Noé nuʼän jun arca

Taq xeqʼax ri jnaʼ, xekʼiyär ri winäq chwäch le Rwachʼlew chqä kan itzel wä kinaʼoj. Yajün jojun ángeles xuʼän itzel kinaʼoj. Tapeʼ Jehová xeruʼän ri ángeles rchë yejeʼ chkaj, re ángeles reʼ xa xepë chwäch le Rwachʼlew. ¿Ataman rït achkë rma? Rchë yekʼleʼ kikʼë ixoqiʼ.

Ri ángeles xejeʼ kalkʼwal kikʼë ri ixoqiʼ. Ri akʼalaʼ riʼ kan itzel kinaʼoj chqä kowan kichqʼaʼ xjeʼ taq xenmär, y yekitzʼlaʼ wä ri winäq. Jehová ma xyaʼ ta qʼij chë ronojel mul xbʼanatäj ya riʼ. Rma riʼ xuʼij chë xtchüp kiwäch ri itzel taq winäq rkʼë jun mamaʼ jöbʼ, ri kan xtnujsaj jontir Rwachʼlew.

Pero kʼo wä jun achï ri kan ma jnan ta rnaʼoj kikʼë ri nkʼaj chik, rma kan nrajoʼ Jehová. Rbʼiʼ re achï reʼ ya riʼ Noé. Ryä kʼlan wä chqä ye oxiʼ rkʼajol: Sem, Cam chqä Jafet. Ryeʼ chqä ye kʼlan wä. Jehová xuʼij che rä Noé chë tbʼanaʼ jun arca. Jun arca ya riʼ jun mamaʼ caja ri bʼanon rkʼë tzʼalän chqä nkowin nbʼä pa rwiʼ yaʼ. Ya riʼ xttoʼ Noé chqä rfamilia rchë ma xkekäm ta taq xtpë ri mamaʼ jöbʼ. Jehová chqä xuʼij che rä Noé chë kerksaj kʼïy chköp chpan ri arca rchë ma yekäm ta.

Noé kan chanin xchäp rbʼanik ri arca. Ryä chqä rfamilia xkʼwaj jun 50 jnaʼ chkiwäch rchë xkikʼïs rbʼanik. Y xkiʼän kan achiʼel xuʼij Jehová chkë. Noé chqä xuʼij chkë ri winäq chë xtpë jun mamaʼ jöbʼ, pero majun xnman chwäch.

¿Nawajoʼ natamaj achkë xbʼanatäj taq ryeʼ xeʼok chpan ri arca?