Māch

Ngam ‘sīṅp’ im inchō-oṙô Yēsū im Mëtiv 25:31-36, ṙô tö yip tölöök tarik töngamuh yip mameukkenre nö örheūheu aṅ nö ikūö ngih panam yip töt aṅ ngam kiteūm. Cha-a yin tö keuheūtngöre chūök nö ing panam nö ahangkö ngam tölöök inhānga nö holṙen yip kahëm Yēsū. (Mët. 24:14; 28:19, 20) Urěhēkūö infēkö ngam kinpaha, nö kēkaṙen ngam kömpěn nö keuheūt ngöre chūök nö inë Panam. Vē töt aṅ ngam kiteūm yin kamëtöre nö in e angu-ö la-en, havëtö yip tarik cha-a nö yihtökuö nö im infēkö kinpaha. Halēnken ngam infēkö kinpaha cha-a. Angu-ö la-en cha nö holtö ṙanāmölōn re nö holṙen më kahëm Kristū. Akahalōn yin töre yěn holṙen cha, nöng sa hamòlṙen Yēsū.—Mët. 25:37-40. w22.01 pěch 22 përa 11-12

Mihôiṅ in ayī-ö inrē asīnken Yēsū yěi vë-ekūö yip holre hēk la-evṙen öi holṙen cha. Hē Yēsū nö meuk ök tö yeūnyu tarik, chöknyi nômö anga-aṅ nö meūkan, lökngöre anga-aṅ inrē tö chanöökö ök yöng nyīö tö marô-òtökūö nö vāhavö. Yēḵ hī min ayī-ö inrē, lökngöre tö nup kanihngen yip holre, ngaich sā ma-asīnken Yēsū min ayī-ö öi pītnyöre. (Māk. 1:40, 41; 5:25-34; Yôh. 11:33-35) Ngaich röhta min öi in ngam Tēv yěi ngatī inlahen. Öt hō in lōmngö i nup la-en ngih panam yēḵ hī min öi tömkö röön Yēsū. Öt lōmngö Yēsū tö nup la-en ngih panam, nup mufē yip tarik hēk nup tinrīken cha inrē. Öt vaichngö anga-aṅ töm la-en re nö yih nö ing panam, nö möharōilö minë-eny Yāvē. Lökten ò nö heuveū-euṙô nö ngö ṙô: “Ngaich Chin mihôiṅ töng panam.” (Yôh. 16:33) Pōyen nup inlo-ongkūö hī töngamuh ikūö ngih panam. Yēḵ hī pöri min haköpmatre ngëichken Yēsū ngam inchōkūö hī, ngaich öt hō min öi öt “mihôiṅ” töng panam.—1 Yôh. 5:5. w21.04 pěch 3-4 përa 7-8

Akahakūö anga-aṅ töm kinlēḵngô Yēsū ‘tö vē ṙamatö-ellōnre nö in ò [Yēsū] . . . Nômu tö ngam tö-örheūheu aṅ.’ (Yôh. 3:16; Rōm. 6:23) Öt kintööngulōn anga-aṅ tö ngam Tēv nö hangenlōn tö ò. Yēḵ hī min ayī-ö haṙivlōn tö nup kahëkenre tö vaich ngaich halööktitre ngaich aṙělen hī min ang Yāvē. (Sal. 86:5.) Ṙatö-ellōn re ang Pôl tö Yāvē nö kēḵten ngam kūön re ang Kristū nö chö-önyten tö ò. Kò-òren hang ṙô ngam mana-angrit ṙô ngam Kalatī 2:20. Ngö ṙô ang Pôl: ‘Töm Kūön ngam Tēv, nö hāngenlōn tö chu, kēngöre inrē töpôkūö chu.’ Öt ngö mufē ang Pôl tö Yāvē nö pōyen hangenlōn tö ò ngaich kūönnen hanangenlōn tö yip tahëng. Fēlen yik Kristīön aṅ Rōma ang Pôl, nö ngö ṙô: “I saha hī ṙòngmö tötlöök, ngaich kapah Kristū tö pòkūö hī.” (Rōm. 5:8) Kò-en pöri ang Yāvē nö ṙòkhöre hanangenlōn tö yip tarikre. Öt kintööngulōn ang Pôl tö ṙū-u ngam hanangenlōn ngam Tēv. Ngatī manööyö misī anga-aṅ nö in yik kūönre Israel. w21.04 pěch 22 përa 8-10

Yēḵ meh kēḵ Paipöl istötī ngaich hayööken öp mahaköp nö hangenlōn tö Yāvē. Yēḵ meh öm ṙētak vö ngaich vë-eny nang ò tö nup tinrīken Yāvē. Ngaich vë-eny nang ò më-eṅ tö Yāvē nö Tēv ṙanamlōn ngaich yip tö hangenlōn tö ò, ngaich holren cha anga-aṅ. (1 Tim. 1:11; Hep. 11:6) Pōyen yanöölen öp töhaköptu min yěn asinken nup haköpre hēk vë-eny nang ò tö Yāvē nö lōnu tö yanöölen yip tö hangenlōn tö ò. (Isa. 48:17, 18) Asā öp hanangenlōn ò min tö Yāvē ngaich ngatī inlahen min anga-aṅ nö halööktit nup tinrīken re. Yēḵ ngam mahaköp nö kēḵ ngam vinôkö, ngaich hòṅ haröḵngenre anga-aṅ. Tö sā öp mahaköp öre nö öt asā nup ṙô ngam paipöl öp kinmanö ò, ngaich lohten anga-aṅ nö hòṅ hariḵngö ngam kinmanö re. Ngaich hòṅ ṙāngenre anga-aṅ nö hanôl yip töt ha-öönyö Yāvē. Ngaich yip aṅ patī ò inrē nö öt hangenlōn tö ò pò cha nö öt hangenlōn tö yip vamënyen Yāvē. Kilēḵngöre pöri ang Yēsū nö örhō nö ṙāngen hī pòn yip mikūönö Yāvē nö acha-a min tö hangenlōn tö hī.—Māk. 10:29, 30. w21.06 pěch 4 përa 8-9

