Hatön Meh

Vë-enyre ngam kamūich ngam Inchōḵ-oṙô 30:18, 19 nö öt akaha elmat tö ngam inlahen tinrīken ngam kikōnyö nö im kikānö. Tö sitih manah öng ngam ṙô ò?

Pōyen yin më tarik töt akaha elnang tö ngih ṙô, rīkre inrē yip kamūich, töt akaha elmat tö e. Ngö kinūichngö ön ngih miröökö nö im Tufömngöre Panam Translēsön Paipöl, ‘Lūöi nup töyahlö pinngangkūö chu; fën nup öt mikah elmat chu. Talöökö ngam matēṙö nö el taṙul, talöökö ngam pēch nö i kui ihong, talöökö ngam chōng nö el ngam tökiröng mai, inlahen kikōnyö nö i kikānö.’—Inch. 30:18, 19.

Ngih tö kūichi nö im miröökö, ‘inlahen kikōnyö nö i kikānö’ urěh sin ayī-ö öi ngölōn tö e nö kamakkö tötlöng. Kūö yòh öi ngatī mufē? Kūö minë tö röhta miröökö nö kakkö inlahen minë tötlöng la-en, minë töt kinheūtu kuilōn hēk öt rēhěn nö ngö ṙô ‘ngaichchö!’ (Inch. 30:15, 16) Kakka inlahen inrē ngam ‘tötlöngö la-en kikānö’ nö im tö 20 miröökö, ngam vamë-enyre nö öt vaichö kahëken. Angū-ö misī lāinyngen hī öi ngölōn tö ngam tö 18 hēk tö 19 miröökö nö kamakkö ngam tötlöng inlahen. Ngölōn in sin, sā inlahen ngam kumteū matēṙö nö el taṙul, ngam lamô pēch nö el ihong hēk ngam chōng lamök el ngam tökiröng mai nö öt rēhěn anū-ö nö ṙāngö minkahngöre, ngatī inlahen ngam kikōnyö nö öt halöngten yip tahëng nö akahalōn tö minë inlahen ò. Heuveū-en ngam kikōnyö nö haṙöingen ngam töng öt hěngö mikah kikānö, ngaich höng öt akahaiṙen ngam kikānö töre nö chōḵngö nö in minë ṙô ò.

Hö-ö ngam kamūich nö kakkö minë tötlöng ṙô nö in në miröökö, vë-eny inlahen minë rīkre tövai ṙô pöri anga-aṅ minë pinngangkūö ò. Kūö yòh öi mihôiṅ ngatī ṙô? Töi ngëichkö öp lāinyngen e.

Yěi ngëichkö ṙô minë tö hötṙeh takô manuscript, minë tö kūichö tö kūö kanūich nö i ṙô heprāi. Ngaich kôtökūö ayī-ö tö ngam tövai ṙô tö vënyu nö in e, nö imat ngam töhěng tiksönörī līpöre i ṙô heprāi, nö ngö ṙô, ngam manah ngam ṙô tö translētö im Inchōḵ-oṙô 30:18, ‘pinngangkūö töt mikah elmat chu’ nö tö ṙô tö öp töhěng angū-ö inlahngen hēk ṙôtö öp töt insā-av, ngaich meūkö angū-ö tö ò nö pingangkūö takô.’—Tiōlòchiköl Leksikôn Òf Tī Ōl Testömen.

Ngatī ṙô ön inrē ngam Pròfěsör aṅ el ngam Harvöt Yunivörsitī ang Krōfört Ĕch Tòi tö minë miröökö nö rö-ö anū-ö nö kakkö nup tötlöng inlahen. Ngö ṙô anga-aṅ, “Vë-enyre ngam kamūich nö pinngangkūö tö minë inlahen.”

Lökten nö tölöng min ngam inlahen hī yěi ngö ṙô tö minë tö vënyu inlahen im Inchōḵ-oṙô 30:18, 19 nö pinngangkūö anū-ö hēk öt mikah elmat hī. Sā pinngangkūö ngam kamūich in inrē ayī-ö yěi meuk inlahen öp matēṙö kumteū nö el taṙul, pēch tö yit nö lök kui ihong pòrô nöng öt kalröönuvö hēk sitih inlahen ngam tölangan chōng nö havangngö el ngam mai nö chuh in nup tahëng panam hēk sitih inlahen ngam kikōnyö hēk töm kikānö nö hangenlōn tö höö, ngaich söl manā-aṅ nö köp nö in höö.