Éxodo
Israel chachilla Sinaíbi jila.
19 Israel chachilla, yala ti malunaa Egiptosha demaluꞌ mijiꞌba, pai chuꞌchaya puiñu, juntsa malunuren tiba den chutyu Sinaí tenasha tyuinajila. 2 Tsejtu Refidim tenanu demaluꞌ miitu, tiba den chutyu Sinaí tenabi jitu, Israel chachilla junu kajdiꞌ chula, kuyi ajuusha. 3 Tsenñu Moisés juntsa kuyinu lumi Yavéba katawanu. Tsenñu Yavé juntsa kuyisha puꞌ, yanu paputu tsandimi: Jacobnu seraꞌ jimu chachillanu, matyu Israel chachillanu, entsandide: 4 Ñulla, iya Egiptoꞌ chullanu naakeñu bain dekatave, tsenmin naaketaa ñullanu engu in puinsha miyaꞌ jañu bain mideeve, ñullaa jullayu jaꞌchinu chudiꞌ jan tsa deive. 5 Tsaꞌ mitya ñulla tiba demeengueꞌ, iba vetaꞌ vetaꞌ naakenu paꞌba tsa tsanguen dechushu juntsaa, vejan chachillaba ñullaa kayu in estennu chachi junu detsuve, matyu kumuinchi tuya inchi tene juuñu.6 Tsejtu ñullaa chachillaꞌ mitya inu kalen jamula tene dejuꞌ, inchin juu tene junu detsuve. Kumuinchi entsa palaaya Israel chachillanu dewainde, timi.
7 Tsenñu Moisés miitu, Yavé yanu naatide tiñu bain bale rukulanu mikaꞌ dewainmi. 8 Tsenñu Israel chachilla manbarejuu pakakitu: Yavé naatiñuba tiba tsanguenu detsuyu, tila. Tsenñu Moisés chachilla naadetiñu bain Yavénu tsangue mangüindakiiñu, 9 Yavé tsandimi: Uraꞌ meedika, iya ñuꞌ ajuusha ma ñivijcha yapijbuluu kejtsapalaa katawanu tsuyu, tsenmalaa iya ñuba kuinda kentsu chachilla meelaya, ñu naatiñuba naa-uwanuba keenguinu detsuve, timi.
Tsejtu Moisés chachilla naadetiñuba Yavénu juntsandimi. 10 Tsenñu Yavé Moisésnu tsandimi: Chachillaꞌ junga miitu, uma bain, ayu bain inchin juu demandikareꞌ, naa yalaꞌ jali bain demanbipukaade. 11 Tsajuꞌ ma-ayu sekuwa juu keenadei, matyu ma-ayuya kumuinchi chachilla dekeenan, iya, Yavé, Sinaí kuyisha pajanu tsuyu. 12 Entsa kuyi keetala señas pude, tsenmalaa juntsa señasnu pullaꞌ jiꞌnudetsu. Tsenmin tsandide, juntsa kuyinu lunu kityudei, naa kalen jinu bain kityudei, tsandiñun mallee kalen dejishu juntsaa peyanbera inu dejuve. 13 Tsaaren mun señasnu dapullaꞌ kuipa viñuba, juntsanu ne muba tyaapachi tuꞌnu dejutyuꞌ, shupukachi tene, tsa jutyuꞌba, tsutachi tene tyaꞌkeꞌ tuꞌnu dejuve, naa chachi tsaiñu bain, naa animaa tsaiñu bain; tsajuꞌ tutenbera kenu dejuꞌ, tuꞌtyumujchiya tsangaanu dejutyuve. Tsaaren bene tyujtyu bareꞌ uiꞌkakayaa tene meejanmalaya, chachilla kuyisha lunuu dejuve, timi.
14 Tsenñu Moisés manbajatu, chachillanu mijakareꞌ sekuwanguikaami Diosnu aawa kureꞌ keewaanudetsu. Tsenñu chachilla yalaꞌ jali demanbipuñu, 15 Moisés chachillanu tsandimi: Ma-ayu malunchiya sekuwa juu keenadei, tsenmin ñullaꞌ supulaba tsaityudei, timi.
16 Tsenñu umaa pen malu iñu, juntsa chanu malunchi tsaa kuidya paꞌ pidya pidyakemi dedanguinsha, tsenñu ma ñivishbulu bain tsaa yapijbuluu viyadijami juntsa kuyinu. Tsenmin naa tyujtyu bain tsamantsa daran uiꞌkaya meejañu, junga kajnaꞌ chumu chachilla tsamantsai wapanaꞌ dejullukentsula. 17 Tsenñu Moisés chachillanu yalaꞌ kajdiꞌ chununu de-eꞌlareꞌ jiꞌ, Diosba katawanu jila, tsejtu kuyi lunu kujtu keesha kajdiila. 18 Tsenñu Sinaí kuyisha ñivijcha lutintsumi, junaa Yavé ñi bulu juunu pajaꞌ puñuꞌ mitya. Tsenñu ñivijcha tsamantsai luntsuꞌ, aa ñinbelenu keekiñuumi. Juntsa kuyi jumuya tsamantsanguentsuꞌ depiꞌshikentsumi. 19 Tsenmala tyujtyu pakara bain kayu daran meejaita ne jiintsumi. Tsenñu Moisés pañu, Dios pakatu, kuidya pan tsa tsandimi.
20 Tsejtu Yavé Sinaí kuyinu kayu katyuusha paijtu, Moisésnu junga lade tiñu, Moisés junga lumi, 21 tsenñu Yavé tsandimi: Manbajtyaꞌ chachillanu wainde, tsenmalaa yala señas juushu juntsanu dedapullaꞌ inu katanu tyaꞌ, tsamantsai peyaiꞌnudetsu. 22 Tsenmin naa chachillaꞌ mitya inu kalen jimu rukula bain inu kalen jinuya, inchin juu mandiyanu dejuve; tsa deityuñu, iya tutenmala depeyasa tendyuve, timi Yavé.
23 Tsenñu Moisés Yavénu pakatu: Chachillaya entsa Sinaí kuyinu lanu ken dejutyuve, matyu kuyisha puiten jutyu tiꞌ, ñuren wandiꞌ, entsandive: Kuyi keetala señas puꞌ, inchin juu kurede, tive, timi.
24 Tsenñun Yavé tsandimi: Manbaijde; tsejtu Aarónbaa malade. Tsaaren chachillaꞌ mitya inu kalen jimu rukula bain, naa ne chachilla bain juntsa señasnu puinu dejutyuve in punu kuyisha lanu, ne tsa deiñu yalanu tituba kenu tendyuve, timi.
25 Tsenñu Moisés mavitu, yanu Yavé naatiñuba chachillanu tsandi dewainmi.