon ta chqij?

Jean rutjon pä ruqʼij rma ma nkowin ta numestaj ri kaʼiʼ rubʼanik kʼaslemal xkʼwaj taq kʼa kʼajol na. Tapeʼ ke riʼ ryä nuʼij: «Nqä chi nwäch chë ‹Dios más nüm chwäch ri qan›» (1 Juan 3:19, 20). Röj chqä nukʼuqbʼaʼ qakʼuʼx nqatamaj chë Jehová chqä Jesús nqʼax chkiwäch chë xa yoj ajmakiʼ. Tnatäj chqë chë yë ri ajowabʼäl xbʼanö chkë chë xkiyaʼ ri kolotajïk. Chqä xkiyaʼ ri spanïk riʼ kimä ri winäq ri nkitzolij kiʼ rchë kimak y ma chkë ta ri majun ta kimak (1 Tim. 1:15).

Xtqanaʼ chë ri rukʼaslemal xyaʼ Jesús pa kamïk jun spanïk ri yaʼon pä chqë chqajujnal we xtqchʼobʼon chrij ri runaʼoj xuʼän Jesús kikʼë ri winäq chqä we xtqatäj qaqʼij rchë xtqaʼän ri samaj ri ruchlaʼen qa chqë. Ke riʼ, xtqkowin xtqaʼij achiʼel xuʼij Pablo: Jesús «janina xirajoʼ chqä xyaʼ rukʼaslemal pa kamïk xa wumä rïn».