TJONÏK 05
Ri naʼoj ye kʼo chpan le Biblia kan rkʼë Dios petenäq wä
Jehová ruyaʼon jun nimaläj spanïk chqë y ya riʼ ri 66 libros ri kʼo chpan le Biblia. Ye kʼa rkʼë jbʼaʼ nakʼutuj qa chawäch: «¿Achoq runaʼoj kʼo chpan le Biblia?». Rchë nqaqʼalajsaj re kʼutunïk reʼ, tqatzʼetaʼ achkë ruqʼaxan pä Ruchʼaʼäl Dios.
1. We le Biblia xtzʼibʼäx kimä achiʼaʼ, ¿achkë rma nqaʼij chë runaʼoj Dios kʼo chpan?
Le Biblia xtzʼibʼäx kimä jun 40 achiʼaʼ ri jalajöj wä kisamaj. Jojun chkë ryeʼ xeʼok yuqʼunelaʼ, ajchapöy kär chqä qʼatöy tzij. Le Biblia xchap rutzʼibʼaxik pa junaʼ 1513 taq majanä wä tpë Jesús y xkʼis rutzʼibʼaxik pa junaʼ 98 taq xpë yän Jesús. Reʼ ntel chë tzij chë xkʼwaj jun 1,600 junaʼ rutzʼibʼaxik. Tapeʼ ke riʼ, ma nkisüqʼ ta kiʼ ri naʼoj ye kʼo chpan. ¿Achkë rma? Rma kan yë Dios xbʼanö rchë (taskʼij ruwäch 1 Tesalonicenses 2:13). Ri achiʼaʼ riʼ ma kinaʼoj ta ryeʼ xkitzʼibʼaj qa rma «kan yë ri loqʼoläj ruchqʼaʼ Dios xkʼwan kichë rchë xetzjon pa rubʼiʼ Dios» (2 Pedro 1:21). Dios xksaj ri loqʼoläj ruchqʼaʼ rchë xuʼän chë ri achiʼaʼ riʼ xkitzʼibʼaj qa runaʼoj chpan le Biblia (2 Timoteo 3:16).
2. ¿Achoq chkë bʼanon wä pä le Biblia?
Jontir winäq ri ye kʼo chpan «jontir tinamït, ijatzul y chʼaʼäl» ütz nuʼän chkiwäch nkitamaj chrij ri utziläj taq rutzjol yeruyaʼ le Biblia (taskʼij ruwäch Apocalipsis 14:6). Dios rubʼanon chë le Biblia alenäq chkipan kʼïy chʼaʼäl; ya riʼ ri wuj ri qʼaxan pa más chʼaʼäl chwäch xa bʼa achkë chik jun wuj. Rma riʼ jbʼaʼ ma jontir winäq kʼo jun ki-Biblia tapeʼ xa bʼa achkë na kitinamit o kichʼaʼäl.
3. ¿Achkë xuʼän Jehová rchë ma xchup ta ruwäch le Biblia?
Le Biblia xtzʼibʼäx chkiwäch rollos ri kan chaq bʼaʼ yechaʼ chiʼ, rma xa rkʼë kitzʼmal chköp o rkʼë rujotaʼy jun cheʼ ri rubʼiniʼan papiro xebʼan wä. Ye kʼa jojun achiʼaʼ ri kan xkiloqʼoqʼej le Biblia xkiqʼaxaj chkiwäch nkʼaj chik wuj ri kʼo wä chkiwäch ri rollos riʼ. Tapeʼ ye kʼïy winäq ri kʼo wä uchqʼaʼ pa kiqʼaʼ xkajoʼ xkichüp ruwäch le Biblia, nkʼaj chik kan xkitäj kiqʼij rchë ma xbʼanatäj ta riʼ tapeʼ xxiʼin rij kikʼaslemal. Majun ta jun achkë qʼatayon rchë Jehová rchë ma ta ntzjon pä qkʼë. Le Biblia nuʼij: «Ri Ruchʼaʼäl ri qa-Dios majun bʼëy xtchup ta ruwäch» (Isaías 40:8).
TQATAMAJ MÁS CHRIJ RE NAʼOJ REʼ
Tqatamaj más chrij ri achkë rubʼanik xeʼuksäx jojun achiʼaʼ rma Dios rchë xkitzʼibʼaj le Biblia. Chqä tqatzʼetaʼ achkë rubʼanon pä Dios rchë ma chupnäq ta ruwäch le Biblia chqä rchë jontir winäq ütz nuʼän chkiwäch nkiskʼij ruwäch.
4. Le Biblia nuʼij chqë achkë xbʼanö rchë
Titzʼetaʼ ri VIDEO. Chrij riʼ tiskʼij ruwäch 2 Timoteo 3:16 y kixtzjon chrij reʼ:
We le Biblia xtzʼibʼäx kimä achiʼaʼ, ¿achkë rma nbʼix Ruchʼaʼäl Dios che rä?
