Chönvörī

Tö heuveū-en ök Timôtī nö tarik alaha Yāvē, pò ò nö asīöp nup tövai tinrīken Kristīön. (Filip. 2:19-22) Minë kahūich tanīnöṙô Pôl, in e mikahkūö ayī-ö tö Timôtī nö tö aṅhavin tö ngam inyāichngö tö chiplö hēk tö chumkūöṙen inrē nö la-evṙen. Tö chumkūöṙen anga-aṅ tö më holmaneukre. Lökten ang Pôl nö hangenlōn tö ò. Pōyen ṙinatö-ellōn anga-aṅ nö in Timôtī lökten ang Pôl nö kētö nup tahëng inrē la-en ò. Yēḵ hī min asīnken Timôtī asīöp minë tövai tinrīken re ngaich hangenlōn min Yāvē tö hī ngaich hēk min ayī-ö mihôiṅ öi hayööken më prötör sistör öi löktö in minë la-en re. (Sal. 25:9; 138:6) Lökten man vë-ekūötēv ngaich fē-a nö asuh nup tö hòṅ halöktitvö tö meh. Ngaich hěngö atöllö tö öp tinrīken tö hòṅ asīöpö tö meh. Mihôiṅ öm ngö mufē, asīöp ngam miṙēlōn hòng chu-ö öich in re? Köptī hòng chu-ö tö ngam lanāmö yěich aṙē-ěl öp holre? Mihôiṅ öm hatön töre öm in öp holre hēk havëkö inyööken re inrē öm in u.—Inch. 27:6. w22.04 pěch 23 përa 4-5

Lōnu ang Yāvē tö hī öi örheūheu ṙamlōn. Ṙën in öi akahakūö pò e nö töhěng nö ṙòng ngam töhet fanöinylö, ngam ṙanamlōn. (Kal. 5:22) Ngö kinūichngö ön inrē imat ngam Paipöl tö hī öi hōtu ṙamlōn im kinë-eti. Lökten yēḵ hī ahānga öi vë-eny nang yip tahëng pōyen nup löktö tī hī inrē öi hayööken më prötör sistör re ngaich kô-en ayī-ö teūngen tö ṙanamlōn re. (Inl. 20:35) Sā ṙô ngam tövë-evkūö töngamuh, yēḵ hī öi hòṅ ṙamlōn ngaich hòṅ nët nup la-en inlahen hī. Ngam raneh, öp töng tölngö inlahen hī löklōn Yāvē hòṅ holtö ellōn re ayī-ö kēken e. Yēḵ hī öi ngatī inlahen ṙamlōn min ayī-ö. (Mët. 22:36-38) Innëtö, ötkô öi asātöre in yip tahëng hòṅ köplōn ayī-ö, nup töng kahëkö hī la-en ṙòkhöre anū-ö nöng löktö in Yāvē pön anga-aṅ maharunten hī mahaköpten hī kamëtö kumlēḵ hī hēk heuneu-en hī inrē ngaich yēḵ yip tahëng nö mööḵlö inlahen nö in nup la-en re sön ayī-ö öi hòṅ ṙamlōn pön rö-ö cha-a nö löktö im minë-eny re nö harōilö re pön hòṅ harōilö minë-eny ngam Tēv Yāvē. w22.04 pěch 10 përa 1-2

Höng rötten yanīhi min ngam inhetngö në tövaich tinlööken, pingangkūö min yip tarik nö meuk. (Inm. 18:8-10) Kayinlöng min ngih panam yěn meuk inhetngö ngam tökiröng Pēpilön. Lökten min nö öt hō nö öt yih nup kanihngen, ṙamlōn pöri min yip tarik ngam Tēv. Pön ngaich nö ha-ëtiyö ngam tökiröng la-al ngam Tēv, ngaich teūngen ayī-ö tö ngam ṙinānyöre öi ṙa-angkūö ngih tötlöng panam! Vë-eny nang hī ang Tanīěl nö in ngam tö-eūka kinlēḵngô tö ngam tökô-en mikah nö “ṙūöhölre min” ing manā-aṅ sakāmö. Ngaich kô-en angū-ö nö meūkö tö hī töngamuh. Ngaich in töngamuh öi akahakūö töre öi el ngih manā-aṅ sakāmö. (Tan. 12:4, 9, 10) Sā inlahen taneungtökūö mat hī öi meuk minë ṙô ngam Paipöl nö ṙòkhöre nö teungtakūö, ngatī sanīöplöre ṙôken ngam hanāngenlōn hī, töm minlēḵṙen hī tö Yāvē, sīöp inrē ngam ṙinātö-ellōn hī öi in ngam Paipöl. (Isa. 46:10; 55:11) Lökten chumkūöṙen haköp mat ngam Paipöl ngaich hayööken yip Tarik nö yihtöre nö in Yāvē. Ngaich sīöp min ngam ṙinatö-ellōn meh. Ngaich kilēḵngôre Yāvē nö in yip mahayönglenre nö in ò nö öthō min nö öt laklen cha, ngaich kētö ngam lanāmö nö in cha.—Isa. 26:3. w22.07 pěch 6-7 përa 16-17

Akahakūö in lökten im līpöre inmeukhömat tö ngam inyööngö töm Tēv ngaich nö rultenre nö hayöng nö el halīöngö, ngaich suktu ngam Sī-ö nö ing panam. (Inm. 12:1-9) Lökten ngaich nö lanāmö nö el halīöngö, sīöplö pöri minë kanihngen nö ing panam. Kalē-ě tanainyö ngam Sī-ö ngaich hameuktö ngam tanainyö re anga-aṅ nö in yip tarik Yāvē. (Inm. 12:12, 15, 17) Sitih inlahen pöri ayī-ö mihôin chiplen öi löklōn Yāvē, pòrò öi ötlēkaṙen tö ngam Sī-ö? (Inm. 13:10) Yēḵ hī min öi akahakūö tö nup yamih lākūö re, ngaich mihôiṅ min ayī-ö chiplö i linökölōn Yāvē. Sā ṙô Yôhan im Inmeukhömat nö vë-eny nang hī tö nup taneūngen hī min inkôlò, tö ngam Tēv min nö ha-etngö yip tö kunyaha elmat töre. Vënyu nang ayī-ö tö ngam raneh miröökö tö hī öi ‘hameuktu mat tö minë minkahngö’.—Inm. 1:1. w22.05 pěch 8 përa 1-3

