Mateo

Juan Mungaamu peñu kuinda

(Marcos 6.14-29; Lucas 9.7-9)

14 Tsangues nenu tinbutala Galileasha chumu uñi Herodes, chachilla Jesúsnu laapuꞌ patu naa naadetiñu bain kuinda meemeekemi. 2 Tsejtu yaꞌ chachillanu tsandimi: Chachilla patindetsushu juntsa rukuya Juan Mungaamu peyaishu juntsave, mangujpatu. Tsaꞌ mityaa naa tiba tsamantsaa keꞌ keewara juula bain kenuu juve, timi.

3 Entsa Herodesya Juannu peesu kakareꞌ jeru chuwachi telekeꞌ peesu pumuwaami, yaꞌ naatala Filipoꞌ shinbu Herodíasꞌ mityaren, 4 matyu Juan, Herodesnu entsa entsandimuwaañu: Juntsanu ñuꞌ shinbu juu tanañu urajtuve, tiitimuwaami.

5 Tsenñu Herodes Juannu tuꞌnu tyaturen chachillanu jeetyami, matyu mu bain Juanya Diosaꞌ mitya pamu rukuve tya tyadeiñuꞌ mitya. 6 Tsenñuren Herodesꞌ nakayanu malu manchañu fandangu kendetsuñu, Herodíasꞌ naꞌma junu waꞌnamulaꞌ ajuusha beelanguemi. Tsejtu Herodeschi yuj sundyanuꞌ keñu, sundenganchiren 7 juntsa naꞌmanu ti paꞌñuba Diosnu pakaꞌ tsanguenbera kenu tsuyu tiꞌ ma tsandimuwaami. 8 Tsenñu juntsa naꞌma yaꞌ ama Herodías paviñu, Herodesnu tsandimuwaami: Juan Mungaamuꞌ mishpukaa palatunu puu tajaꞌ inu enu kuwaka, timuwaami.

9 Tsenñu rei Herodes mika llakindyami, tsejturen tsanguenbera kenu tsuyu tiꞌ, tsanguityushu juntsaa yanu Dios taaju puitesa tiꞌ ma patiꞌ mityaa, tsenmin junu pumu chachillaꞌ ajuusharen ma tsandiꞌ mitya, naati paꞌñuba tsanguikaamuwaami. 10 Tsejtu peesusha Juanꞌ mishpuka daakakaanu uudenguemuwaami. 11 Tsangueꞌ juntsa mishpuka palatunu puuya detajaꞌ, juntsa naꞌmanu kuwañu, yaꞌ amanu kuwami.

12 Tsenñu Juanꞌ disipulula dejiꞌ, yaꞌ ujkun bulu kaꞌ demenjitu, bene Jesúsnu wainjila.

5.000 pullaa chachillanu Jesús panda fikaami.

(Marcos 6.30-44; Lucas 9.10-17; Juan 6.1-15)

13 Tsaa kuinda mijatu, Jesús baakunu viꞌ junu luꞌ jiimi, muba den netyuinsha maali punu. Tsenñun chachilla demijatu, yai bain yalaꞌ pebulutala deluꞌ jiꞌ tutu surekila. 14 Tsenñu Jesús yaꞌ jinu baakusha puꞌ tusha lutu, chachilla tsamantsadena katatu yuj tenbityami. Tsejtu juntsa kejtsapala dilu pumulanuya uraꞌ demandirekemi. 15 Tsenñu yumaa dekependuꞌ kantsuñu, yaꞌ disipulula Jesúsꞌ keesha jitu tsandila: Yumaa ma dekependuꞌ kakentsuve; entsa tenashaa muba den neiꞌnu tenave. Tsaꞌ mitya chachillanu deme-eenu kide, kaa pebulutalaaba dejiꞌ tyeeba atiꞌkaꞌ finudetsu, tila. 16 Tsa detiñun Jesús entsandimi: Tiꞌ mityaba yala miinu dejutyuve; ñullaa yalanu panda kuwadei, timi.

