Ri Qʼatbʼäl Tzij ri ma xtchup ta rwäch

Kʼo jun aqʼaʼ, ri rey Nabucodonosor kʼo jun xrachkʼaj ri xuʼän chë ma xok ta chik rwaran. Ryä xerskʼij ri ajqʼijaʼ y xuʼij reʼ chkë: «Tiʼij chwä achkë ntel chë tzij wachïkʼ». Ryeʼ xkiʼij: «Ütz kʼa tat rey, xa xuʼ taʼij chqë achkë xawachkʼaj». Pero ri rey xuʼij: «¡Manä! Rïx kixbʼin chwä. Si no, xkixinkamsaj». Rma riʼ xkiʼij chik jmul: «Pero taʼij chqë achkë xawachkʼaj, ke riʼ xtqaʼij chawä achkë ntel chë tzij». Ryä xuʼij: «Rïx xa nikanuj achkë niʼij. ¡Tiʼij chwä achkë xinwachkʼaj!». Ryeʼ xkiʼij: «Majun ta jun nkowin nbʼanö riʼ».

Rma Nabucodonosor xkatäj ryowal, xtäq kikamsaxik jontir ri ajnaʼoj taq winäq, yajün Daniel, Sadrac, Mesac y Abednego. Rma riʼ Daniel xbʼeruʼij che rä ri rey chë tyaʼ tiempo che rä. Chrij riʼ ryä chqä ramigos xkikʼutuj kitoʼik che rä Jehová. ¿Achkë xuʼän Jehová?

Chpan jun visión, Jehová xkʼüt chwäch Daniel ri xrachkʼaj Nabucodonosor y xuʼij che rä achkë ntel chë tzij. Chkaʼn qʼij, Daniel xuʼij reʼ che rä rmos ri rey: «Majun ta jun tikamsaj. Rïn yikowin nbʼij ri xrachkʼaj ri rey». Rma riʼ, xekʼwäx Daniel chwäch ri rey y xuʼij reʼ che rä: «Dios xkʼüt chawäch ri xtbʼanatäj chqawäch apü. Ya reʼ xawachkʼaj: rït xatzʼët jun mamaʼ estatua; ri rjolon bʼanon rkʼë oro, ri rwarkʼuʼx y rqʼaʼ rkʼë plata, ri rpan chqä rachäq rkʼë cobre, ri rchʼek chqä pa raʼ rkʼë hierro, y raqän bʼanon rkʼë hierro chqä rkʼë chʼabʼäq. Chrij riʼ, jun abʼäj xel pä che rä jun jyuʼ y xbʼerkajij raqän ri estatua. Rma riʼ, ri estatua xtzaq y xbʼeʼok poqlaj, y ri kaqʼiqʼ xkʼwaj äl. Ri abʼäj xbʼeʼok jun mamaʼ jyuʼ ri xnujsaj le Rwachʼlew».

Chrij riʼ Daniel xuʼij: «Ri achïkʼ ya reʼ ntel chë tzij: ri aqʼatbʼäl tzij rït ya riʼ rjolon ri estatua ri bʼanon rkʼë oro. Ri peraj ri bʼanon rkʼë plata ya riʼ jun qʼatbʼäl tzij ri xtkanaj pa rkʼexel aqʼatbʼäl tzij rït. Chrij riʼ xtpë chik jun qʼatbʼäl tzij ri nukʼambʼej tzij ri cobre y xtqʼät tzij pa rwiʼ jontir le Rwachʼlew. Ri qʼatbʼäl tzij ri xtpë chrij riʼ kowan rchqʼaʼ xtjeʼ achiʼel ri hierro. Pa rkʼisbʼäl, xtbʼejeʼ jun qʼatbʼäl tzij ri xa xtjäch riʼ, rma xtjeʼ rchqʼaʼ achiʼel ri hierro pero chqä ma xtjeʼ ta rchqʼaʼ achiʼel ri chʼabʼäq. Ri abʼäj ri nbʼeʼok jun mamaʼ jyuʼ ya riʼ Rqʼatbʼäl Tzij Dios, ri xtchüp kiwäch jontir ri qʼatbʼäl taq tzij y majun bʼëy xtchup ta rwäch».

Nabucodonosor xxkeʼ chqä xqasaj rjolon chwäch Daniel. Ryä xuʼij: «Ri aDios xkʼüt chawäch achkë xinwachkʼaj. Majun ta chik jun Dios achiʼel ryä». Daniel ma xkamsäx ta. Pa rkʼexel riʼ, ri rey xyaʼ pa kiwiʼ jontir ri ajnaʼoj taq winäq y xuʼän chë xbʼeʼok jun gobernante pa rwiʼ ri tinamït Babilonia. ¿Xatzʼët achkë rbʼanik xyaʼöx pä che rä Daniel ri xkʼutuj che rä Jehová?