Éxodo
Dios naaken dechusa tyaꞌba paitya uuden kuwami.
20 Tsejtu Dios kumuinchi entsa palaaya paꞌ entsandimi:
2 Iyaa Yavé, ñullaꞌ Diosyu; iyaa ñullanu Egiptosha dechuren mangalaamuyu, naa ñulla yaichi manda-iꞌ taawasha kemuwa deeñu bain.
3 Ñulla inun ma Dios juu tadejuꞌ, vee dyus juuya tajtudei.
4 Naa ti muuteba dekeꞌ chujtityuꞌ, naa selusha chumula kerake bain, naa tusha chumula kerake bain, naa tu pandainsha jumu lamaasha pumula kerakeꞌ chujtinu bain kityuꞌ, 5 ne juntsalanu teediꞌ aawa kureꞌ keewaanu bain kityudei, matyu iyaa Yavé, ñullaꞌ Dios juꞌ tsamantsa selandyamuyu. Tsejtu inu tyutyamu apalaa firuꞌ kemu deeñuba yalaꞌ mityaren, yalaꞌ kaillanu bain, naa yalaꞌ pañalanu bain, naa yalaꞌ tyuipañalanu bain taaju depuiwaamuyu, 6 tsaaren mun inu estyaꞌ, iya naakide tiñuba uraꞌ meengueꞌ tsanguemulanuya 1000 bijee seraꞌ jinsha bain estyaꞌ uraꞌ kemuyu.
7 Naa inu, Yavénu, ñullaꞌ Diosaꞌ mumunu bain naꞌbaasa pakan chutyudei, matyu naajulaa tsandiꞌ naꞌbaasa pakan dechuñuba, iya taaju iwaatyumujchiya puitetyu juyu.
8 Saaduma lekanu malunu tengaya jujuude, tsejtaa inchin juu malu kurenu. 9 Mandishmain malu taawasha keꞌ, titi kenuu juꞌba dekide, 10 tsaaren mandishpai malunuya saaduma lekanu malu juꞌ, inu, ñullaꞌ Dios Yavénu balengureꞌ keewaanu malu juve. Tsaañuꞌ mitya juntsa malunuya ti taawashaba kityude, naa ñullaꞌ kailla bain, naa ñuichi manda-iꞌ taawasha kemula bain, naa ñullaꞌ animaala bain, naa vee tusha chumu ñuiba bulu chumula bain, 11 matyu iya, Yavé, mandishmain malunaa naa selu bain, naa tu bain, naa lamaa bain, tsenmin tiba katawamu judeeshu juntsala bain deketu, saaduma mandishpai malunu lekayu. Tsejtaa iya juntsa malunu yuj ura kurave tiꞌ, inchin juu tireyu.
12 Ñullaꞌ apanu bain, ñullaꞌ amanu bain balengureꞌ uraꞌ keewaadei, tsejtaa iya, ñullaꞌ Dios Yavé, kuwanu tusha ñulla aa chuꞌ jintsunu.
13 Chachiitala tuꞌtyude.
14 Vee matsaityude.
15 Taanguityude.
16 Anbutiꞌ veelanu firuꞌ kikaakenuu kityude.
17 Veelaꞌ yanu ñuchin tsaasa tyaꞌ keetyude, naa yaꞌ shinbunu bain ñuchin tsaasa tyaꞌ keetyude, naa yachi manda-iꞌ taawasha kemulanu bain, naa yachi taawasha kemu wagaranu bain, naa yaꞌ burunu bain, naa kayu vera tiba jumulanu bain ñuchin tsaasa tyaꞌ mujkeetyude.
Israel chachilla Diosnu jeetyala.
18 Kumuinchi Israel chachilla kuidya paꞌ pidya pidya kentsuñu bain, naa tyujtyunu daran depakaañu mera bain, naa Sinaí kuyisha tsamantsa ñivijcha jelekenguentsu bain tsana keenala, tsejtu dejeetyaꞌ mitya juntsa keesha kalen jiꞌmujchi baasha ne ke-eenala. 19 Tsejtu Moisésnu tsandila: Ñaa lalanu panmala ñu naatiñuba tsanguenu detsuyu, tsaaren Diosya lalanu patyusa; ya panmala depekeyaꞌba ikeemive, tila.
20 Tsenñu Moisés pakatu: Jeetyatyudei, Diosya lala naadejuñuba keꞌ keenaa jave, tsenmalaa naa-uwanuba yanu dejeetyaꞌ, ujcha latintsun dejutyu, timi.
21 Tsejtu chachillaya jelanchin baatala ke-eedenaren, Moisésya juntsa yapij bulu ñivijchasha kalen jimi, Diosaꞌ puinsha.
Ufeenda tsureꞌ juꞌkenunu naakenuu juñu bain
22 Moisésnu Yavé patu tsandimi: Israel chachillanu tsandide: Ñulla demeeve naa iya selusha puturen ñuiba pañu bain. 23 Tsajuꞌ ñulla naa uruchi juu bain, naa lushi kenu jeruchi juu dyus muute bain keꞌ juntsanaa inu aawa kureꞌ keewaren tsanguenu kityudei. 24 Ufeenda tsureꞌ juꞌkenunu tuchee kidei, tsejtu junaa animaa tuteꞌ juꞌkeꞌ keewaanu dejuve, naa uveja juula bain, chibu juula bain, wagara juula bain, tsangueꞌ iba uraꞌ mandiyanu. Tsejtu nutalaa iya ñullanu tsangueꞌ inu mandengakaanu juꞌba, junu iya jaꞌ, ñullanu uraꞌ de-iwaanu tsuyu. 25 Tsaaren shupukachi tene tsangueꞌ ufeenda tsureꞌ juꞌkenunu dekishu juntsaa, tichiba kutajtu shupukachee kidei, matyu tsanguenu shupuka kuta deeshu juntsaa inchi urajtu kuranu juñuꞌ mitya. 26 Tsenmin inchi ufeenda tsureꞌ juꞌkenunuya llaꞌtenachi juu lunu dejutyuve, junu lundu ñullaꞌ bulunu chaꞌtene junutala keewaanuu dejuñuꞌ mitya.