Mateo
11 Jesús entsandi depaꞌ, yaꞌ 12 disipululanu titi kenuu juñu bain dewandiꞌ junu maluꞌ miitu, jundaa chumu pebulutala Diosaꞌ mika ura kuinda mijakares nenu jimi.
Juan Mungaamuꞌ era chachilla Jesúsꞌ junga jila.
(Lucas 7.18-35)
2 Tsenñu Juan Mungaamu peesu puturen, Dioschi Miꞌkeꞌ Kayamu naakes neneintsuñuba mijatu, mantsa yaꞌ disipululanu eemi 3 yanu pakeꞌmeenu, naa uwain yaa Livee kemu entsa tusha jainuu jushu juntsañu bain, naa veranaa kayu keenanuu juñu bain mijanu.
4 Tsenñu Jesús pakatu: Miitu Juannu ñulla naake kataꞌ bain, naake mereꞌ bain, tsandi kuinda mandei: 5 naa kapuka putyula bain katamu detiyave, naa uraꞌ netyula bain uraꞌ demandiyave, naa manbityu bishpeechi dilula bain uraꞌ demandiyave, naa pungui merajtula bain meemu detiyave, naa pemula bain demangujve, tsenmin lastemaa chumulanu bain Diosaꞌ mika ura kuinda mijakaandetsuve, tidei. 6 Tsenmin mun iya tsanguiñu kataataakeꞌba in mitya kundaa tyatyu juꞌ bain, juntsaya Dioschi uraꞌ imuve, timi.
7 Juanꞌ disipulula miindetsu, Jesús Juannu laapuꞌ paꞌ chachillanu kuinda ketu tsandimi: ¿Ñulla tiba den chutyuin tenasha jitu ti katanaa dejiyu? ¿Ñañi ishuwachi ballaꞌ juya juyaintsu katanaa dejii? 8 Tsa jutyushu juntsaa, ¿tyee katanu dejiyu? ¿Ma ruku balenchi jali panaanu katanaa dejii? Ñulla mideeve balenchi jali panaalaya reilaꞌ yatalaa chumu deeñu bain. 9 Tsaaya, ¿tyee katanaa dejiyu? ¿Diosaꞌ mitya pamu ma rukunu katanaa dejii? Tsaave, uwain tsa deive, Diosaꞌ mitya pamu rukunu katanaa dejive, tsangues nemu rukuutalaa kayu pullaa jumunu. 10 Juannu laapuꞌ pataa Diosaꞌ Kiikanu entsa pillave: In mitya wainmu rukunu main ñuꞌ ajkesha erentsuyu, tsenmalaa ñu tyeengues nenuuñuba tsanguenu peepuꞌ tsuunutsu,* tiꞌ pillave. 11 Uwaindiyu naaju chachillaba Juan Mungaamunu kayu pullaa dejutyuve, tsaaren Diosnu yalaꞌ rei juu tanamulachiya kayu balejtu ruku juuñuulaa Juannu pulla deeve.
12 Juan Mungaamu jañu peepumin, chaikama, Diosnu rei juu tananu tinbu, apain tsai tiyasa tyaꞌ, mantsa chachilla deranchi tsaa tirenu kenchin judeeve. 13 Matyu Diosaꞌ mitya pamu rukula naajula bain, naa Moisésꞌ wandya lei bain, kayu Juan engu jaindyuya Dios yaꞌ chachillachi rei tiyaꞌ washkeꞌ mandanguenu juñu tinbu naajunuuñuba juntsaatala tene wandinchin juuwa deeve. 14 Iya entsandinmala ñulla tsaave tyanu dejuꞌ bain, naa tsa jutyuve tyanu dejuꞌ bain, ñullaa mijadei: Juanya, Diosaꞌ mitya pamu ruku Elías majainu juushu juntsa ruku juuñuuve. 15 ¡Tsaꞌ mitya mun pungui puꞌba uraꞌ meediꞌ aseetanguidei!