Asīntö ngam la-en vinītö mahaköp ang Pôl nö in öp tameūich. Ngö ṙô anga-aṅ nö in yik aṅ Kòrin: “Teūchhöti chū-ö, ṙösö tö Apòlös, ngam Tēv pöri kamëtö ṙôken . . . Yī-ö yin panô-òṅ ngam Tēv, patī ngam Tēv.” (1 Kòr. 3:6-9) Töla-evṙen ayī-ö el “panô-òṅ ngam Tēv,” sā tameūichtö ngam kulöl ayī-ö yěi ahangköm tölöök inhānga ngach sā ṙamösö e yěi haköphöti. Ngam Tēv pöri ma-asīöp ngam kulöl. Tökiröng ön nö la-en ngam inhānga hēk töm inköphöti inrē! Kô-en ayī-ö ṙamölōn tö tī e. Hangihtöṙô Pôl nö vë-eny ṙanamlōn re nö hayööken yik aṅ Tösalònikē: “Asuh ṙöng ap, maheūṅkkö ih, ṙanāmölōn, sapīöv ineū-euṅ? Röh öi yī-ö, i kūö ngam Mā Yēsū ip yanīhih Ò? Pò yīö ineū-euṅ ih, ṙanāmölōn ih inrē.”—1 Tös. 2:19, 20; Inl. 17:1-4. w21.07 pěch 3 përa 5; pěch 7 përa 17

Ik sā Yāvē nö meukö meh nö ṙā-ang in yip tö aröb ṙò-òken, ngaich chumkūöṙen anga-aṅ nö meuk ngam tövai tinrīnkngen meh ngaich hangenlōn min më-eṅ inrē tö ò. (Yôh. 6:44) Lökten anga-aṅ nö tukten meh nö in re. Tökiṙöng ön nö ṙanamlōn hī tö Yāvē nö akahakūö tö meh hēk hangenlōn inrē tö meh. (1 Kin. 28:9) Sā Yāvē nö chumkūören tö meh, ngatī inrē anga-aṅ nö chumkūören tö yip prötör sistör. Tö sā ngam ṙô Yāsū inchōḵ elmat inlahen ngam yōm siṅp. Yēn hěng hang nòng öp tö lō-ong kūö siṅp nö in minë tö 100 ṙôken, ngaich ngam yōm siṅp nö ṙangö nup tö 99, ngaich chuh kui rôngö, nö chöh ngam tö lō-ongkūö siṅp. Ngaich yē ò nö kôtökūö tö ngam siṅp ngaich hö-ö anga-aṅ nö vëken ò pòn ṙamlōn anga-aṅ nö meuk kūö ò. Ngaich asātu Yāvē nö yōm siṅp tö Yēsū. Pōi rai elmat öng Yāvē tö nup siṅp re. Ngö ṙô Yēsū: “Ngatī an nö öt lōn ngam Yöng chu el halīöngö, nö hěng hang tak in vē kun kūöṅnö nö ötkôlö.”—Mët. 18:12-14. w21.06 pěch 20 përa 1-2

Yē hī fēken ngam hanangenlōn Yāvē tö hī sīöplöre min ngam hanangenlōn hī tö ò ngam innôlö hī inrē nö ngönlöre. (Rōm. 8:38, 39) Ṙinūöhlö alaha hī asinken Yēsū. (1 Pīt. 2:21) Urěhēkūö infēkö kinpaha öi haköp inlahen ngam mana-aṅ afta Yēsū nö aṅ nö ikūö ngih panam töm inlahen ngam kinpaha ò töm anahlö ò inrē. Ngaich im harap infēkö kinpaha, im minkahten fēlöngö ayī-ö töm hanangenlō Yēsū tö hī. (Efi. 5:2; 1 Yôh. 3:16) Ngam hinôtö hī ‘asīnken minë tinrīken Yēsū ik sa ò nö aṅ.’ (1 Yôh. 2:6) Harūköre hakööpöre im hanangenlōn ngam Tēv. (Yūt 20, 21) Yē hī hang chööngö Yāvē, ahetlö ngam minë-eny ò haṙamlōn ò inrē, ngaich köp min ngam hanangenlōn ngam tēv nö in hī. (Inch. 27:11; Mët. 6:9; 1 Yôh. 5:3) Im inlahen hī yih tö kūö im infēkö kinpaha ngönlöre ngam kuilōn hī asīnken nup lōn ngam Tēv, mihôiṅ ngöṙô in Yavē, ‘lōnu chin örheūheu köp im hanangenlōn meh!’ w22.01 pěch 23 përa 17; pěch 25 përa 18-19