¿Nanmaj rït chë Dios xyaʼ pä runaʼoj pa kijolon ri achiʼaʼ ri xetzʼibʼan le Biblia?
Ri achiʼ najin nutzʼibʼaj jun carta, ye kʼa runaʼoj ru-jefe najin nuyaʼ äl chpan, rma yë ryä nbʼin che rä achkë kʼo chë nutzʼibʼaj. Ke riʼ chqä xbʼanatäj rkʼë le Biblia, yë winäq xetzʼibʼan rchë, ye kʼa runaʼoj Dios kʼo chpan.
5. Majun ta jun xkowin xchüp ruwäch le Biblia
Rma kan yë Dios xbʼanö le Biblia, ryä ma xtyaʼ ta qʼij chë xtchup ruwäch. Ojer qa, ye kʼïy qʼatöy tzij xkajoʼ xkichüp ruwäch le Biblia chqä jojun ukʼwäy bʼey pa taq religiones ma xkajoʼ ta chë ri winäq xkiskʼij ruwäch. Ye kʼa, ye kʼïy winäq kan xkitäj kiqʼij rchë ma xchup ta ruwäch le Biblia tapeʼ jojun kan itzel xkinaʼ chkë o xkajoʼ xekikamsaj. Rchë nitamaj kiwäch jojun chkë ri achiʼaʼ riʼ, titzʼetaʼ ri VIDEO y kixtzjon chrij reʼ:
Komä ke xatamaj chë kan yë kʼïy winäq xkitäj kiqʼij rchë ma xchup ta ruwäch le Biblia, ¿nawajoʼ komä naskʼij más ruwäch? ¿Achkë rma?
Tiskʼij ruwäch Salmo 119:97 y kixtzjon chrij reʼ:
Tapeʼ xxiʼin rij kikʼaslemal, ¿achkë rma kan ye kʼïy winäq xkitäj kiqʼij rchë xkiqʼaxaj le Biblia pa nkʼaj chik chʼaʼäl?
6. Jun wuj ri bʼanon pä chkë jontir winäq
Le Biblia ya riʼ ri wuj ri qʼaxan pa más chʼaʼäl chwäch xa bʼa achkë chik jun wuj. Tiskʼij ruwäch Hechos 10:34, 35 y kixtzjon chrij reʼ:
¿Achkë rma Dios nrajoʼ chë nqʼaxäx Ruchʼaʼäl chkipan kʼïy chʼaʼäl chqä chë tjach chkipan kʼïy tinamït?
¿Achkë más nqä chawäch rït chrij le Biblia?
Jbʼaʼ ma
jontir
winäq
kʼo jun ki-Biblia ri kʼo chpan jun chʼaʼäl ri nqʼax chkiwäch
Alenäq pa más
3 mil
chʼaʼäl,
jontir le Biblia o xa jojun peraj
Jun
5 mil millones
Biblias elesan chik chwäch wuj.
Ya riʼ ri wuj ri más elesan chwäch xa bʼa achkë chik jun wuj
JOJUN WINÄQ NKIʼIJ REʼ: «Le Biblia xa kinaʼoj winäq kʼo chpan».
¿Achkë naʼij rït?
¿Achkë nkʼutü chë le Biblia ya riʼ Ruchʼaʼäl Dios?
RI XQATAMAJ QA
Le Biblia ya riʼ Ruchʼaʼäl Dios y ryä rukanun rubʼanik rchë jontir winäq njeʼ jun ki-Biblia.
Tqakamluj ri xqatzʼët qa
¿Achkë ntel chë tzij chë Dios xeruksaj achiʼaʼ rchë xkitzʼibʼaj le Biblia?
Rkʼë jontir ri xqatzʼët qa chpan re tjonïk reʼ, ¿achkë más xqä chawäch chrij ri bʼanatajnäq pä rkʼë le Biblia?
¿Achkë nanaʼ rït taq natamaj chë Dios rukanun rubʼanik rchë ntzjon pä awkʼë?
RCHË NATAMAJ MÁS
Tatamaj achkë ruqʼaxan pä le Biblia: kan xa xuʼ xtzʼibʼäx naʼäy mul kʼa pa qaqʼij komä.
Tatzʼetaʼ achkë oxiʼ nmaʼq taq kʼayewal rlon pä le Biblia.
«Le Biblia chqä jontir ri kʼayewal xeruqʼaxaj» (Ri Chajinel, núm. 4 2016)
Tatzʼetaʼ achkë kʼayewal xkïl jojun winäq rma xkajoʼ xkiqʼaxaj le Biblia pa nkʼaj chik chʼaʼäl.
Pa qaqʼij komä kan kʼïy Biblias ye kʼo, ¿achkë rubʼanik nqatamaj chë ma jalon ta runaʼoj Dios chkipan?
«¿Jalon komä ri naʼoj ye kʼo chpan le Biblia?» (Reʼ xtawïl pa jw.org)