TJONÏK 11
¿Achkë ütz naʼän rchë kan kʼo xtatamaj qa taq xtaskʼij ruwäch le Biblia?
Tachʼobʼoʼ na peʼ chë nawajoʼ najosqʼij ruwäch jun nüm peraj juyuʼ rchë naʼän atkoʼn chwäch, ye kʼa ma ataman ta akuchï nachäp wä äl. Rchë ma kʼayewal ta xtuʼän chawäch xtaʼän ri mamaʼ samaj riʼ, rkʼë jbʼaʼ pa jojun peraj xtajosqʼij wä äl. Ke riʼ chqä nbʼanatäj rkʼë ruskʼixik ruwäch le Biblia. Rkʼë jbʼaʼ nakʼutuj qa chawäch: «¿Akuchï nchäp wä ruskʼixik?». Chpan re tjonïk reʼ xtqatzʼët jojun naʼoj ri xkatkitoʼ rchë kan kiʼ akʼuʼx xtaskʼij chqä xtatjoj awiʼ chrij le Biblia.
1. ¿Achkë rma ütz nqaskʼij ruwäch le Biblia ronojel qʼij?
Ri winäq ri nuskʼij ruwäch le Biblia, ri «rupixaʼ Jehová» ronojel qʼij, kan kiʼ rukʼuʼx xtuʼän chqä ronojel ütz xttel chwäch (taskʼij ruwäch Salmo 1:1-3). Rchë naʼän riʼ, tatjaʼ aqʼij rchë naskʼij ruwäch a-Biblia jojun minutos ronojel qʼij. Taq más xtatamaj chrij Ruchʼaʼäl Dios, más xtarayij xtaskʼij ruwäch.
2. ¿Achkë xkatoʼö rchë kan kʼo xtatamaj qa taq xtaskʼij ruwäch le Biblia?
Rchë kan kʼo xtqatamaj qa taq xtqaskʼij ruwäch le Biblia, ma xa xuʼ ta kʼo chë nqaskʼij ruwäch, xa kan kʼo chë nqchʼobʼon chrij ri najin nqaskʼij (Josué 1:8). Taq xtaskʼij ruwäch a-Biblia, tabʼanaʼ qa re kʼutunïk reʼ chawäch: «¿Achkë nkikʼüt qa re textos reʼ chi nwäch chrij Jehová? ¿Achkë rubʼanik yensmajij pa nkʼaslemal? ¿Achkë ta rubʼanik yenksaj rchë yentoʼ ri nkʼaj chik?».
3. ¿Achkë ütz naʼän rchë naskʼij ruwäch le Biblia?
¿Kʼayewal nuʼän chawäch najäm awäch rchë naskʼij ruwäch a-Biblia? Kan kʼïy chqë röj nbʼanatäj riʼ qkʼë. Tatjaʼ aqʼij rchë kan ütz ruksaxik naʼän che rä a-tiempo (Efesios 5:16). Rït xkakowin xtaʼän riʼ we xtaskʼij ruwäch a-Biblia chpan jun hora ri más ütz nuʼän chawäch. Ye kʼo jojun winäq kan nmaqʼaʼ yän nkiʼän riʼ, nkʼaj chik taq yeʼuxlan jbʼaʼ che rä kisamaj y ye kʼo jojun nkiskʼij ruwäch ki-Biblia chaqʼaʼ. ¿Achkë ta hora más ütz nuʼän chawäch rït?
TQATAMAJ MÁS CHRIJ RE NAʼOJ REʼ
Tqatzʼetaʼ achkë ütz naʼän rchë kan más xtqä chawäch xtaskʼij ruwäch le Biblia. Aweʼ xtqïl jojun naʼoj ri xkatkitoʼ rchë kan ütz xtatjoj apü awiʼ chkij ri tjonïk y rchë kan kʼo xtatamaj qa taq xtakʼül atjonik chrij le Biblia.
Achiʼel taq eqal eqal nqä chqawäch nqatäj nkʼaj chik rukïl wäy, ke riʼ chqä nbʼanatäj rkʼë le Biblia, eqal eqal xtqä chqawäch xtqaskʼij ruwäch.
4. Ri ütz naʼän rchë kan xtqä chawäch xtaskʼij ruwäch le Biblia
Rkʼë jbʼaʼ ma chaq bʼa ta nuʼän chqawäch nqachäp ruskʼixik ruwäch le Biblia. Ye kʼa achiʼel taq eqal eqal nqä chqawäch nqatäj jun rukïl wäy, ke riʼ chqä nbʼanatäj rkʼë le Biblia, eqal eqal xtqä chqawäch xtqaskʼij ruwäch. Tiskʼij ruwäch 1 Pedro 2:2 y kixtzjon chrij reʼ:
We naskʼij ruwäch a-Biblia ronojel qʼij, ¿naʼij rït chë ya riʼ xkaturtoʼ rchë xtarayij xtaskʼij más ruwäch?
Titzʼetaʼ ri VIDEO rchë nitamaj achkë xkiʼän jojun qʼopojiʼ kʼojolaʼ rchë kan xqä chkiwäch xkiskʼij ruwäch le Biblia. Chrij riʼ kixtzjon chrij reʼ:
¿Achkë kan kʼayewal xuʼän chkiwäch ri qʼopojiʼ kʼojolaʼ ri xeʼel pa video?