Kētö inlōnti hī an Yāvē öi katöllö öp lōn re. Mihôiṅ in katöllö öp lōn re tinrīken re. Yēḵ hī öi atöllö ngam linöökö lōn Yāvē, ngaich ṙamlōn anga-aṅ. (Sal. 84:11; Inch. 27:11) Mihôiṅ in inrē löngö tī yūs ngam inlōntī re öi in minë tahëng chūök re öi katöllö nup lōn re. Örheūheu ök Yēsū nö fēken yip tahëng. Hěngheuh anga-aṅ tö yip haköp tö ò nö laraḵ. Ngaich cha-a nö heuhtöre nö chuh in öp tö chēvhakṙen chūök, öt teūngen pöri acha-a nö heuhtöre. Pò yip tömaṙôngö tarik nö chuh ngörit cha, ngaich cha-a nö lōnu töre nö hòṅ haköptu tö Yēsū. Öt līplö ang Yēsū nö meukö cha, aṙē-ělōn pöri anga-aṅ tö cha, “Kaknyöre ngaich Anga-aṅ nö marô-òtô nö haköpten cha.” (Māk. 6:30-34) Ngatī in inrē ayī-ö öi hòṅ fēken yip tahëng. Yēḵ hī öi kētö nup ṙētak re hēk kumlēḵ re öi hayööken yip tahëng, ngaich harōilö minë-eny Yāvē ayī-ö.—Mët. 5:14-16. w21.08 pěch 3 përa 7-8

Hö-ö an Yāvē nö hěngren vahī pön kaharīkngöre minë vahī ò. Tö sā minë chōn hēk tö minë töṙeūla inrē. Hēk tö sā hī inrē öi tarik öi kaharīkngöre vīni-i tö ò. Lökten ayī-ö öt kô öi asātöre öi in yip tahëng. Pön akahakūö anga-aṅ töm ellōn hī hëḵ akahakūö anga-aṅ töm lamā tuhet tarik. (1 Sa. 16:7) Akahakūö inrē anga-aṅ tö minë heuneū-en hī, hēk tö minë öt kumlēḵ-en hī inrē hēk inruklö hī inrē. Lökten nup töng töölngö inlahen hī, öt uròh anga-aṅ nö yahlölōn nö in hī. Lökten ayī-ö hòṅ sā mat Yāvē öi ngëichköre. Ngaich möl min ayī-ö öi vayö mufē. (Rōm. 12:3) Öt tö vaich ön ngam inlahen hī yěi haköplu öi in yip tahëng. Tö sā hī yēḵ öp prötör öre hēk tö öp sistör nö tö heuveū-en nö in ngam tölöök inhangö, ngaich mihôiṅ öi meuk inlahen cha öi haköplu öi in cha. (Hep. 13:7; Filip. 3:17) w21.07 pěch 20 përa 1-2

Mihôiṅ man asīöp ngam ṙinatö-ellōn re im Vamīlen hī, yěm ngëichkö në tövīlöngö tö sā minë töṙeula, chōn, tö minë taneusömat inrē. (Sal. 19:1) Yēḵ meh min öm ṙuöhtö mikahkūöre tö u, ngaich sīöpö ṙôken min ngam ṙinatö-ellōn meh in Yāvē tö ò nö anga-aṅ Vamīlen në taṙòkhöre chehen. Chumkūöṙen më-eṅ öm chöh nup kanô-en inmeuknyö ngam Vamīlen hī nö ōt, yēḵ meh öm haköp inlahen në tö vīlöng. (Rōm. 1:20) Töi hachōḵ elmatre, ötkô in öt teūngen tö ṙanāchö mat ngam tavūöi yěi hòṅ aṅ ikūö ngih panam. Ōt pöri nup muh ṙanāchö mat ngam tavūöi tökalēḵ, tömihôiṅ nö pala-aiṙen tī tö hī. Öt sölta pöri anū-ö nö ikui ngih tumlat. Kūöyòh? Pön ōt re ngam Òchōn Lēyör nö laklen hī. Öt halönghöt minë tö chökhuti angū-ö kumlēḵ mat ngam tavūöi. Yěn pōilöre kumlēḵ mat ngam tavūöi ngatī sanīöpö inrē ngam Òchōn Lēyör. Hö-ö hòng tölōn meh ngam töngatī nö elkui ngam tö akaha Vamīlen hī? w21.08 pěch 17 përa 9-10

Pòrô öp tö hěng tak ngaich nö vōkö, iṙūöhen ayī-ö hangenlōn hēk milēḵṙen tö ò. (1 Yôh. 4:20) Öi sitih inlahen? Asehkūö re man tö inlahen öp prötör, öt akahakūö më-eṅ töp chö-öiny ò nö kēken öp töhěng la-en. Sön pöri më-eṅ öt tutkö inlahen ò nö vaich. Pöm ṙinātu ellōn in ò, milēḵṙen tö ò hēk möklö lōn tö ò. (Rōma 12:10; Filip. 2:3) Holtö neūkölōn re hēk miṙēḵlōn re man in yip tahëng. Yēḵ hī öi hòṅ nôlhöt el ngam mikūönö Yāvē ngaich hòṅ la-evṙen ayī-ö asā nup ṙô ngam Paipöl. Tö sā Yēsū nö haköpten hī öi hameuktö neūkölōn re hēk miṙēḵlōn re tö yip tö kunyaha elmat töre. (Lūk. 6:32-36) Öt lööṙen ayī-ö ngatī inlahen. Hòṅ sā mufē Yēsū pöri ayī-ö ngaich asinkö nup tinrīken ò inrē. Yēḵ hī min hang chööngö Yāvē, asinken Yēsū inrē ngaich hameuktöre ayī-ö öi hòṅ nôlhöt el ngam mikūönö Yāvē. w21.08 pěch 6 përa 14-15

