Ri rkʼisbʼäl poqonal

Moisés xuʼij che rä ri faraón chë ma xtapon ta chik rkʼë. Pero taq ya nbʼä äl, xuʼij reʼ che rä: «Komä nkʼäj aqʼaʼ, xkekäm ri naʼäy kalkʼwal ri egipcios. Ke riʼ xtbʼanatäj rkʼë rkʼajol ri faraón chqä kikʼë kalkʼwal ri ye xmïl pa samaj».

Jehová xuʼij reʼ chkë ri israelitas: «Tibʼanaʼ re rkïl wäy reʼ: tikamsaj jun aläj karneʼl o jun aläj kʼsïkʼ ri jun rjnaʼ y tichklaj rkikʼel chuchiʼ ipuertas, tichʼluj ri tiʼäj y titjaʼ rkʼë pan ri majun ta levadura rkʼë. Timoloʼ achkë chiwä chqä tiksaj apü itzyaq chqä ixajabʼ. Re aqʼaʼ reʼ, rïn xtinbʼän chë xkixel äl aweʼ». ¡Xa xuʼ taquʼ ri kiʼkʼuxlal xkinaʼ ri israelitas taq xkikʼoxaj riʼ!

Taq xuʼän nkʼäj aqʼaʼ, ri r·ángel Jehová xqʼax chkipan ri jay ye kʼo Egipto. Ri familias ri majun ta kïkʼ chuchiʼ kipuerta, xkamsäx ri naʼäy kalkʼwal. Pero ri xkiyaʼ kïkʼ chuchiʼ kipuerta, ri ángel majun ta xuʼän chkë ri kalkʼwal. Jontir ri familias ye kʼo Egipto, kʼo o majun kirajil, xkäm jun kalkʼwal. Pero majun ta jun chkë ri kalkʼwal ri israelitas xkäm.

Ri naʼäy rkʼajol ri faraón xkäm chqä. Rma riʼ ri faraón xtäq kikʼamarik Moisés y Aarón, y xuʼij reʼ chkë: «¡Kixel äl chpan ntinamit! ¡Jäx äl y tiyaʼ rqʼij iDios! ¡Tikʼwaj äl ichkop y jäx äl!».

Ri aqʼaʼ riʼ kʼo wä luna llena. Ri israelitas xemol rkʼë kifamilia chqä kijatzul, y ke riʼ rbʼanik xeʼel äl Egipto. Ye kʼo wä 600,000 achiʼaʼ chqä ye kʼïy ixoqiʼ y akʼalaʼ. Ye kʼïy ri ma ye israelitas ta xebʼä äl kikʼë rchë nkiyaʼ rqʼij Jehová. Ri israelitas kan kiʼ wä kikʼuʼx rma xeʼel äl Egipto.

Rchë ma nkimestaj ta chë Jehová xerköl, ronojel jnaʼ ryeʼ nkʼatzin wä nkiʼän ri rkïl wäy ri xuʼij Jehová chkë. Che rä ya riʼ xbʼix Pascua.