Yěn meuk inlahen yip tarik Yāvē min yip lamā-al ngam Tēv nöng köp nö im ṙinātö-ellōnre ngaich tainy min cha-a ngaich holṙen re min nö hakihten yip tarik ngam Tēv. Kinyūngö tö ngam Kōk aṅ Makōk ngöṙô ngam Paipöl nö vënyen e. (Isi. 38:14, 15) Yěn ötlēkaṙen min yip tarik ngam Tēv Yāvē, sitih mufē min anga-aṅ? Ngöṙô anga-aṅ nö vë-eny nang hī, “hachohlöngö min ngam lanīnö chu.” (Isi. 38:18, 21-23) Vënyu nang in im tö 19 mirulö Inmeukhömat nö sitih inlahen min ang Yāvē. Tīnten Yēsū min anga-aṅ nö laklen më tarik re nö la-al me tö kunyaha elmat. Ōt min inrē yip kumyung nö hol Yēsū yip ma-ahānga. Hēk tö yip tö 1,44,000 inrē. (Inm. 17:14; 19:11-15) Asuh min öp ṙòng ngam kinyungö? Yip lama-al ngam Tēv Yāvē min, ṙòkhöre min cha-a nö ha-etiyö!—Inm. 19:19-21. w22.05 pěch 17 përa 9-10

Unôichrit inlahen nā Ātöm nā Ēva nö faluṙen, ilööṙen ngam Tēv nö kilēḵngôre, ngam kamëtö maheūṅkkö yip kūön cha min. Imat ngam līpöre Ranehlö 3:15 angū-ö nö kūichiyö: “Ṙātö kumnyah Chin ihôi meh töngam kikānö, ihôi öp kūön meh inrē tö öp kūön ò inrē: paṙôkö kui man min tö tī ò, ngaich më-eṅ parôkötī tö kulôichröön ò.” In ngam raneh līpöre ngam Paipöl ön ngam tö eūka kinlēḵngô. Sön pöri angū-ö nö ōt nö in minë tahëng līpöre imat ngam Paipöl nö sāta ṙô anū-ö nö in e. Tö sā ṙēngen ngam aṅ likeun tö yōho, nö yōho minë mōtī tö ngam ta-īö nö mahamūlö e, ngatī ṙēngen ngam Paipöl minë līpöre tahëng, ngaich ngam tövënyu nö in ngam līpöre Ranehlö 3:15 nö hamūlö ngaich ngam tövënyu nö in e tö Yāvē min nö tīnten ngam ṙamānyen cha nö kamëngen ngam Sī-ö hēk ha-etngen yip tötlöök inrē hol ò. Ngaich yēḵ cha min nö ha-etiyö ngaich iṙôk ṙanamlōn min yip Tarik Yāvē! Yēḵ hī haköpmat ngam Paipöl ngaich akahakūö min ayī-ö tö taneungtakūö ngam tö eūka, töp yanöölen hī inrē öi löktö in e. w22.07 pěch 14 përa 1-3

Vë-ekūö Yāvē hòṅ ò nö kē-ěkūö meh tö mikah, hòṅ meh öm asīöp ngam hanāngenlōn më kūön re tö Yāvē. (Yāk. 1:5) Höng Yāvē an tö mihôiṅ nö löngö tī nö kētö inlēnö. Pōyen nup lāinyngen hī öi ngatī ṙô. Ngam raneh, pò Yāvē nö inyööngö inrē anga-aṅ, ngaich öt hěngtak tö sā heuneū-en ò. (Sal. 36:9) Ngam innëtö, tö aṅhav in inrē anga-aṅ tö mikah lökten nup inlēnö kahëtö ò nö ṙòkhöre anū-ö nö yanöölen hī min örheūheu. (Isa. 48:17) Pōyen minë līpöre lamökngörit im Paipöl, tö halēnlöng tö Yāvē nö inyööken më inyööngö nö haruklö më kūön re. (Mët. 24:45) Löktö in e më inyööngö nö mihôiṅ nö hayööken më kūön re nö asīöp ngam hanāngenlōn re tö Yāvē. Tö sā inlahen minë inlēnö imat minë ātiköl tö ngö kui, “Inyööken Minë Mikūönö,” minë tö tirepnyu misī nö imat ngam līpöre Hinöre! ngaich pöri anū-ö töngamuh nö el ngam vepsāit hī jw.org. Pōyen inrē nup vitiō el ngam vepsāit nö intöönö më inyööngö nö tö hameuktu, nö sitih inlahen më inyööngö nö hang minë inlēnö re aṅ in Yāvē, ngaich heuveū-en nö haruk më kūön re.—Inch. 2:4, 5. w22.05 pěch 27 përa 4-5

Kô-en Yāvē nö öt insā-avö nö im inṙē-ěl. (1) Örheūheu anga-aṅ nö hīnöre nö aṙēlen hī. (2) Keuheūtlöre mikahkūö anga-aṅ tö hī lökten nö akahakūö tö inlahen hī yē hī kô-en öi halöktitre hēk hö-ö. (3) Keuheūtngöre tī anga-aṅ nö aṙēlen minë tökööl hī ngaich sā ṙēngen töt īnu ayī-ö min tö ngam tö kööl. Angū-ö lainyngen ngam elkuilōn hī min nö het ngaich havantöre min ngam innôlö hī nö in Yāvē sā re in nuk urěh. Īnu in tö ngam öt hanëtö, lökten öi kēkö tökööl. Ötkô pöri ayī-ö haṙivlōn öi fēken minë vanāichö re. (Sal. 103:8-14; 130:3) Akahakūö Yāvē tö minë ötkumlēḵ-en hī lökten anga-aṅ nö hameuktö ngam neūkölōn re nö in hī. Yē hī pöri pītnyöre öi hang minë inchöngten re tö Yāvē, ngaich örhō min öi öt ṙamlōn. (Filip. 4:4-6; 1 Yôh. 3:19-22) w22.06 pěch 7 përa 18-19

Öt uroh yip tarik nö pa-ekūö tö ngam inlahen re nö fëlö, tö ngam inlahen cha nö fēkö inlahen re yēḵ cha min nö vītöre nö Vamënyen Yāvē ngaich sitih ṙô min yip aṅ patī cha. Angū-ö ngih pinhë-ekūö cha, pò cha-a nö hangenlōn tö më aṅ patī re. Ngaich lōnu inrē cha-a nö hòṅ haköp inlahen Yāvē. Yěn ötlēka elnang pöri ang Yāvē hēk tö yip tarik ò inrē, ngaich kô-en cha-a nö haṙivlōn. Ṙōlheuh pöri ngaich öi hang inlahen yip aṅ patī re nö sō sin cha-a nö haköp, unôich pöri cha-a nö vītöre hēk nö mahaköp. Ngaich yēḵ yip aṅ patī hī pöri nö sō-en hī, ngaich hòṅ asuh öp kanööpölōn hī? Teungen in tö ngam inreuskö alaha re im Salmai 27:10. Pòrô öi öt holuṙen tö tahëng, öthō ang Yāvē nö öt holṙen hī pò ò nö hangenlōn tö hī. Yēḵ hī min ayī-ö öi chiplö i linöökölōn ò, ngaich kē-ěkūö hī min anga-aṅ tö minë tö pōyen inkôlò, chumkūöṙen inrē min tö hī nö möḵlö inlahen tö yip aṅ patī hī. Pön kē-ěkūö hī min anga-aṅ tö minë hanaten hī hēk teungen min inrē ayī-ö tö lanāmö elkuilōn re, ṙamlōn min inrē ayī-ö, vai inrē min ngam innôlö hī öi in ò. w22.06 pěch 16-17 përa 11-13

