¿Achkë ütz naʼän rchë junan chik jmul nuʼän awäch rkʼë Jehová?

RONOJEL junaʼ, kan ye kʼïy winäq yetzolin pä chpan ri congregación. Le Biblia nuʼij chë taq jun chkë re winäq reʼ ntzolin pä, kan kiʼ kikʼuʼx nkiʼän chlaʼ chkaj (Luc. 15:7, 10). We rït xatzolin pä chpan ri congregación, tayaʼ chwäch awan chë Jesús, ri ángeles chqä Jehová kan kiʼ kikʼuʼx awkʼë rma xaʼän riʼ. Ye kʼa, rchë junan chik jmul nuʼän awäch rkʼë Jehová, rkʼë jbʼaʼ kʼo kʼayewal xkeʼawïl. ¿Achkë chë kʼayewal riʼ chqä achkë xkatoʼö chkiwäch?

JOJUN KʼAYEWAL RI RKʼË JBʼAʼ XKEʼAWÏL

Ye kʼïy qachʼalal kan kowan na yebʼison tapeʼ xetzolin yän pä chpan ri congregación. We ya riʼ najin nbʼanatäj awkʼë rït, rkʼë jbʼaʼ nqʼax chawäch ri xnaʼ David, ri qʼatöy tzij. Tapeʼ ya xkuy yän rma Dios, ryä xuʼij: «Kan kowan nchʼpü nkʼuʼx (yimayon) rma kan kʼïy ma ütz ta ri nbʼanon» (Sal. 40:12; 65:3). Jun winäq ri xtzolin yän chpan rutinamit Jehová rkʼë jbʼaʼ kan pa junaʼ xtkʼïx o xttiʼon ran rma ri xuʼän. Ya Isabelle,a ri más 20 junaʼ xel qa pa congregación, nuʼij: «Kan kʼayewal xuʼän chi nwäch xinnmaj chë Jehová xiruküy yän». We rït xa xkabʼison, rkʼë jbʼaʼ xa xtchaʼ chik chiʼ jmul ri awachbʼilanïk rkʼë Jehová (Prov. 24:10). Tatjaʼ aqʼij rchë ma nbʼanatäj ta riʼ awkʼë.

Ye kʼo chik jojun kan kowan nchʼpü kikʼuʼx taq nkiquʼ rij achkë nkʼatzin nkiʼän rchë junan chik jmul nuʼän kiwäch rkʼë Jehová. Taq xtzolin pä chpan ri congregación, Antoine xuʼij: «Kʼïy ri yenbʼän wä ojer taq yïn wä Testigo, xemestäj chwä». Rma nkinaʼ ya riʼ, rkʼë jbʼaʼ jojun ma kan ta xtkiʼän jontir ri yekowin chpan rutinamit Jehová.

Tqayaʼ jun tzʼetbʼäl. We jun jay nchaʼ chiʼ rma jun qʼeqäl jöbʼ, rkʼë jbʼaʼ ri rajaw kan kowan xtchʼpü rukʼuʼx taq xttzʼët jaruʼ samaj xtkʼwaj chwäch xtchojmij rachoch. Rkʼë jbʼaʼ ke riʼ chqä xtbʼanatäj rkʼë awachbʼilanïk rkʼë Jehová. We xchaʼ chiʼ rma xaqä chpan jun mamaʼ mak, rkʼë jbʼaʼ kan xtchʼpü akʼuʼx taq xtatzʼët chë kan rukʼwan samaj ri naʼän chë junan chik jmul xtuʼän awäch rkʼë Jehová. Ye kʼa ma ayonïl ta yït kʼo.

Jehová nuʼij reʼ chqë: «Kixampä y tqasoloʼ ri najin nbʼanatäj chqawäch» (Is. 1:18). Rït ya abʼanon chik ri najowatäj rchë xasöl ri kʼayewal kʼo chiwäch rkʼë Jehová, y rma xaʼän riʼ, ryä kan kowan yatrajoʼ. Taquʼ rij reʼ: ryä nkowin yaturksaj rït rchë nukʼüt chë Satanás xa jun ajtzʼuküy tzij (Prov. 27:11).

Rma xatzolin chpan rutinamit, rït ya najin chik yajelun rkʼë Jehová; y ryä nuʼij chë kan ke riʼ chqä xtuʼän awkʼë (Sant. 4:8). Tapeʼ kan ütz chë ri nkʼaj chik nkitzʼët chë xatzolin pa congregación, kʼo na chik jun ri nkʼatzin naʼän. Rït nkʼatzin natäj aqʼij rchë ronojel qʼij más xtawajoʼ Jehová, ri utziläj Qatataʼ. ¿Achkë rubʼanik xtaʼän riʼ?

TAYAʼ CHAWÄCH KʼO YEʼAʼÄN CHUYAʼIK RUQʼIJ DIOS

Tayaʼ chawäch kʼo yeʼaʼän chuyaʼik ruqʼij Dios. Rkʼë jbʼaʼ kʼa yenatäj na chawä ri naʼäy taq naʼoj xatamaj chrij Jehová chqä chrij ri Kotzʼijaläj Ulew ri rutzjun chqë. Ye kʼa nkʼatzin nachäp chik jmul rubʼanik ri naʼän wä rubʼanon qa, achiʼel ri natzjoj le Biblia chkë ri winäq, yabʼä chkipan jontir ri qamoloj chqä najäm awäch rchë yajeʼ kikʼë ri qachʼalal. Tqatzʼetaʼ jojun ri ütz nayaʼ chawäch naʼän.

