Génesis
30 Raquel, Jacobnu nakaꞌ kutyuumin, yaꞌ uñamanu ne kishtyaimi, tsejtu yaꞌ rukunu entsandimi: Inu navikaaka; vikaatyushu juntsaa yujkanchin peyanu tsuyu, timi.
2 Tsenñu Jacob yanu ajaa tiꞌ patu entsandimi: ¿Tsejtu iyaa Dios juu? Diosyaa ñunu navikarendyuba, timi.
3 Tsenñu Raquel tsandimi: Tsaashu juntsaa, inchi tiba kiikemu naꞌma Bilhánu kaꞌ yaba tsude; tsenmala ya nakanmalaya, juntsanu in na juuñuu tirenu tsuyu, timi.
4 Entsanditu Raquel yachi tiba kiikemu naꞌma Bilhánu tsaa Jacobnu kuwakemi, yachi kama miyandinu shinbu tirekitu. Tsenñu Jacob Bilhába tsumi. 5 Tsenñu Bilhá, Jacobnu na main kaꞌ kuwañu, 6 Raquel tsandimi: Entsa kaana Dan mumunu tsuve, (hebreo palaachiya, “deechuꞌ kenu” titiñuu juve titu), entsandiꞌ mitya: Dios i yaba kuinda keñu mereꞌ, tyee keñu urañuba juntsangueꞌ inu na main kuwañuꞌ mitya, titu.
7 Tsenñu bene bain Bilhá, Jacobnu kama na mangaꞌ kuñu, 8 Raquel tsandimi: Entsa kaanaya Neftalí mumunu tsuve, (hebreo palaachiya, “vinguenu” titiñuu juve titu), entsandiꞌ mitya: In uñamaba vetaꞌ vetaꞌ vinguikeñunguendun, iyaa puiyu, titu.
9 Tsenmala Lía bain yumaa na mangatyu tiyatu, yachi tiba kiikemu naꞌma Zilpánu tsaa Jacobnu kuwakemi, yachi kama miyandinu shinbu tirekitu. 10 Tsenñu Zilpá, Jacobnu na main kaꞌ kuwañu, 11 Lía tsandimi: ¡Mika urave! Tsaꞌ mitya entsa kaanaa Gad mumunu tsuve, (hebreo palaachiya “uraꞌ iñuve” titiñuu juve titu).
12 Tsejtu bene bain Zilpá kama na Jacobnu mangaꞌ kumi. 13 Tsenñu manen Lía tsandimi: ¡Yuj sundenve! Challaa supula inu yuj sundyaa tinu detsuve. Tsaꞌ mitya entsa kaanaya Aser mumunu tsuve, (hebreo palaachiya, “sundennu” titiñuu juve titu).
14 Trigu inu tinbutala, ma malu Rubén jeenbaasha jimi. Tsejtu junga, finu puka yaꞌ mumu mandraguras* katami, tsejtu yaꞌ ama Líachi taꞌmi. Tsenñu Raquel juntsa puka katatu, Líanu tsandimi: Inuba mallee ñuꞌ naꞌ kaꞌ taañu mandraguras puka kuwaka, timi.
15 Tsenñu Lía pakatu tsandimi: ¿Ñaa inu in ruku machiꞌketu tiba kendyuyu tenguee? ¿Tsenmin challa in naꞌ kaꞌ maañu mandraguras puka bain chiꞌkenu tendyuka? timi.
Tsenñu Raquel: Ñuꞌ naꞌ mandraguras puka inu kuwashu juntsaa, uma kepe Jacob ñuba tsunu tsuve, timi.
16 Tsenñu kepenusha Jacob jeenbaasha puꞌ maantsu, Lía yanu katanu lutu tsandimi: Umaa ñu iba tsunu tsuve, in naꞌ mandraguras puka Raquelnu kuwatu tsai deshuwaꞌ mitya, timi.
Tsenñu Jacob juntsa kepe Líaba tsumi, 17 tsenñu Lía na maviꞌ mangami, ya Diosba kuinda keñu, Dios meeñuꞌ mitya, tsejtu umaa juntsaba Jacobchi man na seenguemi. 18 Tsejtu Lía tsandimi: Entsa kaanaa Isacar mumunu tsuve, (hebreo palaachiya “ne kuwanu” titiñuu juve titu), iya in rukunu inchi manda-imu naꞌmanu kuwan mitya Dios inu mekikiñunguive, titu.
19 Tsejtu bene Lía manen Jacobnu na mangaꞌ kuwatu, umaa entsaba yachi mandishmain na kami, 20 tsejtu tsandimi: Dios inu naraa meꞌve. Tsaꞌ mitya challa in ruku inu kayu estyanu juve, yumaa mandishmain na kaꞌ kuwañuꞌ mitya. Tsaꞌ mitya entsa kaanaya Zabulón mumunu tsuve, (hebreo palaachiya “meꞌnu” titiñuu juve titu).
21 Tsejtu bene Lía supu naꞌmaa katu, juntsanu Dina mumu pumi.
22 Tsenñu Dios, Raquelnu bain mandengami yaba kuinda kemuwaañu. Tsaiꞌ juntsanguetu na miyandinu tirekaami. 23 Tsenñu Raquel yachi ajkeꞌ na miyanditu tsandimi: Umaa Dios inu nakatyuꞌ yujpen chuñuba umaa manbaishwaave, timi. 24 Tsejtu juntsa kaananu José mumu pumi (hebreo palaachiya, “kayu kunu” titiñuu juve titu), entsandiꞌ mitya: Inu kayu na miyandikaasa, titu.
