Éxodo
Chachillaꞌ mitya Diosnu kalen jimulaꞌ pannu jali
28 Dios kayu paꞌ jindu Moisésnu tsandimi: Ñuꞌ uñaku Aarónnu bain, naa yaꞌ nala Nadabnu bain, Abihúnu bain, Eleazarnu bain, naa Itamarnu bain ñuꞌ junga demikade, tsenmalaa yala chachillaꞌ mitya inu kalen jimu detiyaꞌ in yapayasha taawasha kemu junudetsu, Israel chachillaꞌ kejtsapala. 2 Ñuꞌ uñaku Aarónchi juntsa taawasha kendu pananutsumi balenchi jali keꞌ, narake kide balengurenudetsu. 3 Tsejtu iya naaju rukulanaa juntsa kikenuu tireñu kataꞌba, ñu juntsalanu pade yala Aarónchi jali kenudetsu, tsenmalaa ya inchi chachillaꞌ mitya inu kalen jimu ruku juu tiyanutsu. 4 Entsaa jali jumulaa kenu dejuve: tenbapunu teenu jai paki bain, efud bain, avindaa pannu jali bain, muute dekeꞌ chujtyaa bareree tainsha pumu jali bain, naa mishusha pujchinu linu jali bain, tsenmin ajpeendee chuwa bain. Tsejtu ñuꞌ uñaku Aarónchi bain, naa yaꞌ nalachi bain jali kenu dejuve, tsenmalaa juntsachi chachillaꞌ mitya inu kalen jimu in chachi junudetsu. 5 Tsejtu mun entsa jali kemu dejuꞌba uru jilu bain, lushmurara jilu bain, yamurara jilu bain, ungalala jilu bain, naa ura linu jilu bain menestenguenu dejuve.
Efud
6 Efud jali kentsumiya, uru jiluchi bain, lushmurara jiluchi bain, yamurara jiluchi bain, ungalala jiluchi bain, tsenmin turekaraa ura linu jiluchi bain narake tsejtenu dejuve. 7 Tsenmin efudnu pala deechu kapameemee jai pakichi yaatala teepuꞌ kakaakenuu junu juve. 8 Tsenmala efud jandala deendanamu jimu ajpeendee chuwaya efudba main juunu tsuve, tsenmin entsa bain uru jiluchi bain, lushmurara jiluchi bain, yamurara jiluchi bain, ungalala jiluchi bain, tsenmin turekaraa ura linu jiluchi bain junu tsuve.
9 Tsejtu bene unise shupuka pallu katu, Israelchi yaꞌ nalaꞌ mumu junu piikekaanu juve. 10 Tsejtu yala naa-i pajtyaꞌ awamu deeñuba tsa tsai pillaꞌ, avenjulaꞌ mumu ajkeꞌ pillanu juve. Tsejtu ma shupukanuya mandishmain mumu ajkeꞌ pillaꞌ, kama shupukanu kama mandishmain mumu pillaanu dejuve. 11 Entsa shupukalanu mumu piikilaya urunu taawasha kiikemulaa tsanguenu dejuve, tsejtu naaketaa muute punu tsuꞌkantsumi kemu dejuꞌba tsanguenu dejuve. Tsejtu entsa pai shupukala Israelꞌ nalaꞌ mumu pillaa jumula uruchi keñu maiꞌtenu pakinu nara maiꞌtanu dejuve. 12 Entsa shupukala efudnu pumu, pala kaiꞌsha jimu jai pakinu maiꞌtaanu dejuve naa-uwanuba Israelꞌ nalanu mandenga mandengakenu. Entsanguitaa Aarón yaꞌ palanu yalaꞌ mumu viyaa jiꞌ in ajuusha taji tajiinu tsuve mandenga mandengakenu. 13 Tsenmin maiꞌtenu paki jumula uruchi junu dejuve. 14 Tsenmin kuunduupi keraa bain uruchi tene pallu kikareꞌ, maiꞌtenu pakinu deengareꞌ kelu kelu pukaade.