Ik sā Yēsū nö ing panam ngaich ngöṙô yik tarik tö ò nö töpōivat nö nyā, mihiyôi aṅ hēk fumlalngö ṙētak töhet sakamö. Uroh yip muh nö ngöṙô tö ò nö hamòlṙen ngam Sī-ö nö la-envö hēk lama-al ngam Tēv inrē. (Mët. 11:19; 26:65; Lūk. 11:15; Yôh. 9:16) Sön pöri ang Yēsū nö öt havahal töchōich nö ṙô-òvö. Hòṅ sā inlahen Yēsū ayī-ö inrē öi ui havahalvah re in yip töt lamëkôre tö hī. (1 Pīt. 2:22, 23) Öt tö lööṙen ön nö in hī. (Yāk. 3:2) Asuh öp pöri mahayööken hī? Yěn ōt öre öp tarik tötainy nö vë-ekūö hī el fīlt, ngaich ötkô ayī-ö haṙivölōn. Ngöṙô ang prötör Sem, “Köpölōn chū-ö töre öich hòṅ vë-eny nang ngam tarik tö ngam kanô-en, ngaich öthō min anga-aṅ nö öt halööktit re.” Sön lohten ayī-ö öi vaichö ṙētak öi kuröngkökūö patī ngam tarik lökten anga-aṅ nö līn. Ngaich yēḵ hī öi meukkūö öp tarik öp tötainy ngaich mihôiṅ ayī-ö öi vë-ekūötēv öi vë-ekūö Yāvē hòṅ ò nö hayööken hī öi lām ngaich öt vaichköre ṙô inrē öi ṙô-òvö. w22.04 pěch 6 përa 8-9

Hěng an ngam inlahen hī yěi hòṅ haköpten cha tö inlahen Yāvē öi hòṅ holṙô cha nö haköpmat ngam Paipöl. (2 Tim. 3:14-17) Hěng inrē ngam inlahen hī tö vënyu nö imat ngam Paipöl, hòṅ yip kūön hī nö akahakūö tö Yāvē haröhtöre inrē nö in ò. Yēḵ hī öi vë-ekūö ngam līpöre Inchōḵ-oṙô, ngaich akahakūö min ayī-ö tö ṙô ngam inyööngö nö vë-ekūö ngam kūönre tö inlahen minë tinrīken Yāvē nö löktö in minë tövīlöng nö un vaichngö tö u. (Inch. 3:19-21) Yī-ö inyööngö, lohten yin öi ṙamlōn öi kē-ěny ṙētakre öi holtö më kūönre öi chuh el kahôiṙen. Hē e kò-òren öm mikahtö elmat cha nö sitih inlahen nö meūkö minë tinrīken Yāvē nö löktö in minë tövīlöng. (Rōm. 1:20) Töi chumkūöṙen tö inlahen Yēsū nö haköpten më tanīnöṙô tö inlahen minë tövīlöng. Hěng heuh anga-aṅ nö ngö ṙô, chumkūöṙen yin ngëichkö minë chehechōn hēk minë pūl inrē. (Lūk. 12:24, 27-30) Vë-eny nang cha anga-aṅ nö ngö ṙô, yē Yāvē nö mihôiṅ nö ha-aṅhaṅl minë chehechōn hēk asīöp minë pūl, ngatī inlahen min anga-aṅ nö hateungngö nup kuilōn yip tarikre. Ngatī ṙô anga-aṅ nö vë-eny inlahen Yāvē nö ṙòngnyökūö ellōnre nö kē-ěkūö yip tarikre hēk chumkūöṙen inrē tö cha. w23.03 pěch 20-21 përa 1-4

Hòṅ ha-öönyö Yāvē in, pò hī mihôiṅ löktö im Kūön ò ṙô öi vë-ekūö ò. Yēḵ hī öi i minë-eny Yēsū öi vë-ekūötēv ngaich hang ṙô hī anga-aṅ, ngaich öp töng ṙô hī havëkö kūö Yāvē öi löktö in Yēsū, ngaich öthō anga-aṅ nö öt hateūngngen u. Ngam inlahen Yēsū nö kēngö nômö re, löktö in e ang Yāvē nö aṙēlen minë tökööl hī. (Rōm. 5:1) Vë-eny nang hī an ngam Paipöl tö Yēsū nö, “mākūö kūönṙô ngam amūichngöre nö lahāmö ngam kantēra ngam Rācha el minë el halīöngö.” (Hep. 8:1) Vënyu nang in inrē tö ngam Paipöl tö Yēsū nö ‘vamë-elkui hī nö mī-im yöng.’ (1 Yôh. 2:1) Akahakūö inrē ang Yēsū tö nup töt kumlēḵen hī. Hameuktö ngam miṙēḵlōn re anga-aṅ nö in hī, ngaich löktö in e anga-aṅ nö vë-elkui hī nö in Yāvē. Iṙôken ṙô öm ha-öönyö Yāvē, pò ò nö halēnlö ngam tö akaha makūö kūönṙô? (Rōm. 8:34; Hep. 4:15) Yēḵ Yēsū öre nö öt kēngö nômöre töpòkūö hī, ngaich ötrēhěn ayī-ö öi kô vë-ekūö Yāvē. Chö-önyten hī ang Yāvē nö kēngen ngam hanangenlōn kūönre. Lökten ayī-ö öi hòṅ iṙôken ṙô öi kētö nöönyö ò. w22.07 pěch 23 përa 10-12

