Éxodo
Chachillaꞌ mitya Diosnu kalen jimula Dioschin juu.
29 Dios kayu paꞌ jindu, Moisésnu tsandimi: Chachillaꞌ mitya inu kalen jimu rukulanu inchin juu detirenu jushu juntsaa entsanguenu juve: llupu kaa wagara main kaꞌ, naa llupu uveja bain tiba yujkajtu naraa tene pallu kade, 2 tsejtu pan kenu kayu ura trigu llujpe katu, daꞌpukakaa pan keꞌ, naa mulichi yandaa pan bain keꞌ akaade. Juntsala pujkikarentsumi putyu tene junu dejuve, tsenmin pan kaa paki bain pujkikarentsumi putyu tene keꞌ muli mulangueꞌ akaanu juve. 3 Tsejtu ma pishkalinu pukeꞌ in pupunanu yapayasha taꞌde, naa llupu kaa wagara bain, naa llupu uveja pallu jumula bain. 4 Tsejtu bene Aarónnu bain, naa yaꞌ nalanu bain, iba waꞌdinu yapayasha tajitu, yalanu pitsaade. 5 Tsejtu bene chachillaꞌ mitya inu kalen jimulaꞌ pannu jali katu, Aarónnu juntsa jali pandede, naa bareree tainsha punu jali bain, avindaa pannu jali bain, efud bain, naa yaꞌ tenbapunu teenu jai paki bain. Tsejtu efudnu pumu yaꞌ ajpeendee chuwachi deengaade. 6 Tsejtu mishusha pujchinu jali bain teleꞌ, naa yaꞌ llashkapanu bain juntsa uru pinbakikii jumu teekaꞌ eede chachillaꞌ mitya inu kalen jimula naajuwa deeñuba juntsangueꞌ inchin juu tirenu. 7 Tsejtu inchin juu tirendu menestenguentsumi muli katu, chachillaꞌ mitya inu kalen jimu ruku tirede, Aarónnu juntsa muli yaꞌ mishusha yuutsuutu. 8 Naa yaꞌ nalanu bain mikatu, bareree tainsha punu jali pandeꞌ eede. 9 Tsejtu naa Aarónnu bain, naa yaꞌ nalanu bain ajpeendee chuwachi uraꞌ teede, tsenmin naa mishpukasha pujchinu jali bain uraꞌ teekade. Entsanguitaa naa-uwanuba tsa tsanguemu chachi detirenu juve. Tsenmalaya naa-uwanuba yala tsa tsanguen chunu detsuve.
10 Tsejtu bene, iba waꞌdinu yapaya juukapasha llupu kaa wagara tajide, tsenmala Aarón bain, naa yaꞌ nala bain animaa mishpukanu tyaapachi taꞌkaꞌ tadinudetsu. 11 Tsejtu junu in ajuunu, iba waꞌdinu yapaya juukapanu juntsa animaa tuꞌde. 12 Tsanguetu animaa asa katu, ufeenda tsureꞌ juꞌkenunu kachu muute usnamulanu tyamishuchi munguide, tsenmin laramu asaya ufeenda tsureꞌ juꞌkenu kelunu yuutsuude. 13 Tsejtu peshilitala bain, naa ajpatala bain, naa reñuñutala muli maiꞌnamu bain, naa reñuñula bain dekatu, ufeenda tsureꞌ juꞌkenunu tsureꞌ juꞌkide; 14 tsaaren animaa alla bain, naa yaꞌ kika bain, naa yaꞌ pe bain, kajnaꞌ dechunu avindalaa juꞌkiide, matyu chachillaꞌ mitya inu kalen jimulaꞌ ujchaꞌ mityaa tsangueꞌ juꞌkentsuꞌ mitya.
15 Tsenmin llupu uveja pallu jumulanu main katu, Aarónnu bain, yaꞌ nalanu bain animaa mishunu tyaapachi taꞌkakareꞌ 16 tuꞌde. Tsejtu ufeenda tsureꞌ juꞌkenunu kumuinchi yaꞌ kelu kelu asa tyaꞌkide. 17 Tsanguetu bene animaa petse petse jungue dedaatu, yaꞌ peshili juula bain, naa yaꞌ neepa juula bain pitsaade, tsejtu alla petse petse juu yaꞌ mishuba tsuinsha bulu tsuude. 18 Tsejtu ufeenda tsureꞌ juꞌkenu jandala juntsa millangue juꞌkeꞌ keewaade, in mityaa tsangueꞌ inchi mika uraꞌ aindyu ishkakaanu tsanguetu.
