1 Corintios
Cristo peyaturen mangujtave.
15 Keranguemu naatalala, ñullanu Diosaꞌ mika ura kuinda kikimaashu juntsa mandengaapunu tenve, matyu i tsandiñu demeenguitu chaikama juntsanun kerangues jiindetsushu juntsa kuindanu. 2 Tsenmin juntsa mika ura kuindaꞌ mityaa ñulla livee inu detsuve, ñullaren i kaspele naake mijakaamuñuba tsangue keengues jinduya, tsaaren tsangue keengues jindyutuya, keenguiꞌñuba ne uraataa tsaanu dejuve.
3 Matyu tiꞌ mityaba ñullanu mijakaamiya inu tyee mijakaañu mijaꞌba, juntsaa ñullanu bain demijakaayu: Cristo lalaꞌ ujchaꞌ mitya peyave, Diosaꞌ Kiikanu naaju pillañuba tsaitu. 4 Tsenmin Diosaꞌ Kiikanu naatiñuba tsaitu, tuteꞌ ujkun tujuusha depuñuren pen malu insha mangujtave. 5 Tsejtu Pedronu mangatawatu, bene Jesúsꞌ mitya kuinda kenu laraꞌ eramu ruku 12 tikayamulanu bain mangatawave. 6 Tsejtu bene keranguemu chachillanu ma bijeenuren 500 ma pullaalanu mangatawave. Junu katamu chachilla mantsala yumaa depeyave, tsaaren tsaiñu katamula entsa piikenu uwanu peyaiꞌmujchi chumulaa kayu aa dejuve. 7 Tsejtu benee Santiagonu mangatawaꞌ, kayu bene vejan yaꞌ mitya kuinda kenu laraꞌ eramu rukulanu mangatawamuwaave.
8 Tsejtu pullaꞌbi inu bain katawave, naamika mantsala Jesúsꞌ mitya kuinda kenu laraꞌ eramula ajkeꞌ kerawa deeñuba, iyaa benee keemijamuwa juꞌ, kayu kayanu tinbu jutyunuren nakayan tsaimu juꞌba. 9 Matyu iyaa Jesúsꞌ mitya kuinda kenu laraꞌ eramu rukuutala kayu juñu jutyuu juyu, tsenmin naa Jesúsꞌ mitya kuinda kenu laraꞌ eramu rukuve tikayanu bain ma jutyuuyu, Jesúsꞌ mityaren Diosnu keranguemu chachillanu kaspele iyaa naꞌbaasa kes nemuwaꞌ mitya. 10 Tsaaren Diosya mika ura juꞌ inu tsanguikaañuya, iya challa tyee juꞌba juntsaa juyu, tsenmin Dios inu mika ura juꞌ tsanguitu nebaade tsangueꞌ ne pullaaya indyuve, tsa jutyuꞌ kayu iyaa vejan Jesúsꞌ mitya kuinda kenu laraꞌ eramu rukulanu pullake aa kentsuyu, naamika Diosya tsamantsa ura juꞌ inu kivetentsuñu iyaa tsanguindyu juꞌ bain. 11 Tsaaren iyaa tsangues nentsu bain, naa yalaa tsangues nendetsu bain, juntsaya ne juuve, balemiya kumuinchi lala tyee demijakaañuba juntsaa baleve, matyu ñulla mereꞌ keenguidekishu juntsa kuinda.
Laa bain peyaꞌ mangujtanu detsuyu.