17 Tsenñu yala pakatu: ¡Enuya lala pan, ka manda taꞌ, allaya pallu tadenayu! tila.

18 Tsenñu Jesús tsandimi: Tsaaya, engu inu tajaꞌ kuwakai, timi.

19 Tsejtu chachillanu ishtapetala dechungaakaatu, bene yaꞌ tyaapachi man pan bain, pai alla bain kaketu, kaiꞌsha keꞌlaadiꞌ, Diosnu yuj urave titu, pan dedaakaꞌ, yaꞌ disipululanu kuwañu, yalaa junu pumu chachillanu veela. 20 Tsenñu kumuinchi chachilla panda tyubanbera defiñu laramu mandeꞌkakitun, 12 kubi jungue mandeꞌkala. 21 Panda fimula unbee rukulan juuren 5.000 chachi ma fikeñunguila, naa supulanu bain, naa kaillanu bain mikajturen.

Jesús pi jandala nemi.

(Marcos 6.45-52; Juan 6.16-21)

22 Tsanguemin Jesús yaꞌ disipulula bejkusha ajkeꞌ demandyakasa tyatu, baakusha jeke deme-eepuꞌ me-eemi. Tsaindetsuren yaa junu waꞌnamu chachillanu deme-eren pumi. 23 Jesús tsangueꞌ chachillanu deme-eetu, kuyisha lumi maalindala Diosba kuinda kenu. Tsejtu ya junga maali puren kepemi. 24 Tsejtu yaa tsananmala, yaꞌ disipululaꞌ miinu baakuya yumaa aa pusu pi kejtala lui miintsumi, tsejtu ishuwa yalanu masmiꞌ juyikentsuñuꞌ mitya pisundachi banvillasai miintsula. 25 Dechanusha kayu dedanguenu jutyunu uwanu Jesús pi jandalaren yalaꞌ junga miintsumi. 26 Tsenñu yaꞌ disipulula pinu ma neintsu dekata-eetu, wapanaꞌ dejeetyaꞌ uiꞌtu, ¡Ujmu jee! tiitila.

27 Tsa detiñu Jesús jeti entsandimi: Puluke pensanguidei; iyaa tsaintsuyu. Jeetyatyudei, timi. 28 Tsenñu Pedro pakatu: Bale Ruku, uwain ñutuya, inuba ñuꞌ junga pi jandala mikaka, timi.

29 Tsenñu Jesús: Tsaaya jade, timi.

Tsandiñu Pedro baakunu pajtyaꞌ pi jandala Jesúsꞌ junga jintsumi. 30 Tsaaren ishuwa daran juyintsuñuba mijaimiren jeetyaimi, tsenmin tsaa chukanu kikentsumin entsandi wapan pami: ¡Bale Ruku, inu laꞌkaka! timi.

31 Tsandinmalan Jesús, Pedroꞌ tyaapanu jeke kami, tsejtu tsandimi: ¡Uraꞌ keranguityu unbere! ¿Nenñaa uwain tsaañanga tyatu iyu? timi. 32 Tsejtu yala baakusha demavinmalaren ishuwa mandyaimi. 33 Tsenñu baakusha pumula Jesúsꞌ ajuusha teledenajiꞌ, aawa kureꞌ keewaatu tsandila: Uwain ñuya Diosaꞌ Nave, tila.

Genesaretsha dilu chumulanu Jesús uraꞌ mandiremi.

(Marcos 6.53-56)

34 Tsejtu juntsa aa pusunu detyakaꞌ Genesaret tusha jila. 35 Tsenñu junu chumu chachilla naa Jesúsñuba dekeengala, tsejtu nuka tenasha bain juntsa kuinda demijatu, naaju dilulanu bain Jesúsꞌ junga taji tajiila. 36 Tsejtu jayuya ka naa jai kapanuuñuba taꞌkakutide tiꞌ uꞌta uꞌtandila. Tsanditu naajula bain taꞌkamulaya uraꞌ mandiya mandiyaila.