Éxodo
Lanbakinu pi faami.
17 Kumuinchi Israel chachilla tiba den chutyu Sin tenanu putun, maluꞌ miila, tenameemee kajdiꞌ jijiindu, Yavé naakidei tiñuba tsa tsaitu. Tsejtu Refidim tenanu kajdiila, tsaaren junu pi putyumi yala kushnudetsu. 2 Tsejtu Moisésnu ajaa patu tsandila: Lala pi kujchinudetsu kuwanbera kenu dejuve, tiꞌ bulla pala. Tsenñu Moisés tsandimi: ¿Nenñaa inaa tsandiꞌ pandu detiyu? ¿Nenñaa ne tsandiꞌ Yavénu tyee kichunga tenna pandu detiyu? timi.
3 Tsenñuren chachilla tsamantsai pi mutyandetsuꞌ mitya, Moisésnu veraꞌ tyaꞌ patu entsandiitila: ¿Nenñaa lalanu Egiptosha depuren mangalareꞌ tajaꞌ, naa lalaꞌ kaillanu bain, naa lalaꞌ animaalanu bain pichi detutendunguiyu? tiitila.
4 Tsenñu Moisés Yavénu tsandimi: ¿Entsa chachillanu tyee kenujtuuwa? Matyu entsa chachillaya inu shupukachi tyaꞌkenun jutyuu judeeve, timi.
5 Tsenñu Moisésnu Yavé tsandimi: Israel chachillaꞌ junga jitu, junu bale ruku pumulanu mantsa kaꞌ, miyaꞌ jide, tsenmin Nilo pisha vilikisu juntsa tyutyan chaꞌli bain taꞌde, tsejtu ajkesha jidei. 6 Tsenmala iyaa junga Horeb lanbaꞌ kuyisha keenanu tsuyu. Ñu junga jitu juntsa tyutyan chaꞌlichi lanbakinu ma villa kide, tsenmala junu pi faanu tsuve chachilla kushnudetsu, timi.
Tsenñu Moisés, Israel bale rukula dekeenaren tsanguemi. 7 Tsejtu juntsa tenanu Masá mumu pumi, Yavénu tyeeba kekaanu tyaꞌ patu: ¿Yavé laaba putun tsajuu? tiitimuwa deeñu. Tsenmin Meribá mumu bain pumi, Israel chachilla pi paꞌtu ajaatyaꞌ pamuwa deeñu.
Amalec chachillanu vingueꞌ puila.
8 Israel chachilla Refidimsha depuñu, Amalec chachilla jiꞌ vinguila. 9 Tsenñu Moisés Josuénu tsandimi: Mantsa rukulanu miꞌkeꞌ kaꞌ, Amalec chachillaba vinguiide, tsenmala iyaa ayu kuyisha luꞌ, Diosaꞌ tyutyan chaꞌli in tyaapanu taa uinanu tsuyu, timi.
10 Tsenñu Josué, Moisés naatiñuba meenguetu, Amalec chachillanu vinguenu luꞌ jimi. Tsaindetsun Moisés bain, Aarón bain, Hur bain kuyisha lula. 11 Tsejtu Moisés yaꞌ tyaapa kaiꞌsha ustananmalaya, Israel chachillaa pulla pullaila, tsaaren Moisés yaꞌ tyaapa manbajtenmalaya Amalec chachillaa manbulla pullaila. 12 Tsaaren Moiséschi yaꞌ tyaapa tyuba tyubaiñuꞌ mitya, ma shupuka kaꞌ, yaꞌ keesha tajiꞌ detsuuñu, juntsa jandala chudiñu, Aarón, Hurba Moisésꞌ tyaapanu kelush kelush kakeꞌ yaitadila. Juntsanguiñaa Moisés yaꞌ tyaapa us-eraa tanami pajta dedishuꞌ vingama. 13 Tsanguiñaa Josué, Amalec chachillanu peeniyachi vingueꞌ pureꞌ tutekeꞌ puimi.
14 Tsejtu Yavé Moisésnu tsandimi: Entsa juushu juntsa, kiikanu depiikeꞌ tsuude, bene mandenga mandengakentsumi junudetsu. Tsenmin Josuénu entsandiꞌ narati meewaade: Amalec chachillanu muba tengan jutyungue demanbirenu tsuyu, tide, timi.
15 Bene Moisés ufeenda tsureꞌ juꞌkenunu main ketu, “Yavé inu miyaꞌ jimu Bale Rukuve”, tiꞌ mumu pumi. 16 Tsejtu tsandimi: Amalec chachilla Yavéꞌ pudeenu kundaa ken mitya, Yavé Amalecnu seraꞌ jimu chachillanu naa-uwanuba vinguentsunu tsuve, timi.