Éxodo
Ufeenda tsureꞌ juꞌkenunu brunsechi jumu
27 Dios kayu paꞌ jindu Moisésnu tsandimi: Akasia chichi tene ufeenda tsureꞌ juꞌkenunu main kikaade, barenchi bain, naa bungunchi bain man tyabulu juꞌ, taapai kelu jumula tsaandene junu juve. Tsenmala katyunchiya pen tyabulu junu juve. 2 Tsenmin taapai mutunu, taapai kachu muute juꞌ, tyuipujtuꞌ main juunu juve. Tsejtu brunsechi tene maiꞌtaanu juve. 3 Tiba ufeenda tsureꞌ juꞌkensha talantsumi tsumulaya brunsechi tene juunu dejuve: naa ñijuingui puntsumi bain, naa pala juula bain, naa shulla muute juula bain, naa animaa alla baindekaanu jeru bain, naa ñinbuka puntsumi juu bain brunsechi tene junu juve. 4 Tsenmin brunsechin main waaku juꞌ, yaꞌ mututala brunse tutichi taapai mutunu maiꞌtaanu juve. 5 Tsejtu ufeenda tsureꞌ juꞌkenunu yaꞌ jurusha, kejtaa deechutala kajti usnanu panbeesha entsa waaku tsuunu juve. 6 Tsenmin entsa ufeenda tsureꞌ juꞌkentsumichi chaꞌli lura akasia chichi tene pallu keꞌ, brunsechi tene maiꞌtenu juve. 7 Entsa chi lura jumula juntsa tutinu ñallaꞌ vinu dejuve; ura pañuya, ufeenda tsureꞌ juꞌkenunu pai kelusha puꞌ yaliꞌ tajintsumi junu tsuve. 8 Ufeenda tsureꞌ juꞌkenunu chi tene juu juꞌ juruunu juve, matyu ñu kuyisha naaju katañuba juntsaanu juve.
Diosaꞌ pupunanu yapaya kelutala chaꞌ neneinsha jumu
9 Tsenmin in pupunanu yapaya kelu kelu chaꞌ neneinsha kikaade. Sur pasha daaluꞌtekaanu jali jumu turekaraa ura linuchee junu juve, bareꞌ mitya tene 100 tyabulu junu juve. 10 Yaꞌ yatyutyala 20 junu juve, tsenmala yatyutyanu panbeesha deendanamu paki jumula bain 20 juꞌ, brunsechi tene juunu dejuve. Tsenmala yaꞌ beru juula bain, naa yaꞌ tuti juula bain lushi kenu jeruchi tene juunu dejuve. 11 Tsenmin nurte pasha daaluꞌtekaanu jali jumu bain baren mitya 100 tyabulu junu tsuve; junu yatyutya bain 20 juꞌ, naa yatyutya jumulanu panbeesha deendanamu brunsechi keñu paki bain 20 junu dejuve, tsenmin yatyutya beru jumula bain, naa yaꞌ tuti jumula bain lushi kenu jeruchi tene juunu dejuve. 12 Tsenmala pajta vinu deechusha chaꞌ neneinsha daaluꞌtekaanu jaliya bunguꞌ mitya 50 tyabulu junu juve. Junu uinamu yatyutyala paitya juꞌ, naa yatyutya panbeesha deendanamu paki jumula bain paitya junu juve. 13 Tsenmala pajta lanu pasha chaꞌ neneinu ajuusha bain 50 tyabulu bungunu juve. 14 Tsenmala juukapa kelusha daaluꞌtekaanu jaliya 15 tyabulu bungunu juve, tsenmin yatyutya bain pema, naa yatyutyanu panbeesha deendanamu paki bain pema junu juve. 15 Tsenmala masku kelusha daaluꞌtekaanu jali jumu bain 15 tyabulu bungunu juve, tsenmin yatyutya bain pema, naa yatyutyanu panbeesha deendanamu paki bain pema junu juve. 16 Tsenmala chaꞌ neneinsha vinu juukapanu daayadimu jaliya 20 tyabulu bungu yananu tsuve, tsaaren entsa daayadimu jali turekaraa ura linu jiluchi bain, lushmurara jiluchi bain, yamurara jiluchi bain, ungalala jiluchi bain ti muuteba narake tsejtenu juve. Junu yaꞌ yatyutyaya taapallu, naa yatyutyanu panbeesha deendanamu paki bain taapallu junu juve. 17 Chaꞌ neneinu tenasha uinamu yatyutyalaya naa tuti bain, beru bain lushi kenu jeruchi tene juu puunu dejuve, tsenmala yatyutya panbeesha deendanamu paki jumulaya brunsechi tene juunu dejuve. 18 Tsajuꞌ chaꞌ neneinu tena barenchiya 100 tyabulu juꞌ, bungunchi 50 tyabulu junu tsuve, kelumeemee. Daaluꞌtekaanu jali turekaraa ura linuchi jumu katyunchi man tyabulu junu tsuve. Tsenmala yatyutyanu panbeesha deendanamu paki jumulaya brunsechi tene juunu detsuve. 19 Tsajuꞌ in yapaya jumula chuinsha tiba meneste imula bain, naa in pupunanu yapayanu deengaanu jeru lura jumula bain, naa chaꞌ neneinsha chuwa chiꞌkareꞌ deengaanu jeru lura jumula bain brunsechi tene juunu dejuve.
Lanpaanu punu muli
20 Israel chachillanu, ulibu muli kayu ura taadei tide, ñillunu naa-uwanuba dandaa tananu. 21 Tsenmala Aarónya yaꞌ nalaba lanpaanu naakentsunu juñuba tsanguentsunu dejuve, tsenmalaa daayadimu jali avindala babuu chunu keesha iba waꞌdinu yapayasha* kepengama dannamin, chayangama in ajuusha dannanutsu. Tsaꞌ mitya entsaa jumulaa Israel chachilla bain, naa yalanu bene seraꞌ jimula bain naa-uwanuba tsa tsanguentsunu dejuve.