16 ¿Challa chumu chachillanu tibaa laapuꞌ panu juwa? Matyu chaꞌ den neneindala kailla dewaꞌdiꞌ aikendu yaitala entsandi papatimu juuñu deeve: 17 Naa pujkuna depakaañuba, ñulla beela dekityuwa; naa llaki beesa dekiñu bain, ñullaa dewaatyuwa, timu kailla juuñu deeve. 18 Matyu ñullaya Juan Mungaamu jaꞌ nendu Diosnu pensangueꞌ panda fityu junmala, naa binu bain kushtyu junmala, ñullaya: Entsa ruku dyabulu puu rukuve, timu deeve. 19 Tsenmala bene Chachi Tiyaꞌ Nakayamu jamiya, yaa panda fimu juꞌ, naa binu bain kujchimu junmala: Entsa rukuya panda janbeendu, vin ruku, matyu romano uñichi deechuꞌ mitya lushi kamulaba uraꞌ keranu ruku, tsenmin ujcha lan chumu chachillaba bulu nemuve, tiidetive. Tsaaren titi iꞌ pullantsuñuba juntsanu keetaa naa Dios tsamantsa aseetajuꞌ keewara juñuba aseeta imuve, timi Jesús.
Meenguityu chachillanu ajaa timi.
(Lucas 10.13-16)
20 Tsejtu tiba tsamantsaa keꞌ keewara jumula aa dekeꞌ keewaanu pebulutala chumu chachillanu Jesús ajaa tiꞌ pami, yala vetaꞌ pensa mantyuꞌ Diosnu meenguindetyuñu. Tsejtu tsandimi: 21 ¡Corazínnu chumu chachilla bain, Betsaidanu chumu chachilla bain! Ñulla mika taaju iꞌ puinu dejuve. Matyu judío chachi jutyulaꞌ chunu Tiro pebulunu bain, Sidón pebulunu bain tiba tsamantsaa keꞌ keewara jumula dekeꞌ keewaañuya, yalaya kaspelen vetaꞌ pensa mangueꞌ Diosnu demeengueꞌ, llakingueꞌ keewaanu paba jali depanaꞌ, naa juꞌpe juula bain mishusha detsureꞌbanguichu deeve. 22 Tsaaren uwaindiyu, kavitu dekenu malunu Sidónnu chulla bain, naa Tironu chulla bain ñulla naake taaju kenuu dejuñuba tsangue taaju kenu dejutyuve, timi. 23 Tsenmala ñulla Cafarnaúmꞌ chullaya, ¿Selusha eꞌlaraichu deeyu pensa dejuu? Tsa jutyuve, ñullaya pemulaꞌ pupunanu tena aa tujuushaa kevinu detsuve. Matyu Sodomanu chumu chachillanaa, ñullaꞌ ajuusha tiba tsamantsaa jumula dekeꞌ keewaañuya, juntsa pebulu chaiba chuꞌba nachuve. 24 Tsaaren uwaindiyu, kavitu dekenu malunu Sodomaꞌ chullaya ñulla naake taaju kenuu dejuñuba tsangue taaju kenu dejutyuve, timi.
In junga jaꞌ lekadei.
(Lucas 10.21-22)
25 Juntsa malutala Jesús entsandimi: Apa, selusha chumulachi bain, tusha chumulachi bain Bale Ruku, ñu yuj urave, entsa judeeshu juntsala aseetaju chachillanaa tsaa keewaatyumujchi, ne chachillanaa tsaa keewareꞌ mitya. 26 Uwain tsaave Apa, ñuren tsaisa tyañuya tsaive.
27 Ti bain in tyaapanu tene in Apa dekuwakive. Mu bain yaꞌ Nanu uraꞌ kerajdetuve; yaꞌ Aparen uraꞌ keraave. Mu bain yaꞌ Apanu uraꞌ kerajdetuve, yaꞌ Naren uraꞌ keraave, tsenmin naajulanaa yaꞌ Na, yaꞌ Apanu dekeemijasa tyañuba, juntsalan yaꞌ Apanu keemijainuu judeeve. 28 Naajula bain Moisésꞌ wandya lei mashturula naadetiñuba tsa tsanguenu keꞌ tyubaa nemu chachillaya in junga jadei, tsenmala iya ñullanu lekakaanu tsuyu. 29 Tu junlemu wagara naajun mishunu chaꞌli teepuꞌ chachilla miyaꞌ jiñu tu junleꞌ jimushu juntsaañu iꞌ, ñui bain iya ti naaju kisa tyañuba juntsaa keꞌ inchin manda-iimu tiyaidei; tsaiꞌ iya aa ura ruku juñu, tsenmin mika tenbipu ruku juñuba in mityaa juntsai mijadei. Tsejtaa iya naakesa tyañuba tsanguen dechushu juntsaa, ñullaꞌ pensasha tiba jutyu uraꞌ chunu dejuve, 30 matyu iya tyee kiikenu uudengueñuba juntsalaya liꞌpuꞌ jutyuꞌ, uu tsanguenuu dejuñuꞌ mitya, timi.