12 Tsaaren lala Diosaꞌ kuinda kes netu Cristo peyaturen mangujtave tis nendetsaashuba, ¿nejtaa mantsa ñullaya, pemulaa mangujtyu deeve tiitijdetiyu? 13 Matyu peyamula mangujtyu deeshu juntsaa, naa Cristo bain mangujtaindyuve. 14 Tsejtu uwain Cristo peyatu mangujtaindyaaba jushu juntsaa, lala Diosaꞌ kuinda kes nendetsaashu juntsa tsandis neiꞌñuba ne uraanu juve, tsenmin ñullaꞌ keenguikendetsushu juntsa bain keranguiꞌñuba ne uraanu juve. 15 Tsaaren uwain tsaaba jushu juntsaa, laa bain Diosaꞌ mitya pamu deeyu tiꞌ anbutis nemu junu detsuyu, naamika Dios Cristonu mangujtendyuren, lala uwain Cristonu mangujteve tiitis neneinduya. 16 Matyu pemula uwain mangujtatyu deeshu juntsaa, naa Cristo bain mangujtaindyuñuve. 17 Ne tsajuꞌ Cristo mangujtaindyaaba jushu juntsaa, ñulla keenguiꞌñuba uraanun keenguintsunu dejuve, tsenmin ñullaꞌ ujcha bain manbitsalajtunu juve. 18 Tsenmin tsaashu juntsaa, Cristonu keenguen chuturen yumaa peyamu chachilla bain juntsa-iꞌ peyatu livee indyunu dejuve. 19 Matyu lala peyaiꞌmujchi chuturen Cristochi uraꞌ in chunu jukeyaave pensa dejuñuya, naa veelanuya tenbityaꞌ keetyuu dejuꞌ bain, lalaya uwain tenbityaꞌ kerainuu dejuyu.
20 Tsaaren tsa jutyuve, Cristoya ura uwain peyaturen mangujtave. Ne pukaaba juꞌ yaa ajkeꞌ puꞌ imu jun tsaave, matyu yaa peyaturen ajkeꞌ mangujtatu, vejan peyamula bain mangujtanu detsuve tiꞌ keewarave. 21 Naa-imuwa junga ma rukuꞌ mityaren entsa tunu kumuinchi depeyanuu jushu, tsaren juꞌ ma rukuꞌ mityaren kumuinchi peyamula mangujnuu dejuve. 22 Naajunga lala kumuinchi Adánnu seramulaya peyanuu tene jukeeshu, Cristoꞌ mityaya naajulaba mangujtanuu tene jukeeve. 23 Tsaaren naa mangujtanu dejuꞌ bain, bene mangujnu ura janmalaa, main main mangujnu detsuve; matyu Cristoya ajkeꞌ mangujtave, bene Cristo engu maanmala umaa yanu keenguemulaa mangujnu detsuve. 24 Tsenmala Cristo naa firuꞌ pudeelanu bain, naa bale jumulanu bain, naa pudelanu bain tsaa balejtu detirekeꞌ, yaꞌ uudenguen chunu chachillanu yaꞌ Apa Diosnu demanbuitenmala, umaa entsa tusha tiba de-iꞌ dyanu detsuve, 25 matyu Cristoya uudenguen chunuu juve kumuinchi kundaalanu debengaꞌ tyuliꞌ yaꞌ teetanainsha detsurenbera. 26 Tsenmala umaa tiꞌ mityaba de-insha kundaa bengaꞌ tyullamiya tuꞌmu pudeeya bengaꞌ tyullanu tsuve, 27 matyu Diosya ti bain Cristochi tene uuden in chunuu detirekiñuꞌ mitya.* Tsejtu Diosaꞌ Kiikanu ti bain Cristochi tene uuden in chunuu dejuve titu, Dios bain tsaren inu tsuve titundindyuve, matyu yaa tsangueꞌ tiba Cristochi tene uuden in chunuu detiremuꞌ mitya. 28 Tsejtu ti bain Cristochi tene uuden juu detiyanmala, umaa yaꞌ na Cristoren, Diosaꞌ uudenchin juu chunu tsuve, Diosya tsangueꞌ tiba yachi tene uuden in chunuu detiremuñuꞌ mitya. Tsenmalaa umaa naa tinu bain Diosren uudengueꞌ washkemu juunu tsuve.
