Éxodo
Dios maná kuwami.
16 Kumuinchi Israel chachilla Elim tenabi demaluꞌ miitu, tiba den chutyu Sin tenashaa jila. Entsa Sin tena, Elim tena Sinaí tenaba pensanguiñuya, kejtaa tenatala chunami. Yala Egiptonu demaluꞌ miitu entsaba pai chuꞌchaya jumunu 15 malunaa jundala pula.* 2 Tsejtu junu tiba den chutyuin tenasha nendu, kumuinchi Israel chachilla Moisésnu bain, naa Aarónnu bain veraꞌ tyaꞌ naꞌbaasa paviikedundala. 3 Tsejtu tsandila: Yavé lalanu Egiptoshaa peyakaañuba ne uraanuren tsanguiñuve. Jungaya ai piyama ajuusha dechuꞌ, panda fiꞌ, naa pan bain tyubanbera fifiken chumuwa deeyu, tsaanuren ñullaya entsaiꞌ tiba den chutyuin tenasha detajaꞌ, kumuinchi lalanu tsamantsa yapewareꞌ pandachi tuꞌnu kendetsuve, tila.
4 Tsenñu Moisésnu Yavé tsandimi: Tsaaya ñuichi selusharen pan pajtenu tsuyu. Tsenmala chachilla malumere deluꞌ miꞌkeꞌ kaꞌ, juntsa malunu naa-i fanuu juñuba juntsaren kakenu dejuve. Entsanguitaa mijanu tsuyu, iya naakidei tiñuba tsanguemu deeñu bain, naa tsanguityu deeñu bain. 5 Tsaaren mandishmain malunuya ma malunu naake kamu dejuꞌba tsanguiñu bain, panda dekenmalaya pai malu fikenuu tiyañu katanu detsuve,* timi. 6 Tsenñu Moisés bain, Aarón bain kumuinchi Israel chachillanu entsandila: Entsa kependuꞌkainsha ñulla mijanu dejuve, naa uwain Yavéya ñullanu Egiptosha dechuren mangalaamuñuba. 7 Tsejtu kepenene, Yavéꞌ tsamantsaa keewara jumu katanu detsuve, ñulla yanu veraꞌ tyaꞌ papadetiñuba yaa mereꞌ mitya. Tsaaren ¿lalaya mu deewa ñulla lalanaa veraꞌ tyaꞌ panuu? tila.
8 Tsejtu Moisés kayu paꞌ jindu tsandimi: Entsa kependuꞌkainsha Yavé ñullanu alla kuwanu tsuve finudetsu, tsejtu kepeneneya panya tyubanbera kuwanu tsuve, naa ñulla yanu veraꞌ tyaꞌ papadetiñuba mereꞌ mitya. Tsejtu ¿lala mu deewa, ñulla lalanaa tsandinuu? Ñulla entsanditu ne lalanu pabandindetyuve, Yavénaa kundaa pandetsuve, timi.
9 Tsejtu Moisés bene Aarónnu tsandimi: Kumuinchi Israel chachillanu Yavéꞌ ajuusha dejasa tide, matyu Yavé naa yanu veraꞌ tyaꞌ pandetsuñuba meeñuꞌ mitya, timi.
10 Tsejtu Aarón juntsandiꞌ kumuinchi Israel chachillanu pantsuren, yala tiba den chutyuin tenasha ke-eetu, Yavéꞌ tsamantsaa keewara jumu ñivijchasha faañu katala.
11 Tsenñu Yavé Moisésnu patu tsandimi: 12 Naa Israel chachilla veraꞌ tyaꞌ papadetiñuba meeyu. Ñu yalanu patu entsandide: Kependuꞌkainshaya allaa finu detsuve, tsaaren kepeneneya panyaa tyubanbera finu detsuve. Tsejtaa mijanu dejuve naa iya, Yavéya, uwain ñullaꞌ Diosñuba, tide, timi.
13 Tsenñu juntsa kependuꞌkainsharen kuinbichu keraa dejiꞌ, yalaꞌ kajdiꞌ yapaya dekeꞌ chuinsha tyuwai jila. Tsenmala kepeneneya pi kulili maiꞌchayii tiyaꞌ kataami yalaꞌ tsunchanu kelu kelu. 14 Tsejtu juntsa pi kulili deme-ejlanmalaya, tu jandala tsaa kaa paki jui ejlami. 15 Tsenñu Israel chachilla dekatatu, tyee juñuba mijdetuꞌ mitya, yai tene patu: ¿Entsa tijtun?* tiitila. Tsenñu Moisés tsandimi: Entsaa Yavé ñullanu kuwañu finutsumu panve. 16 Tsenmin ñullanu entsaa kidei tive: Main main naa naake finuu dejuꞌba tsa tsangue kadei, tsenmin yapayasha bain nan dechuñuba juntsalachi bain kadei. Tsaꞌ mitya ma chachimeemee jumulachi kaꞌ pai litru jungue kakidei, tive, timi.