Tenbapunu teenu jai paki
15 Tsenmala kavitu kenutsumi tenbapunu teenu jai paki narake kikaatu, efud naajuñuba tsangue kikaanu juve. Juntsa kendu bain, uru jiluchi bain, lushmurara jiluchi bain, yamurara jiluchi bain, naa ungalala jiluchi bain, naa turekaraa ura linu jiluchi bain kekaanu juve. 16 Tsenmin pai paki jungue dyajllaꞌ buungaraꞌ junu juve, barenchi bain, naa bungunchi bain pareju juu, 22 sentimetru juu tene junu juve kelumeemee. 17 Tsenmin naraa bale shupukachi tene taapai shili ju maiꞌtanu juve. Ajkeꞌ shilinuya sarduniu bain, tupasiu bain, tsenmin esmeralda bain. 18 Tsenmala entsaba pai shilinuya: turkesa bain, safiru bain, tsenmin jade shupuka bain. 19 Tsenmala entsaba pen shilinuya: jasintu bain, agata bain, tsenmin amatista shupuka bain. 20 Tsenmala entsaba taapai shilishaya: krisulitu bain, unise bain, tsenmin jaspe shupuka bain. Entsa bale shupukala uruchi keñu maiꞌtenu paki jumulanu chujtyaa tene junu dejuve. 21 Entsala 12 shupuka junu dejuve, matyu Israelchi yaꞌ nala 12 dejuñuꞌ mitya. Tsajuꞌ Israelnu 12 seraꞌ jimulaꞌ mumu ma shupukameemee ma mumu pillaꞌ chujtyaꞌ muute chujtintsumi juuñuu junu juve.
22 Tsenmala tenbapunu teenu jai pakinuya kaa kuunduupi keraa uruchi tene juꞌ, chuwa turan tsaanu juve. 23 Tsenmin uru tuti bain pallu juꞌ, tenbapunu teenu jai paki kaiꞌsha kapash kapash puntsumi junu dejuve. 24 Tsejtu uru kuunduupi jumuya tenbapunu teenu jai paki kaiꞌsha kapash kapash pumu tutilanu kakaantsumi junu juve. 25 Tsenmin kuunduupi keraa tene pallu jumulaꞌ pai kapa, palanu maiꞌnamu jai pakinu juntsa uru deengaranu kakaade, tsajuꞌ efudnu ajkesha pumu jai pakinu kakaanu juve. 26 Tsenmin uruchiren kayu vee tuti pallu mangaatu, tenbapunu teenu jai pakinu pele kapasha pukaade, ura pañuya, efud keesha jumunu. 27 Tsenmin kama pai tuti uru tene juu mangaatu, entsalaya efudnu pumu jai paki ajkesha pukaade, panbeesha punnu kelunu, efudnu ajpeendee chuwa punu jayu katyunu. 28 Entsanguishu juntsaa tenbapunu teenu jai pakinu pumu tuti efudnu pumu tutiba, main lushmuraraa chuwachee kakaanu dejuve; tsenmalaa tenbapunu teenu jai paki efudnu pumu ajpeendee chuwa kaiꞌtala tiyainu tsuve, yaitala bakaꞌ jiꞌnudetsu. 29 Entsanguitaa Aarón kavitu kenutsumi tenbapunu teenu jai paki panaa chachillaꞌ mitya inu kalen jimulaꞌ vinu sukusha vinmala, naa yaꞌ tenbaputala bain Israelchi yaꞌ nalaꞌ mumu pillaa jinmala, iya naa-uwanuba yalanu mandenga mandengakenu tsuyu. 30 Tsenmin kavitu kenutsumi tenbapunu teenu jai pakinu naa Urim bain, naa Tumim bain pukaade, tsenmala Aarón in ajuusha jamiya yaꞌ tenbapunu puu jajainutsu. Tsejtu juntsa deechuꞌ kikaamu yaꞌ tenbapunu mayii in junga jajainu tsuve.