29 Tsa juiꞌñuya, mantsa pemulaꞌ mitya mungaakutimula, ¿tiꞌ mityaa tsanguichu deenga? Tsejtu pemula mangujtyu deeshu juntsaya, ¿tiꞌ mityaa yala tsangueꞌ mungaakutinuj den? 30 ¿Tsenmala naa laa bain tiꞌ mityaa malumere pureꞌ taaju kiikendu, matyu peyainuuba faañuya peyainuu kiikendu dekiwa, peyatu mangujtan jutyu jushu juntsaa? 31 Matyu iya malumere uu penuiꞌ pulla pullaintsuyu. Anbutindyuyu uwain tsaave, matyu ñullaꞌ mitya Bale Ruku Jesucristonu keenguemu deeñu sundenguee titu anbutindyaashu, matyu entsa bain tsaave, anbutindyuyu. 32 Tsejtu iya Éfesosha firu animaa juuñuulaba vinguikeñunguetu, ne chachilla naakemu deeñuba ne tsanguetuya, ¿tyee juntsan mitya kakenuu junujtuuwa, uwain pemula mangujtan jutyu deeshu juntsaa? Tsa juꞌba juñuya, mantsala naatimu deeñuba juntsaaya kisai: Panda fidaa, kushdaa, ayu pekeenu juve,* timu deeve.
33 Keranguemu naatalala, veelachi anbutikayatyudei. Naatimu deeñu bain uwain tsaave: “Ñu urajtu chachillaba den bulu nemushu juntsaa, naa ura chachi juꞌ bain, urajtu tiyanu tsuve.” 34 Tsaꞌ mitya ñuiba uraꞌ pensa mandei; ujcha malatyudei. Matyu mantsa ñulla Diosnu uraꞌ keemijtu bain dejuve. Ñullanu entsanditu uraꞌ dejuiꞌñu tsa deeve tiꞌ yujpewaanaandiyu tsandimi.
Pemula mangujtu naaju bulu juunu deeñuba
35 Mantsa entsangue pakeꞌmeraꞌbanguenu dejuve: ¿Nejtaa pemulaba mangujchu deenga? ¿Mangujtatu naaju bulu juuya juchudeenga? tiꞌbandinu dejuve. 36 ¡Nejdeeyu jaiba pensangueꞌ keenu mijtula! Asu tyeeba wajkendu ñi tsuuñu juntsa ñiren aawaꞌ laityuve. Juntsa ñinuya wajtunun ma kuya shuꞌkeꞌ awanmala vejanlaya depeteꞌ piyamuve. 37 Matyu ajkeꞌ wajkenduren juntsa awamu kuya wajkatyuwaave, ñi jumaa wajkamuve naa trigu wajkikendu bain, naa vee buikiya wajkikendu bain. 38 Tsenñu Diosya bene naa naake awakaandyaꞌba tsa tsanguemuve, tsenmin vee ñimeemee naa naaju kuya awakaandyaꞌba tsanguemuve. 39 Tsaren juve naa ti bulunu pensanguiñu bain. Naajulaba pareju dejutyuve: naa chaꞌ bulu bain veraꞌ ju, naa animaa bulu bain veraꞌ ju, naa pishku bulu bain veraꞌ ju, naa alla bulu bain veraꞌ juve. 40 Tsenmin tsaren naa kaiꞌsha kataamu bulu bain, naa entsa tusha kataamu bulu bain vee vee dejuve. Tsaaren kaiꞌsha naraa kataamu buluya veraꞌ juve, tsenmala tusha naraa kataamu bulu bain veraꞌ juve. 41 Naa pajta bain veraꞌ piꞌkemuve, naa kepe pajta bain veraꞌ piꞌkemuve, naa makara bain veraꞌ piꞌkemuve; tsenmin makaraatala bain main main vee vee piꞌkemu deeve.