Ṙinatu-ellōn in Yāvē. Kilēḵngôre anga-aṅ tö hī yěi ratö-ellōnre in ò ngaich hōltö ellōnre löklōn ò, ngaich pòyen min nup inkòlô hī kahëtö ò. Pōyen yin më inchōḵ elmat hī imat ngam Paipöl, mu-urěh la-en Yāvē ngaich möl nö teūngen tö inkôlòre. Sā inlahen Aprahām nöng hōḵ nö ṙāngö ök patī re pòrô nö “öt akahakūö tö kū-öre” kētu inkòlô ngaich anga-aṅ tö Yāvē. (Hep. 11:8) Ang Yāköp inrē urěh nö kirīp ök ma-ahānga, möl Yāvē nö kētö inkòlô ò. (Ran. 32:24-30) Yik kūönṙô urěh nö ṙatö röönre nö el ngam mak i Yôtön, möl ngam hanëmö ngam mak nö sökngöre. Unôichrit e më aṅ Israel nö havangen e ngaich möl nö teūngta nö im kinlēḵngô panam. (Yôs. 3:14-16) Haköp inlahen yip prötör sistör man kò-òren, ṙamātö-ellōnre nö in Yāvē ngaich ṙuhlö inlahenre nö löklōn ò. w21.08 pěch 29-30 përa 12-14

Yī-ö tököiny holmaneuk hī, akahalōn yī-ö tö re öt köpsören inlahen min öi kēken minë la-enre tö la-urěh, pön tufömngöre ngaich minë inlahen hī öi kēken minë la-en. Sön öi höng hō asīnken minë tufömngöre inlahen hī öi kēken minë la-en. Pòrô man fömngören kēḵ ngam vīnôkö, sön öm mihôiṅ hayööken yip tö ayal tarik. Pön ṙamlōn min më tö ayal tarik nö hang inlahen meh ing ṙēḵti meh. Pōyen min inrē nup inkôlò taneūngen meh kahëtö Yāvē. (Lūkös 6:38) Yěn vai min ngam innôlö ngam tököiny tarik, tö ngam tö ayal ngaich öthō min cha-a nö öt holṙen höö nö la-evṙen, hayööken höö inrē. (Rōm. 1:12) Nëtre tak cha-a nö tö pōiṙāi nö im kamtöre, pön pōyen mikah ngam tököiny, ngaich īnu ngam tö ayal töm kumlēḵ re. Yēḵ cha min nö holṙen re, ngaich rōilö min ngam minë-eny Yāvē. Köp min inrē ngam hinëngö nö el minë māṅ. w21.09 pěch 8 përa 3; pěch 13 përa 17-18

Kihngen yik Yahuti nö ṙatö-ellōnre nö in Yēsū kūö ò nö sā finëlngö tö köölö fālen. Lökten cha nö kihngen nö ṙatö-ellōnre tö Yēsū nö Mesayā. (Chöö. 21:22, 23) Yik tarik hamang kinṙòkken Yēsū misī, öt lööngö inlahen yik kamhòkken ò nöng vīlöng nuk fālen ò. Töng öt chumkūöṙen yik inrē kamhòkken ò. Höng haveutṙenre cha-a nö kahòkken ngam fālen nöng öt sā ṙô minë chööngö. (Lūk. 22:54; Yôh. 18:24; Mët. 26:59; Māk. 14:55-64) Unôichrit Yēsū hēk nö choholre nö ṙa-ang im kinpaha, cha-a nö “Pōiyen kahëti tö rupīö, nö i yik kumyung” aṅ Rōm hòṅ cha nö vënyen ök anūlö nö öt aṅhav tök alaha Yēsū.—Mët. 28:11-15. w21.05 pěch 11 përa 12-13

Mihôiṅ öre anga-aṅ nöng ilöö kēngen u, hamööyö re pöri anga-aṅ. Yöölen ayī-ö töngamuh kūö ngam Manööyö ò! Ngëchkö ngih inchōḵ elmat hī. Kūön Ātöm nā Ēva öi ṙòkhöre aṅhavin tö ngam tökööl. Sön ang Yāvē nö hangenlōn tö hī. (1 Yôh. 4:19) Kilēḵngôre anga-aṅ inrē töre min nöt löktu nöt kēngen minë kanihngen hī. Lökten ayī-ö hòṅ hamööyöre la-al minë kanihngen re hanöng sā ò nö öl nö kēngen u. Töt insā-avö ang Yāvē nö inchōḵ elmat hī nö tö aṅhavin töm Manööyö. Asīnkö inlahen ngam Yöng re ang Yēsū hē ò nö ing panam. Hamööyöre anga-aṅ pòrô nö ötlēka elnang, miṙē-ěyö nö ikūö tömaṙôngö, uroh inrē nö fëliyö töpôkūö hī. (Hep. 12:2, 3) Ngön pöri ang Yēsū nö la-al nuk inkihten re kūö ò nö afēkö Manööyö ngam yöngre. Ngatī min ayī-ö ngönlöre yěi köpölōn töm Manööyö Yāvē. w21.07 pěch 12-13 përa 15-17

