Éxodo

Diosaꞌ pupunanu yapaya

26 Dios kayu paꞌ jindu Moisésnu tsandimi: In pupunanu yapaya kikaade, tsejtu daayadimu jali turekaraa ura linuchi tene paitya kikaade. Juntsa daayadimu jali jumula lushmuraraa jiluchi bain, yamuraraa jiluchi bain, naa ungalalaa jiluchi bain juunu dejuve, tsenmin juntsa jalinu jaꞌchi puu muute pallu narake tsejtekaade. 2 Kumuinchi entsa daayadimu jali jumula paree bareemin, paree bunguunu dejuve; barenchiya 28 tyabulu, tsenmala bungunchiya taapai tyabulu. 3 Daayadimu jali mandaya kapash kapash pumaa juꞌ main jujuꞌ, kama manda jumula bain tsaren junu dejuve. 4 Tsenmin entsa daayadimu jali ajkeꞌ manda tyuipu jumula ma kelusha yaꞌ kapatala lushmuraraa jai tuti jungue keꞌ chujtyaanu juve. Tsenmin, kama daayadimu jali tyuipu jumula bain tsaren junu dejuve. 5 Tsaꞌ mitya daayadimu jali ajkeꞌ manda tyuipu jumu ma kelusha bain, naa kama daayadimu tyuipu jumu kama kelusha bain main main 50 jai tuti punu dejuꞌ, tutiitala kajuꞌtalai tiya tiyainu dejuve. 6 Tsenmin daayadimu jalitala tyuipuꞌ kakaanu beru bain uruchi tene 50 junu juve, tsangueꞌ tyuipunmala in pupunanu yapaya ma jali juu tiyainutsu.

7 Tsenmin chibu juchi keñu jali tene 11 junu juve, juntsachi in pupunanu yapaya vikaanu. 8 Kumuinchi entsa 11 vikaanu jali jumula barenchi bain, naa bungunchi bain paree juunu dejuve: barenchiya 30 tyabulu, tsenmin bungunchiya taapai tyabulu. 9 Tsejtu vikaanu jali manda jumula dulaꞌ depumaꞌ, naa vikaanu jali mandishmain laramula bain tsaren junu dejuve; tsajuꞌ vikaanu jali mandishmain buunamushaya main yapaya ajuusha tiyaꞌ dyajpiikakaraanu juve. 10 Tsejtu vikaanu jali ajkeꞌ manda tyuipu jumula ma kelushaya 50 jai tuti puꞌ, kama vikaanu tyuipu jumu kama kelusha bain 50 jai tuti punu juve. 11 Tsenmin beru bain brunsechi tene 50 juꞌ, tutiitala kakaraanu juve, tsenmalaa yapaya ma jalichin vikaraañui tiyanutsu. 12 Tsaaren vikaanu jali kayu aabunguꞌ tiyaꞌ mitya, main kapasha vimuya ma tsandaa laraꞌ dyajpii pajtyaꞌ in pupunanu yapaya benesha eradinu tsuve. 13 Tsajuꞌ entsa vidimu jaliya linu jalinu kelush kelush ma tyabulu pullaa bareꞌ mitya, in pupunanu yapayanu bareꞌ mitya viyadinu tsuve.

14 Tsenmin in pupunanu yapayanu entsaba pema vidimuya, llupu uveja kika ungalalaa tiwarachi tene juunu juve, tsenmala juntsa jandala yapaya mishbuiꞌsha vikaantsumiya pi animaa kika kayu naraa jumulachi tene juunu juve.

15 Tsenmin in pupunanu yapayasha uikaanuya akasia chi taꞌpa tene juunu juve. 16 Ma taꞌpameemee paitya tyabulu barenu dejuve, tsenmin bungunchiya ma tyabulu kama kejtaa tyabulu junu juve. 17 Entsa taꞌpala mainya pai kajti puꞌ, kamainya pai juru juunu juve yaitala tyulla tyullainudetsu. Tsajuꞌ in pupunanu yapayasha vimu taꞌpala naajula bain tsaandene junu dejuve. 18 Sur pashaya 20 taꞌpa punu juve, 19 tsejtu entsa 20 taꞌpalanu deendanamu paki jumulaya 40 juꞌ, lushi kenu jeruchi tene juunu dejuve. Taꞌpameemee pai kajti puu dejuꞌ, panbeesha deendanamu pai paki juru jumulanu yaꞌ kajti vinu dejuve. Taꞌpameemee tsaandene junu dejuve.