Chachillaꞌ mitya Diosnu kalen jimulaꞌ pannu vejan jali
31 Tsenmala avindaa pannu jaliya lushmurara jiluchi tene dekide. Juntsa jandalaa efud jimu juve. 32 Tsaaren kejtalaya juruunu juve mishpuka vinutsu. Tsejtu chiipunu keetala jayu dyajpiikakaade, wagaa kikachi naake jali keꞌ tenbapunu dishkaamu deeñuba tsanguikaatu, tsenmalaa kiyuujiꞌnutsu. 33 Tsejtu beluꞌ kaya pele kapa kapaya tsururu puka kerake detsejtekareꞌ uukerake kikaade, lushmuraraa jiluchi bain, naa yamuraraa jiluchi bain, naa ungalalaa jiluchi bain deketu, tsenmin naa uru kaa kanbana juula bain yangaatselu kikaade entsa kapatala, 34 ura pañuya, uru kaa kanbana eengaamiya, tsururu puka keraaya juntsa keenu pujaꞌteke tsejtekaade, tsejtu kamain uru kaa kanbana eengaamiya, tsururu puka keraaya tsejtekareꞌ tsaandene kekaanu juve kumuinchi juntsa jali beluꞌ kaya kapatala. 35 Aarón chachillaꞌ mitya inu kalen jimu ruku juu taawasha kentsumiya entsa kapa tinu jali pananu tsuve, tsenmalaa chachillaꞌ mitya inu kalen jimulaꞌ vinu sukusha viꞌ, in ajuusha jaiñu bain, naa faleꞌ majaintsu bain kanbanan keenbarai neneinutsu, tsejtaa Aarón peyan jutyu.
36 Tsenmin junu uruchi tene pinbakikii paki keꞌ muute puntsuminu naake piikemu dejuꞌba juntsanguitu: “Yavéchin juu rukuve”, pilla junu tsuve. 37 Tsenmin juntsa pinbakiki, mishusha pujchinu jalinu llashkapasha maiꞌtekaade main lushmuraraa kaa chuwachi teleketu, tsenmalaa jei pajtyaiꞌnutsu. 38 Entsanguitaa entsa pinbakiki Aarónꞌ llashkapanu naa-uwanuba tsananu juve, tsenmalaa Israel chachilla inchin juu ufeenda keewaanutala ti ujcha ladeiñuba Aarónya kuipa taji tajiinu tsuve. Tsajuꞌ juntsa pinbakiki lepa puu jijiinu tsuve, tsenmalaa iya juntsa ufeenda jumula mutyanutsu.
39 Aarónchi muute dekeꞌ chujtyaa bareree tainsha pumu jali ura linuchi tene juꞌ, naa mishunu pujchinu jali bain ura linuchiren junu tsuve. Tsenmin ajpeendee chuwa bain tyeeba narake tsejtenu juve. 40 Tsenmala Aarónꞌ nalachiya bareree tainsha pumu jali juꞌ, naa ajpeendee chuwa bain, naa mishusha pujchinu jali bain naraa juꞌ, yalanu balengurekaantsumi junu dejuve.
41 Entsanguitaa naa ñuꞌ uñaku Aarónnu bain, naa yaꞌ nalanu bain jali dekeꞌ pandenu juve, tsejtu bene yalaꞌ mishusha muli yuutsuude, tsanguetaa yalanu tsanguenu taawasha kuwaꞌ, chachillaꞌ mitya inu kalen jimu ruku inchin juu detirenu. 42 Tsenmin yaichi tainsha punu wara bain linuchi tene juꞌ, ajpelenu dishdimiren enbubi jingue dishdinuu junu juve. 43 Aarónya yaꞌ nalaba entsa wara puu junu dejuꞌ, naa iba waꞌdinu yapayasha viindu bain, tsa jutyuꞌba, in yapaya chuinsha viꞌ, ufeenda tsureꞌ juꞌkensha kalen jiindu bain puu viviinu detsuve. Tsejtaa naa-uwanuba tsaandene kiikenu detsuve, ujcha laꞌ peyan jutyu. Tsaꞌ mitya entsaa jumulaa naa ya bain, naa yanu seraꞌ jimula bain naa-uwanuba tsa tsanguen chunu detsuve.