Chaq taqïl kachʼö rkʼë Jehová. Ri Qatataʼ kʼo chkaj nqʼax chwäch chë rkʼë jbʼaʼ kʼayewal xtuʼän chawäch xkachʼö rkʼë we kʼa kowan na ntiʼon awan rma ri mak xaʼän (Rom. 8:26). Tapeʼ ke riʼ, ronojel mul kachʼö rkʼë Dios chqä taʼij che rä chë kan narayij yatok rachiʼil (Rom. 12:12). Andrej nuʼij reʼ: «Rubʼanon qa kan kowan wä yikʼïx chqä ntiʼon wä wan rma ri xinbʼän. Ye kʼa kan nnaʼ wä uxlanen pa wan taq yichʼö rkʼë Jehová». We rït ma ataman ta achkë naʼij che rä Jehová taq yachʼö rkʼë, taquʼ rij ri xuʼij David che rä Jehová taq rutzolin wä chik riʼ, reʼ xtawïl chpan ri Salmos 51 chqä 65.

Tatjoj awiʼ chrij le Biblia ronojel mul. Reʼ xtuʼän chë xtkowïr ri akʼuqbʼäl kʼuʼx chrij Dios chqä más xtawajoʼ (Sal. 19:7-11). Felipe xuʼij reʼ: «Ri xbʼanö chë xkʼis qa ri nkʼuqbʼäl kʼuʼx chqä ximakun chwäch Jehová ya riʼ chë kʼa chaq jantäq na xinskʼij ruwäch le Biblia chqä xinnukʼuj ruwäch. Rma ma nwajoʼ ta nsök chik mul ran Jehová, xintäj nqʼij rchë más chaq taqïl xinnukʼuj ruwäch le Biblia». Rït chqä ütz naʼän ya riʼ. We taq natjoj awiʼ chrij le Biblia ma ataman ta achkë nanukʼuj ruwäch, rkʼë jbʼaʼ ütz nakʼutuj atoʼik che rä jun awachiʼil ri kʼuqül rukʼuʼx pa Ruchʼaʼäl Dios.

Katok chik jmul kichiʼil ri qachʼalal. Ye kʼo jojun ri yetzolin pa congregación nkixiʼij kiʼ chë ma ütz ta chik xketzʼet kimä ri qachʼalal. Ya Larissa nuʼij: «Kan chiʼin wä runaʼon wan. Xinnaʼ chë kan xinsök kan ri qachʼalal pa congregación. Y kan yalöj ke riʼ xinnaʼ». Rït ütz nayaʼ chwäch awan chë ri ukʼwäy taq bʼey chqä ri qachʼalal ri kʼuqül kikʼuʼx pa ruchʼaʼäl Dios nkajoʼ yatkitoʼ rchë junan chik jmul nuʼän awäch rkʼë Jehová (tatzʼetaʼ ri recuadro «Ri ütz nkiʼän ri ukʼwäy taq bʼey»). Ryeʼ kan kiʼ kikʼuʼx rma rït xatzolin pä y nkajoʼ chqä chë rït kiʼ akʼuʼx naʼän (Prov. 17:17).

¿Achkë ütz naʼän rchë más junan nuʼän awäch kikʼë ri qachʼalal? Kajeʼ chkipan jontir ri qamoloj chqä chaq taqïl katel kikʼë chutzjoxik le Biblia. ¿Achkë rubʼanik xkaturtoʼ riʼ? Félix nuʼij: «Ri qachʼalal kan kiyoʼen wä chë rïn yitzolin. Xinnaʼ chë kan janina yinkajoʼ. Jontir ryeʼ xinkitoʼ rchë xinnaʼ chë yïn kichiʼil pa congregación, chë Jehová xiruküy chqä chë yikowin wä nyaʼ chik jmul ruqʼij Jehová» (tatzʼetaʼ ri recuadro «Ri ütz naʼän rït»).

MA KAKOS TA

Rma rït najin natäj aqʼij rchë junan chik jmul nuʼän awäch rkʼë Jehová, Satanás kan xtyaʼ pä kʼïy kʼayewal chawij rchë rït ma xkakowin ta xtaʼän riʼ (Luc. 4:13). We ma nawajoʼ ta yaqä pa ruqʼaʼ, kan komä nkʼatzin nakowirsaj ri awachbʼilanïk rkʼë Jehová.

Jehová nuʼij chë xtuʼän reʼ kikʼë rusamajelaʼ: «Xkenkanuj ri ye sachnäq äl, xkentzolij pä ri xa xkisäch kibʼey, xkenknaj ri ye sokotajnäq y xtinyaʼ kichqʼaʼ ri majun ta kichqʼaʼ» (Ezeq. 34:16). Jehová kan kʼïy chkë rusamajelaʼ yerutoʼon rchë junan chik jmul nuʼän kiwäch rkʼë. Rma riʼ ütz nayaʼ chwäch awan chë ryä chqä nrajoʼ yaturtoʼ rït rchë más junan xtuʼän awäch rkʼë.