19 Tsejtu bene llupu uveja kamain mangatu, juntsanu bain Aarón yaꞌ nalaba animaa mishunu taꞌkaꞌ tadedisa. 20 Tsenmala animaa tuꞌde, tsejtu asa jayu katu, Aarónnu bain, naa yaꞌ nalanu bain yalaꞌ urandya punguinu pele mutusha bain, naa urandya aa tyamishunu bain, naa urandya aa nemishunu bain munguide. Tsejtu laramu asaya ufeenda tsureꞌ juꞌkenunu kelu kelu detyaꞌkide. 21 Tsejtu ufeenda tsureꞌ juꞌkenu jandala tyatyumu asa bain, naa inchin juu tirendu menestenguentsumi muli bain jayu katu, Aarónnu bain, naa yaꞌ jalitala bain tyaꞌkide, tsenmin naa yaꞌ nalanu bain, naa yalaꞌ jalinu bain tsaren kide. Entsanguenmalaa Aarón bain, naa yaꞌ nala bain, naa yalaꞌ jali bain inchin juu tene tiyanu detsuve.
22 Tsejtu bene llupu uvejanu yaꞌ muli kade: naa nepelesha chumu muli bain, naa peshilitala maiꞌnamu muli juula bain, naa ajpatala muli maiꞌnamu bain, naa pai reñuñu bain, naa reñuñutala muli maiꞌnamu bain, naa urandya enbu alla bain kade, chachillaꞌ mitya inu kalen jimu rukulanu inchin juu tiwarendu menestenguentsumi animaañuꞌ mitya. 23 Tsenmin pujkikaantsumi putyu pan, in ajuusha pishkalinu pumula kalaade: daꞌpukakaa pan bain main, naa mulichi yandaa jumu pan bain main, naa pan kaa paki bain main katu, 24 Aarónꞌ tyaapanu bain, naa yaꞌ nalaꞌ tyaapanu bain kumuinchi entsa detsuunu juve, tsejtu yalanu in ajuusha ufeenda yaliꞌ keewaakaanu juve. 25 Tsejtu bene yalaꞌ tyaapanu demangatu, in ajuusha uraꞌ aindyu ishkakaanu ufeenda tsureꞌ juꞌkenunu ajkeꞌ animaa juꞌkeꞌ keewara jandala dejuꞌkide. Entsa ufeendaya in mitya juꞌkeꞌ keewara juve.
26 Tsenmin Aarónnu inchin juu chachi tirendu menestenguentsumi llupu uveja tenbapu katu, in ajuusha ufeenda yaliꞌ keewaade. Tsenñu juntsa alla petsee ñuchi junu tsuve. 27 Tsejtu chachillaꞌ mitya inu kalen jimu detiwaandu menestenguentsumi llupu uveja tuteꞌ keewara allanu pai petse veleꞌ tadide. Entsa alla jumula, mainya tenbapu alla ufeenda yaliꞌ keewara jumaa juntsave, tsenmala kamainya enbu alla vee mujtu veleꞌ tsuuñu jumaa juntsave. Tsajuꞌ tenbapu allaya Aarónchi* junmala, enbu allaya yaꞌ nalachi junu tsuve. 28 Tsejtu entsa alla jumulaa Israel chachilla, yala iba uraꞌ mandinu animaa tuteꞌ keewaantsumiya Aarónnu bain, naa yaꞌ nalanu bain naa-uwanuba kuwanu dejuve. Tsajuꞌ entsaa jumulaa naa-uwanuba tsaanu tsuve.
29 Tsenmala Aarónꞌ pananu jali inchin juu jumulanuya, yanu seraꞌ jimu chachillaa manganu dejuve ya peyanmala, tsaaren yala chachillaꞌ mitya inu kalen jimu ruku tiyandaa, juntsaa taawasha kenu uuden kandu pananu dejuve. 30 Tsajuꞌ Aarónnu seraꞌ jimu ruku chachillaꞌ mitya inu kalen jimulaꞌ aa bale ruku mandiyaꞌ Aarón naaken chumuwaañuba tsanguen chuꞌ, iba waꞌdinu yapayasha taawasha mannu vimiya mandishpai maluꞌ mitya entsa jali panaa tsananu tsuve.