Akahaiṙen in töm hanangenlōn ngam Yöng hī aṅ el halīöngö. (Sal. 103:10-14) Pòrô yik mahaköp nö in Yēsū nö töthet; sön anga-aṅ, nö hangenlōn tö cha, aṙēlen cha inrē. Hō anga-aṅ nö kēngö nômö re tö pòkūö në tökööl hī. (1 Yôh. 2:1, 2) Sā mahangönlöm hanangenlōn re in tö höö yěi “kö aṙēlen höö.” (Efi. 4:32) Hö-ö pöri öi lööṙen öi ngatī inlahen pò hī öi öthet. Yēḵ hī pöri min harūnöre ngaich köp min ngam hanangenlōn hī tö höö. Kò-òren in hang ṙô ök töhěngtak sistör nö vë-eny inlahen lanööktö mufēre hē ò nö haköp ök ātiköl el ngam chuökamahati (HI) ök tö ngö ṙô: “Kö Aṙēlen Höö Yin.” Ngö ṙô tī anga-aṅ nö kūich: “Vë-eny nang hī ngam ātiköl, töm inlahen hī yěi aṙēlö yip holre, nö rö-ö nö tö ngö manah tö hī öi ṙamlōn töm inlahen tī ò tö hī. Tö ngö manah pöri angū-ö, tö hī öi hòṅ vī ngam lanāmö öi ihôi cha.” Yēḵ hī min öi lööṙen öi aṙē-ěl yip holre, ngaich ma-asīnken Yāvē min ayī-ö ngam Yöng hī aṅ el halīöngö öi kö aṙēlen höö. w21.09 pěch 23-24 përa 15-16

Akahakūö ang Yēsū tö nuk kuilōn Yāvē. Hangenlōn inrē anga-aṅ tö ngam kanô-en. Lökten anga-aṅ nö ngatī tinrīken hēk vë-eny nang yip tahëng inrē tö e. (Yôh. 18:37) Ngatī inrē yik haköptö Yēsū nö hangenlōn tö ngam kanô-en. (Yôh. 4:23) Vënyen ngam talöökö Kristīön inrē ang Pītör nö “talöökö kanô-en.” (2 Pīt. 2:2) Hangenlōn inrē misī yik Kristīön tö ngam kanô-en. Lökten nö sō-en nuk inköphöti hēk tinrīken ngih panam nuk töt sā ta nö i ṙô ngam Paipöl. (Kòl. 2:8) Ngatī töngamuh yip tö kò-en Kristīön nö pītnyöre nö lök in ngam “talöökö kanô-en.” Ngaich ngatī nup haköp cha hēk tinrīken nö asā ṙô ngam Paipöl. (3 Yôh. 3, 4) Öt eū-eure yin vē Vamënyen Yāvē nö keuheūtlöre mikahkūö tö ṙô ngam Paipöl. Hēkpī ṙung cha-a nö vaichö mikah elnang tö minë inköphöti ṙô ngam Paipöl. Yěn cha pöri nö akahakūö töp tökô-en, ngaich halööktö mikah elnang hī ṙung cha-a. w21.10 pěch 21-22 përa 11-12

Havīlöng misī nuk elpanam tö nuk tömarô-òl kinlōngö, pön sōtu yip aṅkūö u nö fehëvṙen tö tī yik la-al re. Ngatī ṙēngen ngam töt chanuhuvṙen hanangenlōn Yāvē nö laklēn hī tö nup tö mihôiṅ nö pasū-utī tö ngam innôlö hī tö ò. Angū-ö inrē min maharöhten hī öi in ò. (Yar. 31:3) Ngöṙô ngam kamūich Salmai ang Tāvit: “Pò [ngam Tēv] nö innyatlö chu ip sakamö kanihngen.” Vënyen Yāvē hēk anga-aṅ nö ngö ṙô: “Hanāngen neūkölōn chu, chūök chu kiyung, tömarô-òlkui chūök chamônghöl, ṙamānyen chu inrē, lanaklö chu, chūök chu inrē hayönglenre.” (Sal. 59:17; 144:2) Kūö yòh ök Tāvit nö asīnten ngam töt chanuhuvṙen hanangenlōn Yāvē nö chūök innyatlö? Yěn hanyatlöre misī yik tarik nö el nuk patī innyatlö ngaich öt fehngenvö cha-a, ngatī inlahen yip tarik ngam Tēv yěn hangön ngam ṙinatö ellōn re nö in Yāvē ngaich örheūheu min ang Yāvē nö hayööken cha pòrô öp töyòh chūök cha. w21.11 pěch 6 përa 14-15

Ik sā Yēsū nö holtö yik haköptöre nö el ök tökiröng chanôchö, hē e anga-aṅ nö fēlen cha nö hòṅ hangön ngam ṙinātö-ellōnre. (Mët. 8:23-26) Ngaich nö hòṅ lōngti ngam kupòk cha höng haṙòh pöri ang Yēsū. Holtö vanööṙö re yik mahaköp nö kilanglen Yēsū pön hōten ò nö laklen cha. Ṙēmöṙô ang Yēsū nö hatöönö cha, “Kuöyòh öi pa-ekuö ō yi-ö tökūöṅnö mikah?” Pi-a man më-eṅ inrē öm meuk nup kanihngen tö sā tökiröng chanôchö. Sā nup tö faltöre pinlangen hēk lohten öm kihngen inrē tökuö re öm vāhavö. Hē e takô nö hòṅ ngön ngam ṙinātö-ellōn meh in Yāvē, hēk kalē-ěṙô inrē öm vë-ekuötēv hòm röhta in ò. Fēkö nuk tī Yāvē nö hayööken meh inuk tö urěh kanihngen meh, ngönlöre ngam ṙinātö-ellōn meh min yěm ngatī inlahen. (Sal. 77:11) Mihôiṅ man ṙinātu-ellōn in ò tö ò nöt hōḵ nö ṙangen meh töngamuh hēk inup yamih min inrē ṙētak. w21.11 pěch 22 përa 7, 10