¿Achkë xtoʼö kichë rchë ma xkiyaʼ ta qa ruskʼixik ruwäch le Biblia?
¿Achkë xkiʼän ryeʼ rchë kan más jaʼäl xkinaʼ xkiskʼij ruwäch ki-Biblia?
Ri ütz naʼän:
Tachaʼ jun Biblia ri kan ütz nakʼuqbʼaʼ akʼuʼx chrij chqä chë kan nqʼax chawäch ri tzij yeruksaj. Ütz naksaj ri Traducción del Nuevo Mundo pa kaxlän.
Tachapaʼ kiskʼixik ri peraj ri más yeqä chawäch. Xtawïl jojun naʼoj chpan ri peraj «Naʼoj ri yatkitoʼ rchë nachäp ruskʼixik ruwäch le Biblia».
Tayaʼ qa retal ri xaskʼij ruwäch. Taksaj ri peraj «Ri nskʼin chik ruwäch chpan le Biblia» ri kʼo chpan re wuj reʼ.
Taksaj ri aplicación JW Library®. We naqasaj pan a-teléfono, pan a-tablet o pan a-computadora, xkakowin xtaskʼij chqä xtakʼoxaj ruskʼixik ruwäch le Biblia xa bʼa akuchï yït kʼo wä.
Taksaj ri peraj ri ye kʼo pa rukʼisbʼäl che rä ri Traducción del Nuevo Mundo. Chriʼ xtawïl jojun naʼoj ri xkatkitoʼ rchë kan más jaʼäl xtanaʼ xtaskʼij ruwäch le Biblia.
5. Tatjoj apü awiʼ chkij ri tjonïk
Tiskʼij ruwäch Salmo 119:34 y kixtzjon chrij reʼ:
¿Achkë rma ütz yachʼö rkʼë Dios taq ya naskʼij ruwäch le Biblia o taq ya natjoj apü awiʼ chkij ri tjonïk?
¿Achkë ütz naʼän rchë kan kʼo xtatamaj qa taq xtakʼül atjonik? Taq xtatjoj apü awiʼ chkij ri tjonïk ri ye kʼo chpan re libro reʼ, tabʼanaʼ ya reʼ:
Taskʼij kiwäch jontir ri peraj ri ye kʼo chpan ri naʼäy peraj rchë ri tjonïk.
Takanuj ri textos, taskʼij kiwäch y tatzʼetaʼ we kikʼwan kiʼ rkʼë ri naʼoj najin nanukʼuj ruwäch.
Tayaʼ qa ketal ri tzij ri nkiqʼalajsaj ri kʼutunïk. Ya reʼ kowan xkaturtoʼ taq xtatjoj awiʼ rkʼë ri najin nyaʼö atjonik.
¿Ataman rït reʼ?
Ri testigos de Jehová kan kʼïy Biblias qaksan, ye kʼa más ütz qatzʼeton ri Traducción del Nuevo Mundo rma kan tzʼaqät bʼanon pä che rä, kan nqʼax chawäch ri tzij yeruksaj y rma kʼo rubʼiʼ Dios chpan (tatzʼetaʼ re naʼoj reʼ ri kʼo pa jw.org: «¿Kʼo komä jun Biblia ri xa xuʼ kichë ri testigos de Jehová?»).
JOJUN WINÄQ NKIʼIJ REʼ: «Rchë natjoj awiʼ chrij le Biblia nkʼatzin najäm awäch, y rïn majun ta tiempo rchë nbʼän riʼ».
¿Y rït achkë naʼij chrij riʼ?
RI XQATAMAJ QA
Rchë kan kʼo xtatamaj qa taq xtaskʼij ruwäch le Biblia, tachaʼ jun hora ri más ütz nuʼän chawäch rchë naskʼij ruwäch, taʼij che rä Dios chë katurtoʼ rchë nqʼax chawäch ri najin naskʼij y tatjoj apü awiʼ chkij ri tjonïk.
Tqakamluj ri xqatzʼët qa
¿Achkë xkatoʼö rchë kan kʼo xtatamaj qa chpan le Biblia?
¿Achkë hora más ütz nuʼän chawäch rït rchë naskʼij chqä natjoj awiʼ chrij le Biblia?
¿Achkë rma ütz natjoj apü awiʼ chkij ri tjonïk?
RCHË NATAMAJ MÁS
Tatzʼetaʼ jojun naʼoj ri xkatkitoʼ rchë kan kʼo xtatamaj qa taq xtaskʼij ruwäch a-Biblia.
«Ri ütz naʼän rchë kan xtqä chawäch xtaskʼij ruwäch le Biblia» (Ri Chajinel, núm. 1 2017)
Tatamaj achkë oxiʼ rubʼanik ütz naskʼij ruwäch le Biblia.
Tatzʼetaʼ achkë ütz naʼän rchë kan xtqä chawäch xtaskʼij ruwäch le Biblia.
Tatzʼetaʼ achkë naʼoj nkiyaʼ jojun winäq ri kan kʼïy chik junaʼ kiskʼin pä ruwäch le Biblia.