¿Tapeʼ chë kan ntel akʼuʼx taq natzʼët chë ri akʼalaʼ kan chanin yekʼïy qʼanäj? Ryeʼ achiʼel ta kan majun ta nkʼatzin nkiʼän rchë yekʼïy qʼanäj. Ye kʼa röj rchë achiʼel ta nqkʼïy chpan rchʼaʼäl Dios, ntel chë tzij, rchë kan jnan nuʼän qawäch rkʼë Jehová nkʼatzin nqatäj qaqʼij (1Co 13:11; Heb 6:1). Rchë nqaʼän riʼ nkʼatzin nq·ok rchiʼil Jehová. Chqä nkʼatzin chë ryä nuyaʼ pä ri loqʼoläj rchqʼaʼ pa qawiʼ rchë yejeʼ ütz taq naʼoj qkʼë, rchë nqatamaj nqaʼän xa bʼa achkë jun ri nkʼatzin chqë chqä rchë nqatjoj apü qiʼ chrij ri xtkʼatzin xtqaʼän chqawäch apü (Pr 1:5). Yë Jehová xbʼanö kichë ri winäq; ryä xbʼanö ri achï chqä ri ixöq (Gé 1:27). Achiʼel qataman, Jehová ma jnan ta xuʼän che rä ri achï chqä ri ixöq y ma jnan ta ri samaj xyaʼ qa pa kiqʼaʼ. Rma riʼ, rchë nkiʼän ri samaj riʼ, ryeʼ ma jnan ta ri naʼoj ri nkʼatzin njeʼ kikʼë chqä ri yekowin nkiʼän (Gé 2:18). w23.12 18 peraj 1, 2

¿Xrajoʼ komä Jesús chë ri nkʼaj chik nkiksaj rbʼiʼ Rtataʼ? Jaʼ, kan ya riʼ xrajoʼ ryä. Rkʼë jbʼaʼ jojun chkë ri kʼamöl taq bʼey judíos nkinmaj wä chë ma ütz ta nbʼix rbʼiʼ Dios rma kan kowan loqʼoläj. Ye kʼa Jesús ma xyaʼ ta qʼij chë ri naʼoj riʼ —ri ma chpan ta ri Loqʼoläj taq Wuj lenäq wä pä— xkiqʼät rchë nuyaʼ rqʼij rbʼiʼ Jehová. Tqaquʼ rij ri qʼij taq ryä xresaj jun demonio ri kʼo rkʼë jun achï chpan ri tinamït Gerasa. Ri winäq kan kowan xkixiʼij kiʼ chwäch Jesús rma riʼ xkiʼij che rä chë tbʼä äl chriʼ (Mr 5:16, 17). Ye kʼa rma ryä xrajoʼ chë jontir winäq nkitamaj rbʼiʼ Jehová, taq ya nbʼä äl, xuʼij che rä ri achï chë ttzjoj chkë ri winäq achkë xuʼän Jehová rma ryä (Mr 5:19). Jesús, ri Qaqʼatöy Tzij, nrajoʼ chë röj chqä ke riʼ nqaʼän. Ryä nrajoʼ chë röj nqakʼüt rbʼiʼ Jehová chkiwäch jontir winäq (Mt 24:14; 28:20). Taq nqaʼän riʼ, Jesús kan kiʼ rkʼuʼx nuʼän. w24.02 10 peraj 10

¡Jontir röj kan kiʼ qakʼuʼx rma yoj kʼo chpan rtinamit Jehová! Tapeʼ ri kʼayewal ye kʼo komä más najin yenmatäj, röj nqtyoxin che rä Jehová rma yoj kʼo chpan jun familia ri akuchï kan jnan rbʼanon qawäch (Sl 133:1). Ri naʼoj yeryaʼ Dios yertoʼ ri familias rchë kiʼ kikʼuʼx nkiʼän (Ef 5:33–6:1). Chqä nuyaʼ pä qanaʼoj rchë ma kan ta nchʼpü qakʼuʼx chqä rchë kiʼ qakʼuʼx nqaʼän. Tapeʼ ke riʼ, kʼo mul nkʼatzin nqatäj qaqʼij rchë nqayaʼ rqʼij Jehová. ¿Achkë rma? Rma rkʼë jbʼaʼ ma nqä ta chqawäch ri nkiʼij o ri nkiʼän ri nkʼaj chik chqë. Chqä kʼo mul nqbʼison taq kʼo jun akuchï nqsach wä, y más taq bʼanaqïl nqaʼän riʼ. Re tjonïk reʼ xtqrtoʼ rchë ma xtqayaʼ ta qa Jehová tapeʼ yeqaqʼaxaj re kʼayewal reʼ: 1) taq jun qachʼalal kʼo jun nuʼij o kʼo jun nuʼän chqë ri xa nqrsök, 2) taq ri qakʼlaj nuyaʼ bʼis pa qan y 3) taq nqbʼison rma kʼo jun ma ütz ta nqaʼän. w24.03 14 peraj 1, 2