31 Tsejtu bene inchin juu tirekaandu menestenguentsumi llupu uveja alla katu, inchin juu tenasha tajiꞌ alla akaade. 32 Tsenmala Aarón, yaꞌ nalaba juntsa alla bain, naa pishkalinu pumu pan bain iba waꞌdinu yapaya vinu juukapasha finu dejuve. 33 Tsajuꞌ entsa alla bain, pan bain finuu dejuve, matyu yala inchin juu detiraꞌ, naa chachillaꞌ mitya inu kalen jimu ruku bain tiyanu uwanu, yalaꞌ ujcha manbitsaanu keewaramuwaañuꞌ mitya. Tsaaren entsa panda, vee chachi juulaya finu dejutyuve, inchin juu dejuñuꞌ mitya. 34 Tsenmala naa alla bain, naa pan juu bain ayunchi fikenui larañuba, jupenchi kikenu dejuve. Tsajuꞌ juntsa panda inchin juu juñuꞌ mitya, mu bain defityusa.
35 Tsaꞌ mitya iya naatiñuba Aarónnu bain, naa yaꞌ nalanu bain tsanguide. Tsejtu yalanu bale chachi tirendu, mandishpai malu tsaandene kide. 36 Malumere llupu kaa wagara main tuteꞌ keewaawaakide, yalaꞌ ujchaꞌ mitya manbitsalanudetsu; tsenmin naa ufeenda tsureꞌ juꞌkenunu bain inchi uraꞌ kuraa mandirenu menestenguentsumi muli yuutsuude, inchin juu tirenu. 37 Tsajuꞌ mandishpai maluya ufeenda tsureꞌ juꞌkenunu ujchaꞌ mitya animaa tuteꞌ keewaanu juve; entsanguenmalaa ufeenda tsureꞌ juꞌkenunu inchin juu tiyanu tsuve. Tsenñu tyee juntsanu tyuikaꞌ bain inchin juu tiya tiyainu detsuve.
Malumee keewaanu ufeenda
38 Naa-uwanu bain malumere llupu kaa uveja ma añu juu tene pallu tuteꞌ ufeenda tsureꞌ juꞌkenunu jupe jupekenu juve. 39 Tsejtu mainya kepenene juꞌkeꞌ keewareꞌ, kamainya kependuꞌkainsha juꞌkeꞌ keewaakenu juve. 40 Ajkeꞌ kaa uveja juꞌkentsumiya pan kenu llujpe kayu ura tene pai kilu kaꞌ, ulibu muli bain kayu ura tene ma litru kaꞌ yandeꞌ keewaanu juve, tsenmin ma litru binu bain kaꞌ yuutsureꞌ ufeenda juu keewaanu juve. 41 Tsejtu kependuꞌkainsha kama llupu kaa uveja keewaandu bain, naa pan kenu llujpe bain, naa binu bain yuutsureꞌ keewareꞌ kepenene naakeꞌba tsaren mannu juve inu uraꞌ tyawaanu aindyu ishkakaanu juꞌkeꞌ keewaatu. 42 Tsajuꞌ entsa inu keewaanu tuteꞌ juꞌkenu ufeendalaa naa ñulla bain, naa ñullanu seraꞌ jimula bain in ajuusha naa-uwanuba tsanguentsunu dejuve, iba waꞌdinu yapaya juukapasha; matyu iya junaa ñuba katawaꞌ kuinda kiikenu tsuyu. 43 Tsejtu junaa iya Israel chachillaba katawanu tsuyu, tsenmala juntsa tenaya inchi tsamantsaa keewara jumuꞌ mityan inchin juu jujuunu tsuve. 44 Tsejtu iba waꞌdinu yapaya bain, naa ufeenda tsureꞌ juꞌkenunu bain inchin juu detirenu tsuyu, tsenmin naa Aarónnu bain, naa yaꞌ nalanu bain inchin juu detirenu tsuyu yala inchi chachillaꞌ mitya inu kalen jimu ruku deeñu. 45 Tsenmin iya Israel chachillaꞌ kejtsapala chutu, yalaꞌ Dios junu tsuyu. 46 Tsenmalaa yala mijanu dejuve naa iyaa, Yavé, yalaꞌ Dios, yaiba bulu chunaa yala Egiptosha dechuren mangalaamuñuba. Iyaa Yavé, yalaꞌ Diosyu.