Kamëkö kaha ngam chööngö min tölōn re öp tarik, töthěng heuh nö ulāingö chehen holre. Tahëngö inlahen pöri lohten anga-aṅ nö ulāyö. Tö sā ngih inchōḵelmat, yē ngam pisnesmën min nö michūḵṙen yěn havahkö nup inyihköre, ngaich töng mu-ulayö anga-aṅ yěn ngatī inlahen. Ngatī ṙô ngam La-en Lēvī 19:13 miröökö, “Uh man [michūḵṙen tö] holre.” Yēḵ hī min michūḵṙen, ngaich töng sā mu ulāya min ayī-ö. Ötkô yik Yahuti nö michūḵṙen inuk töng la-en re. Yēḵ hī vë-ekūö ngam La-en Lēvī 19:11-13 ngaich meuk mat Yāvē ayī-ö nö ngëichkö ngam unlāyö. Lökten öi hòṅ hatönöre öi ngö ṙô, ‘Öt michūḵṙen öich ṙung ichūök re kamān hēk yěich Pisnes inrē? Ōt hòng chūök chu halööktit re?’ w21.12 pěch 9-10 përa 6-8

Inup vanachkören inlahen hī kaheuk sakamö, ngaich hòṅ vë-eny nang Yāvē ayī-ö tö u. Yěn tökiröng pöri nup fālen hī ngaich hòṅ vë-eny nang yip minṙöinylen ayī-ö tö u. Ngaich hang ṙô hī min cha-a ngaich löknyö mat ngam Paipöl ṙô min nö halēnö hī, vë-elkui hī min inrē cha-a, hòṅ Yāvē nö aṙēḵlen hī, ‘ngaich yöölen min öi [im ṙô ngam Tēv] ngaich lööken.’ (Yāk. 5:14-16) Ngam ṙāi ṙinanyi an min tömihôin nö yöölen tī tö hi lökten in hòṅ örheūheu fēken e. Kôtö kūö min ayī-ö tö Yēsū nö kihngen tö pôkūö hī. Kô-en in hòṅ fēkö ngam inlahen Yēsū nö kēngö nômöre tö pôkūö hī, ngaich sīöp min ngam minlēḵṙen hī tö e. Yēḵ hī inrē yihtökūö kaheuk samyeūheu im infēkö kinpaha ò, havëtö yip tahëng inrē nö yihtökūö ngaich sīöp min ngam minlēḵṙen hī töm ṙāi ṙinānyi. w21.04 pěch 18-19 përa 13-16

Ik sā Yēsū nö hěngheuh nö hěng mitööm ṙô nö vë-ekūötēv. Ik tahëng sakamö anga-aṅ nö lāṙaḵ. Ngaich ik sā yik tömaṙôngö tarik nö yihtöre nö in ò, ngaich kò-òren öi ngëichkö inlahen ò, nö sitih inlahen anga-aṅ. Meuk yip yāch anga-aṅ in cha hēk tö vahavö inrē. Ngaich aṙē-ěvlōn anga-aṅ nö meukö cha. Rö-ö anga-aṅ nöng halanken yik tö vahavö pön kētö minkahten, ngam mikahkūö hī töngamuh ngam minkahten i kui ròngö. (Lūk. 6:12-20) Kētö ṙētak re inrē ang Yēsū nö in yip tahëng. Kò-òren öi fē-a ik sā Yēsū nö akahalōn tö ök holre ang Yôhan öp vamôk nö röki likeun, ngaich iṙòken miṙivlōn anga-aṅ. Ngö kinūichngö ön nö imat ngam Paipöl: “Hē Yēsū nö hāngö e, ṙuhöngre ngaich Anga-aṅ nö ṙa-ang umuh, nö el kupòk nö ik elinchōn.” (Mët. 14:10-13) Ik sā ò pöri nö in öp tö chēvhakṙen chūök ngaich meuk yip tamaṙòngö anga-aṅ nö urēhten nö umuh nö hòṅ hangihtö ṙô ò. (Māk. 6:31-33) Akahakūö ngaich anga-aṅ tö cha nö ha-euk tö ṙô ngam Tēv. Lökten anga-aṅ nö haköpten yip tarik.—Lūk. 9:10, 11. w22.02 pěch 21 përa 4, 6

Yē hī öi akahngen re öi haṙivlōn tī tö öp prötör hēk sistör, ngaich hòṅ sitih inlahen ayī-ö? Hòṅ vë-ekūötēv ayī-ö öi vë-ekūö Yāvē öi havëkö inyööken re öi halāmtöre öi in yip prötör sistör. Ngaich hòṅ ngëichköre inrē ayī-ö, öi hatöönö re, ‘Hō-en ngam vanāichöre öich ṙung hēk havëkö inṙē-ěl röng? Yē chu min öich urěhēre öich halāmtöre öich in më prötör sistör, ngaich sitih inlahen mufē min ang Yāvē hēk Yēsū inrē?’ Ngaich yēḵ hī min öi ngëichköre öi ngatī inlahen ngaich ṙūhlöre ngam inlahen hī min öi hang ṙô Yēsū hēk vī ngam lanāmö inrē öi in më prötör sistör. Yē hī öi halāmtöre, ngaich hòṅ īnu ayī-ö tö ngam inyāchngö. (Efi. 4:2, 3) Yē hī öi meuk kūö öp miṙivngölōn re, ngaich hòṅ iṙūöhen ayī-ö öi kēngen minë kumnyah lōn höö, ngaich havantö ngam innôlöre tö ò. Ëhten öm halāmtöre in ò, töre öm vënyö öp vanāchö ò.—1 Kòr. 6:7. w21.12 pěch 26 përa 13-16

