¿Achkë qʼatöy tzij xtachaʼ rït? | ¿Achkë nuʼij le Biblia chrij riʼ?

Ri semanas ye petenäq, chkipan ye kʼïy tinamït, xkechaʼöx ri qʼatbʼäl taq tzij, y ri winäq kʼo chë xtkichaʼ achkë xtqʼatö tzij pa kiwiʼ.

¿Achkë nuʼij le Biblia chrij riʼ?

Ri qʼatbʼäl taq tzij ma jontir ta yekowin nkiʼän

Le Biblia nuʼij achkë ma yekowin ta nkiʼän ri qʼatbʼäl taq tzij.

• «Ma tikʼuqbʼaʼ ta ikʼuʼx chkij ri qʼatöy taq tzij nixta chrij jun chik winäq, rma ryeʼ ma yekowin ta yixkiköl. Ntel äl ri rxlaʼ y ryä ntzolin pa poqlaj; kan yë kʼa ri qʼij riʼ nkʼis ri rchʼobʼonik» (Salmo 146:3, 4, nota).

Jontir ri yeqʼatö tzij xa yekäm, tapeʼ nqʼalajin chë ütz kinaʼoj chqä ütz taq samaj kibʼanon. Tapeʼ kʼo ütz taq samaj kibʼanon, ma yekowin ta nkiʼän chë ri yekanaj qa pa kikʼexel nkiʼän chqä ri samaj riʼ (Eclesiastés 2:18, 19).

Le Biblia chqä nuʼij chë ri winäq ma xebʼan ta rchë ryeʼ nkiqʼät qa tzij pa kiwiʼ.

• «Ma yaʼon ta pa rqʼaʼ rchë nukʼwaj rbʼey» (Jeremías 10:23).

¿Kʼo komä jun winäq ri kan pa rbʼeyal nkowin nuqʼät tzij?

Ri qʼatöy tzij rchaʼon Dios

Le Biblia nuʼij chë Dios rchaʼon jun qʼatöy tzij ri kan ütz nakʼuqbʼaʼ akʼuʼx chrij: Jesucristo (Salmo 2:6). Yë ryä xtqʼatö tzij chpan Ruqʼatbʼäl Tzij Dios, jun qʼatbʼäl tzij ri kʼo chlaʼ chkaj ri xtqʼät tzij pa rwiʼ le Rwachʼlew (Mateo 6:10).

¿Xtachaʼ rït Jesús rchë xtqʼät tzij pan awiʼ? Le Biblia nuʼij achkë rma ütz nqachaʼ ryä:

• «Ma tiqasaj ta rqʼij ri rkʼajol Dios [Jesucristo]; we xa xtiʼän riʼ, Dios xtpë ryowal chiwä chqä rïx pa taq bʼey xkixkäm wä qa, rma ryä kan chanin npë ryowal. ¡Kan kiʼ kikʼuʼx ri winäq ri kan rkʼë ryä nkitoʼ wä kiʼ!» (Salmo 2:12).

Kan komä ütz nqachaʼ achkë nqaʼän. Ri profecías ye kʼo chpan le Biblia nkiʼij chë Jesús xok qʼatöy tzij pa 1914. Ri profecías chqä nkiʼij chë, xa jbʼaʼ chik apü, Dios xtchüp kiwäch jontir ri qʼatbʼäl taq tzij, y xa xuʼ chik Rqʼatbʼäl Tzij ryä xtjeʼ qa (Daniel 2:44).

We nawajoʼ natamaj achkë rbʼanik yatoʼon rkʼë Rqʼatbʼäl Tzij Dios, taskʼij rwäch ri peraj «Apoyemos ahora el Reino de Dios».