17 Tsenñu Israel chachilla tsanguitu, mantsalaya kayu aa dekanmala, mantsalaya jayu jayun kakila. 18 Tsaaren litrunu demidingueꞌ keenmalaya, naa aa kamulachi bain laraiba indyu, naa jayun kakemulachi bain faata-iiba indyumi. Matyu main main naake meneste deeñuba tsa tsai tiyami.
19 Tsenñu bene Moisés tsandimi: Mu bain ayunchi finu tiꞌ laakaanu kityudei, timi.
20 Tsenñuren mantsalaya Moisés naatiñuba demeenguiꞌtu, ayunchi finu titu jayu delaakaañu, mallu deviila, tsenmin pudyunguemi. Tsenñu Moisés juntsa chachillanu ajaatyami.
21 Tsejtu kepenenemee naa naake finuu dejuꞌba juntsan kakila, tsenmala kaiꞌñu laramunuya pajta luꞌmin demanbiꞌwaawaakemi. 22 Tsaaren mandishmain malunuya, pai malu fikenungue kala, ura pañuya ma chachimee taapai litru. Tsenñu yaatala bale pumu rukula Moisésnu tsa dekive tiꞌ kuinda kiila. 23 Tsenñu Moisés tsandimi: Yavéren entsanguidei tive: Ayu saaduma lekanu malu juꞌ, inu balenguunu maluve. Tsaꞌ mitya ti akaanu dejuꞌba akaadei, tyee teengaanu juꞌba teengaadei, tsejtu tyee delaakareꞌba ayunchi mafinu uukaadei, tive, timi.
24 Tsenñu Moisés naatiñuba juntsa dekitu, laramuya ayunchi mafinu delaakaañuren, naa mallu bain vindyuꞌ, naa pudyunguibanguiꞌmi. 25 Tsenñu Moisés tsandimi: Juntsa umaa fidei. Uma saaduma lekanu malu juꞌ, Yavénu balengureꞌ keewaanu maluve. Uma malunuya finutsumi avindala tiba katan dejutyuve. 26 Tsaꞌ mitya mandishmain maluya panda kajiꞌ fifikituren, mandishpai maluya saaduma lekanu maluñuꞌ mitya, tiba katanu dejutyuve, timi.
27 Tsenñuren mantsalaya mandishpai malunuren teꞌkanu tyaꞌ, deluꞌ miꞌkituren, tiba kataiꞌla. 28 Tsenñu Yavé, Moisésnu tsandimi: ¿Naama jina iya ñullanu naa naakidei tiñuba juntsalanu meenguiꞌmujchi jintsunuj deeyu? 29 Tengaya judei naa iya ñullanu saaduma ma maluya lekanu malu kuwañuba. Tsaꞌ mityaa mandishmain malunuya pai malu jungue panda finu kuwayu. Tsajuꞌ mandishpai malunuya muba yanu luꞌ jityuꞌ, yasha tsananu dejuve.
30 Tsenñaa mandishpai malunuya chachilla lekala.
31 Israel chachilla juntsa yalaꞌ teꞌka teꞌkakenu pandanu maná mumu pula. Juntsa fibabaa juꞌ, silantru ñi keraami, tsenmin pan kaa paki mishkiba juuñu pingalami.
32 Bene Moisés tsandimi: Yavé entsaaya kidei tive: pai litru maná kaꞌ detyuketu, ñullanu seraꞌ jimu chachillanu keewaanu uukaadei, tsenmalaa iya ñullanu Egiptosha mangalaatu, ñulla tiba den chutyuin tenasha nendetsu ti pandaa kuwamuñuba keemijanudetsu, timi.
33 Tsejtu Moisés, Aarónnuya entsandimi: Aa basu kaꞌ maná pai litruuñuba putu Yavéꞌ ajuusha chujtiide, tsangueꞌ ñullanu seraꞌ jimulachi uukaanu, timi.
34 Tsenñu Yavé Moisésnu naatimuwaañuba Aarón tsanguitu, bene juntsa aa basu, Yavé chachillanu vetaꞌ vetaꞌ tsanguedaa tiñu keewara babuusha puꞌ Diosaꞌ lei pilla shupuꞌ taꞌpa ajuusha tsuumi, tsenmalaa uukaraa tsananutsu.
35 Tsejtu Israel chachilla 40 añuꞌ mitya maná panda fin chula, chachillaꞌ chunu tusha jingama, tsandityuꞌba Canaán tu kapasha tyuinajingama.
36 (Ma efa 22 litru juñu, paitya pela veleꞌ tsuukeñunguenmalaa, ma gumer tiyamu juve, ura pañuya, pai litru.)