20 Naa kama pasha bain, ura pañuya, in pupunanu yapaya nurte pasha bain, 20 taꞌpa puꞌ, 21 taꞌpameemee deendanamu paki pallu pallu punu juꞌ, 40 junu juve; juntsala lushi kenu jeruchi tene juunu dejuve. 22 Tsenmala pajvinu pashaya, ura pañuya, in pupunanu yapaya beneshaya mandishmain taꞌpa punu juve, 23 tsenmin benesha, pai mutu jumunu uinamu bain pai taꞌpa, pai taꞌpa buungaraanu dejuve. 24 Entsa taꞌpa pallu pallu uikaraꞌ jimula pelesha pareju mityanaꞌ, kaiꞌsha bain tutichi dulaꞌ mityananu detsuve. Tsajuꞌ benesha pai mutunu uinamu taꞌpala tsaandene junu dejuve. 25 Tsajuꞌ mandishpen taꞌpa junmala juntsa panbeesha deendanamu paki jumulaya lushi kenu jeruchi tene juꞌ, kumuinchibi 16 paki junu dejuve, matyu taꞌpameemee deendanamu paki pallu pallu vinu jutu.

26 Tsenmin in pupunanu yapaya ma kelusha taꞌpa deengaanu punu bain akasia chaꞌli tene manda junu juve. 27 Tsenmin masku keesha taꞌpa deengaanu bain man chaꞌli, naa benesha pajta vinsha taꞌpa deengaanu bain man chaꞌli junu juve. 28 Tsenmala ma lura kejtala kapash kapash dapuimuya taꞌpa kejtaa katyutala puntsumi junu juve. 29 Kumuinchi taꞌpala uruchi tene maiꞌtaa juꞌ, naa tutila bain uruchi tene juunu dejuve; tsenmin tutinu viꞌ jiinuu chaꞌli jumula bain uruchi tene maiꞌtaanu dejuve. 30 Tsaꞌ mitya in yapaya jumula iya kuyisha naaju keewaamuñuba juntsangue kikaade.

31 Tsenmin daayadimu ma jali turekaraa ura linuchi kikareꞌ, lushmuraraa jiluchi bain, yamuraraa jiluchi bain, ungalalaa jiluchi bain jungue kikaade. Tsejtu juntsa jalinu jaꞌchi puu muute jumula narake tsejtekaade. 32 Entsa daayadimu jali akasia chichi keñu taapai yatyutya uinamu luratala uru beruchi yangaantsumi junu juve. Entsa yatyutya jumula bain uruchi tene maiꞌtaanu dejuve. Yatyutyameemee lushi kenu jeruchi keñu panbeesha deendanamu ma paki jumulanu uinanu dejuve. 33 Tsejtu umaa daayadimu jali berutala yangaakaade, tsejtu juntsa beneshaa iya chachillanu vetaꞌ vetaꞌ tsanguedaa tiñu keewara babuu tsuukaade. Entsanguenmalaa pai suku juu tiyanu tsuve; ma sukuya chachillaꞌ mitya inu kalen jimulaꞌ vinu suku, tsenmala kama sukuya inchin juu jumu suku junu tsuve. 34 Tsejtu bene babuunu taꞌpa dukaade, inchin juu jumu sukusha. 35 Tyeeba tsuunu taꞌpa llaijkaraya daayadimu jali avindala chujtikide, ura pañuya, in pupunanu yapaya nurte pasha, tsenmala ñillu chujtinu aa lanparaya surshaa chujtiꞌ, tyeeba tsuunu taꞌpa llaijkaraba ajuꞌtalake chujtide.

36 Tsenmala yapaya juukapanuya daayadimu ma jali turekaraa ura linuchi kikareꞌ, lushmuraraa jiluchi bain, yamuraraa jiluchi bain, ungalalaa jiluchi bain jungue kikaade, tsangueꞌ jiluchi ti muuteeba narake tsejtenu juve. 37 Tsenmin daayadimu jali yangaanu bain akasia chichi man yatyutya kikareꞌ, uruchi tene maiꞌtekaanu juve, naa beru bain uruchiren junu dejuve, tsenmin man yatyutyanu panbeesha deendanamu paki jumulaya brunsechi tene depiꞌwareꞌ kikaanu juve.