Ngòh tökô-ò ṙô tarik, öthō anga-aṅ nö öt hateungngö minë kinlēḵngô re nö in minë la-en re. (Sal. 15:4) Mihôiṅ öi ṙātö-ellōn re öi in ò tö ò. Hòṅ ngatī inlahen tinrīken in ayī-ö hòṅ më prötör sistör nö ṙātö-ellōn re nö in hī. Ötkô ayī-ö öi höng iṙô re pöi hòṅ hameukten u inup la-en re. Tö sā hī öre yěi hamūl rupīö re, chumngëṅtu hēk samyeūheuv rô-òten öi hamūl rupīö re, ngaich yēḵ hī pöri inyih nup chehen re höng hěng sumkam kinheūṅtö anū-ö nö lökngö eltī hī. Ngatī ṙēngen ngam inlahen yip hol hī yěn ṙātö-ellōn re nö in hī. Ṙinatu-ellōn in ayī-ö in ngam Tēv Yāvē pò ò nö tö ngatī inlahen nö inup la-en re nö hameukhöti, lökten ayī-ö ṙātö-ellōnre öi in ò pön “ṙòkhöre nup la-en ò nö aṅ i kanô-en.” (Sal. 33:4) Ngaich lōnu anga-aṅ tö hī öi ngatī inlahen öi ṙòkhöre öi im kanô-en. (Efi. 5:1) Iṙôken ṙanamlōn öi pô hī nôlhöt in ngam söngkötön Yāvē. Hāngenlōn inrē ayī-ö tö höö. Ṙātö-ellōnre inrē öi in höö. Yēḵ hī min öi hāngenlōn tö yip holre, aṅhavin töm inyāichngö holtö mikah-elmat re öi la-envö, kô-òṙô, ṙāpöre ngaich ṙātö-ellōnre min yip hol hī nö in hī. Mihôiṅ pöri ngam ṙinātö-ellōn cha nö in hī nö lakukiyö. Lökten ayī-ö öi hòṅ kēken nup la-en nup chūök hī nup inlahen cha nö ṙātö-ellōn re nö in hī. Ngaich yēḵ hī min öi ngatī inlahen ngaich mihôiṅ min ayī-ö öi sā inlahen ngam Tēv Yāvē öi chūök ṙinātö-ellōn. w22.09 pěch 8 përa 1-2; pěch 13 përa 17

Pōyen yin më prötör sistör el ngam māṅ. Hēṙu pöri ayī-ö mihôiṅ öi ngö lōn tö re öi höng hěng tak yēḵ meh inrē haṙivlōn tö nup mufē re ngaich hē e min mihôiṅ öm ngatī mufē. Pī-a öi ngö lōn höng kahngenre chin lā-al në kanihngen re. Hö-ö pöri ang Yāvē nö lōnu tö hī ngatī mufē. Kô-òren ngëichkö inlahen ò nö in prôfět Ĕlaicha. Vë-ekūö Ĕlaicha ang Yāvē. Nët heuh ṙô anga-aṅ nö hatöönö ò, “Suh ap la-en meh ihih?” (1 Rā. 19:9, 13) Ik sā Ĕlaicha nö keuheūtnyö ṙô ellōn re ngaich hangihtöre ang Yāvē tö ṙô ò. Vënyö nang ò inrē ang Yāvē tö ò nö öt hěng tak, pön pōyen inrē yip tarik tö sā ò nö lamöklōn Yāvē. (1 Rā. 19:11, 12, 18) Teūngen ang Ĕlaicha tö hanöhlö re pön keuheūtnyö ṙô ellōn re nö in Yāvē, hangihtöre inrē tö nup ṙô ò. Unôichrit e inrē ang Yāvē nö kētö la-en Ĕlaicha. Tölṙô ò anga-aṅ nö vīlen Hasaěl nö rācha aṅ Siriā, ngaich vīlen Yēhū nö rācha aṅ Israel hēk vīlen Ĕlaisa inrē nö pròfět. (1 Rā. 19:15, 16) Ik sā Ĕlaicha nö kě-ěvkūö tö minë la-en re möl anga-aṅ nö chumkūöṙen tö minë tölöök ṙô. Kētö hol ò inrē ang Yāvē tö Ĕlaisa. w22.08 pěch 8 përa 3; pěch 9 përa 5

Ngaich öm më-eṅ ṙung kētöre i minānlö Patī Pūlngö? Ik kinheuten vīni-i ngam Patī Pūlngö hēk ik sā raneh van meh inrē öm yihtökūö el mīting, lohten më-eṅ öm kirööngen ṙanamlōn. Ngaich ik sā meh tikök minë tinköökö kingdom song, ngaich lohten më-eṅ keūheutnyöre tö ṙanamlōnre. Ngaich yěn vāyö mineūkö ngam Patī Pūlngö, ngaich lökten in e ngam nöönyö Yāvē. Ngih inrē töhěng la-en hī, tö ngam Patī Pūlngö nö hòṅ ngönö vinī-i, ngamuh inrē kò-òren inlahen hī öi hangëkö alaha höö hēk hareuskö alaha höö inrē. Ngaich lökten in e ngam nöönyö Yāvē. Tölṙô yik Kristīön aṅ Tösalònikē ang Pôl nö hareuskö alaha höö, sā ṙô ngam tövë-evkūö töngamuh. Hangenlōn ang Pôl tö yik prötör sistör re, lökten anga-aṅ nö hareuskö alaha cha hēk hangönken cha inrē. Mihôiṅ ayī-ö asīnken ò öi hareuskö alaha yip prötör sistör re.—1 Kòr. 11:1. w22.08 pěch 20 përa 1-2

Öp Kristīön tö kaheūkö nö tölöök nö imat Yāvē, nö töt michūḵṙen, tölöngö inlahen inrē yěn inyīhaṅ. Kunyah-elmat inrē anga-aṅ tö nup ötlinëken, lōnu inrē tö taṙòkhöre tarik nö kahòklöng kui. Urēhěkūö ò nö katöllö nup la-enre, ngaich fēkö mufē Yāvē min anga-aṅ, pön hòṅ ‘haṙamlōn ò i nup tökeuheūttöre. Hö-ö an Yāvē nöng kēken nup tölöök la-en, pön vënyu inrē nö imat ngam Paipöl tö ò nö īnu tö ngam lanöökö. (Yar. 50:7) Anga-aṅ Vamīlen hī, anga-aṅ inrē tö akahakūö tö nup tölöng hēk tövaich. Örheūheu inrē anga-aṅ nö akahakūö tö nup tölöng hēk tönup tövaich inrē. (Inch. 14:12; Isa. 55:8, 9) Mihôiṅ pöri ayī-ö öi hang minë inchöngtenre kahëtö ò, kūö hī öi sā vinī-i ò. (Ran. 1:27) Ṙamlōn ayī-ö yěi hang minë inchöngtenre kahëtö ò, pò hī öi hangenlōn tö ò hēk hòṅ asīnken ò inrē ayī-ö.—Efi. 5:1. w22.08 pěch 27 përa 5-6