Jacob taruku tiyami.
25 Raquel, Josénu nakañu, bene Jacob Labánnu tsandimi: Inu in tusha me-eeka. 26 Tsaꞌ mitya in shinbulanu bain, naa in kaillanu bain iba tiba jutyu me-eeka, yalaꞌ mityaa iya ñuchi taawasha kiyu. Tsaꞌ mitya mandyaikeꞌ me-eeka. Tsenmin ñuya mive iya ñuba naake taawasha keñuba, timi.
27 Tsenñu Labán pakatu tsandimi: Tsantsaya iba chudisa tenve. Ñuren tsandisa tyañuya entsandinu tenve: Yavéya inu ñuꞌ mityaren uraꞌ ikaantsuñuba mijayu. 28 Tsaꞌ mitya ñuꞌ taawasha kikenuushu juntsaꞌ mitya nan kuwasa tenñuba inu wainka, tsenmala iya juntsangue kuwanu tsuyu, timi.
29 Tsenñu Jacob tsandimi: Ñuya nara mive iya ñuꞌ mitya naake taawasha keñu bain, naa ñuꞌ animaalanu naake washkeñaa kayu uraꞌ detiyañu bain; 30 iya kayu engu jaindyuya ñuchi animaa jayun juuwa deeve, tsaaren challa pureꞌ sera deive, matyu iya engu jainmalan Yavé ñunu mika uraꞌ ikaañuꞌ mitya. Tsaꞌ mitya ¿naamaa iba in bululachin juu taawasha kenujtuuwa? timi.
31 Tsenñu Labán manen: ¿Ñuꞌ taawasha kikenuushu juntsaꞌ mitya nan kuwasa tenguen? timi.
Tsenñu Jacob manbakatu: Tiba kuwatyuka. Tsaaren iya tyee panu juñuba ñu juntsanguenu tiyashu juntsaa, ñuꞌ animaalanu mawashkenu tsuyu. 32 Uma ñuꞌ animaa puinsha jinu tsuyu, tsejtu kumuinchi uvejalanu bain, naa chibu peꞌpeꞌjaraalanu bain, tsenmin uveja yapijtutuulanu bain deveekanu tsuyu. Tsejtu juntsalaa in taawashaꞌ mitya kuwakiñuu junu detsuve. 33 Tsenmalaa ñu mandinbu in kañu animaalanu jaꞌ keetu, uwain iya uraꞌ kemu ruku firuꞌ ketyuñuve tyanu tsuve. Tsaꞌ mitya in uveja paasha naaju chibu peꞌpeꞌjaraa jutyula bain, naa uveja pababaa jutyula bain in junga depushu juntsaa, ñunu taanguiñaa tsaanu tsuve, timi.
34 Tsenñu Labán: Tsaaya urave, ñu naatiñu bain tsaasa, timi.
35 Tsandituren juntsa malunun Labán tsaa kumuinchi llupu chibu piichililijaꞌteelanu bain, naa pababaa pujaꞌteelanu bain dekakemi, tsenmin kumuinchi supu chibu peꞌpeꞌjaraalanu bain, naa pababa pujaꞌteelanu bain, naa ne fibaba jayu pujaꞌteelanu bain dekakemi, tsenmin uveja pababaalanu bain dekakeꞌ, yaꞌ nalanu washkidei tiꞌ kuwakemi. 36 Tsejtu bene, pen malu nainsha baasha juntsa animaalaba Jacobꞌ pununu baajiimi. Tsaaren Labánꞌ vejan animaalanu Jacobya washi washikentsumi. 37 Tsejtu Jacob alamu chi ali bain, naa almendru chi ali bain, naa kastañu chi ali bain daakaꞌ, fibaba pilla jujaꞌtengue dellashmi. 38 30:38-39 Tsanguetu bene juntsa chaꞌli dellajchaaya animaa puinsha, yalaꞌ pi kujchi kujchikenu juusha uikaami, matyu junaa unbee rukula supulanu nakaapupu dekiñuꞌ mitya. Tsaꞌ mitya juntsa chaꞌli ajuutala tsa tsa dekiñu, yalaꞌ kailla piichililii bain, naa peꞌpeꞌjaraa bain fale falekila. 39 —— 40 Tsenmala Jacob velaꞌ kalaalaakemi juntsa uvejalanu; tsanguetu Jacob Labánꞌ animaalanu tinu bain piichililiitala bain, naa ne pababaalanu bain tsaanu tene keekaakaakemi. Entsanguetaa yachi bain maali animaala demiyandimi, matyu Labánꞌ animaalanu mantsa velaꞌ kalaalaaketu. 41 Tsejtu naa-uwanu deraꞌ animaa juulaa tsa tsaindetsuñuba Jacob junu juntsa chaꞌli uikaakaakemi nunbanu pi kushmu deeñu bain, tsenmalaa animaala tsanguenu uwanu juntsa chaꞌlinu kataataakenudetsu; 42 tsaaren animaala ejkee dejashu juntsaa, chaꞌli uikaatyu jujuumi. Tsaꞌ mitya ejkekee animaalaya Labánchi tene detiyanmala, kayu deraꞌ juu animaalaya Jacobchi tene tiya tiyaila. 43 Entsanguitaa Jacob mika taruku tiyami, naa uveja juula bain, naa chibu juula bain, naa tiba kiikemu chachilla, unbee rukula bain, supula bain, naa kameyula bain, naa burula bain pureꞌ miyandiyaimi.