42 Tsaren junu tsuve naa pemu mangujmula bain, matyu menamuya mushamuve, tsaaren menamuren mangujmuya mushatyunu tsuve. 43 Peyaiꞌmujchi chumu buluya mafiruinuu juve, tsaaren menaturen mangujmuya tsamantsa naraanu tsuve. Matyu peyaiꞌmujchi chumu buluya ti deraba jutyuve, tsaaren menaturen mangujmuya tsamantsa dera junu tsuve. 44 Peyaiꞌmujchi chumu buluya ne chaꞌ bulu juuve, tsaaren menaꞌ mangujmuya selusha chumu bulu juuya mangujnu tsuve. Tsaꞌ mitya naa ura ne chaꞌ bulu bain, naa selusha chumu bulu bain juve. 45 Matyu Diosaꞌ Kiikanu entsa pillave: Ajkeꞌ unbere Adánya ajkeꞌ iꞌ chumu tiyave,* tsaaren Cristo, de-insha faamu Adán kuramuya, chuwaamu espiritu tiyave. 46 Tsajuꞌ mitya espirituchi faamu juuya ajkeꞌ jutyuve, chachilla naadejuñuba tsaa jumaa ajkeꞌ juve, matyu benee espirituchi faamu ive. 47 Ajkeꞌ jumu rukunuya yaꞌ bulu tuchee keñu juꞌ, entsa tusha naana chumu deeñuba juntsana chumu juve, tsaaren bene jamu rukuya selusha naaju chumu deeñuba juntsaa chumu juve. 48 Entsa tusha chumulaya tuchi keñu ruku naaju bulu tañuba juntsaaren dejuve, tsenmala kaiꞌsha chumulaya kaiꞌsha jamu ruku naaju bulu tañuba yai bain juntsaaren tadeeve. 49 Tsaꞌ mitya naadejuꞌ tuchi keñu ruku naajuñuba juntsa kera deewashu, tsaren juꞌ selusha jumu ruku naajuñu bain juntsa keraanu detsuyu.*
50 Keranguemu naatalala, ñullanu entsandimiya, lala chachilla naadejuꞌba juntsajuꞌ, alla pujuꞌ bain, ne asa pujuꞌ bain, tsaalaya Dios rei juꞌ chuinsha jinuu dejutyuve, tsandityuꞌ bain, ne tiba mushaimu juuya tiba mushatyuinsha jinu dejutyuve titundiyu. 51 Tsaaren ñullanu Dioschi munuba wandyajtu kuinda mijakaanu tenve: kumuinchi depeyainu dejutyuyu, tsaaren kumuinchi veraꞌ juu mandiyanu detsuyu, 52 maratu kapuka washkeꞌ machainguebanguindyuren de-ive tiꞌ keewara tyujtyu depakareꞌ dyanmalan tsainu detsuyu. Matyu de-ive tiꞌ keewara tyujtyu uiꞌkanmalan, kumuinchi peyamula manbeyan jutyu mangujtanu detsuve, tsenmala laa bain veraꞌ juu mandinu detsuyu. 53 Tsejtu lalaꞌ bulu mushainuu jumuya mushatyu buluba mavetainuuya juve, tsa jutyuꞌ bain, lalaꞌ bulu peyainuu jumuya peyan jutyu buluba mavetainuuya juve. 54 Tsenmalaa, Diosaꞌ Kiikanu naatimuwaañu bain umaa tsaa iꞌ puitaa tsainu juve, matyu Diosaꞌ Kiikanun entsa pillave:
Peyawaanuu jumuya de-iꞌ piyave, pemula demangujñuꞌ mitya.*
55 ¿Tyee ketaa peyawaanuu jumuya lalanu tuteꞌ puinuu jun?
¿Naa ketaa peyawaanuu jumuya lalanu kityawaanu jun?* tive.
56 Tiba ujcha bain peyawaanu tiremuve, tsenmin tsaa jumiya Moisésꞌ wandya leiꞌ mityaa uwain ujcha juñuba keewaraꞌ peyanuu tirekaamuve. 57 Tsaanuren, Diosya yuj uraꞌ keꞌ, lalaꞌ Bale Ruku Jesucristoꞌ mityaren lalanu tinuba puikareꞌ jijiintsuve. 58 Tsaꞌ mitya estennu keranguemu naatalala, naa-uwanuba keenguindanda kiꞌmujchi tsaa tsanaꞌ Bale Rukuꞌ taawashanu malumere tsangues jijiintsudei, matyu ñulla mideeve naa Bale Rukuba bulu juꞌ taawasha kiikendetsushu juntsaa, juntsan mitya tyeeba kanu dejuꞌ bain.