Yēḵ hī ṙung öi kalē-ě miṙivlōn hēk kihngen inrē, ngaich mihôiṅ min ayī-ö öi teungten kēken nup tövaich la-en. Pöi hòṅ havaichngen nup miṙivlōnre. Chumkūöṙen pöri ayī-ö töre öi ui kēken nup tövaich la-en, nup sin-òkkūö Yāvē. (Efi. 5:10-12, 15, 16) Kūich ngam chitri yik Kristīön aṅ Filipī ang Pôl nö ngö ṙô tī “nup taṙòkhöre töng kô-en, nup taṙòkhöre töng tö ineū-euṅv, nup taṙòkhöre töng löök, nup taṙòkhöre töng het, . . . fēkö u anū-ö.” (Filip. 4:8) Öt ṙôtö minë inṙamlōn hī ang Pôl nö ihih, Yěm öt sanānnguṙen pöri hēk ṙētakvö inrē, ngaich mihôiṅ öm chumkūöṙen fēkö ṙô ngih miröökö. Sā öp tarik öre yěn hòṅ meuk öp sinimā, ngaich kò-òren anga-aṅ nö hatöönöre nö ngö ṙô: Kô-en öng ngih sinimā maheuk chu nö tövai? Hēk tö hō-ov hòng inrē? Ngatī ṙēngen ngòh hamang tinköökö, mahaköpmat līpöre, nyamamkö vitiō kēm nö hòṅ hatöönöre tö në intöönö. Yēḵ meh min öm ngatī mufē, ngaich akahakūö min më-eṅ tö nup tölöng hēk tövaich nö ikūö Yāvē. Yēḵ hī min öi hang minë inchöngtenre tö Yāvē, ngaich het min ngam elkuilōn hī.—Sal. 119:1-3. w22.10 pěch 9 përa 11-12

Ōt yip sin in më “tötlöök” tarik töt löngö kahëken. Pōyen nup min inköp tö cha ip töhěng kööny samyeūheu ip hē Yēsū min nö hayöng. Angu-ö min ranehlö ṙôken yip tarik nö keuheūtngöre chūök nö haköptu nö ikūö ngih panam. Achīö yip min mahaköpten yip tötlöök tarik? Yip tö ha-aṅlöngö min nö ikuö ngih panam yip tö kiröng kiteūm hēk tölöök tarik inrē. Yēḵ yip tötlöök tarik min nö havai ngam innôlöre nö in Yāvē, hēk yěn kētöre cha-a nö ilinöökölōn Yāvē, ngaich kūichhötvö minë minë-eny cha nö imat ngam līpöre nômö. Chumkūöṙen ang Yēsū Kristū hēk tö yip hamòlṙen ò min nö kahôka nö ngëichken më tarik tö inlahen cha yēn halööktitre. (Inm. 20:4) Yip tarik töt mahalööktitre ha-etiyö min cha-a, pòrô cha-a nöng hēngông samyeūheu rô-òten nö aṅ. (Isa. 65:20) Pò Yāvē hēk Yēsū nö meuk ellōn tarik, lökten min cha-a nö öt halöngten yip tarik nö ikūö öp tufömngöre panam yip mahakihten holre.—Isa. 11:9; 60:18; 65:25; Yôh. 2:25. w22.09 pěch 17 përa 11-12

Ṙô tö më ‘lamātulöng chööngö mahayöng’ ön ngih miröökö më tö kē-ěvkūö tö minā-aṅ re nö hayöng. Chumkūöṙen cha-a nö ngëichken më tarik yěn hang minë chööngö, lēnö inlahen inrē nö kēken u. Hēṙu inrē ṙung cha-a nö laklen më tarik Yāvē. (Inm. 12:16) Lökten më Kristīön nö hòṅ el katòh chööngö më mahayöng. Vë-eny nang hī inrē ngam Paipöl tö hī hòṅ milēḵṙen tö cha öi kētö tëks (tax) öi in ngam mahayöng. (Rōm. 13:7) Minë minā-aṅ aṅ in më mahayöng ikūö ngih panam, ṙòkhöre anū-ö nöng kahëtö Yāvē. Kò-òren öi hang ṙô Yēsū nö vë-ekūö ök mahayöng aṅ Rōm ang Pòntiös Pailět, hē ò nö vë-eny nang Yēsū tö ò nö mihôiṅ nö ṙānyen ò hēk mihôiṅ nö tölṙô ò nö kumpaha. Ngöṙô pöri ang Yēsū nö sapṙô ò: “Öt minhôinyu man in chu, yěn Öt aṅ lātulöng nö kinëḵeṅkūö meh.” (Yôh. 19:11) Sā inlahen Pailět yin më mā hēk më mahayöng töngamuh nöng tölngukūö aṅ in tö minā-aṅ hēk chööngö inrē. w22.10 pěch 14 përa 6

Vë-eny nang hī ang Rācha Tavit nö löknyö mat ngam töhet līpöre, yěn akaha min ngam Rācha mahayöng hēk köp inrē nö in Yāvē, ngaich sitih inlahen min öp ṙētak ip hē e. (Sal. 37:10, 11, 29) Vë-ekūö ngam Salmai 37:11 ṙung ayī-ö yěi hòṅ vë-eny nang yip tarik tö inlahen ngam Peretāis. Tölöng angū-ö nö inlahen hī. Ik sā Yēsū nö haköptö yik tarik nö ikui ök ṙôngö, tö inlahen yip tarik min nö sitih inlahen nö ikūö öp tufömngöre panam, havannyö ngam ṙô Tāvit anga-aṅ. In e mikahkūö ayī-ö töm tökūichi ṙô ngam Salmai 37:11 nö öthō min nö öt teung. (Mët. 5:5) Teungtakūö ngih ṙô ik ṙētak ngam inyööngö tö Sòlòmön. Ngaich keūtngöngöre chūök ngam lanāmö nö i Israel hēk öt hanaktuṙen inrē yik tarik. Kilēḵngôre ang Yāvē nö in yik aṅ Israel tö öp panam “töhëmö aṅkūö tö aṅteh hēk hanī” inrē ngaich ngöṙô inrē anga-aṅ nö in yik tarikre, ‘Yēḵ yīö lök i në chööngö chu, ngaich kētö ngam lanāmö min chū-ö im panam hēk hulalngöre yī-ö min öi haṙòh ngaich öt hěngtak min pumnëḵtökūö yīö.’ (Lēv. 20:24; 26:3, 6) Teūngtakūö minë kinlēḵngô Yāvē ik ṙētak Sòlòmön nö hayöng. (1 Kin. 22:9; 29:26-28) Ngam ṙô im Salmai 37:10, 11, 29 nö teungtakūö anū-ö inuk urěh ṙētak ngaich ngatī inlahen min in öp yamih ṙētak. w22.12 pěch 10 përa 8

