TACHAPAʼ TZIJ
NAʼOJ 3
Ütz anaʼoj tabʼanaʼ
Ri nuʼij le Biblia: «Ri winäq ri najowan [...] ütz runaʼoj» (1 Cor. 13:4).
Ri xuʼän Jesús
1. Tatzʼetaʼ ri VIDEO o taskʼij ruwäch Juan 9:1-7. Chrij riʼ, taquʼ kij re kʼutunïk reʼ:
¿Achkë naʼäy xuʼän Jesús: xknaj (xqʼomaj) ri moy, o xtzjoj ri utziläj taq rutzjol che rä? (Tatzʼetaʼ Juan 9:35-38).
¿Achkë rma ri achï xkʼoxaj Jesús?
¿Achkë nqatamaj qa chrij Jesús?
2. Rkʼë jbʼaʼ jun winäq más xtrajoʼ xtyaʼ ruxkïn chqë we nunaʼ chë nqchʼpü chrij (nqamäy rij).
Takʼamaʼ anaʼoj chrij Jesús
3. Tanaʼ ri nkinaʼ ri nkʼaj chik. Taquʼ achkë rkʼë jbʼaʼ najin nunaʼ ri winäq.
Taquʼ rij reʼ: «¿Achkë rkʼë jbʼaʼ yebʼanö che rä chë nchʼpü rukʼuʼx (nmayon)? ¿Achoq chrij rkʼë jbʼaʼ nrajoʼ ntzjon wä o achkë naʼoj rkʼë jbʼaʼ xtkʼatzin che rä?». Re kʼutunïk reʼ xkatkitoʼ rchë kan ütz anaʼoj xtaʼän rkʼë ri winäq.
Tayaʼ axkïn che rä ri winäq, rma ya riʼ xtkʼüt chwäch chë yachʼpü chrij (namäy rij). We ri winäq nuʼij achkë nunaʼ o achkë kʼayewal najin nuqʼaxaj, ma tatzjoj ta rij jun chik naʼoj.
4. Ma taqasaj ta kiqʼij ri winäq taq yatzjon kikʼë. Rkʼë ri rubʼanik nqtzjon nqakʼüt we nqapoqonaj ruwäch jun winäq chqä we kantzij nqajoʼ nqatoʼ. Rma riʼ taquʼ na achkë naʼij chqä achkë rubʼanik xkeʼaʼij ri tzij riʼ. Ma keʼaksaj ta tzij ri rkʼë jbʼaʼ xa xtsök jun winäq.
5. Keʼatoʼ ri winäq. Taq ütz nuʼän, tatzʼetaʼ achkë rubʼanik natoʼ ri winäq. We ütz qanaʼoj xtqaʼän rkʼë, ya riʼ rkʼë jbʼaʼ xtuʼän chë más xtuʼij riʼ ran nqrkʼoxaj.