¿Xrajoʼ komä Jesús chë ri nkʼaj chik nkiksaj rbʼiʼ Rtataʼ? Jaʼ, kan ya riʼ xrajoʼ ryä. Rkʼë jbʼaʼ jojun chkë ri kʼamöl taq bʼey judíos nkinmaj wä chë ma ütz ta nbʼix rbʼiʼ Dios rma kan kowan loqʼoläj. Ye kʼa Jesús ma xyaʼ ta qʼij chë ri naʼoj riʼ —ri ma chpan ta ri Loqʼoläj taq Wuj lenäq wä pä— xkiqʼät rchë nuyaʼ rqʼij rbʼiʼ Jehová. Tqaquʼ rij ri qʼij taq ryä xresaj jun demonio ri kʼo rkʼë jun achï chpan ri tinamït Gerasa. Ri winäq kan kowan xkixiʼij kiʼ chwäch Jesús rma riʼ xkiʼij che rä chë tbʼä äl chriʼ (Mr 5:16, 17). Ye kʼa rma ryä xrajoʼ chë jontir winäq nkitamaj rbʼiʼ Jehová, taq ya nbʼä äl, xuʼij che rä ri achï chë ttzjoj chkë ri winäq achkë xuʼän Jehová rma ryä (Mr 5:19). Jesús, ri Qaqʼatöy Tzij, nrajoʼ chë röj chqä ke riʼ nqaʼän. Ryä nrajoʼ chë röj nqakʼüt rbʼiʼ Jehová chkiwäch jontir winäq (Mt 24:14; 28:20). Taq nqaʼän riʼ, Jesús kan kiʼ rkʼuʼx nuʼän. w24.02 10 peraj 10

¡Jontir röj kan kiʼ qakʼuʼx rma yoj kʼo chpan rtinamit Jehová! Tapeʼ ri kʼayewal ye kʼo komä más najin yenmatäj, röj nqtyoxin che rä Jehová rma yoj kʼo chpan jun familia ri akuchï kan jnan rbʼanon qawäch (Sl 133:1). Ri naʼoj yeryaʼ Dios yertoʼ ri familias rchë kiʼ kikʼuʼx nkiʼän (Ef 5:33–6:1). Chqä nuyaʼ pä qanaʼoj rchë ma kan ta nchʼpü qakʼuʼx chqä rchë kiʼ qakʼuʼx nqaʼän. Tapeʼ ke riʼ, kʼo mul nkʼatzin nqatäj qaqʼij rchë nqayaʼ rqʼij Jehová. ¿Achkë rma? Rma rkʼë jbʼaʼ ma nqä ta chqawäch ri nkiʼij o ri nkiʼän ri nkʼaj chik chqë. Chqä kʼo mul nqbʼison taq kʼo jun akuchï nqsach wä, y más taq bʼanaqïl nqaʼän riʼ. Re tjonïk reʼ xtqrtoʼ rchë ma xtqayaʼ ta qa Jehová tapeʼ yeqaqʼaxaj re kʼayewal reʼ: 1) taq jun qachʼalal kʼo jun nuʼij o kʼo jun nuʼän chqë ri xa nqrsök, 2) taq ri qakʼlaj nuyaʼ bʼis pa qan y 3) taq nqbʼison rma kʼo jun ma ütz ta nqaʼän. w24.03 14 peraj 1, 2

Kʼo mul, rït xtakʼoxaj chkij qachʼalal ri xkiyaʼ chkiwäch nkiʼän más samaj chpan rtinamit Jehová. Rkʼë jbʼaʼ xebʼä chpan ri Tijobʼäl rchë yetjöx ri nkitzjoj ri Rqʼatbʼäl Tzij Dios o xebʼä jukʼan chik tinamït ri akuchï nkʼatzin más toʼïk rchë ntzjöx le Biblia. ¿Ütz nuʼän chawäch rït naʼän riʼ? We ke riʼ, ¡kan tabʼanaʼ! Ri rsamajelaʼ Jehová ronojel mul nkikanuj rbʼanik rchë nkiyaʼ más rqʼij ryä (Hch 16:9). Ye kʼa we komä rït ma ütz ta na nuʼän chawäch naʼän riʼ, ma taquʼ ta chë xa rma riʼ majun ta más aqʼij, rma ri kʼo más rqʼij chpan rkʼaslemal jun cristiano ya riʼ ma nikʼo ta rkʼuʼx nyoʼen (Mt 10:22). Ma tamestaj ta chë Jehová kan kiʼ rkʼuʼx nuʼän we rït naʼän ri yakowin rchë nayaʼ rqʼij. We xtaʼän riʼ, xkakowin ronojel mul xtatzeqelbʼej Jesús taq yït qasan chik pa yaʼ (Sl 26:1). w24.03 10 peraj 11