Hòṅ hang minë inlēnöre yin vē Kristīön. Ngö ṙô an ngam Paipöl: “Pòn lökten tö akaha inchōkūö öm kô kiyung öp kinyūngö meh, i ṙôken mahalēn inrē öp minhôiṅyö.” (Inch. 24:6) Yēḵ hī min chumkūöṙen hang ngih inlēnö, ngaich öthō min ayī-ö ip töng lōnre öi ahangkö ngam tölöök inhāngö. Pöi hang minë inlēnö min ngaich kēkö kaha u minë lamöktö in ngam söngkötön, ngaich öthō min ayī-ö öt heuveu-en im inhangkö ngam tölöök inhāngö hēk haköptö yip holre inrē. Ngaich yēḵ hī chumkūöṙen el mīting tö minë minkahten hēk tö minë inruntö ṙôre ngaich heuveū-en min öi haköphöti. Pōyen nun minë līpöre hēk vitiō töhalēnlöng tö ngam söngkötön, chūök hī mihôiṅ teūngen tö mikah elmatre tö ṙô ngam Paipöl. Ha-öny tī ngam Tēv in pò ò nö kūchhöt minë ṙô mikah nö imat ngam Paipöl. Sitih inlahen pöri öre ayī-ö yěn öt kūichhöt u anga-aṅ! Ta-a chěi, ui asīnken ngih panam öi sō-en ngam mikah, kēḵ ngam mikah pöri ngaich köptī tö e.—Inch. 3:13-17. w22.10 pěch 23 përa 18-19

Yēḵ hī ṙung öi nyā ngaich tööḵngen ayī-ö, löktö in e ngam kumlēḵ hī ngön inrē ayī-ö. Ngatī inlahen yěi haköp mat ngam Paipöl hēk fēken minë haköp re, ngaich ngönlöre ngam ṙinatö-ellōn hī. Sā inlahen Isikīěl nö hatööḵngen re nö nyā ngam tö löömö līpöre. Ngatī lōn ang Yāvē tö hī öi akah elmat tö minë ṙô ò. Lūöi nun minë tö hòṅ inlahen hī. Ngam raneh, hòṅ vë-ekūötēv ayī-ö hòṅ hī akah elnang tö minë ṙô ngam Tēv hòṅ halēn ngam elkuilōn re inrē hēk hòṅ chumkūöṙen inrē öi haköp mat ngam Paipöl. Ngaich fēken minë haköp re inrē. Yē hī min ngatī inlahen ngaich akah elnang min ayī-ö tö ṙô minë tö kūichi imat ngam Paipöl ngaich ngön inrē min ngam ṙinatö-ellōn hī. Kūö yòh öng nö töt ṙanāngen ngam inlahen hī öi vë-ekūö ngam Paipöl hēk fēken minë haköpre inrē? Pöi yēḵ hī min öi ngatī inlahen ngön min ayī-ö töngamuh öi im la-en inhangkö ngam tölöök inhānga. Ngaich mihôiṅ min ayī-ö öi vënyö ngam ṙētak kinṙôka öi in cha ip yamih ṙētak. Ngaich yē hī inrē öi fēken minë ṙô aṅ mat ngam Paipöl ngaich akahakūö min ayī-ö tö minë tinrīken Yāvē hēk tö sitih inlahen anga-aṅ nö Tēv. Yē hī min ngatī inlahen ngaich ṙöhta ayī-ö min in Yāvē. w22.11 pěch 6-7 përa 16-17

In e ang Yēsū nö vë-eny nang hī tö ngam tökô-en hanangenlōn min nö ihôi yip haköptö ò, rö-ö min nöng më aṅ ngam māṅ mameūkö e, pön meūkö inrē min cha-a tö taṙòkhöre nö tökô-en nö mahaköp nö in Yēsū. Töt insā-avö an inrē ngam hanangenlōn tömeūkö nö ihôi më tarik ngam Tēv Yāvē! Öt tö ngö manah pöri angū-ö tö hī min öi öt vaichköreṙen. (1 Yôh. 1:8) Sā ṙôken mikahkūö hī min tö yip hol hī, ngaich lööṙen min öi meuk nup vanāichö cha. (Rōm. 3:23) Haṙivlōn in öi meuk yip tahëng nö ṙāngenre nö löklōn Yāvē kūö cha nö meuk nup vanāichö yip tahëng. Sitih inlahen ang Yēsū nö hangenlōn tö yik haköptöre? Ngaich sitih inlahen kò-òren ayī-ö töngamuh öi asīnken Yēsū?’ Hòṅ chumkūöṙen ayī-ö Vamënyen Yāvē tö sanapṙô në intöönö. Yēḵ hī min öi ngatī inlahen, ngaich sīöp ngam hanangenlōn hī tö höö, yěn pòrô nö vaichköre inlahen yip hol hī.—Efi. 5:2. w23.03 pěch 26-27 përa 2-4

Sā ṙanöhtö ngam manāngen ngaich nö hòṅ yih, yih min nup kanihngen nö lā kūö hī nup tö mihôiṅ min nö kihngen tī hī öi haköpöre öi löklōn ngam Tēv Yāvē hēk holṙen ngam söngkötön ò inrē. Lökten öi hòṅ ṙāpöre i tökeuheūttöre ngaich hòṅ löngö inlahen ayī-ö. Tö sā meh öre, yěn ōt öp prötör sistör tö haṙivlōn tī tö meh ngaich ötkô më-eṅ öm köptī tö ngam lanīnö re öm in ò. Hēk yēḵ meh inrē öm fēlöngö, lohten më-eṅ öm sirongkūö, ötkô pöri öm höng fēken e pöm hòṅ hang ngam inlēnöre më-eṅ, ngaich halööktitre hēk yěn ōt nup tö halööktitvö nö el ngam söngkötön ngaich kihngen më-eṅ öm hāngö u, höng hòṅ iṙūöhen pöri më-eṅ hang tö nup tö vënyu. Köptī tö ngam ṙinatö-ellōnre öm in Yāvē in ngam söngkötön ò inrē, pòrô nö yih nup kanihngen nö lā kūö meh. Hòṅ ṙāpöre më-eṅ i tökeuheūttöre, tö sā meh öm ötkô öm veut lanīnö, hòṅ afītöre inrē më-eṅ öm hòṅ kēken nup la-en re ngaich sā mat Yāvē inrē më-eṅ öm ngëichken nup töng sitih la-en.Havëkö kūö Yāvē inrē tö inyööken re. Um ṙāngen re öm hanôltöre öm in më prötör sistör. Yēḵ meh min ngatī inlahen ngaich pòrô öp tö sitih kanihngen öt löktu ngam Sī-ö nö kô nö haṙēvngen meh tö ngam Tēv Yāvē hēk tö ngam söngkötön ò.—Yāk. 4:7. w22.11 pěch 24-25 përa 14-16