Ṙen ang Yēsū nö peuiny pön akahakūö anga-aṅ tö më tarik nö unôichngöre min cha-a nö sō-en ò. Angū-ö lainyngen Yerūsalem min nö ha-atiyö ngaich yip tö ōt tit min Yahutī nö haköövö min acha-a. (Lūk. 21:20-24) Teungtökūö ngam ṙô Yēsū! Pōyen yip tarik töt hamang minë ṙô Yēsū. Ngatī yip tarik töngamuh tö sō nö hang ngam tölöök inhānga. Chumkūöṙen ang Yāvē tö yip tarik. Peuiny ang Yēsū nö chö-önyten yik tarik, in e mikahlōn ayī-ö tö Yāvē nö tö chumkūöṙen tö tarik. “Öt hōten hī hěng hang tak tölëlngö, hōten hī pöri ṙòkhöre yihtöre im invöötö ellōn.” (2 Pīt. 3:9) Hòṅ asīnken Yāvē in ayī-ö öi hòṅ chumkūöṙen tö yip tarik. Hangenlōn inrē ayī-ö tö yip holre, lökten öi ahangkö ngam tölöök inhānga öi in cha.—Mët. 22:39. w22.01 pěch 16 përa 10-12

Sīöp min ngam ṙinātö-ellōn meh yēḵ meh afēkö nuk tö urěhngöre tī Yāvē nö ngëichkö yik tarik re nup tī ò inrē nö hayööken meh.Ngamuh pöri tökiröng yanöölen meh, sīöp min ngam hanangenlōn meh tö Yāvē. Angū-ö min ṙamūöhlö alaha meh hang chööngö Yāvē, haröḵngen re, ngaich la-al minë kanihngen re inrē. (Mët. 22:37-39; 1 Kòr. 13:4, 7; 1 Yôh. 5:3) Öt insā-avö ngam innôlö Yāvē! (Sal. 63:1-7) Köpölōn tö ngam vinë-ekūötēv, inkööpö, hēk finëkö nup haköp re inrē nö alaha ngam kinëtö nöönyö. Hòṅ asīnken Yēsū ayī-ö öi chöh öp tö chēvhakṙen chūök re öi in Yāvē. Kēngö nup tömihôiṅ nö lōḵngen tī tö hī. Havëkö kūö Yāvē tö hinòlṙen re öm chumkūöṙen in minë la-en linöklōn ò. Yēḵ meh löngö tī töngamuh yūs minë ṙētakre, kētö raneushö meh min ang Yāvē el öp tufömngöre panam.—Māk. 4:24. w22.01 pěch 31 përa 18-20

Nup afēkö hī ṙung, ngatī inlahen ayī-ö kēken u. Lökten nö ngö ṙô ang Yēsū, ötkô öi fēkö nup tötlöök ṙô hēk ötkô inrē öi kakken u pöi yēḵ hī fēken u örheūheu mihôiṅ öi kēken nup tökööl. (Mët. 5:21, 22, 28, 29) Hòṅ lōnu in öi haṙamlōn ngam yöng re Yāvē lökten ngih töhòṅ urööḵren, yěn yih ngam tötlöng nö elkuilōn hī hē e ayī-ö öi ilööṙen kavalngen e! Ngöṙô ang Yēsū, nup lamöknyö elvang pöri nö ṙa-ang ellōn töchōichö tī tö tarik. (Mët. 15:18) Tö ngö manah angū-ö nup ṙô hī in e inkahka ayī-ö öi tö sitih inlaha öi tarik lökten ayī-ö hòṅ hatönöre, kò-òṙô öich chū-ö ṙung yěich pòrô öich kihngen ngatī inlahen. Yēḵ chu öich töpīhövö, milēḵṙen hēk chumkūöṙen hòng chū-ö vë-ekūö öp kikōnyö hēk kikanö öich laköre. Chumkūöṙen hòng chū-ö nö un löknyö elvāng chu nup tötlöng ṙô. Yēḵ öp töhěng tak nö vīlö tanānyö chu sön hòng chū-ö holtö lanāmö öich sapṙô ò. Yēḵ meh öm fēkö në intöönö, mihôiṅ min më-eṅ öm halööktit re. Yēḵ meh öm ṙā-ang ṙô re tö minë tötlöök ṙô sā ṙēngen öp ta-īö angū-ö tö kēnyu nö ṙā-ang in öp hīlā, Ngaich ngatī ṙēngen ngam tö hötṙeh tinrīken hòm lööṙen min öm ṙāngen e. w22.03 pěch 5 përa 12-14

Kò-en nö in cha yip mahavëkö inlēnöre, lööngö kahëtö fëslare hēk pōyen ṙētak nö i līnöökölōn Yāvē. Lökten ayī-ö öi hôṅ havëkö inlēnöre i yip holre. Um höktö inlēnöre. Ihē öi kô-òren havëkö inlēnöre in yip prötör sistör? Töi ngëchken në inlahen (1) Hěngtak ök sistör havëken öp prötör anga-aṅ nö holre nö kē Istötī. Kinheūten cha nö Istötī hatöntöre anga-aṅ nö ngö ṙô sitih inlahen öich ṙūöhlö heuneū-enre haköphöti. (2) Hěngtak ök sistör tö öl nö pihīvö mahavah hīlare hatöntöre anga-aṅ nö in ök holre tö ha-eh nö kē hīlare. (3) Hěngtak ök prötör tömöl nö kētö tôk. Ngö ṙô anga-aṅ nö in öp tahëng prötör hangihtöre man tö ṙô chu kētöng tôk re ngach halööktit nup ṙô chu tövach. Mihôiṅ yip prötör tö marô-òten nö kētö tôk nö havëkö inlēnöre nö in yip töhuveū-en nö kētö tôk hēk hòṅ hang inlēnöre.—Inch. 19:20. w22.02 pěch 13 përa 15-17