Hayööken yip prötör sistör më minröinylen nö hīnöre urēhěkūö yanīhih minë tö faltöre pinlāḵngen. Ngëicha inrē cha-a yěn ngaich nö ṙòkhöre më prötör sistör nö akahakūö tö inlahen re min nö vë-ekūö më minṙöinylen ip hē e. Sitih inlahen öm kô-òren më-eṅ? Yěn yih minë tö faltöre kanihngen in öp kamngö meh, ngaich hatöntöre in yip minṙöinylen öi sitih inlahen öi hayööken cha. mihôiṅ öi havëten yip prötör sistör nö iyöng patīre yip ṙamāngö patīre hēk sitih inlahen öi holṙen cha yip kamëtöre nö in ngam minānö. Hēk tölōnu inrē tö nyā-aṅkūö hēk hayööken yip tahëng inrē öi söömtö nyā-aṅkūö cha. Yěn ōt öp pinlāngen nö in öp tahëng kamngö, ngaich sitih inlahen më-eṅ mihôiṅ vë-elkui yip prötör sistör. (2 Kòr. 1:8-11) Ngaich yēḵ meh holṙen yip samömtö relief nö in nup tahëng panam, ngaich mihôiṅ më-eṅ löktö in minë kòntripiūsön öm hayööken cha. (2 Kòr. 8:2-5) Ngaich yēḵ meh pöri hòṅ lōnu öm hayööken cha öm chuh in e, ngaich hòṅ vë-ekūö më minṙöinylen më-eṅ. Yēḵ meh min havëtu, ngaich öthō öm öt kētu trēning, hòṅ meh min öm mötlö inlahen öm hayööken yip ngatī. w22.12 pěch 24 përa 8; pěch 25 përa 11-12

Kahūich Pôl ön nö chamuh in yik aṅ Kòrin holmaneuk ò. Pön urěh sin yik rīkre in cha ma-asěha, hěnghöre mihiyōi-aṅ, chamô-òṅkanö inrē. (1 Kòr. 6:9-11) Sitih mufē öm më-eṅ, öt hēk hòng nö havantöre minë töchōich elkuilōn cha pòrô ngaich nö kē ngam vinôkö. Pôyòh, rö-ö yin pön tö hachāmö elkui nö Kristīön, sön pöri, pò cha nö töthet. Öthō nö öt yih minë töchōich elkuilōn cha. Lökten ayī-ö teūngen tö nganönö re tö hī töngamuh öi pòrô öi la-al minë töchōich elkuilōnre ngaich ōtre inrē yip prötör sistör tö mihôiṅ nö la-al minë töngatī töchōich elkuilōnre. Lökten më-eṅ öm hòṅ hangön ngam ṙinātö-ellōnre pò meh öm akahakūö tö hī ṙòkhöre elkatòh ngih halīöngö öi ngatī inlahen öi la-al minë kanihngenre.”—1 Pīt. 5:9. w23.01 pěch 12 përa 15

Akahakūö ang Yēsū tö më mahaköp min nö ngatī kanihngen, lökten anga-aṅ nö vë-ekūö Yāvē nö chumkūöṙen tö cha. (Yôh. 17:11) Ngatī inlahen an Yāvē töngamuh nö chumkūöṙen tö hī. Iṙôken taneūngen ayī-ö tö nganönöre. Pò ò nö mötlö kumlēḵ töm tökunyaha elmat tö hī. (1 Yôh. 4:4) Öt hěng nup tö hayunngöre nö imat ò. Lökten öi ṙinatu-ellōn yěi hayönglenre in Yāvē, ngaich öthō min ayī-ö pa-ekūö pöi holtö nganötöre min öi la-evṙen. Aṙē-ěv öm ṙung vë-enyre öm Vamënyen Yāvē i chūökre kamān hēk el Iskul? Angu-ö röh afēkö meh lökten öm öt kētöre pöplisör hēk öt kē ngam vinôkö pön sitih lōn min yip tarik tö meh? Ötkô öm heūlngöre yěm hòṅ kēken në tö löng la-en. Hòṅ vë-ekūö Yāvē më-eṅ havëkö kumlēḵre. Hòṅ chumkūöṙen më-eṅ tö nup inlahen tī ò nö hayööken meh. Ngaich ngön min ngam ṙinatö-ellōn meh ngöt inrē min më-eṅ öm in nup la-enre.—Isa. 41:10, 13. w23.01 pěch 29 përa 12; pěch 30 përa 14

Ik tahëng hēk ṙētak ang Yēsū nö hatön yik Feresī, nö ngö ṙô, ‘Öt vë-ekūö ngam chöngö öi yī-ö?’ (Mët. 12:1-7) Ṙën anga-aṅ nö hatöönö cha pön öt löng ngam ellōn yik Feresī nö in yik mahaköp. Nö vënyen cha nö öt milēḵṙen tö ngam Töhet Sakāmö. Lökten ang Yēsū nö löknyö mat ngam töhet līpöre nö vë-eny nuk tö nët inchō elmat cha, hēngö vahënyi anga-aṅ nö löknyömat ngam līpöre Hōsī. In e anga-aṅ nö vë-eny inlahen yik Feresī tö cha nö öt akaha elmat tö öp chö-öny ngam Töhet Sakāmö nö kēkaṙen, lökten cha-a nö öt īnu töm miṙēlōnre tö tarik. Kūö yòh pöri minë tinrīken cha nö öt sā ṙô ngam Tēv? Pò cha nöng haköp, hö-ö pöri nö kēkö kaha minë haköpre. Yahlö mat inrē cha-a nöng ngëichköre, höng chamöh nup fālen yip tahëng inrē ngam chö-öny cha-a nö haköp. Lökten cha-a nö öt hō nö akaha elnang tö minë tökô-en manah minë haköp re kūö cha nöng ngatī inlahen tinrīken. (Mët. 23:23; Yôh. 5:39, 40) Vë-ekūö ngam Mëtiv 19:4-6 inrē. Ngam hatön Yēsū nö in yik Feresī: “Öt vë-ekūö ngam chöngö öi yī-ö?” Lohten yik Feresī nö ṙōlheuh nö haköp inlahen vinīlö ngih panam nö imat ngam töhet līpöre, hang inlahen ngam Tēv inrē cha-a nö hamūl tö ngam tarik nö in ngam kikānö nö hōten cha nö hěng. Hö-ö pöri cha-a nö meuk ngam pinīhö nö töhet nö imat ngam Tēv. Haköplu ayī-ö öi in ngam ṙô Yēsū nö in yik Feresī, tö ngam ellōn hī nö hòṅ löng yěi vë-ekūö ngam Paipöl. Yēḵ hī min öi sā yik Feresī öi yahlö mat töre hēk kūö re öi höng hòṅ chöh vanāchö yip holre lökten öi vë-ekūö ngam Paipöl, ngaich öthō min öi yöölen yěi ngatī. w23.02 pěch 12 përa 12-13

Kē-ěkūö yik Israel ang Yāvē tö minë chööngö, yēḵ cha min nö hāngö u ngaich lāköre min cha-a tö nup pinlāngen. Pòrô cha-a nö i patī hēk ip kamngö chūökre nö la-evṙen. (Man. 21:28, 29; Chöö. 22:8) Yēḵ öp tarik pòrô nö öt tölngenre nö kapaha tī töp holre, fukkui ò min öp ṙòng e. (Chöö. 19:4, 5) Yēḵ öp tarik nö öt tölngenre nö pala-aiṙen tī töp piyōsö, kapah ngaich öp kūön ò nö ellōn ò. Ngaich kētu sācha min öp tö pala-aiṙen tī tö ò. (Man. 21:22, 23) In e mikahkūö ayī-ö tö Yāvē nö lōnu tö hī öi hòṅ örheūheu öi lāköre hēk chumkūöṙen inrē töre. Yēḵ hī öi lāköre tö nup pinlāngen yěi pòrô i patī hēk ip chūök hī inrē öi la-evṙen, ngaich hameuktöre ayī-ö öi milēḵṙen tö ngam nômö. Tö sā hī öi chumkūöṙen öi ṙūöhngen yip nyīö tö nup tö chökhukūö chehen, nup fël, lane-ën hēk këmiköl inrē. Chumkūöṙen inrē ayī-ö yěi kavalngen u hòṅ yip tahëng nö öt pala-aiṙen tö tī hī. Ngaich yēḵ hī öi föng tameūyö hēk tilī mak, ngaich hòṅ haṙēmngenre öi la-evṙen. Yēḵ hī öi òk ka-eūt hēk òk lanë-en, ngaich yih ngam ranahata hēk inṙòhò hī. Ngaich ötkô ayī-ö öi aṅhav eltī tö fūn yěi chuvē lôri. w23.02 pěch 21-22 përa 7-9

Töpōyen manööyö an Yāvē yěn haköptö yip istutent re, hangenlōn hēk akahakūö inrē anga-aṅ tö cha. Höng ngëichkö nup tövai anga-aṅ tinrīken cha. (Sal. 130:3) Hòṅ akahakūö in tö Yāvē tö ò nö anga-aṅ vamī ngam elkui hī, lökten anga-aṅ nö öt hō nö tölṙô hī min töp töt kanò-òṅ hī la-en. Pingangkūö in yěi ngëichkö vinī-i ngam elkui re. (Sal. 139:14) Lökten in hòṅ löktökūö töngamuh öi hòṅ asīöp ngam neūköre töm kanô-en aṅmat ngam Paipöl. (1 Pīt. 2:2) Mihôiṅ nup chö-öny hī öi haköp mat Paipöl nöng tö kun kun, ngaich yěn ōt öp setiūl (schedule) hī ngaich hòṅ ngatī inlahen öi la-evṙen. (Yôs. 1:8) Ngaich öthō min Yāvē nö öt hakòlô nup la-en hī, kuchik ṙô min inrē öi haköp mat ngam Paipöl. Ngaich ṙūöhölre ṙôken min ngam kuilōn hī hòṅ haköp inlahen Yāvē. Kô-en an ngam kinë-e ngam mikah nö tövai, hòṅ vai pöri inrē ngam chö-öny hī öi kē-ě e, pöi hòṅ ṙūöhtö mikahkūöre tö Yāvē, hòṅ hangenlōn tö ò hēk ṙatö-ellōnre öi in ò, ngaich asīöp minë tinrīken ò öi in re. Ngaich möl min öi yöölen töm mikah yěi ngatī. (1 Kòr. 8:1-3) Ngaich yěm akahakūö ngaich tö Yāvē ngaich mihôiṅ öm havëkökūö ò nö asīöp ngam ṙinatö-ellōn meh. (Lūk. 17:5) Hang ṙô meh min inrē öm vë-ekūötēv. w23.03 pěch 10 përa 11, 13

Akahakūö yik mahaköp nö in Yēsū tö Yerusalem min nö payāyi, rö-ö pöri cha-a nöng suvan kalröönre nöng ūichhak ngaich hökken e. Pön kētu la-en cha-a tö Yēsū nö keuheūtngöre chūök nö ‘i Yērusalem, i Yūta hēk i Samariā inrē nö ahangkö yanīhi ngam Pūlngö ngam Tēv.’ (Inl. 1:6-8) Kô-en nö kiröng ngam la-en kinë-ekūö yik mahaköp, lökten cha-a nö hòṅ keuheūttö ellōnre nö kēken e nö yūs ngam tö rahëichtit ṙētak aṅ in re. Yēḵ hī min löngö tī yūs ngam ṙētak, ngaich chumkūöṙen min ayī-ö tö re. Lökten öi hòṅ chumkūöṙen tö inlahen tī re tö ngam ṙētak öi inup la-en tömihôiṅ nö yëngen tī tö e. Kūö yòh öi hòṅ ngatī inlahen? Pöi mihôiṅ min öi ‘fukkui tö kanihngen’ mihôiṅ inrē min öi kapah. (Mum. 9:11) Sitih inlahen öi min löngö tī yūs ngam ṙētak? Hòṅ lök nup lōn Yāvē, hangön ngam innôlöre inrē öi in ò. (Yôh. 14:21) Ngöṙô an ngam Paipöl. “Lökten, yī-ö hol chu, hakööpöre yin, ui hanlöinyken: örheūheu ṙūöhlö ngam la-en ngam Tēv.” (1 Kòr. 15:58) Yēḵ hī min öi ngatī inlahen ngaich öthō min ayī-ö öi fēḵ unôich yěn yih pòrô ngam manāngen hēk yěn faltöre yanihī ngam kinpaha hī.—Mët. 24:13; Rōm. 14:8. w23.02 pěch 18 përa 12-14