Hangenlōn ang Yāvē tö hī nö holre tö ngam kūön ò, lökten ò nö hameukhömat ò tö nup taṙòkhöre la-enre. (Yôh. 5:20) Kē-ěkūö Yēsū anga-aṅ tö minë tölöök inlēnö, hayööken ò yěn haṙivlōn, kē-ěkūö ò tö minë kuilōn ò. Öt ma-ihṅtīre anga-aṅ nö hameuktöm hanangenlōn re tö ò, vë-enyre inrē nö hangenlōn tö ò. (Mët. 3:16, 17) Öt ṙāngen ngam kūönre anga-aṅ nöng hěngtak nö i nup la-enre. Akahaiṙen in ayī-ö inrē töm hanangenlōn Yāvē tö hī, öi sā Yēsū. Kò-òren in ngëichköm inlahen ò nö hameuktöm hanangenlōnre tö hī, hē ò nö tūökten hī öi tūmö alaha ngam mikūönö ò. (Yôh. 6:44) Akahalōn anga-aṅ inrē tö nup taṙòkhöre hanakten hī ngaich kēten u nö in hī. (Mët. 6:31, 32) Yēḵ hī min öi hameknyö minë hanangenlōnre tö ò ngaich ngatī min anga-aṅ nö hameuktöm hanangenlōnre tö hī. w21.09 pěch 22 përa 8-9

Tö sitih inlahen tinrīken öm sin, urēhěkūö meh haköpmat ngam Paipöl in më Vamënyen Yāvē? Öthěng tak in hī lohten tö ööire nö fēken nup tö urēhangen inlahen re. Sā inlahen mufē ngih panam sin ayī-ö inup tölöng inup tövaich inrē. Öt maheūṅkkuvö sin ayī-ö ötrēhěn öi Tēvu inrē. (Efi. 2:12) Ik sā meh pöri ngaich haköpmat ngam Paipöl, akahakūö ngaich më-eṅ tö ngam Tēv nö ōt, ngam töminënyu tö Yāvē ngam tö hangenlōn inrē tö meh. Akahakūö inrē ngaich më-eṅ töre yěm hòṅ haṙamlōn ò hēk hòṅ kaheuktu inrē öm mikūönö ò ngaich hòṅ haṙīngö minë tinrīken re me-eṅ tö minë mufē re inrē. Hēk hòṅ kēken nup la-en më-eṅ nup tölöng nö imat Yāvē, ngaich ṙūöhngöre tö nup la-en tövaich nö imat ò. (Efi. 5:3-5) Vamīlen hī ang Yāvē, Yöng hī inrē. Lökten anga-aṅ nö mihôiṅ nö vë-eny nang hī tö nup tö hòṅ inlahen hī. Hōten hī anga-aṅ öi “ṙòngngö ngam hötṙeh tarik nö anòngngen nuk la-en ò.” w22.03 pěch 2 përa 1-3

Sā ṙanamölōn öp yamih tökūö nö i inpīhö, ngatī ṙanamölōn cha-a nö yihtökūö nö im infēkö kinpaha Yēsū. Sā inlahen më aṅ ngam kiteūm yin më töt aṅ ngam kiteūm nö yihtökūö nö im infēkö kinpaha nö fēken ngam maheukköre inrē cha-a. Hangihtöre inrē töm minkahten inlahen tī Yēsū tö yip hol ò rācha tö tī cha nö halēnlö inlahen yip tarik ip tö hěngkööny samheūheu. Ngaich vī ngih panam min nö peretāis ngaich hiṙeūt-hiṙeūtkö ti re min nö ha-etlen yip tarik. Yē cha nö fēköṙô ngam Isayā 35:5, 6; 65:21-23; hēk Inm. 21:3, 4. Ngaich ṙamlōn cha-a sīöplöre inrē ngam nganönö ṙinatö-ellōn cha töm inlahen cha inrē nö i linöökö lōn Yāvē.—Mët. 24:13; Kal. 6:9. w22.01 pěch 21 përa 5-7

Hòṅ kēngö nômö re ang Yēsū nö ṙāi nômö Ātöm. Ṙāi ṙinānyi ngö ṙô in tö e. (1 Kòr. 15:22) Kūö yòh ang Yēsū nö hòṅ kēngö nômö re? Pön ngatī ṙô ngam chööngö Yāvē nö hòṅ ṙāi tö nômö ngam nômö. (Man. 21:23, 24) Lökten ang Yēsū nö hòṅ kēngö nômöre nö ṙāi nômö Ātöm. (Rōm. 5:17) Hēten tö e ngaich ang Yēsū nö “Yöng Taṙòkhöre” yip töng ṙamatö-ellōnre, nö im inlahen ò nö kēngö nômöre. (Isa. 9:6; Rōm. 3:23, 24) Kēngö nômöre ang Yēsū pön hangenlōn tö Yāvē, tö hī inrē. (Yôh. 14:31; 15:13.) Kūö ngam hanangenlōnre anga-aṅ nö söl kinpahare nö hateung ngö minë lōn ngam Yöng re. Löktö in e min nö teung minë kuilōn ngam Tēv nö ing panam. w21.04 pěch 14 përa 2-3